Read West Ambae REVELESEN 19 Bible Online

REVELESEN 19 - West Ambae bible

REVELESEN 19

¹Takuni tina kinau vano hikani, nomo rongo na roro hoki na dilao na vao lakua lolo taetae, rau kaho rau viti “!Ta kaluhaki God! A noda God u vakahikikita ba, vae tana tabe hakeki na hinana. Ta matangwasaraki kwara aia u hago huirana lo kinau savia.

²A rongoana hati mo bete rau bakoto, rau kareaki. A vavine tu huri hala hi mo toko vai na varamana mo hogora kina doridorina hi rau hati, vae i God u kwaheki na doridorina ba, u bete na kakadiki lakwae. I God u gele ba lakwae, huri a vavine hi u kwohi matematei na bulana tangaloi.”

³Hikani ramo kware taliku ramo viti “!Ta kaluhaki God! A kabuiahu na kabu na gwatuivanua lakua hika u ahu tagaulu tigwaravu, nehe tikei lai tea.”

⁴Hikani a ngwarasea* ngavu kairua dongwaki kaivati mana boboroa mauri hi kaivati ramo sovi hivo ramo lai noga mavakiana lakwai God aia hi mo hugu lo hagehagelena. Ramo viti “!Io kareaki! !Ta kaluhaki God!”

⁵Hikani nomo rongo na leo mo ngwalua tina hagehagele hi mo viti “I kamu a tangaloi boloki noi God, a tangaloi lalakua mana tangaloi haro nga hinea tulu domi mavakinia, i kamu vunu tulu kaluhaki na noda God.”

⁶Hikani nomo rongo na kinau mo roro hoki na dilao na vao lakua, aia hoki na roro na navo mo marobe, hoki na dumu na gwatuhari. Nomo rongora rau tuku viti kwara, “Ta kaluhaki God, huri a Hugwe aia a noda God hinea u hago huirana lo kinau savia, vae aia kehekeheki u hugwe koro na tangaloi doluaki.

⁷Ta lagwalagwa ne havutikita, ta tabe hakeki na hinana, huri a taro u maravuti kwara a Sivsivi* Kelekele ne laki. I vavinehina [20] u rarai ba.

⁸I God mo bete na vavine hi kina lugwa karea hinea u lotu vohoki u tavila, kwara ne lugwakinia.” A lugwana aia hi u karea u lotu vohoki, aia a bakotoana nona tangaloi noi God.

⁹Hikani a kaihora tina taetae mo kwaha maiau mo viti “Ko uli na leo hika kwara, ‘Aira hi i God u kwarera vaki lolo kanikani na lakiana nona Sivsivi Kelekele hi, vae ne havutira.’ ” A kaihora tina taetae hi mo kwaha taliku mo viti “Hikani a leo i God kareaki.”

¹⁰Vunu nomo sovi hivo mana garuna kwara na lai nogu mavakiana lakwae, vae mo viti lakweau kwara, “!Hetea! !Ko hatu vai hokinia hi! I kitarua vunu a tangaloi boloki noi God, i ratuamu vake aira hinea ramo kwiribibi na vitikareaki hinea i Jisas mo matangwasarakinia. Ko sovi hivo vovohi God, ko lai nomu mavakiana lakwae kehekeheki.” A vitikareaki hinea i Jisas mo matangwasarakinia, aia hi i God mo taua lolo domi na tangaloi* duruduruki kwara rana matangwasarakinia.

¹¹Hikani nomo tagai na taetae mo matakahi, nomo tagai na osi mavute mo tu. A Tangaloi hi mo kwalao luna a hinana “A Tangaloi Ko Domidomi Tiluna Hinea U Kareaki.” Mo kwaheki na doridori na tangaloi, mo vai vuro mana nona tavaluivuro, vae u vai lo hala hinea u bakoto kehekeheki.

¹²A matana aia hoki na kabu sea, u huni na kaikwokwori na gwatu u rusa hoki na kaikwokwori na gwatu nona hugwe lakua. A hinana u uliana luna, vae aia vohoki u kikilai na hina hi, a tangaloi dolua hetea.

¹³A lugwana hi mo lugwakinia u mebuka doluakinia kina dai. A hina hi ramo toko kwarea kinia aia “A Leo i God.”

¹⁴A tangaloi na vuro tina taetae ramo huria, rau hugu lo osi mavute kehe nga, a lugwaga hi ramo lugwakinira rau lotu, rau ngwasara vohoki.

¹⁵A Tangaloi hika, a nona bue na vuro hinea u hoko mo toko ngwalua tina kwakwana, vae ne vai vuro kinia vovohi na tangaloi vunuhi na ureure, ne guira. Aia vae ne hugwe korora, vae a kaimatai na nona huirana aia a kaitiko hinea u kihiana kina aean. Vae ne vai ne madi lakwara hoki na tangaloi hi mo bile sisineki na kwai na karo hi kwara a nubuki rana huki, rana vai a waen luga. Hika hokinia i God hinea u hago huirana lo kinau savia, u lologute haburu kinira, vae a nona lologute mo vaira.

¹⁶Lo lugwa na Tangaloi hi, mana balaona, rau uli na hinana kwara “A Hugwe Lakua koro na hugwe lalakua savia, vake a Hugwe* nona hugwe savia.”

¹⁷Hikani nomo tagai na kaihora tina taetae mo tu lo mataniaho. Mo koleki karakara mo viti lakwa na manu savia hinea ramo toko rovo lo mahaleki kwara, “Tulu vanamai tulu vileki tabulutaki lo kanikani lakua hika hinea i God mo vaia.

¹⁸Tulu vanamai tulu kani na vihiko na hugwe lalakua, vake a vihiko na kaitovo na vuro. Tulu kani na vihiko na tangaloi na vuro, a vihiko na osi maira mana tangaloiki. Tulu kani na vihiko na tangaloi savia, a tangaloi* hinea rau boloki vuroki tavuti na masi, maira hinea a masi he hugwe te korora, vake a tangaloi lalakua mana tangaloi haro nga.”

¹⁹Hikani nomo tagai na boboroa ovi hi, mana hugwe lalakua koro na varamana, mana noga tangaloi na vuro, ramo vileki tabulutaki kwara rana vai vuro vovohi na Tangaloi hi mo kwalao lo osi, mana nona tangaloi na vuro.

²⁰Hikani a tangaloi na vuro nona Tangaloi hi, rau vano ramo kwiribibi na boboroa ovi mana tangaloi duruduruki kurakura hinea tuai mo toko vai na vaisea lolo nako na boboroa ovi hi. A vaisea vano hi a tangaloi duruduruki kurakura hi mo toko vaira tuai. Mo sinasina na tangaloi hinea a kaimatai na boboroa ovi hi luga, mana tangaloi vano hi ramo sovi hivo vovohi na nunu hinea ramo tai dedekinia ramo toko lai noga mavakiana lakwae. Hikani a tangaloi na vuro vano hi ramo lavi na boboroa ovi hi mana tangaloi duruduruki kurakura hi raru ahi radu nga, ramo vohokirarua tilolo kwalu na kabu hinea a vuikani* tuku sea luna.

²¹A hugwe lalakua mana noga tangaloi na vuro, vae a Tangaloi hi mo kwalao lo osi mo kwohi matemateira kina bue na vuro hi mo ngwalua tina kwakwana. Vunu a manu ramo vanamai ramo kani na tarabehiga ramo kugwa kinira.