Read West Ambae 1 SIONE 2 Bible Online

1 SIONE 2 - West Ambae bible

1 SIONE 2

¹Raranatugu. Nu uli na leo hika lakwakamu huri kwara vae tulu ne hatu vai na vaivai hati. Vae diko te katukwale tikita ne vai na vaivai hati, vae i Jisas Kraes*, aia hi a tangaloi bakoto, u tu lo nako i Tamada i God u tuku kwaha hurikita.

²I Kraes sibona mo mate u kwareki a hura boniboni, kwara vae i God ne domidomi koro na noda vaivai hati doluaki, vae hete noda vaivai hati kehekeheki, a vaivai hati vake nona tangaloi vunuhia lo varamana.

³Diko tau rongohuri na tulikileo noi God, tau kikilai kareaki kwara tau kikilai i God.

⁴Diko te tangaloi ne viti “I nau nu kikilaia,” vae he rongohuri na nona tulikileo tea, a tangaloi hokinia hi aia a tangaloi kurakura, vae a vitikareaki u tikei luna.

⁵Ihe hi u rongohuri na leo i God, a tangaloi hini u vosangia tivarea lo doridorina kwara kareaki i God u vakakukwere na domina kina nona lagwaana. Ihe hi u viti kwara aia u toka lui God, u taritarisa kwara ne loliloli hoki Jisas Kraes. Hokinia hi tau kikilai kareaki kwara i kita tau toka lui God.

⁷Rabelagu. A tulikileo hika nomo ulia lakwakamu hete kinau kwara u karagwa, aia a tulikileo ta tuai, aia hi i kamu tulu kwiribibia ba lo tinatinakakiki vaki na hika. A tulikileo ta tuai hi aia a leo tulu rongo vunuhia ba.

⁸Vae hika kareaki a tulikileo hini nomo ulia lakwakamu aia a kinau karagwa. I Kraes* a doridorina u vosangi tivarea ba kwara a leo hi u kareaki, vake a doridorimiu u vosangi tivarea kwara a leo hi u kareaki, huri a dodoki u tuku tikei, vae hikani a leleha kareaki u vavarama vunu ba.

⁹Ihe te hinea ne viti aia lolo leleha, vae u vai tarataraki tuana diko i hagwena lui Kraes, aia lolo dodoki radu nga vaki na hika.

¹⁰Ihe te hinea u lagwa mai tuana mai hagwena lui Kraes u hugu lolo leleha, hokinia a kinau tikei luna vohoki kwara ne vai na tangaloi dolua vake ne sovi tilo hatiana.

¹¹Vae ihe te hinea u vai tarataraki tuana diko i hagwena lui Kraes aia lolo dodoki, u lakalakao lolona, he kikilai te kwara ne vano ave, huri a dodoki u vaia a matana mo dodo.

¹²I kamu i raranatugu. Nu uli na leo hika lakwakamu huri i God u domidomi koro na nomiu hatiana u rovo ba, huri na kinau hi i Kraes* mo vai.

¹³I kamu a ratama. Nu uli na leo hika lakwakamu huri tulu kikilaia aia hinea u toka vanamai evina kinia lolona a varamana u tikei radu nga. I kamu a ngwalagelo. Nu uli na leo hika lakwakamu huri tulu gui i Setano* ba.

¹⁴Sakwarigi. Nu uli na leo hi lakwakamu huri tulu kikilai i Tamada. Ratama. Nu uli na leo hi lakwakamu huri tulu kikilaia aia hini u toka vanamai evina kinia lolona a varamana u tikei radu nga. Ngwalagelo. Nu uli na leo hi lakwakamu huri i kamu tulu huira, a leo i God u eno lolo domimiu, tulu gui i Setano ba.

¹⁵Tulu hatu lagwa mana doridori na varamana diko te kinau hini rau eno lo varamana. Diko tulu lagwa mana doridori na varamana, a lagwaana huri Tamada u tikei lumiu.

¹⁶Vataha na kinau hini a nona varamana aira hika. A lengalengahuri hati a domi u lengaia, a kinau hi a tangaloi rau taga ramo lengaia, vunu vatavataha na kinau lo varamana hini a tangaloi rau domidomira luna. A kinau aira vano hi rahe vanamai te ti Tamada, vae savira rau vanamai tina doridori na varamana.

¹⁷A varamana, vunu vataha na kinau hi lolona a tangaloi ramo toko lengaira, vae rau tuku tikei, vae ihe hi u tuku vai kinau i God u lengaia ne ahi vaki tuai.

¹⁸Raranatugu. A gweregwere na varamana u garagarani. Rau vitia lakwakamu ba kwara a Tavaluivuro noi Kraes* vae ne vanamai. Vae hika a tavaluivuro rusa lengalenga noi Kraes rau maravuti vunu ba, vae huri hi tamo kikilai kwara a gweregwere na varamana u garagarani.

¹⁹A tangaloi aira vano hi aira kareaki hete lo noda bulubulu, vae huri hi rava tirakikita. Kwara vae diko aira kareaki lo noda bulubulu rana hugu maikita. Vae ramo tirakikita kwara ne matangwasara lakwakita kwara hete katukwale tiura aia lo noda bulubulu.

²⁰I kamu, i Kraes u tau na Tanungwe Kokona tilumiu ba. Vunu hokinia hi i kamu doluaki tulu mo kikilai na vitikareaki.

²¹Nu uli na leo lakwakamu hikani, hete huri kwara tulu he kikilai na vitikareaki tea hini, vae huri tulu kikilaia, vunu tulu kikilai vake kwara a kurakura he vanamai te vohoki tina vitikareaki.

²²?Vae ihe hi a tangaloi kurakura? A tangaloi kurakura aia hini u viti kwara i Jisas aia hete i Vurae*. Aia hi a tavaluivuro noi Kraes, huri u bena ki Tamada mai Natuna vake.

²³Ihe te hini u bena kina Natuki, u bena kina Tamaki vake, vae ihe hi u matangwasaraki kwara u hauhuri lo Natuki, u lai tabetabeki na Tamaki vake.

²⁴Hokinia tulu ne tagahuri ne karea kwara a leo hini tulu rongo ba lo tinatinakakiki ne eno lolo domimiu tigwaravu. Diko a leo hi tulu mo rongoa lo tinatinakakiki ne eno lolo domimiu tigwaravu, vunu i kamu tulu ne toka tigwaravu lo Natuki mana Tamaki.

²⁵A ahiana noi God vaki tuai, aia hi hinea i Kraes mo tulikinia lakwakita.

²⁶Nu uli na leo hika lakwakamu, nu viti hurira hinea rau vai kwara rana sinasinakamu.

²⁷Vae i kamu, i Kraes u tau na nona Tanungwe tilumiu ba. Hikani a nona Tanungwe u toka lumiu, vae tulu he lengai na tangaloi te kwara ne huhuikamu, huri a nona Tanungwe u huhuikamu lo kinau vatahae, vae a nona huhuiana u bakoto, a kurakura tikei luna. Tulu rongohuri na huhuiana nona Tanungwe hi, vae tulu ne toka lui Kraes.

²⁸Io, raranatugu. Tulu toka lui Kraes, kwara vae ne maravuti kikita i kita tanahe mataku tea, tana hatu maemae kinia tamo hili lo Rani Lakua hi ne mulemai luna.

²⁹Tulu kikilai ba kwara i Kraes aia u bakoto, vae i kamu kwara tulu ne kikilai kareaki kwara vatavataha na tangaloi hinea rau vai kinau u bakoto, aira i raranatu i God.