Read West Ambae REVELESEN 1 Bible Online

REVELESEN 1 - West Ambae bible

REVELESEN 1

¹Lo buku* hika i nau i Sione nu uli na kinau aira hinea i Jisas Kraes* mo matangwasarakinira lakweau. A kinau aira hi i God mo betera lakwae kwara ne vosangi na bulana tangaloi maira, kina kinau hinea vae rana mule luna nehe tuai tea. I Kraes u hora na nona kaihora tina taetae kwara ne matangwasaraki na kinau vano hi lakweau, i nau a nona tangaloi boloki.

²Vunu nomo ulibibi doluaki na kinau aira hinea nomo tagaira. Hika a leo hinea i God u vitia, mana vitikareaki hinea i Jisas Kraes mo matangwasarakinia.

³A tangaloi ne valuki na leo hika tivarea, hinea u durukiana ti God, ne havutia. A hahavutiana lakwara vake, hinea rau rongo na leo rau uliana lolo buku hika, ramo rongohurira, huri a taroki u garagarani, vae doluaki na kinau aira hika rana mule luna.

⁴I nau i Sione nu uli na leo hika lakwakamu a kwarelua* a bulubulu kaibitu lo gwatuivanua lalakua Esia*. A tangaroa karea hika lakwakamu. I God hinea u toka hika karagwa, u toka tuai ba, vunu aia vae neri vanamai, a nona domi tabetabe lakua ne eno maikamu, vake ne betekamu kina magemuana. A tanungwe kaibitu hinea rau tu lo nakona mana hagehagelena, rana vai hokinia vake.

⁵Vunu i Jisas Kraes* hinea u karohuri mo hago leo noi God, ne vai hokinia vake. Aia a Nakoi-natu hinea mo maraka tina mateana, vake u hugwe koro na hugwe lalakua doluaki lo varamana. U lagwa maikita, vae lolona hi mo mate a daina mo huki mo lavikita tina noda vaivai hati rusa.

⁶Mo vaikita tamo mulemai ki hugwe lalakua tavutina, vake mo vaikita tamo mulemai ki tangaloi* lingilingi kwara tana boloki lakwai Tamana a nona God. A hina i Jisas ne tabe hakekiana tigwaravu vaki tuai, vake a nona huirana nehe rovo tea. Io kareaki.

⁷!Tulu tagaia! I Jisas u tuku vanamai lolo taenalangi. Doluaki na tangaloi vae rana tagaia ki mataga. A tangaloi hinea rau haria tuai, vae rana tagaia vake. Savi na tangaloi na varamana vae rana tangi huria. Ne mule luna. Io kareaki.

⁸A Hugwe i God hinea u hugwe koro na kinau doluaki, aia hi u toka hika karagwa, u toka tuai ba, vunu aia vae neri vanamai, aia u viti “I nau a Gwatakiki, i nau a Gwereki.”

⁹I nau i Sione i belamiu lui Jisas hinea a noda Hugwe Lakua. Vae huri nu hariki luna tau bulu katukwale lo rongoana hati. Tau hariki katukwale luna, vunu vake tau bulu katukwale kwara tana tu ne madi, a domida ne bua lo taro na rongoana hati. Rau tauau lo vanua Patmos huri nu tuku heretuvaki na leo noi God mana vitikareaki hinea i Jisas u matangwasarakinia ba.

¹⁰Lo Rani na noda Hugwe* a Tanungwe Kokona u hivo tilugu, a nona huirana mo kwiribibiau. Vae nomo rongo na dilao huira u tatangi hoki na tavui, mo kwaha takuni tiau, mo viti kwara,

¹¹“Ko ulibibi na kinau hi komo taga. Vunu komo hokaki na buku* hi lakwa na kwarelua* a bulubulu kaibitu, aira hi lolo gwatuivanua lalakua Evesas, Smana, Pekamam, Tuatira, Satis, Vilatelvia maia Laotisia.” [1]

¹²Hikani nomo halebohi kwara na taga kwara ihe u kwaha maiau. Vae lolona hi nomo halebohi nomo tagai na tutu na laeti kaibitu ramo tu, rau kihira kina kol.

¹³Lo livuka na tutu na laeti vano hi nu tagai na tangaloi aia hoki na Natu* na Tangaloi. [2] U lugwaki na lugwa gwaravu tegetano vaki lo tano, hoki na lugwa na tangaloi lingilingi, a kwahina u kwahikwahiki na kol lo gwagwana.

¹⁴A vuluna u lotu hoki na koten, diko hoki na takotakora na tahi. Vunu a matana u sea hoki na kabu.

¹⁵Vunu a garuna u vilavila hoki na bras hinea rau huraia lo kabu mo huki mo vilavila, vunu ramo buruia taliku kwara ne vilavila vakevake nga. Vunu a dilaona u roro hoki na navo mo marobe.

¹⁶U hagobibi na vitu kaibitu lo matuai kabana, vunu a bue na vuro u hoko dalidali u tuku ngwalua tina kwakwana. A nakona u kwaka hoki na mataniaho hinea mo kwaka lo livukai-rani.

¹⁷Lolona nomo tagaia nomo sovi hivo vaki lo garuna hoki na tangaloi u mate. Vae mo tau na matuai kabana lugu, mo viti “Ko hatu mataku. I nau a tangaloi tomua halaradu, i nau a tangaloi ki rovonaki.

¹⁸I nau aia hi u ahi. !Tuai nu mate, vae hika ko taga, nu ahi vaki tuai! I nau nu hago huirana koro na mateana, vunu vake korora hinea rau hugu lo tanotano na tanungwe na tangaloi rau mate, vae nari takahi na matakihala na mateana lakwara rana soro tivarea.

¹⁹U karea, ko ulibibi savi na kinau hinea komo tagaira, vunuhi na kinau hinea rau tuku vai hika, maira hinea ranari vanamai vaki takuni.

²⁰Ku tagai na vitu kaibitu hi lo matuai kabagu, vunu a tutu na laeti hi kaibitu ramo tu, rau kihira kina kol. A leo tavuniki hurira aia hikwe. A vitu hi kaibitu, aira a kaihora tina taetae lakwa na kwarelua a bulubulu kaibitu, vunu a tutu na laeti hi kaibitu ramo tu, aira a kwarelua a bulubulu kaibitu.”