Read West Ambae 2 PITA 1 Bible Online

2 PITA 1 - West Ambae bible

2 PITA 1

¹I nau i Saemon Pita, a tangaloi boloki vunu vake a kaihora* kokona noi Jisas Kraes*, nu uli na leta hika lakwakamu hinea tulu lavi na hauhuriana hinea u karea haburu hokinia i kami kemo lavia. Tulu lavi na hauhuriana hi lalahi na bakotoana na noda Kaivakahi i Jisas Kraes a noda God.

²A tangaroa karea hika lakwakamu. I God ne hago maikamu vakevake kina nona domi tabetabe lakua, ne bete na magemuana ne eno maikamu tigwaravu huri tulu kikilai i God mai Jisas a noda Hugwe*.

³I God u bete vataha na kinau lo nona huirana lakwakita, hinea u taritarisa kwara tana lai, kwara vae tana toka ne taritarisa lo nakona. Tau lavi na kinau aira vano hi huri tau kikilai i Jisas Kraes* hinea mo kwarekita kwara tana bulu maia lo nona karekarea na taetae tana bakoto hokinia. [1]

⁴Lo hala hokinia hi i God u tuliki na kinau rau lalakua lakwakita hinea rau karea haburu kareaki. Vae diko tulu ne lavi na kinau aira vano hi tulu ne kwalao lai tina doridori hati lo varamana hika hinea u tuku magaraki na domidomi na tangaloi, vae tulu ne bulu mai God lo nona bohiana ngwasara.

⁵Vae huri na kinau hi vohoki tulu huira kwara tulu ne bului na nomiu hauhuriana kina bohiana karea, vunu tulu ne bului na nomiu bohiana karea kina kikikila.

⁶A nomiu kikikila tulu ne buluia kina doridori hinea tulu kwiribibikamu tina nomiu lengalengaiana sibomiu, vunu a doridori hi tulu ne buluia kina domi madi hinea tulu tu madi lo nomiu boloki tulu he tiraki tea. A domi madi hi tulu ne buluia kina doridori karea hinea u taritarisa lo nako i God.

⁷Vunu a nomiu doridori karea hinea u taritarisa lo nako i God tulu ne buluia kina lagwaana huri rabelamiu lui Kraes, vunu a lagwaana huri rabelamiu lui Kraes tulu ne buluia kina lagwaana huri na tangaloi savia.

⁸Diko a bohiana aira vano hi rau eno lo mamaurianamiu rau tuku mauri, ranari vaikamu tulu ne huira lo nomiu bolokiana, vae a kwaiki aia hi, tulu ne kikilai vakevake i Jisas Kraes a noda Hugwe*.

⁹Vae ihe te hinea a bohiana vano hi rau tikei lo mamaurianana aia hokinia a matana u hati, u taga he vakahao tea, a lolona bongi kwara a nona hatiana tomua, i God u kwasukira letiu ba.

¹⁰Rabela. I God u mataikamu, u kwarekamu kwara tulu ne kwareki a bulana tangaloi. Vae huri hi tulu ne huira vakevake kwara a kwai na doridorina vano hi ne eia tigwaravu lo mamaurianamiu. Diko tulu ne vai luna hokinia hi tulu nehe sovi lai te vohoki.

¹¹Lo hala hi i God ne vaikamu tulu ne taritarisa vohoki kwara tulu ne soro tilolo Vanua Karagwa hinea u eno vaki tuai, hinea i Jisas Kraes a noda Hugwe a noda Kaivakahi u hugwe koroa.

¹²Kareaki tulu kikilai savi na kinau vano hi ba, vunu vake tulu tu madi lo vitikareaki hinea tulu lavia ba. Vae venaha, tigwaravu nu tuku viti na leo vano hi taliku kwara na vakagwaro na domimiu.

¹³Lo nogu tokaana hike lo varamana aia hokinia kwara a tarabehigu a ingwa haleki vohoki hinea nu hugu luna. Vae nu kikilai kareaki kwara nehe tuai tea vae na mate hokinia kwara na vano tina ingwa haleki hi, ne taritarisa hokinia hi a noda Hugwe i Jisas Kraes mo viti terekakinia lakweau tuai. I nau nu domi u taritarisa lakweau kwara lo taro hika nu hugu lo ingwa haleki hi, na vakaradakamu tigwaravu kina leo vano hi kwara tulu ne domidomi-bibira.

¹⁵Vae na vai rarai na hala huri kwara vae tulu ne domidomi-bibi na kinau vano hikani tigwaravu takuni tina kagu mateana.

¹⁶Lolona kemo viti lakwakamu huri na huirana na mulemaiana noi Jisas Kraes* a noda Hugwe*, kehe domi te lo vevehuri vohoki hinea a tangaloi ramo domikinira. Vae keu tagaia kareaki kina matamai kwara a nona huirana u lakua haburu.

¹⁷Kwahaia hi i God a Tamaki mo tabe hakekinia mo vai na hahaviada mo kwaka dalia, i kami kaitolu takwa-hi. Kemo rongo na dilao mo kwaha maia u vanamai tina hahaviada lakua, u viti kwara, “I Natugu a Natu Tabe aia hika, u havutiau haburu kinia.”

¹⁸Lolona kemo hugu maia lo vuti kokona i kami keu rongo na dilao hi mo tatangi tina taetae.

¹⁹A kinau vano hi rau vaikami kemo kikilai vakevake kwara a leo na tangaloi* duruduruki maira u kareaki. Vae u karea kwara tulu ne rongohuria ne karea, huri aia hoki na laeti hinea mo kwaka lolo dodoki, vae tarisaki a Rani ne kini, a vavarama na ngwasoe na sirovobongi ne kwaka lolo domimiu.

²⁰Vae hivoulu lo kinau aira hi savia, tulu domidomi-bibi kwara hete tangaloi kwara aia sibona, vae ne matangwasaraki lavi na domiana na leo nona tangaloi duruduruki hinea lo Uliuli* Kokona.

²¹A leo nona tangaloi duruduruki hete kwara u vanamai tina domi na tangaloi vohoki. Vae lolona a tangaloi duruduruki ramo viti na leo, aia a Tanungwe Kokona u lalahira, ramo duruki na leo hinea u vanamai ti God.