Read West Ambae 2 PITA 2 Bible Online

2 PITA 2 - West Ambae bible

2 PITA 2

¹Tuai lolona a tangaloi* duruduruki ramo duruki na leo ti God, vae a tangaloi duruduruki kurakura vake ramo tu vaki na ngwasara vaki mana tangaloi. Vae lo hala hokinia hi a tangaloi huhui kurakura rana tu vaki na ngwasara vaki maikamu vake. Rana soro mana huhuiana kurakura kwara ne magarakikamu, rana tu dori kina noda Hugwe*, aia hi u volitukuhira ba. Vae aira rana lavi na magarakiana tiluga siboga heheriki vohoki.

²Vunu a tangaloi rusa rana huri na doridori hati hinea a tangaloi huhui vano hi rau tuku vai. Vae huri ramo vai kwehi, a tangaloi rana toko kwaha bulakiki na Hala na Vitikareaki.

³A tangaloi huhui kurakura vano hini rau lengai na mane* haburu, vae huri hi rana toko lai nomiu mane tikamu kina noga leo kurakura. Vae i God hinea ne arekinira u hugu rarai tuai ba hurira. Aia he maturu tea vae u hugu tara kwara ne magarakinira.

⁴Tulu kikilai kwara tuai lolona a kaihora tina taetae tuaki ramo vai na vaivai hati, i God he kakalokinira tea, vae u vohokinira tilolo tanotano na kakadiana. Lo vanua hi mo gwarubibira kina seni, rau hugu lolo dodoki tara na Rani na Arekiana. [2]

⁵Vake i God he kakaloki na tangaloi maira tea tuai lo taro i Noa hinea mo toko heretuvaki na hala na bakotoana. U vakahiki Noa mana tangaloi kaibitu vake, vae u vai na kwai mo hake mo huki letiuki na tangaloi ratuaki hinea rahe rongohuria tea.

⁶I God u viti kwara ne magaraki na gwatuivanua lalakua Sotom maia Gomora, vae u hura letiukirarua kina kabu. U vai kwehi kwara ne vosangi lakwa na tangaloi savia a havakinau hinea ne vai lakwa na tangaloi hinea rahe rongohuria tea.

⁷Vae u vakahiki i Lot, aia a tangaloi karea hinea u rongo hati haburu kina tangaloi aira vano hini rau tuku vai doridori hati, rau galo lo tangwata.

⁸A tangaloi bakoto hi u hugu lo livukaga mo toko tagaira mo rongora vataha na rani lo kinau aira vano hi, vae a domina u kao kina doridoriga hinea rahe karea tea.

⁹Vae hokinia hi a noda Hugwe u vai lai kwara ne vakahiki na tangaloi bakoto tina sinasina hati hinea ramo toko vaira. Vunu u vai lai kwara ne kwiribibi na tangaloi doridori hati rana hugu lolo ingwa na gwarugwaru rovonaki lo Rani na Arekiana. [3]

¹⁰Vunu vake silesiletira hi, aira hinea rau huri na domidomi hati hinea u vaira ramo hogora haburu lo nako i God, ramo toko vai a havakinau a tarabehiga rau lengaia, rau domi bulakiki God mana nona huirana, vae rana hugu lolo ingwa na gwarugwaru hi. A tangaloi huhui kurakura vano hi a gwatuga rau madi haburu, rau vai kinau lo noga domidomi siboga. Rahe domi mavaki na tangaloi na taetae te vohoki, vae rau tuku kwaha bulabula vovohira.

¹¹A kaihora lolo taetae rau lalakua sileti na tangaloi huhui kurakura vano hi, vake rau hago huirana siletira, vae aira rahe vitiviti huri na tangaloi huhui kurakura te koro na nako i God, vake rahe kwaha bulakikinira tea.

