Read West Ambae 1 SIONE 4 Bible Online

1 SIONE 4 - West Ambae bible

1 SIONE 4

¹Rabelagu. A tangaloi* duruduruki rusa hinea aira a tangaloi kurakura rau vano laliki lo varamana ba. Vae huri hi tulu hatu hauhuri lo tangaloi savira hinea rau viti kwara, “A Tanungwe noi God aia lugu.” Vae tulu ne kahi haro luga tulu ne kikilai kwara a tanungwe hi u vanamai ti God diko hetea.

²Tulu ne kikilai hokinia hika kwara a tanungwe hi u vanamai ti God diko hetea. Ihe tangaloi te hinea ne viti kwara i Jisas Kraes* u lai a tarabehi na tangaloi mo vora vanamai tilo varamana, aia hi u lavi na Tanungwe hinea u vanamai ti God.

³Vae ihe te hinea u tuku viti kwara a tarabehi i Jisas u dolua tina tangaloi, a tanungwe hi luna he vanamai te ti God. A tanungwe hi u vanamai tina Tavaluivuro noi Kraes, aia hi tulu rongo ba kwara vae ne vanamai, vae hika aia lolo varamana ba.

⁴Raranatugu. I kamu a tangaloi noi God, vae tulu gui na tangaloi duruduruki kurakura vano hi ba, huri a Tanungwe hini lumiu u huira sileti na tanungwe hi lo tangaloi rau huri na doridori na varamana.

⁵A tangaloi vano hi rau viti huri na doridori na varamana, vae a tangaloi rau huri na doridori na varamana rau rongohurira, huri aira a nona varamana.

⁶Vae i kita a tangaloi noi God. Aia hinea u kikilai God u rongohurikita, vae aia hinea hete noi God, he rongohurikita tea. Luna hi tana kikilai kwahekwaheki lavi na Tanungwe na vitikareaki mana tanungwe na kurakura.

⁷Rabelagu. Tana lagwalagwa maikita, huri a lagwaana u vanamai ti God. Ihe hinea u lagwa mai God vake u lagwa mana tangaloi, aia i natu i God, u kikilai God.

⁸Ihe hinea he lagwa tea mai God vake he lagwa tea mana tangaloi, he kikilai God tea, huri i God aia a gwataki na lagwaana.

⁹I God u vosangi na nona lagwaana lakwakita luna hika, mo hora i Natuna a natu kwakehe tilo varamana kwara tana hagwe na ahiana luna.

¹⁰A lagwaana hi aia hokinia hika, hete kwara i kita tau lagwa mai God, vae aia u lagwa maikita haburu mo hora i Natuna mo mate, mo vai na hala lakwakita kwara a noda vaivai hati rusa ne domidomi koroana.

¹¹Rabelagu. Diko i God u lagwa maikita hokinia hi, u karea kwara i kita vake tana lagwalagwa maikita.

¹²Hete katukwale kwara u tagai God te lo taroki. Vae diko tau lagwalagwa maikita, i God u toka luda, u vakakukwere na domida kina nona lagwaana.

¹³Hikani tau kikilai kwara i kita tau toka lui God vake aia u toka luda, huri u betekita kina nona Tanungwe.

¹⁴Vunu i kita tau taga ba kwara i Tamada u hora i Natuna kwara ne kwareki a Kaivakahi nona tangaloi na varamana, vae hika tau viti matangwasarakinia tivarea.

¹⁵Ihe te hinea u matangwasaraki Jisas kwara aia i Natu i God, i God u toka luna, vake aia u toka lui God.

¹⁶I kita tau kikilai na lagwaana noi God ba hurikita, vae tau hauhuri kwara u lagwa haburu maikita. I God aia a gwataki na lagwaana. Ihe te hinea u toka lo lagwaana u toka lui God, vake i God u toka luna.

¹⁷A lagwaana hi u kukwere lolo domida kwara tanahe mataku tea lo Rani Lakua hi [1] hinea i God ne kwaheki na doridori na tangaloi savia luna. Tanahe mataku tea huri i kita tau loliloli lo varamana hoki i Kraes* mo loliloli lo varamana.

¹⁸A tangaloi hinea i God u lagwa maia he mataku te kinia. Diko tau kikilai kareaki kwara i God u lagwa maikita hokinia hi, vae tanahe mataku te taliku. A tangaloi ne mataku huri u domi kwara ne kwali na kakadiki lo Rani na Arekiana, vae a tangaloi hinea u mataku hokinia hi he kikilai kareaki te radu kwara i God u lagwa maia.

¹⁹Ta lagwa mai God, vake ta lagwa mana tangaloi, huri i God u lagwa maikita tomua.

²⁰Diko te katukwale ne viti “Nu lagwa mai God,” vae u vai tarataraki tuana, aia a tangaloi kurakura, huri diko he lagwa te mai tuana hinea u tagaia, vae nehe lagwa lai te mai God hini he tagaia tea.

²¹A tulikileo hika aia hi i Kraes mo betea lakwakita, u viti kwara aia hi u lagwa mai God ne lagwa mai tuana vake.