Read West Ambae REVELESEN 2 Bible Online

REVELESEN 2 - West Ambae bible

REVELESEN 2

¹Vunu mo kwaha maiau mo viti kwara, “Ko uli na leogu hika lakwa na kaihora tina taetae nona kwarelua* lo gwatuivanua Evesas, ko viti lakwara lo kwarelua hi kwara, ‘I nau nomo hagobibi na vitu kaibitu lo matuai kabagu, nomo toko lakao lo livuka na tutu na laeti hi kaibitu ramo tu, hinea rau kihira kina kol. Vae a leogu lakwakamu hokinia hika.

²“ ‘Nu kikilai na havakinau hi tulu mo toko vai. Nu kikilai kwara tulu boloki u huira, a domimiu u bua, vunu vake tulu he lagwa te vohoki mana tangaloi hinea rau tuku vai na hatiki. Nu kikilai kwara tulu kahi haro na leo nona tangaloi aira hinea rau viti kwara aira a kaihora* kokona vae rau tuku kura. Tulu hagwe kwara aira a tangaloi kurakura kehe nga.

³Nu kikilai kwara a domimiu u bua, vake a tangaloi rau vaikamu tulu mo rongo hati lo tarabehimiu huri na hinagu, vae a domimiu he sovi tea.

⁴“ ‘Vae a kinau aia hika nomo rongo hati kikamu luna hinea tulu he lagwa te maiau hika, hokinia tulu mo lagwa maiau tomua.

⁵Tulu ne domihagwe na tanotano hinea tulu mo tu luna tomua, lolona hi tulu he sovi te radu nga. Vae tulu ne bohi tina nomiu hatiana, tulu ne vai na kinau hinea tulu mo toko vai tomua. Vae diko tulu nehe bohi tea tina nomiu hatiana, na vanamai vaki maikamu na lavi na tutu na nomiu laeti tina tanotano hinea mo tu eia.

⁶“ ‘Vae a kinau katukwale tulu mo toko vai hinea u karea. Tulu bemiu kina doridori lo bulubulu noi Nikolas hinea ramo toko vai, vae i nau hokinia vake nu begu kinia.

⁷“ ‘A gweromiu eia. Tulu rongohuri na kinau hi a Tanungwe u viti lakwa na kwarelua doluaki. “ ‘Lakwara hinea rau gui na hatiki nari tiraki lakwara rana kani na kwai na vikai na mauriana hinea mo mauri lolo Talutalu na Rivurivu bulai God.’ ”

⁸Vunu mo kwaha maiau mo viti kwara, “Ko uli na leogu hika lakwa na kaihora tina taetae nona kwarelua* lo gwatuivanua Smana, ko viti lakwara lo kwarelua hi kwara, ‘I nau a tangaloi tomua halaradu, i nau a tangaloi ki rovonaki, hinea nu mate vae nu ahi taliku, vae a leogu lakwakamu hokinia hika.

⁹“ ‘Nu kikilai na nomiu rongoana hati rusa. Nu kikilai kwara tulu kakaravika, vae kareaki i kamu a tangaloi hugwe. Nu kikilai na leo hati rusa ramo toko vitira vovohikamu. A tangaloi aira hi rau tuku viti kwara aira a gwaloana noi Isrel*, vae rau kura, aira lo bulubulu noi Setano*.

¹⁰Tulu hatu mataku kina kinau doluaki hinea rana vaikamu tulu ne rongo hati luga. Tulu rongo. I Setano ne tau ratuaki tikamu tilolo ingwa na gwarugwaru kwara ne vaivai rongohikamu. A nomiu rongoana hati ne eno a rani hangavulu. Vae tulu tu ne madi vae rovonaki tulu ne mate, vunu nari betekamu kina ahiana, ne kwareki a kaikwokwori na gwatumiu hinea u vosangi kwara tulu gui na hatiki.

¹¹“ ‘A gweromiu eia. Tulu rongohuri na kinau hi a Tanungwe u viti lakwa na kwarelua doluaki. “ ‘Aira hinea rau gui na hatiki, a mateana vakairuaki nehe kihira tea.’ ”

¹²Vunu mo kwaha maiau mo viti kwara, “Ko uli na leogu hika lakwa na kaihora tina taetae nona kwarelua* lo gwatuivanua Pekamam, ko viti lakwara lo kwarelua hi kwara, ‘I nau a nogu bue na vuro eia u hoko dalidali, vae a leogu lakwakamu hokinia hika.

¹³“ ‘Nu kikilai na gwatuivanua Pekamam hinea tulu mo hugu eia. I Setano* u hugwe koro na gwatuivanua hi ba. Vae i kamu tulu kwiribibi na hinagu radu nga. Lolona ramo kwohi matei Antivas hinea u karohuri, u hago leo huriau lo vanuamiu Pekamam hinea i Setano u hugu eia, vae tulu he herevunikiau tea, tulu hauhuri lugu radu nga.