¹²Vae a tangaloi aira vano hi a domidomiga tikei, rau bohibohi hoki na boboroa ovi hinea rau vai a havakinau rau rongo lo tarabehiga, rau vora vanamai huri kwara vae a boboroa dolua vake ne kwalibibira ne ua matemateira. A tangaloi huhui kurakura vano hi aira hokinira. Rau kwaha bulabula vovohi na kinau savia hinea rahe rongo utuhakinira tea. Vae a magarakiana ne kihira hoki na boboroa ovi vano hi.

¹³A kaimalaiga ranari hagwea aia hi a rongoana hati, huri aira rau tuku vai na tangaloi tuaki rau hagwe na rongoana hati. Rau vai a kanikani hati lolo rani, rau lagwa vohoki. Rau tuku vai na maemaeana lakwakamu, rau tuku magarakikamu. Lolona hi ramo bulu maikamu lo nomiu kanikani, vae rau lagwa kwara rana sinakamu lo doridori rahe karea tea.

¹⁴Tigwaravu rau lengai na kinau katukwale vohoki, kwara rana balu vavine. Rau lengaia kwara rana vai a doridori hati tigwaravu. Rau tuku sina na tangaloi hinea rahe huira tea, kwara rana vai na hatiki. A domiga rau huhui na hala na bohiana ba hinea rau lengahuri na kinau nona tangaloi dolua. Vae i God u viti ba kwara vae rana sala.

¹⁵Rau tiraki na hala bakoto, rau vano vakasile. Rau huri na hala hinea a tangaloi* duruduruki tuai i Balam i natu i Beo mo huria, aia hi mo lengai na mane haburu hinea kwara vae ne lai huri na kinau ne vai hinea rahe bakoto tea.

¹⁶I God mo kwaha lalahi na dogi bulai Balam, mo kwaha suri Balam huri na nona hatiana. A dogi hi mo kwaha hoki na tangaloi mo tu koro na domidomi noi Balam hinea u reraka.

¹⁷A tangaloi huhui kurakura vano hi, aira hoki na kwai mauri vae u gweka ba, vake aira hoki na taenalangi hinea lolo langiua a langi u hereira u kwalira rava tikei. Vae i God u matai na tanotano hurira lolo dodo maeto vohoki.

¹⁸Rau kwaha kwetukwetutu, rau viti na leo rahe huri na halaki tea, kwara vae rana rakati na domidomi hinea rau hati hinea a tarabehi u lengaia. Lo hala hi, rana sina lavi na tangaloi hinea ramori bohi hi nga, ramo tiraki na tangaloi hinea rau toka lo hatiki radu nga, vae rana mule vaki lo hatiki taliku.

¹⁹A tangaloi kurakura vano hi rau tuliki lakwa na tangaloi vano hi kwara, “Tulu ne vai lai a havakinau hinea tulu lengaia, a kinau he gwarubibikamu tea.” Vae a tangaloi kurakura vano hi a doridoriga u gwarubibira, u hugwe korora vae ne magarakinira. Diko te doridori hati ne gui na tangaloi, vae a doridori hati hi ne gwarubibia kareaki, ne hugwe koroa.

²⁰Te tangaloi hinea u kikilai a noda Hugwe* i Jisas Kraes*, a noda Kaivakahi, vae huri hi u kwalao tina doridori hati na varamana hinea ramo gwarubibia ramo hugwe koroa tomua, aia u toka u karea. Vae vaki takuni, diko a tangaloi hi ne mule taliku, a doridori hati na varamana rana gwarubibia taliku vae rana hugwe koroa, vae a hatiki hinea ne kihia vaki takuni hi ne siletia hinea tomua.

²¹Diko te tangaloi hokinia hi he kikilai na hala na bakotoana te vohoki, hi u hati. Vae diko u kikilai na hala hi, vunu mote maraka mo halebohi taliku, mo tiraki na leo kokona hinea i God mo tau terekakinia, hi u hati siletia hi tomua.

²²A doridori na tangaloi hokinia hi u vosangi kwara a vitisea hi kairua tuai raru viti kareaki hinea raru mo viti kwara, “A kwiriu u mule huri na luana mo kania taliku,” vunu “A dura u ngwada mo rovo, vunu mote mule mo taletalele lolo kekwa taliku.”