Read West Ambae 1 SIONE 5 Bible Online

1 SIONE 5 - West Ambae bible

1 SIONE 5

¹Ihe te hinea u hauhuri kwara i Jisas aia i Vurae*, u kwareki i natu i God, vunu ihe te hinea u lagwa mana tama, ne lagwa mai raranatuna vake.

²Diko tau lagwa mai God vunu vake tau rongohuri na nona tulikileo, lo hala hi tau kikilai kwara hi tau lagwa mana raranatu i God.

³A leo hi u viti kwara tau lagwa mai God, a domianaki kwara tau rongohuri na nona tulikileo. Vake a nona tulikileo rahe madi te haburu kwara tana huri luga,

⁴huri i raranatu i God savia rau gui lavi na hatiana na varamana. A noda hauhuriana, aia hi tana gui na hatiana na varamana kinia.

⁵?Ihe hi u vai lai kwara ne gui na hatiana na varamana? A tangaloi aia hi kehekeheki hinea u hauhuri kwara i Jisas aia i Natu i God.

⁶I Jisas Kraes* aia hi mo vanamai. A kwai hini mo lai bavtaes luna mana daina hinea mo huki lolona mo mate raru matangwasarakinia. Hete kwai kehekeheki u matangwasarakinia, vae a kwai mana daina i rarua vunu raru matangwasarakinia. Vae a Tanungwe Kokona vake u hago leo kwara u kareaki huri a Tanungwe Kokona aia a gwataki na vitikareaki.

⁷A hagoleo huri Jisas aira kaitolu.

⁸A Tanungwe, a kwai, mana dai, vae aira hi kaitolu rau hago leo katukwale.

⁹Tau hauhuri lo hagoleo hinea a tangaloi ramo vitia, vae a hagoleo noi God u huira sileti na hagoleo nona tangaloi. A hagoleo hi aia hini i God sibona mo vitia huri i Natuna.

¹⁰Aira hini rau hauhuri lui Natu i God rau hagobibi na hagoleo hi lolo domiga. Vae aira hini rahe hauhuri te lo hagoleo hi noi God, rau viti kwara i God aia a tangaloi kurakura, huri u hago leo huri i Natuna vae rahe hauhuri te luna.

¹¹A hagoleo hi aia hika. I God u betekita kina nona ahiana vaki tuai, a ahiana hi aia lui Natuna.

¹²Ihe hinea i Natu i God u toka lo mamaurianana u lavi na ahiana hi. Vae ihe hinea i Natu i God he toka tea lo mamaurianana, he lavi na ahiana hi tea.

¹³I kamu hinea tulu hauhuri lo hina i Natu i God, nu uli na leo aira vano hi lakwakamu kwara vae tulu ne kikilai ne karea kwara tulu lavi na ahiana noi God ba vaki tuai.

¹⁴I kita tahe mataku te lo nako i God lo noda tiutangaroa, vae tau domi tiluna huri tau kikilai kareaki kwara diko tana uduhuri te kinau kinia hinea u taritarisa lo nona domidomi, ne rongohurikita.

¹⁵Tau kikilai kwara tigwaravu tau uduhuri te kinau kinia u rongohurikita. Vae huri hi tau kikilai vake kwara a havakinau te hinea tau uduhuri kinia, vae aira a noda vunu ba.

¹⁶Diko te katukwale u tagai tuana u vai na vaivai hati hinea hete vaivai hati na mateana, ne tiutangaroa lakwai God huri i tuana, vae i God ne bete na ahiana lakwa na tangaloi hi mo vai na vaivai hati. I God ne bete na ahiana lakwara hinea a noga vaivai hati hete vaivai hati na mateana. Vae a vaivai hati eia hinea a gweregwereki a mateana, vae nahe viti tea kwara tulu ne tiutangaroa lakwai God hurira.

¹⁷Vunuhi na vai vakasileana, aira a vaivai hati, vae hete vaivai hati savira kwara a gweregwereki a mateana.

¹⁸I kita tau kikilai kwara hete raranatu i God kwara te katukwale ne toko seaki na vaivai hati, huri i Natu i God u tagahurira, vae i Setano* nehe magaraki lavira tea.

¹⁹Tau kikilai kwara i kita a noi God, vae a tangaloi doluaki hinea rau huri lo doridori na varamana aira tavuti na huirana noi Setano.

²⁰Tau kikilai kwara i Natu i God u vanamai, mo bete na kikikila lakwakita, kwara vae tana kikilai God aia hi u kareaki. I kita tau hariki lui God hinea u kareaki, huri tau hariki lui Natuna i Jisas Kraes*. Aia i God kareaki, vae aia a gwataki na ahiana vaki tuai.

²¹Raranatugu. Tulu tagahurikamu ne karea tina takaro vuroki maira.