Read West Ambae REVELESEN 21 Bible Online

REVELESEN 21 - West Ambae bible

REVELESEN 21

¹Hikani nomo tagai na taetae karagwa mana varamana karagwa. A taetae tomua mana varamana tomua raru mo titikeiki, vae a karata tikei.

²Vunu nomo tagai na Gwatuivanua Kokona Lakua, aia hi a vanua Serusalem karagwa. Mo hivo vanamai ti God tina taetae, u raraiana u rovo ba, u taritarisa hoki na vavine hinea kwara ne laki, ramo vakavulae mo karea kwara ne bulu mai tuana ngwarasea.

³Hikani nomo rongo na dilao mo tatangi vanamai tina hagehagele i God, mo kware karakara mo viti “I God u vai tatana mana tangaloi. Vae ne hugu maira tigwaravu, rana kwareki a bulana tangaloi. I God sibona ne bulu maira, ne kwareki a noga God.

⁴Aia ne kwasuki na mega tinangi savia tina mataga. Vae hikani a mateana ne tikei, vake hete tangaloi kwara ne tangihi na mateana. Hete tangaloi kwara ne tangi diko ne rongo hati lo tarabehina, huri a kinau vano hi tuai rau rovo ba.”

⁵Hikani a tangaloi hi mo hugu lo hagehagelena mo kwaha mo viti “!Hikani nu vai na kinau savia rau karagwa!” Mo viti lakweau taliku kwara, “Ko uli na leo hika huri a leogu u bakoto, a tangaloi savia rana hauhuri lai luna.”

⁶Vake u viti “!Hikani u rovo! I nau a Gwatakiki, i nau a Gwereki. I nau nu tinakaki na kinau savia, vunu na gweregwereira. A tangaloi hinea u madoku, vae na bete na kwai lakwae vuroki, hete kwara ne voli, u vanamai tina kwai mauri na ahiana.

⁷A tangaloi hinea u gui na hatiki ne lavi na tulikileo hika tiau. I nau na kwareki a nona God, vake aia ne kwareki i natugu.

⁸Vae a nogu tulikileo vake u eno lakwa na tangaloi hinea rau matamataku, vake lakwa na tangaloi hinea rau bohibohi leo, mana tangaloi hinea rau vai doridori rahe karea tea. A tulikileo hi u eno vake lakwa na tangaloi uamate tangaloi, mana tangaloi hinea rau vai doridori hati mana ravavine, mana tangaloi hinea rau vai a novo, vake mana tangaloi hinea rau tiutangaroa lakwa na takaro vuroki. U eno vake lakwa na tangaloi kurakura. A nogu tulikileo lakwara aia hika. A tangaloi vano hi a tanotanoga eia u eno. Rana vano tilolo kwalu hinea a kabu lakua mana vuikani* raru mo sea eia, aia hi a mateana vakairuaki.”

⁹Hikani a kaihora tina taetae katukwale u vanamai. Aia katukwale tiura hi kaibitu hinea tomua rau hagovi na laha kaibitu rau kukwere kina rongoana hati lalakua kaibitu, aira hi a rongoana hati lalakua ki rovonaki vohoki. Mo kwaha maiau mo viti kwara, “Mai, ko vanamai. Na vosangiko kina vavine aia hi a vavinehi na Sivsivi* Kelekele hinea ramo taubibia kwara ne laki maia.”

¹⁰A Tanungwe Kokona mo hivo tilugu, a nona huirana mo kwiribibiau, vae a kaihora tina taetae mo laviau tagaulu vaki lo vuhunge na vuti lakua katukwale hinea u tu aulu karakara. Mo vosangiau kina gwatuivanua Serusalem, aia hi a Gwatuivanua Kokona Lakua mo hivo vanamai ti God tina taetae.

¹¹A gwatuivanua lakua hi u vilavila kina hahaviada noi God, u vilavila hoki na vatu karekarea, hoki na sasva*, u ngwasara vohoki hoki na gelas hinea u vilavila.

¹²A titibaki hinea u tu tagaulu, u kwalao dali na gwatuivanua lakua hi, vake a matakihalaki hangavulu dongwana kairua. Vunu a kaihora tina taetae hangavulu dongwana kairua rau tagahuri na matakihala vano hi. Lo matakihala vano hi rau uli na hina na gwatuidamu hangavulu dongwana kairua nona gwaloana noi Isrel*.

¹³A gwatuivanua lakua hi, a ngwararaki kaivati, a matakihalaki kaitolu kehe nga. Luna hi vanamai mahuku ahake vovohi na mataniaho giri a matakihalaki kaitolu, vunu vanamai ahake mabeo kaitolu, vunu vanamai ahivo mahuku kaitolu, vunu rovonaki vanamai mabeo ahivo vovohi na mataniaho soro a matakihalaki kaitolu.

