Read West Ambae REVELESEN 11 Bible Online

REVELESEN 11 - West Ambae bible

REVELESEN 11

¹Hikani rau bete na mavuro lakweau, aia hoki na kaidumu gwaravu. Vunu i God mo kwaha maiau mo viti “Ko maraka ko vano ko dumuki na nogu Ingwa Kokona mana nogu voda, [10] vake ko valuki na tangaloi hi rau kaluhakiau lolo Ingwa hi.

²Vae a loloiara na nogu Ingwa tavalavarea, ko tirakinia ne eno. Ko hatu dumukia huri a loloiara hi, u eno lakwa na tangaloi ba hinea rahe kikilai God tea. Rana bile rahaki na nogu Gwatuivanua Kokona a vula ngavu kaivati dongwaki kairua.

³Vae nari hora na nogu tangaloi kairua, hi raru lugwaki na lugwa rau vatukira kina vulu na nani maeto hinea a kaivosangi na mateana. Vae lo rani aira hika u tari vakatukwale eviki vidolua vakairua eviki ngavu kaiono [11] a nogu tangaloi na hagoleo kairua hi vae raru ne duruki na leogu tivarea.”

⁴A tangaloi na hagoleo hi kairua i rarua hoki na vikai kairua hi a violev, vunu vake i rarua hoki na laeti kairua hi raru mo toko tu lo nako i God hinea a Hugwe Lakua u hugwe koro na varamana.

⁵Diko te tangaloi u vai kwara ne magarakirarua, a kabu ne ngwalua lai tina kwakwagaru ne magaraki na nogaru tavaluivuro. Lo hala hokinia hi, aira hi ramo vai kwara rana magarakirarua, vae rana mate.

⁶Raru hago huirana kwara raru ne tu koro lavi na uha, kwara vae lo taro hi raru ne duruki na leo ti God, nehe uha tea. Vake raru hago huirana koro na kwai mauri, kwara rana bohi ki dai. Vake raru hago huirana kwara raru ne lavi na lengeana hati mataroi vanamai, rana magaraki na tangaloi na varamana. A kinau aira vano hi raru ne vai lavira vataha na taroki hokinia raru lengaia kwara raru ne vai luna.

⁷A tangaloi na hagoleo kairua hi raru ne viti vunuhi na nogaru leo hi ne rovo hinea i God mo bete lakwararua, vunu a boboroa ovi hi ne ngwalua tina kwalu bua hinea a kwotoki tikei, vae ne vai vuro vovohirarua. Aia neri guirarua, neri kwohi mateirarua.

⁸Vae a tarabehigaru rana va saro lo hala lo gwatuivanua lakua hi, hinea tuai ramo duru na nogaru Hugwe* i Jisas tilo kaibetu eia. A gwatuivanua lakua hi tana vai lai tana kwarekinia kwara “Sotom” diko “Isiv”.

⁹Hikani a tangaloi tina ureure savia, rau gwalo vanamai lo gwatuidamu vunuhia, rau vanamai lo leo gwatu na rusa, aira a tangaloi mataroi, vae rana tagai na tarabehigaru a rani kaitolu kaivatiki duviki. Vae ranahe tirakirarua tea kwara a tangaloi rana tanomirarua.

¹⁰A tangaloi* duruduruki hi kairua raru duruki na leo ti God vae a tangaloi savia lo varamana rana rongo hati haburu kinia. Vae raru ne mate, a tangaloi vano hi ne havutira haburu. Hikani vae rana vai a kanikani hurirarua, rana hokohoko lakwai rabelaga, rana matai na kagaru mateana.

¹¹Vae hikani lo vakatabobo hi i God u vosangia lakweau, nomo taga kwara takuni tina rani kaitolu kaivatiki duviki, i God mo bete mabugaru kwara vae raru ne ahi taliku. Hokinia raru mo maraka raru mo tu. A tangaloi vano hi rau tagairarua, rau mataku haburu.

¹²Hikani a tangaloi duruduruki kairua hi, raru mo rongo na dilao mo tangi tina taetae mo viti lakwararua kwara, “Kuru vanamai vaki hike.” A nogaru tavaluivuro ramo tagataga hurirarua, raru mo vano tagaulu lolo taenalangi vaki lolo taetae.

¹³Lo taro aia hi vohoki, a ruru lakua. A gwatuivanua lakua hi u makwahe gwatu hangavulu vae katukwale mo masurati, kaihikwa maeno. A valuvalu na tangaloi savia ramo mate kina ruru lakua hi, aira u tari vakaibitu. Aira hi rahe mate tea, rau mataku haburu, ramo tabe hakeki na hina i God lolo taetae.

¹⁴Aia hi a rongoana hati haburu kairuaki u rovo ba. Vunu kaitoluki aia radu nga ne vanamai nehe tuai tea.

¹⁵Hikani a kaihora lolo taetae hi kaibituki mo horoki na bulana tavui, vunu a dilao rusa lolo taetae ramo tangi ramo viti “Hikani a mamalukoro na varamana rau eno tavuti na huirana na noda Hugwe i God, vake tavuti na huirana na nona Vurae* hinea u mataia kwara ne kwareki a Hugwe Lakua. Vae aia ne hugwe koro na kinau savia vaki tuai, a gwereki tikei.”

¹⁶Hikani a ngwarasea* ngavu kairua dongwaki kaivati hinea ramo toko hugu lo hagehagelega koro na nako i God, ramo sovi hivo vovohia ki nakoga ramo kaluhakinia kina domi mavakiana,

¹⁷ramo viti “Hugwe i God. I nigo ku hago huirana koro na kinau savia. I nigo ku toka hika karagwa, ku toka tuai ba. I kami keu lai nomai lagwaana lakwako, keu lagwakinigo huri lalahi na nomu huirana lakua komo tinakaki komo hugwe koro na kinau savia.

¹⁸A tangaloi na ureure savia rau vai nakara haburu. Vae hika a taro na nomu lologute u maravuti. Hikani a taro kwara kona kwaheki na doridori na tangaloi hi rau mate. Hikani a taro kwara kona bete na kaitakwe lakwa na nomu tangaloi boloki hinea aira a tangaloi* duruduruki, vake lakwa na nomu tangaloi hinea rau domi mavakinigo, aira hinea a tangaloi lalakua maira hi a tangaloi haro nga. Hikani a taro kwara kona magarakinira hinea ramo toko magaraki na varamana.”

¹⁹Vunu a Ingwa Kokona noi God lolo taetae u matakahi, a tangaloi ramo taga hokoti na Bokisi Lakua, hinea aia a Kaimatai na Leo Harikiana noi God mana bulana tangaloi. Vunu mo vila, a gwatuhari mo hari, mo ruru lakua, vake a uha mo mulemai kina vatu na aes* mo ngwangwarasuki.