Read West Ambae REVELESEN 4 Bible Online

REVELESEN 4 - West Ambae bible

REVELESEN 4

¹Vunu takuni tina kinau hikani hi, nomote tagai na vakatabobo taliku, nomo tagai na matakihala katukwale u kwakwanga lolo taetae. Vunu a dilao mo tatangi hoki na tavui, aia hi nga nomo rongoa tomua. Hika mo kwaha maiau mo viti “Ko vanamai vaki hike, na vosangiko kina kinau hinea vae ranari vanamai te taroki.”

²Vunu heheriki a Tanungwe Kokona u hivo tilugu a nona huirana mo kwiribibiau. Nomo tagai na hagehagele lakua lolo taetae, a Tangaloi [3] katukwale u hugu luna.

³A nakona u kwaka u vilavila hoki na vatu karekarea hi a sasva* mana kanelian*. A nuenue u hariki dalidali na hagehagele lakua hi, a gelagelanaki u kwaka hoki na vatu hi a emeral* hinea u kesana hoki na rakai.

⁴A hagehagele dolua vake ngavu kairua dongwaki kaivati rau tu dalidali na hagehagele lakua hi, a ngwarasea* ngavu kairua dongwaki kaivati rau hugu lo hagehagele vano hi, rau huni a kaikwokwori na gwatu nona hugwe lalakua hinea rau kihira kina kol.

⁵A vila mo toko vila tina hagehagele lakua hi, a dumu na gwatuhari mo toko dadarea. A laeti lalakua kaibitu ramo sea lo nako na hagehagele lakua hi. Aira hi a tanungwe kaibitu noi God.

⁶Lo nako na hagehagele lakua hi, a kinau hoki na vilavila na tahi mo eno, aia hoki na gelas, vae u ngwasara hi u ngwasara vohoki. Lo livuka na kinau hi dalidali na hagehagele lakua hi lolo ngwahukuki hi kaivati tavaluki maia, a boboroa mauri kaivati rau tu, a mataga u rusa lengalenga, u kukwere lo tarabehiga tomua, vunu takuni lo gulaga vake.

⁷A boboroa mauri vano hi, katukwale aia hoki na laeon, kairuaki aia hoki na natu na buluki, kaitoluki a nakona aia hoki na nako na tangaloi, vunu kaivatiki aia hoki na mala mo toko rovo.

⁸Vatahaki na boboroa mauri vano hi kaivati, a kabaga kaiono kehe nga, vunu a mataga u rusa lengalenga u kukwere lo tarabehiga vunuhia, lolona maia tavalavarea vake. U bongi u rani rahe mabu te vohoki kina kahokaho, ramo toko viti “A Hugwe i God hinea a nona huirana eia vatavataha na kinau u kokona, u kokona, u kokona. Aia u toka tuai ba, u toka hika karagwa, vunu aia vae neri toka vaki tuai a gwereki tikei.”

⁹A boboroa mauri vano hi kaivati rau kaho na bolo kwara rana tabe hakeki na hina i God hinea u toka vaki tuai, a gwereki tikei, aia hi u hugu lo hagehagelena lakua, vake rau vai mavakinia, rau lagwakinia. Lolona ramo toko vai kwehi,

¹⁰a ngwarasea hi ngavu kairua dongwaki kaivati ramo sovi hivo kina domi mavakiana koro na nakona aia hi mo hugu lo hagehagelena lakua hi, ramo kaluhakinia hinea u toka vaki tuai a gwereki tikei. Ramo kakwo kaikwokwori na gwatuga ramo vohokinira tegetano vovohi na hagehagele lakua hi, ramo viti

¹¹“Nomai Hugwe, nomai God. I nigo ku tau vunuhi na kinau, vunu lo hala na domimu komo kwiribibi na kinau vano hi ramo eno mo karea, komo hile a mauriana lakwara. Vae huri hi, u taritarisa kwara a tangaloi vunuhia rana tabe hakeki na hinamu, rana sovi hivo vovohiko kina domi mavakiana, rana hugu tavuti na nomu huirana vaki tuai.”