¹⁴A titiba na gwatuivanua lakua hi u tu lo vatu lalakua hangavulu dongwana kairua. Rau uli na hina na kaihora* kokona hangavulu dongwana kairua nona Sivsivi Kelekele, katukwale kehe nga lo vatu vano hi.

¹⁵A kaihora tina taetae hinea mo kwaha maiau u hagovi na kaidumu rau kihia kina kol, kwara ne dumuki na gwatuivanua lakua hi kwara u lakua diko u gwaravu hoki na havakinau, vunu a matakihalaki mana titibaki vake.

¹⁶Mo tagaia u bakoto vohoki u taritarisa, a gwaravuki mana lakuaki raru taritarisa. A kaihora tina taetae hi mo dumuki na gwatuivanua lakua hi kina nona kaidumu, mo hagwe na gwaravuki statia* u tari vakahangavulu-dongwana-kairua. Vunu a lakuaki maia hi u tu tagaulu u taritarisa hoki na gwaravuki.

¹⁷A kaihora tina taetae hi mo dumuki na titibaki vake, mo hagwea a kiubit* u vidolua eviki ngavu kaivati dongwaki kaivati, aia hoki na ngava ngavu kaitolu dongwaki kaiono hinea u tu tagaulu. A kaidumu hi a kaihora tina taetae mo dumudumu kinia aia hoki na kaidumu hinea a tangaloi ramo toko dumudumu kinia tigwaravu.

¹⁸A titiba na gwatuivanua lakua hi, rau kihia kina vatu karekarea lalakua hi a sasva, vunu a gwatuivanua lakua hi rau kihia kina kol hinea u ngwasara vohoki, u vilavila hoki na gelas.

¹⁹A tutu na titiba na gwatuivanua lakua hi, aira hi a vatu lalakua, rau vakavulara kina vatu mataroi rau karekarea. A tutu hi tomuaki rau vakavulae kina vatu hi a sasva. Kairuaki rau vakavulae kina vatu hi a savaea*. Kaitoluki rau vakavulae kina vatu hi a akat*. Vunu kaivatiki rau vakavulae kina vatu hi a emeral*.

²⁰Kailimaki rau vakavulae kina vatu hi a onikis*. Kaionoki rau vakavulae kina vatu hi a kanelian*. Kaibituki rau vakavulae kina vatu hi a kwos angora*. Kaikwaluki rau vakavulae kina vatu hi a malakaet*. Vunu kaihikwaki rau vakavulae kina vatu hi a tovas*. Hangavuluki rau vakavulae kina vatu hi a kalsetoni*. Hangavulu dongwaki katukwale rau vakavulae kina vatu hi a takwoes. Vunu hangavulu dongwaki kairua rau vakavulae kina vatu hi a ametis*.

²¹A katama na titiba hi hangavulu dongwana kairua katukwale kehe nga rau kihira kina perel*. Vunu a hala lolo gwatuivanua lakua hi rau kihira kina kol hinea u ngwasara vohoki, u vilavila hoki na gelas.

²²Nahe tagai na Ingwa Kokona te noi God lolo gwatuivanua lakua hi, huri a Hugwe i God hinea u hago huirana lo kinau savia, mana Sivsivi Kelekele, i rarua vunu hoki na Ingwa Kokona luna.

²³Lo gwatuivanua lakua hi a tangaloi rahe domi huri na mataniaho te mana vula kwara raru ne kwaka tiluga, huri a hahaviada noi God u kwaka tiluga, vake a Sivsivi Kelekele hi aia a noga laeti.

²⁴A tangaloi na ureure savia lo varamana rana lakalakao kina nona vavarama, vake a hugwe lalakua koro na varamana rana kwali noga kinau karekarea, rana vanamai rana tau tilolona.

²⁵A matakihala na gwatuivanua lakua hi rana kwakwanga tigwaravu doluaki na rani. Ranahe vono te vohoki, huri a bongi ne tikei eia.

²⁶Vae a tangaloi na ureure savia lo varamana rana lai noga kinau karekarea mana kinau hahaburuka savia, rana lavira tilolo gwatuivanua hi.

²⁷Vae savi na kinau hinea rahe ngwasara te lolo nako i God, mana tangaloi savia hinea rau tuku vai na maemaeana, mana kurakura, a tangaloi aira vano hi ranahe soro lai te vaki lolo gwatuivanua lakua hi. Vae a tangaloi aira hi a hinaga rau uliana lo buku* na ahiana nona Sivsivi Kelekele rana soro lai tilolona.