¹⁴“ ‘Vae a kinau te kairua nomo rongo hati kikamu luga. Takwa-hi maikamu, ratuaki rau huri na huhuiana nona tangaloi duruduruki hati i Balam hinea mo vosangi na hala lakwa na hugwe lakua i Balak kwara ne sina na gwaloana noi Isrel rana sovi tilo hatiana. A gwaloana noi Isrel vano hi ramo sovi luna hi ramo kani na hinaka hinea a tangaloi ramo toko hile lakwa na takaro vuroki maira, vake ramo vakasile mana ravavine.

¹⁵Lo hala hokinia hi a tangaloi ratuaki maikamu vake, rau huri na huhuiana lo bulubulu noi Nikolas.

¹⁶Vae huri hi, tulu ne bohi tina nomiu hatiana. Diko hetea, vae nana vanamai vaki maikamu hika lai nga, nana vai vuro mana tangaloi aira vano hi kina bue na vuro hinea u ngwalua tina kwakwagu.

¹⁷“ ‘A gweromiu eia. Tulu rongohuri na kinau hi a Tanungwe u viti lakwa na kwarelua doluaki. “ ‘Lakwara hinea rau gui na hatiki nari bete na hinaka aia hi a mana* u eno tavuniki, rana kania. Vunu vake nari bete na vatu mavute vatavatahakinira hinea a hinaga, a hina karagwa mo ulibibiana luna. A tangaloi rahe kikilaia tea, vae kehekeheki a tangaloi hinea ne lavia ne kwareki a nona, aia neri kikilaia.’ ”

¹⁸Vunu mo kwaha maiau mo viti kwara, “Ko uli na leogu hika lakwa na kaihora tina taetae nona kwarelua* lo gwatuivanua Tuatira, ko viti lakwara lo kwarelua hi kwara, ‘I nau i Natu i God hinea a matagu u sea hoki na kabu, a garugu u vilavila hoki na bras hinea rau buruia mo vilavila. Vae a leogu lakwakamu hokinia hika.

¹⁹“ ‘Nu kikilai na havakinau hi tulu mo toko vai. Nu kikilai na nomiu lagwaana, a nomiu karohuriana, a nomiu bolokiana mana nomiu domi bua. Nu kikilai kwara hika tulu boloki u siletia tomua.

²⁰“ ‘Vae nu rongo hati kikamu luna hika. Tulu mo tiraki na vavine hinea aia hoki i Sesebel mo hugu maikamu radu nga. U kwarekinia sibona kwara aia a tangaloi duruduruki noi God. U huhui na nogu tangaloi boloki u reveira tilolo hatiana. Ra toko va reraka maia, ramo kani na hinaka hinea a tangaloi rau hilea lakwa na takaro vuroki maira.

²¹Nu bete taro lakwae kwara ne bohi, vae he lengaia tea kwara ne bohi tina nona doridori hati.

²²Vae huri hi nari vohokinia tilo here kina lengeana lakua. Aia mana nona tangaloi hinea ramo toko reraka maia rana ngwalulu rana rongo hati haburu. Vae diko a tangaloi vano hi rahe bohi te tina noga doridori hati hi ramo toko vai mana vavine hi, na vai na kinau hi hika lai nga.

²³Hikani vake na kwohi matematei na tangaloi ramo toko huria, vunu doluaki na kwarelua ranari kikilai kwara i nau hinea nu kikilai na domidomi mana lengalengaiana nona tangaloi savia. Nari bete kaivoli lakwakamu doluaki vatavatahakikamu ne taritarisa mana kinauki hini tulu mo toko vai.

²⁴“ ‘Vae i kamu hi ratuaki lo gwatuivanua Tuatira tulu he huri te lo huhuiana hati hi, tulu he huhui na doridori te hinea ramo kwarekinia kwara, “A kinau haburu tavuniki noi Setano*.” Na viti lakwakamu nanahe tau na hagohago mava te dolua lumiu.

²⁵Vae tulu ne kwiri madimadi lo kinau hi tulu mo hago luna vae rovonaki nana mulemai.

²⁶“ ‘Aira hinea rau gui na hatiki, rau tuku vai na kinau hini i nau nu lengaia vae rovonaki lo gweregwereki, vae na hilera kina huirana aia hi nomo lavia ti Tamagu. Na tabera kwara rana hugwe koro na tangaloi doluaki lo varamana. A noga kaitiko hinea ne vosangi kwara aira a tangaloi lalakua aia hoki na aean hinea u taritarisa kwara ne vai vurivuri na tangaloi vano hi, hoki na aean u vai vurivuri na laha tano.

²⁸Vunu vake nari bete na vitu hi a ngwasoe na rani lakwara.

²⁹“ ‘A gweromiu eia. Tulu rongohuri na kinau hi a Tanungwe u viti lakwa na kwarelua doluaki.’ ”