Read West Ambae REVELESEN 12 Bible Online

REVELESEN 12 - West Ambae bible

REVELESEN 12

¹Hikani nu tagai na kaimatai katukwale lo mahaleki, u hahaburuka. A vavine katukwale u lugwaki na mataniaho hoki na lugwana nga, a vula mo eno tavuti na garuna, mo huni na kaikwokwori na gwatu nona hugwe lakua hinea a vitu hangavulu dongwana kairua rau eno luna.

²A vavine hi u garagarani kwara ne lailai, u rongo a tagwangina u kadia, mo toko ngara, huri u rongo hati haburu.

³Vunu nomo tagai na kaimatai kairuaki vake lo mahaleki, a alkita lakua lengalenga u kara, a gwatuna kaibitu, a gwalana hangavulu. A gwatuna hi kaibitu a kaikwokwori na gwatu kehe nga luga, hoki na kaikwokwori na gwatu na hugwe lakua.

⁴Hikani a alkita lakua hi mo viliki na kolona vaki lo mahaleki mo vili surisuri na vitu rusa, ramo sovi vaki lo tano. A vitu rau makwahe gwatu kaitolu, vae gwatu katukwale mo sovi, kairua maeno. Hikani a alkita hi mo tu koro na nako na vavine hi mo vai kwara ne hagovi natuna, kwara ne kani na natu hi ne vora.

⁵Vae a vavine hi mo hagovi natuna a ngwera. A natu hi ne hugwe koro na tangaloi savia lo varamana, vae a kaimatai na nona huirana aia a kaitiko hinea rau kihia kina aean. Kwahaia a natu hi mo vora ramo reveia ramo kwalia vaki mai God, hinea mo hugu lo hagehagelena.

⁶Vae a vavine hi mo kwalao vaki lo vanua vuroki, hinea i God u vai rarai na tanotano huria u rovo ba, kwara i God ne tagahuri tabetabekinia a rani u tari vakatukwale eviki vidolua vakairua eviki ngavu kaiono. [12]

⁷Hikani a vuro mo takwaka lolo taetae. I Maekel mai rabuluina a kaihora lolo taetae ramo vai vuro vovohi na alkita lakua hi. A alkita lakua hi mana nona kaihora ramo vai vuro vovohi Maekel mai rabuluina.

⁸Vae i Maekel mana nona kaihora lolo taetae ramo gui na alkita mana nona kaihora, vunu a tanotano na alkita mana nona kaihora tikei taliku lolo taetae.

⁹A alkita lakua hi aia a ngwata tuai hinea mo sinasina na tangaloi na varamana doluaki, ramo vaivai hati. A hinana i “Setano*”, diko “A Tangaloi Vai Bulabula”, aia hi a tavaluivuro nona tangaloi. Hikani aira hi lolo taetae ramo vohokinia tina taetae mana nona kaihora vanamai vaki lo varamana.

¹⁰Hikani nomo rongo na dilao mo kware karakara tina taetae mo viti “Hika i God u vakahikikita ba mo vosangi na nona huirana, vake u vosangi kwara aia a Hugwe Lakua. Hika i Vurae* hinea i God u mataia ba kwara ne kwareki a Hugwe Lakua aia u vosangi na nona huirana. A tangaloi hi u tu vovohi ratuada hinea rani bongi mo toko viti na hatiga koro na nako i God, vae i God u vohokinia ba tina taetae.

¹¹I ratuada ramo guia kina huirana na dai na kairoroi* hinea a Sivsivi* Kelekele, vake kina huirana na vitikareaki hinea ramo matangwasarakinia. A ratua vano hi ramo guia, huri rahe domi huri na mamaurianaga tea, rau rarai kwara rana mate.

¹²Huri na kinau hi, i nigo taetae, vake i kamu vunu hi tulu mo hugu lolo taetae, tulu rongo karea. Vae a hahakaviana lakua lakwakarua tano mana tahi, huri i Setano u vanamai tegetano vaki maikamu, u lologute haburu, huri u kikilai kwara nona taro gwanugwanu maeno.”

¹³Lolona hi a alkita lakua mo kikilai kwara rau vohokinia ba vaki lo varamana, mo tinakaki mo livuti na vavine hi mori hagovi natuna hi nga.

¹⁴I God mo bete na kaba na mala lakua lakwa na vavine hi kwara ne rovo hoki na manu vaki lo tanotanona hi lo vanua vuroki. Ne hugu takwa-hi vae i God ne tagahuria a hukao kaitolu kaivatiki duviki ne ahi tina alkita lakua hi kwara ne hatu vai magarakinia.

¹⁵A alkita lakua hi mo lukwaki na kwai mo huki hoki na kwai lakua, kwara ne hukiki na vavine hi.

¹⁶Vae a tano mo rumi na kwai hi mo huki tina kwakwa na alkita hi, hokinia u hago mana vavine hi.

¹⁷Hikani a alkita lakua hi u lologute haburu kina vavine hi, mo tirakinia mo vano kwara ne vai vuro mana nona gwaloana savia, aira hinea rau tuku rongohuri na tulikileo noi God, rau tuku kwiribibi na vitikareaki hi i Jisas mo matangwasarakinia.

¹⁸Hikani a alkita lakua hi mo vano mo tu na tahi lo one.