Read West Ambae REVELESEN 7 Bible Online

REVELESEN 7 - West Ambae bible

REVELESEN 7

¹Vunu vaki takuni tina kinau vano hi, nu tagai na kaihora tina taetae kaivati rau tu lo ngwahukui na varamana hi kaivati. Rau tu koro na langi kaivati lo varamana kwara vae a langi ne hatu herei na tano, a tahi, diko te vikai.

²Vunu note tagai na kaihora tina taetae dolua vake u ngwalua vanamai lo hala na mataniaho giri, u vanamai mana kaimatai noi God Tatoka. Mo kware karakara vaki mana kaihora tina taetae aira hi kaivati hinea i God u bete na huirana lakwara kwara rana magaraki na tano mana tahi.

³A kaihora tina taetae hi mo viti kwara, “Tulu hatu magaraki na tano mana tahi diko doluaki na vikai, vae tarisaki na matai doluaki na tangaloi boloki nona noda God kina kaimatai hika lo raega.”

⁴Hikani nu rongo na valuvalu na tangaloi hinea rau mataira kina kaimatai noi God lo raega. Aira u tari vakavidolua-eviki-ngavu-kaivati-ngavu-kailimaki-kaivati, [6] hinea rau vanamai vataha na gwatuidamu nona gwaloana noi Isrel*.

⁵Lo gwatuidamu lui Suta, a tangaloi u tari vakahangavulu-dongwana-kairua. Lo gwatuidamu lui Ruben, a tangaloi u tari vakahangavulu-dongwana-kairua. Vunu lo gwatuidamu lui Gat, a tangaloi u tari vakahangavulu-dongwana-kairua.

⁶Lo gwatuidamu lui Asere, a tangaloi u tari vakahangavulu-dongwana-kairua. Lo gwatuidamu lui Navtali, a tangaloi u tari vakahangavulu-dongwana-kairua. Vunu lo gwatuidamu lui Manase, a tangaloi u tari vakahangavulu-dongwana-kairua.

⁷Lo gwatuidamu lui Simion, a tangaloi u tari vakahangavulu-dongwana-kairua. Lo gwatuidamu lui Livae, a tangaloi u tari vakahangavulu-dongwana-kairua. Vunu lo gwatuidamu lui Isakara, a tangaloi u tari vakahangavulu-dongwana-kairua.

⁸Lo gwatuidamu lui Sevulun, a tangaloi u tari vakahangavulu-dongwana-kairua. Lo gwatuidamu lui Sosev, a tangaloi u tari vakahangavulu-dongwana-kairua. Vunu lo gwatuidamu lui Bensamen, a tangaloi u tari vakahangavulu-dongwana-kairua.

⁹Takuni tiua hi, nu tagai na vao lakua lengalenga, a tangaloi nehe valu lavira tea. Aira a tangaloi mataroi, rau gwalo vanamai lo gwatuidamu vunuhia, tina ureure savia, vake rau vanamai lo leo gwatu na rusa. Hikani rau tu vovohi na hagehagele lakua hi, vake koro na nako na Sivsivi* Kelekele, rau lugwaki a lugwa lotu, rau kwali a rau here lo kabaga.

¹⁰Ramo toko kware karakara, rau viti “A noda God, aia hi u hugu lo hagehagelena lakua, vake a Sivsivi Kelekele, i rarua raru mo vai na hala raru mo vakahikikami.”

¹¹Doluaki na kaihora lolo taetae vano hi rau tu dalidali na hagehagele hi mana ngwarasea* mana boboroa mauri hi kaivati. Vunu ramo sovi hivo ki nakoga vovohi na hagehagele lakua hi ramo kaluhaki God,

¹²ramo viti “!Io kareaki! A noda God hi u taritarisa kwara a tangaloi savia rana kaluhakinia, rana tabe hakeki na hinana, rana viti huri na nona lolorani, rana lagwakinia, rana vai mavakinia, rana viti huri na nona huirana mana nona rakahui vaki tuai, a gwereki tikei. !Io kareaki!”

¹³Vunu katukwale tina ngwarasea hi mo uhiau mo viti “?Ihe maira vano hi rau lugwaki na lugwa lotu? ?Rau vanamai ave?”

¹⁴Hikani nomo daraki nomo viti kwara, “Ngwarasea, nohe kikilai tea. I nigo ku kikilai.” Mo kwaha maiau mo viti “A tangaloi aira hika rau hagwe na rongoana hati lakua lolona hi a tangaloi rau vai bulakikinira haburu, vae hika rau ahi tina rongoana hati hi. Rau kwasu lugwaga ramo vaira ramo lotu kina dai na kairoroi* hinea a Sivsivi Kelekele.

¹⁵Vae huri hi ramo tu koro na nako i God hinea u hugu lo hagehagelena lakua hi, ramo boloki lakwae u rani u bongi lolo nona Ingwa Kokona. Aia hi hinea mo hugu lo hagehagelena lakua hi neri tagahurira huri u hugu maira.

¹⁶Nehe marakatira lai te taliku, ranahe madoku lai tea. A mataniaho nehe aho kadira tea, ranahe tatakugwahi tea kina ngwangwavia na aho lakua hi mo aho tiluga,

¹⁷huri a Sivsivi Kelekele aia hi lo livuka na hagehagele lakua hi, vae ne tagahurira hoki na kaitagahuri na sivsivi mo tagahuri na bulana sivsivi. Vunu neri turukinira vaki lo kwai mauri na ahiana. I God neri kwasu mamahaki doluaki na mega tinangi tina mataga.”