Read West Ambae REVELESEN 15 Bible Online

REVELESEN 15 - West Ambae bible

REVELESEN 15

¹Hikani nomo tagai na kaimatai katukwale vake lolo taetae hinea u hahaburuka, nu idila haburu kinia. A kaihora tina taetae kaibitu ramo toko lavi na rongoana hati lalakua vanamai kaibitu. A rongoana hati lalakua vano hi kaibitu aira a rongoana hati lalakua ki rovonaki vohoki, vae lolona rana mule luna a lologute noi God ne rovo.

²Hikani nomo tagai na kinau hoki na vilavila na tahi, aia hoki na gelas u rokekiana mana kabu. Vunu nomo tagai na tangaloi vano hika aira hinea tomua ramo vai vuro mana boboroa ovi mana nununa, aia hi ramo tai dedekinia hinea a valuvaluna u matangwasaraki na hinana, vae rau guia u rovo ba. Ramo tu garagarani mana kinau hoki na vilavila na tahi hi aia hoki na gelas, rau hagovi na gita hinea i God mo betera lakwara.

³Rau tuku kahoki na bolo hinea a kaihora noi God i Mosis, mana Sivsivi* Kelekele raru mo kahokinia, hinea mo viti kwara, “Hugwe i God. I nigo ku hago huirana lo kinau savia. A nomu boloki rau lalakua rau hahaburuka. I nigo a Hugwe Lakua koro na ureure savia. A doridorimu rau bakoto, rau kareaki.

⁴Hugwe i God. ?Ihe hi nehe domi mavakinigo tea? ?Ihe hi nehe tabe hakeki na hinamu tea? I nigo vohoki ku kokona. Vae a tangaloi na ureure savia, rana vanamai rana lai noga mavakiana lakwako, huri ku vosangi na nomu doridori bakoto u rovo ba lakwa na tangaloi doluaki.”

⁵Hikani lo vakatabobo hi i God u vosangia lakweau, nomo taga kwara lolo taetae ramo takahi na Tanotano Kokona Karakara lolo Ingwa Haleki hinea a tangaloi rau tuku vano eia kwara rana bulu mai God eia.

⁶Hikani a kaihora lolo taetae hi kaibitu ramo lavi na rongoana hati lalakua hi kaibitu vanamai, rau ngwalua tina Tanotano Kokona Karakara hi. Rau lugwaki na lugwa lotu hinea rau ngwasara rau karea vohoki. A kwahiga a kol rau kwahikwahiki lo gwagwaga.

⁷Hikani a boboroa mauri hi kaivati, vae katukwale tiura mo bete na laha kaibitu rau kihira kina kol, lakwa na kaihora lolo taetae hi kaibitu. A laha vano hi rau kukwere kina lologute noi God aia hi i Tatoka, nehe mate lai tea.

⁸Hikani a Tanotano Kokona Karakara u kabuahura kina hahaviada noi God, mana nona huirana. A tangaloi tikei kwara ne soro tilolo Tanotano Kokona Karakara, tarisaki hi a rongoana hati lalakua hi kaibitu, hinea a kaihora lolo taetae kaibitu rana lavira vanamai, ne rovo, vunu rana soro lai.