Read West Ambae 2 PITA 3 Bible Online

2 PITA 3 - West Ambae bible

2 PITA 3

¹Rabelagu. Hikani a leta kairuaki nu ulia lakwakamu. Lolo leta kairua hini, nu vai kwara na vakarada na domimiu kwara vae tulu ne domidomi-bibi na kinau aira vano hi, vae tulu ne domidomi lo kinau hinea rau bakoto.

²Nu lengaikamu kwara tulu ne domidomi-bibi na leo vano hini a tangaloi* duruduruki kokona ramo toko viti hurira tuai karakara, vake a leo hinea a Hugwe* a noda Kaivakahi mo tau terekakinira, hinea i kami a nomiu kaihora* kokona keu vitira lakwakamu.

³Hika a kinau haburu kwara tulu ne kikilai. Lo taro hika ki rovonaki, vae a tangaloi tuaki rana maravuti hinea a lengalengahuri na tarabehi u hugwe korora, u kwiribibira, vae rana toko mana tiehikamu.

⁴Rana uduhuri kwara, “?Kworohokinia hika? ?U tuliki u viti kwara ne mulemai, vae aia ave? I ratubuda rau matemate vunu ba. Lolona i God mo tau na varamana vaki na hika, vae a kinau savia rau eno kwehi radu nga, rahe bohi tea.”

⁵Rau tuku kwaha kwehi huri rau domi bulakiki na kareaki hinea kwara tuai i God mo kwaha, vae kina leona mo tau na taetae mana varamana. Vunu vake i God mo vai na varamana mo maraka tina kwai, vunu mo kihi na varamana hi kina kwai.

⁶Vae vaki takuni, kina kwai huki, i God mo magaraki na varamana hi tuai.

⁷Vae a taetae mana varamana hika hinea raru tu radu, i God u kwiribibirarua kina leona aia hi kwara vae lo taroki neri magarakirarua kina kabu. U kwiribibirarua vaki lo rani hini vae ne areki na tangaloi hinea rau domi bulakikinia, vae ne magarakinira.

⁸Rabelagu. A lolomiu ne hatu bongi kina kinau hika. A hukao tari diko a rani katukwale vohoki, vae lo nako na noda Hugwe raru he dolua tea, i rarua raru taritarisa

⁹A tangaloi tuaki rau domi kwara a noda Hugwe u vaivai ta tuai haburu hinea he kwiribibi na nona tulikileo tea kwara ne mulemai heheri, vae aia hete kwehi. A domina u bua, u hugu hurikamu, huri he lengaia tea kwara te katukwale ne sala. U lengaia kwara savisavi na tangaloi rana bohi tina noga vaivai hati.

¹⁰A Rani nona Hugwe [4] vae ne maravuti hoki na tangaloi babalua hinea ne vanamai, vae tahe kikilai na tarona tea. Lo Rani aia hi, a roro na taetae ne dudumuhia ne seserengete, vae a taetae ne tikei. A vitu mana kinau na taetae doluaki rana kao rana va titikeiki, vake a varamana mana kinau savia lolona rana kao rana va titikeiki. [5]

¹¹A kinau vano hi savia vae rana magarakiana rana va titikeiki, vae huri hi tulu ne tagataga ne karea lo mamaurianamiu. Tulu ne kokona, tulu ne kwareki a noi God, tulu ne vai a havakinau hinea aia u lengaia.

¹²Tulu ne hugu tara na Rani noi God [6] vae tulu ne boloki ne karea kwara tulu ne vai na Rani hi ne vanamai heheri. Lo Rani hi vae a taetae doluaki ne kao ne va titikeiki, a vitu mana kinau na taetae doluaki rana huki kina ngwangwavia na kabu hinea u ngwangwavi haburu.

¹³Vae i God u tuliki terekaki kwara ne tau na taetae karagwa mana varamana karagwa. Takwa-hi a tangaloi rau tuku vai kinau hinea rau bakoto kehe. Vae i kita tau tuku hugu tara na kinau aira vano hi.

¹⁴Rabelagu. Huri na kinau aira vano hi, lolona tamo toko hugu tara na Rani aia hi, vae tulu vai rongo kwara tulu ne ngwasara ne karea koro na nako i God, a hatiki ne tikei lumiu, vae ne tangwatahakikamu maia.

¹⁵A noda Hugwe a domina u bua mo hugu hurikamu. Tulu ne domidomi luna hi huri u vai kwehi kwara ne bete a taro lakwakamu kwara vae tulu ne ahi. I belada karea hi i Pol u uli na leta lakwakamu kina kikikila hinea i God mo bete lakwae, vae mo viti na kinau aia hokinia hi vohoki nomo vitia lakwakamu.

¹⁶Tigwaravu lo nona leta savia lolona mo viti huri na kinau aira vano hi, mo toko viti hokinia. A kinau tuaki lo nona leta rau madi kwara tana kikilaira, vae a tangaloi hinea rahe kikikila tea maira hi a noga hauhuriana he huira tea, rava bohi na domiana na nona leo, vae rava mulemai kina kurakura, hokinia hinea ramo toko vai bohiki na leo na Uliuli* Kokona ratuaki. Rau vai hokinia hi, vae rau tuku lavi na magarakiana lakwara siboga.

¹⁷Rabelagu. I kamu tulu kikilai na kinau vano hi u rovo ba. Vae huri hi tulu tagahuri ne karea. Diko hetea, vae a tangaloi hinea rau tuku galo lo tangwata ramai reveikamu letiu kina noga leo kurakura, tulu mo sovi tina tanotano karea hinea tulu mo tu luna.

¹⁸Vae tigwaravu tulu ne mauri lo kinau kairua hika, hinea i Jisas Kraes* a noda Hugwe* vake a noda Kaivakahi, ne hago maikamu vakevake kina nona domi tabetabe lakua, vunu tulu ne kikilaia vakevake. Tana tabe hakeki na hinana tigwaravu, hika ne vano nga vaki tuai a gwereki tikei. Io kareaki.