Read West Ambae REVELESEN 20 Bible Online

REVELESEN 20 - West Ambae bible

REVELESEN 20

¹Hikani nomo tagai na kaihora tina taetae mo vanamai tina taetae, u hagovi na ki na kwalu bua hinea a kwotoki tikei, mana seni lakua.

²Hikani mo kwiribibi na alkita lakua, aia hi a ngwata tuai, hinea a hinana i “Setano*” diko “A Tangaloi Vai Bulabula”. Mo gwarua kina seni lakua hi, kwara ne hugu kwehi a hukao u tari.

³Vunu a kaihora tina taetae hi mo vohokinia tilolo kwalu bua hinea a kwotoki tikei, mo valiseki-bibi na katamaki. Mo bulubibia kwara vae a tangaloi nehe takahi lavia tea, kwara a alkita hi ne hatu sinasina na tangaloi taliku vae tarisaki a hukao tari ne rovo. A hukao tari ne rovo, vunu a alkita hika ne ngwalua, mo materi, mo lagalaga taliku, vae nehe tuai tea.

⁴Hikani nomo tagai na hagehagele hoki na hagehagele na hugwe lalakua, a tangaloi ramo hugu luga. I God u bete huirana lakwara kwara rana kwaheki na doridori na tangaloi. Vake nomo tagai na tanungwe na tangaloi hinea ramo tai utuutu gwatuga tuai, huri ramo viti huri na kareaki hinea i Jisas mo matangwasarakinia, mana leo i God. A tangaloi vano hi rahe sovi hivo tea vovohi na boboroa ovi hi mana nununa hinea a tangaloi ramo tai dedekinia kwara rana lai noga mavakiana lakwae, vunu vake a kaimatai na boboroa ovi hi tikei lo nakoga mana kabaga. Hikani ramo ahi taliku, ramo bulu mai Kraes, ramo kwareki a hugwe lalakua maia a hukao u tari.

⁵A mateana ratuaki rahe ahi te taliku vae tarisaki hi a hukao u tari ne rovo. Hikani a taro na marakaana tina mateana tomua halaradu.

⁶Aira hi rana maraka taliku tina mateana tomua halaradu ne havutira. I God ne tabera huri a mateana vakairuaki a nona huirana tikei korora. Vae aira rana kwareki a tangaloi* lingilingi noi God vake noi Kraes, vae rana bulu mai Kraes rana kwareki a hugwe lalakua maia a hukao u tari.

⁷A hukao u tari ne rovo, vunu rana tiraki Setano* ne ngwalua tina kwalu bua hinea ramo gwarua eia.

⁸Hikani vae ne vano laliki ne sinasina na tangaloi lo ureure rusa lo varamana, aira hi a tangaloi Gok mana tangaloi Magok. Vae i Setano ne lai tabulutakinira rana rusa hoki na one na tahi, kwara rana vai vuro vovohi na tangaloi noi God.

⁹Hikani lo vakatabobo hi nomo taga kwara a tangaloi vano hi ramo hivo dalidali ramo tu kakavuki na varamana. Ramo tu dalidali na tanotano hinea a tangaloi na vuro noi God ramo hugu eia, vunu vake dalidali na gwatuivanua lakua hinea i God u lagwa maia haburu. Vae hikani a kabu mo ngwalua vanamai tina taetae, mo kaokaora.

¹⁰Hikani i Setano, aia hi mo sinara, a kaihora lolo taetae u vohokinia tilolo kwalu lakua na kabu mana vuikani* hinea u seasea gwaravu. Lo kwalu hi a boboroa ovi hi mana tangaloi duruduruki kurakura raru mo hugu eia. Lo tanotano hi, u rani u bongi, vae rana rongo hati haburu tigwaravu kina kabu vaki tuai, a gwereki tikei.

¹¹Hikani nomo tagai na hagehagele lakua u lotu, a Tangaloi [21] katukwale u hugu luna. A varamana mana taetae raru mo titikeiki lo nako na Tangaloi hi, a tangaloi rahe tagairarua te taliku.

¹²Hikani nomo tagai na tangaloi rau mate, aira hi a tangaloi lalakua mana tangaloi haro nga ramo tu lo nako na Tangaloi hi mo hugu lo hagehagelena. Mo vukeri na buku* maira, mana buku katukwale vake hinea a hina na tangaloi rau ahi ramo eno luna. Vunu a Tangaloi hi mo kwaheki na doridori na tangaloi vano hi rau mate huri na doridori hi ramo toko vai tuai, aira hi rau eno lo buku vano hi.

¹³A tangaloi hinea rau mate lolo karata ramo vanamai. Vake a tangaloi vunuhia hinea rau mate ramo vanamai. A mateana mana tanotano na tanungwe na tangaloi hinea rau mate raru he kwiribibi lavira tea. A tangaloi aira vunu ramo tiraki na tanotanoga ramo vanamai. Vae a Tangaloi hi mo kwaheki na doridori na tangaloi vano hi rau mate huri na doridori hi ramo toko vai tuai.

¹⁴Vunu a mateana mo rovo. A mateana mana tanotano na tanungwe na tangaloi hinea rau mate, vae a kaihora lolo taetae mo vohokirarua tilolo kwalu na kabu sea. A kwalu na kabu sea hi aia a mateana vakairuaki.

¹⁵Vae aira hi a hinaga tikei lo buku na ahiana, a kaihora lolo taetae hi mo vohokinira tilolo kwalu na kabu sea.