Read West Ambae 1 SIONE 3 Bible Online

1 SIONE 3 - West Ambae bible

1 SIONE 3

¹!Tulu taga! I Tamada i God u lagwa haburu maikita. A nona lagwaana u lakua haburu vae hokinia tamo kwareki i raranatuna. Vae kareaki i kita i raranatuna. A tangaloi hinea rau huri na doridori na varamana, rahe kikilaikita tea kwara i kita i raranatu i God, huri rahe kikilai i God tea.

²Rabelagu. I kita i raranatu i God ba, vae he matangwasara te lakwakita radu nga kwara tana mulemai hoki naha. Vae tau kikilai, kwara vae lo taro i Kraes* ne maravuti kikita, tanari mulemai hokinia, huri tana tagaia kareaki kina matada.

³Ihe te hinea u domidomi lui Kraes kwara ne mulemai hokinia, u kwiribibia sibona kwara ne toka ne ngwasara, hoki na tokaana noi Kraes u ngwasara.

⁴Ihe te hinea u vai na vaivai hati u galo lo Tangwata* noi God, huri a vaivai hati, a domianaki kwara a tangaloi u galo lo Tangwata noi God.

⁵Tulu kikilai kwara i Kraes u vanamai ba kwara ne lai leletiuki na hatiana nona tangaloi savira. Vake aia a hatiana tikei luna vohoki.

⁶Doluaki na tangaloi hinea rau toka lui Kraes rahe toko seaki na vaivai hati tea, vae a tangaloi hi u seaki na vaivai hati he tagai Kraes tea, vake he kikilaia tea vohoki.

⁷Raranatugu, tulu hatu tiraki na tangaloi mo sinasinakamu. Ihe hinea u vai kinau karea aia a tangaloi bakoto, hoki i Kraes aia u bakoto.

⁸Ihe hinea u seaki na vaivai hati, aia a tangaloi bulai Setano*, huri i Setano u vai na vaivai hati vanamai evina kinia lolona a varamana u tikei radu nga, vae i Natu i God u vanamai huri na kinau hini kwara ne vai magaraki na bolokiana noi Setano.

⁹Ihe te hinea i natu i God, he toko seaki na vaivai hati tea, huri i God a bohianana aia luna. Vae nehe vai lai tea kwara ne toko seaki na vaivai hati, huri i Tamana i God.

¹⁰A kinau hikani u matangwasara lakwakita kwara ihe maira i raranatu i God, vake ihe maira i raranatu i Setano. Te katukwale hinea u vai kinau he bakoto tea, diko he lagwa te mai tuana, aia hete i natu i God.

¹¹A leo hi tulu mo rongoa lo tinatinakakiki aia hika kwara tana lagwalagwa maikita.

¹²Tana hatu vai hoki Ken, a tangaloi bulai Setano mo kwohi matei tuana vohoki. ?Kworohokinia i Ken mo kwohi mateia? Huri i Ken u vai kinau rahe bakoto tea, vae i tuana u vai kinau rau bakoto. Vae mo kwohi mateia, huri a kinau u kadikadia.

¹³Rabela. Diko a tangaloi hinea rau huri na doridori na varamana rana vai taratarakikamu, tulu hatu maruti.

¹⁴Tau kikilai kwara tau tiraki na mateana ba, tamo vanamai vaki lolo ahiana. Tau kikilaia huri tau lagwa mai ratuada. Ihe hinea he lagwa tea mai ratuana aia radu nga lo mateana.

¹⁵Ihe te hinea u vai tarataraki tuana, aia a tangaloi uauamate tangaloi, vae i kamu tulu kikilai kwara a tangaloi uauamate tangaloi a ahiana noi God vaki tuai u tikei luna.

¹⁶Lolona i Kraes* mo tiraki na mamaurianana hurikita mo vosangikita kina hala na lagwaana, vae u taritarisa kwara i kita vake tana tiraki na mamaurianada huri rabelada lui Kraes.

¹⁷Diko te tangaloi a nona vivilagoki u rusa, u tagai tuana u kakaravika, vae he domi huri tea kwara ne hago mai tuana, a tangaloi hi nehe viti lai tea kwara u lagwa mai God. A lagwaana noi God u tikei lolo domina.

¹⁸Raranatugu. Ta hatu viti huri na lagwaana kina ringoda vohoki, vae tana vosangi na lagwaana kareaki lo doridorida.

¹⁹Luna hi tana kikilai kwara i kita a tangaloi na vitikareaki. Vunu diko a domida mo kilukikita kwara tau vakasile, vae ne tangwatahakikita lo nako i God, huri i God u lakua sileti na domida. Aia u kikilai savi na kinau.

²¹Rabelagu. Diko a domida he kilukikita tea kwara tau vakasile tanahe mataku tea lo nako i God.

²²Diko tana uduhuri te kinau kinia, vae tana lai tiua, huri tau rongohuri na nona tulikileo, tau vai kinau u lagwa luna.

²³A nona tulikileo aia hika kwara tana hauhuri lo hina i Natuna i Jisas Kraes, vake tana lagwalagwa maikita hokinia hi i Kraes mo tuliki lakwakita.

²⁴Ihe te hinea u rongohuri na tulikileo noi God, u toka lui God, i God u toka luna. Vae tau kikilai kwara i God u toka luda ba, huri u bete na nona Tanungwe lakwakita.