Read West Ambae REVELESEN 5 Bible Online

REVELESEN 5 - West Ambae bible

REVELESEN 5

¹Hika nu tagai na buku* lo matuai kaba i God hinea mo hugu lo hagehagelena lakua hi, a rauki savia u kukwere kina uliuli. Rau lulukia ramo bulubibia kina bulu kaibitu.

²Vunu nomo tagai na kaihora tina taetae u huira haburu, mo koleki karakara mo viti “?Ihe hi u taritarisa kwara vae ne kakwoti na bulu kaibitu tina buku hika ne vukeria?”

³Vae rahe hagwe na tangaloi te lolo taetae diko lo varamana diko lo tanotano na mateana kwara ne vukeri lavi na buku hika ne tagataga luna.

⁴Nu rongo hati haburu nomo tangi, huri rahe hagwe lavi na tangaloi tea kwara u taritarisa kwara ne vukeri na buku hika ne tagataga luna.

⁵Vunu a tangaloi katukwale tina ngwarasea* mo kwaha maiau mo viti kwara, “Hatu tangi. !Ko tagaia! A Laeon hinea u gwalo vanamai lo gwatuidamu lui Suta, a gwaloana lui Devit, u gui na hatiki ba, vae ne kakwo lavi na bulu hi kaibitu, vunu ne vukeri na buku hi.”

⁶Vunu nu tagai na kairoroi* hinea a Sivsivi Kelekele [4] u tu lolo livuka na hagehagele lakua hi. A boboroa mauri kaivati mana ngwarasea vano hi ramo tu dalidalia. A Sivsivi Kelekele hi nomo tagaia hokinia rau kwohi mateia ba. A gwalana kaibitu vunu a matana kaibitu. A mata vano hi aira a tanungwe kaibitu noi God hinea u horara ba tilolo varamana doluaki.

⁷A Sivsivi Kelekele hi u vano mo lavi na buku tina matuai kaba i God hinea mo hugu lo hagehagelena lakua.

⁸Lolona a Sivsivi Kelekele hi mo vai kwehi, a boboroa hi kaivati mana ngwarasea hi ngavu kairua dongwaki kaivati ramo sovi hivo koro na nako na Sivsivi Kelekele hi. Rau hago bulaga gita vatavataha mana laha rau kihira kina kol rau kukwere kina kinau* boniboni, a kabuiahuki mo boniboni mo kwareki a tiutangaroa nona tangaloi noi God.

⁹Vunu rau kahoki a bolo karagwa, ramo viti “I nigo ku taritarisa kwara kona lavi na buku hi kona kakwoti na bulu vano hi, huri komo abe, vae kina daimu komo volitukuhi na tangaloi kwara rana kwareki a noi God. A tangaloi vano hi rau gwalo vanamai lo gwatuidamu vunuhia, rau vanamai lo leo gwatu na rusa, tina ureure savia, aira a tangaloi mataroi.

¹⁰Komo vaira ramo mulemai ki hugwe lalakua tavutimu, vake komo vaira ramo mulemai ki tangaloi* lingilingi kwara rana boloki lakwa na nomai God, vae rana hugwe koro na tangaloi lo varamana.”

¹¹Hikani nomo taga, nomo rongo na kaihora rusa lolo taetae u tari vakatari mulemule. Rau tu dalidali na hagehagele lakua hi mana boboroa mauri hi kaivati, mana ngwarasea vano hi,

¹²ramo kaho ramo viti “A Sivsivi Kelekele hi mo abe, aia u taritarisa kwara ne lavi na huirana, mana vivilagoki rusa, mana lolorani, mana rakahui. U taritarisa kwara tana vai mavakinia, tana tabe hakeki na hinana, vake tana kaluhakinia.”

¹³Vunu nu rongo vunuhi na kinau i God mo taura hinea a mabuga eia ramo toko kaho. A kinau vunuhia lolo taetae, lolo varamana, lolo tanotano na mateana, mana kinau vunuhia lolo karata, vunuhi na kinau i God mo taura hinea a mabuga eia lo varamana doluakinia, ramo toko kaho rau viti “I God hinea u hugu lo hagehagelena lakua mana Sivsivi Kelekele vake, u taritarisa kwara tana kaluhakirarua, tana vai mavakirarua, tana tabe hakeki na hinagaru, tana viti huri na nogaru huirana vaki tuai a gwereki tikei.”

¹⁴A boboroa mauri hi kaivati ramo daraki ramo viti “Io kareaki.” Vunu a ngwarasea vano hi ramo sovi hivo vovohia, ramo lai noga mavakiana lakwae.