Read West Ambae 2 SIONE 1 Bible Online

2 SIONE 1 - West Ambae bible

2 SIONE 1

¹I nau a ngwarasea* lo kwarelua* noi Jisas, nu uli na leo hika lakwako Tubui [1], hinea i God u mataiko. Vunu vake nu uli lakwai raranatumu. I kamu vunu nu lagwa maikamu huri tau hariki katukwale lo vitikareaki. Hete i nau kehekeheki vae doluakinira hinea rau kikilai na vitikareaki rau lagwa maikamu vake,

²huri a vitikareaki u eno luda, vake ne eno maikita vaki na tuai.

³A tangaroa karea hika lakwakita. I God i Tamada vake i Jisas Kraes* i Natu i Tamada, raru ne hago maikita kina nogaru domi tabetabe lakua, raru ne hakavikita, raru ne betekita kina magemuana. Vae raru ne toka maikita huri tau kikilai na vitikareaki, vake tau lagwalagwa maikita.

⁴U havutiau haburu huri nu hagwe kwara i raranatumu ratuaki rau toka lo vitikareaki, hokinia hinea a Tamaki u tuliki terekaki ba lakwakita.

⁵Vae huri hi nu viti lakwako Tubui, kwara i kita vunu tana lagwalagwa maikita. A tulikileo hika nomo ulia lakwako he karagwa tea, aia a tulikileo hinea tamo kwiribibia vanamai evina lo tinatinakakiki.

⁶A lagwaana aia hika, kwara tana rongohuri na tulikileo noi God. A tulikileo hi tulu rongoa ba vanamai evina lo tinatinakakiki aia hika, kwara tulu ne toka lo lagwaana.

⁷A tangaloi hinea rau tuku sinasina na tangaloi, u rusa rau vano laliki lo varamana ba. A tangaloi aira vano hi rahe matangwasaraki tea kwara i Jisas Kraes* u lai tarabehi na tangaloi mo vora vanamai tilo varamana. A tangaloi hokinia hi aia a tangaloi na sinasina tangaloi, vunu vake aia a tavaluivuro noi Kraes.

⁸Vae tulu tagahurikamu ne karea, kwara vae tulu ne hatu vai magaraki na kinau hinea kemo toko boloki huria, vae tulu ne lai doluaki na nomiu kaitakwe. [2]

⁹Te tangaloi hinea he toka te lo huhuiana noi Kraes, u vano vakahao haburu vae i God u tikei luna. Ihe te hinea u toka lo huhuiana noi Kraes, u lai tabetabeki na Tamaki mana Natuki.

¹⁰Diko te tangaloi ne vanamai vaki maiko, a huhuiana hika u tikei luna, hatu lai tabetabekinia vaki tatamu. Ko hatu kwaha tabetabe maia,

¹¹huri te tangaloi hinea u kwaha tabetabe maia, u bulu maia lo nona boloboloki hati.

¹²A leogu u rusa radu kwara na viti lakwakamu, vae nahe lengaia te kwara na ulia lo veva kina igi. Nu lengaia haburu kwara na tirokikamu vae tanari kwahakwaha ki nakoda, vunu a noda hahavutiana ne lakua ne taritarisa vohoki.

¹³I tuamu [3] hinea i God u mataia ba, i raranatuna rau bete noga lagwaana lakwako.