Read West Ambae 3 SIONE 1 Bible Online

3 SIONE 1 - West Ambae bible

3 SIONE 1

¹Tuagu karea Gaeas. I nau a ngwarasea* lo kwarelua* noi Jisas, nu uli na leo hika lakwako. Nu lagwa haburu maiko huri taru hariki katukwale lo vitikareaki.

²Tuagu karea. Nu lengaia haburu kwara savi na kinau ne karea maiko, vake kona rongo karea lo tarabehimu, hokinia nu kikilai kwara ku rongo karea lo tanungwemu.

³U havutiau haburu lolona a ratua ratuaki ramo maravuti ramo viti huri kwara ku karohuri u madi lo vitikareaki, hokinia hinea i nigo komo toka tigwaravu lo vitikareaki.

⁴Hete kinau vake kwara ne vaiau ne havutiau siletia hika, nomo rongo kwara i raranatugu rau toka lo vitikareaki.

⁵Tuagu karea. I nigo ku karohuri u madi kareaki lo boloki komo toko vai lakwa na rabela, vae vake lakwa na rabela aira hi a vanamaiana.

⁶Aira rau viti huri na nomu lagwaana lakwa na tangaloi na kwarelua noi Jisas hike. Lo taro hinea rana tinakaki hala taliku u karea kwara kona hago maira. Lo halaki hokinia hi u taritarisa kwara tana hago maira hinea rau vai a boloki noi God.

⁷Rau tiraki tataga huri na bolokiana noi Kraes*, vae rahe lai te kaihago tina tangaloi hinea rahe hauhuri tea.

⁸Vae i kita hi a tangaloi noi Kraes, tana hago mana tangaloi aira hi, huri vae tana bulu haragoki maira lolo noga bolokiana huri na vitikareaki.

⁹Nu uli na leo gwanugwanu ba lakwa na tangaloi na kwarelua* noi Jisas. Vae i Diotreves u lengaia haburu kwara ne kwareki noga kaitomuaki, vae he rongohuri te kinau hinea nomo viti.

¹⁰Vae u karea, nana vanamai nari tau savi na kinau vano hi tivarea mo toko vaira, a doridori hati vano hi mo toko vitiviti hurikami luna, vake a kurakura hinea mo toko vitira. Vae hete aia hika kehekeheki, huri lolona a rabela ramo vanamai, he lai tabetabekinira tea, vunu vake u tu korora hinea rau lengaia kwara rana lai tabetabekinira, mo taura tivarea tina kwarelua.

¹¹Tuagu karea. Ko hatu huri na tanoigaru na tangaloi hinea rau vai kinau rau hati, vae ko huri na tanoigaru na tangaloi hinea rau vai kinau rau karea. A tangaloi hinea u vai kinau u karea, aia u kwareki i natu i God, vae a tangaloi hinea u vai kinau u hati, he tagai God te vohoki.

¹²Savi na tangaloi rau kaluki i Demetrius. A bohianana u bakoto, aia u vosangi tivarea kwara aia a tangaloi karea. Vunu i kami vake keu hariki na nomai hagoleo, vae tulu kikilai kwara a nomai hagoleo rau bakoto.

¹³A leogu u rusa radu nga kwara na viti lakwako, vae nahe lengaia tea kwara na ulia kina igi.

¹⁴Nu domi kwara nehe tuai tea nana tagaiko, vunu taru neri kwahakwaha ki nakodaru.

¹⁵A magemuana ne eno maiko. Doluaki na noda buluana rau bete noga lagwaana lakwako. Ko bete nomai lagwaana lakwa na noda buluana hinea maiko vunuhira katukwale kehe.