Read West-Central Limba Mathiyu 11 Bible Online

Mathiyu 11 - West-Central Limba bible

Mathiyu 11

¹Naa thanki Yisɔs nunkunɔkɔ bakarandeni nama bikɔhi iŋ biye beŋ, ndɛ pɛyɛŋ kɛndɛ ba kaa kaŋ thaninuwa iŋ ba niya kɛwandi ka mɛtiŋ ba tɔpɛ kɛndɛ baŋ.

²Yɔni wo Babiye woŋ kiŋ nde ka yeeli woŋ. Kɛna yuye ndɛ bɛyiniŋ ba Banikisi woŋ ni baŋ, huna ŋindi ndɛ bakarandeni nama binɔndi kɛnama.

³Ndɛ bindɛ nunkunɔkɔ ba bindɛ ka thɔnthiŋina Yisɔs na ba dɔma, na “E yina domo nde wɔ wo see woŋ, maa miŋ be dethiteke hɛlɛŋ ba wɔ hɛna?”

⁴Yisɔs mɛyiyɛ bindɛ ba dɔma, na “Kaaŋ tepe Yɔni na ba thanki beŋ yuyɔkɔ baŋ iŋ ba thanki beŋ kutiyɔkɔ baŋ.

⁵Bi mankɔy thaaya beŋ kute, awa bigbɛsinkɔy beŋ kaande, biya bi iŋ nthoonani kinɛnɔy ki bohe ka kɔtɔ ku ka wɔmɛti koŋ ka thinthi beŋ pethɔy, awa bilɔŋɔy ŋaiha beŋ yuye, bitukɛ beŋ ŋayino ka tuka haŋ, awa bamɔnɛŋ beŋ niyo kɛwandi Huseri Huyɔhɔy haŋ.

⁶Mayehitɔkɔ ma kiŋ ka biya bi sa yama sikiŋ sɔkɔrɔ beŋ.”

⁷Naa bohe bakarandeni bi ka Yɔni beŋ duwa, Yisɔs bohe gbonkitiyande sɛthɛ baŋ ba Yɔni, na “Mbɛ mu nde beŋ key ka detha ka wula baŋ? E buwari bu hande na nde beŋ kutu bu si ŋɛna iŋ huru?

⁸Mbɛ hu nde beŋ kɛndɛ kaaye gbeeŋ? E ba ka detha wɔ thɔɔyɛ mugbɛkitɔkɔ muyɔhɔy? Biya bi thɔɔyɛ mugbɛkitɔkɔ muyɔhɔy bi kiŋ ka kaamani bibukuyuwɛ bi ka gbakuiŋ beŋ.

⁹Mbu mbɛ hu nde beŋ kaaye kɛndɛ haŋ gbeeŋ? E ba detha banabi? Yaŋ tepe bena, beŋ thanki nda kuta wɔ yamɛ ba banabi,

¹⁰baa ba Yɔni bɛna gbalo wuŋ ka magbali ma ka Masaala maŋ ba dɔma, na ‘Masaala tepe ba dɔma, na, yaŋ kɔŋ ŋindi baseri wokiyaŋ woŋ ka kɔtɔkɔy kɛnda, wo ka kɔsinɔkɔ gboŋa baŋ ba yi.’

¹¹Yaŋ kɔŋ bena tepe nɔndi baŋ, Yɔni wo Babiye woŋ yameŋ ba wɔ yo wɔ ka faido. Kɛrɛ ndɛ wo thahuwɔy woŋ ka Hugbakinɛ hu ka ariana haŋ, ndɛ na yamɛ ba Yɔni.

¹²There ka lɔkɔ ba Yɔni wo Babiye woŋ niye kɛwandi baŋ haaŋ saaŋ bohi hɛ, Hugbakinɛ hu ka ariana haŋ niyɔy thɔrɔ wumandiŋ. Awa biyamɛti bibaŋɔy yole ba huŋ pinda.

¹³Banabiŋ beŋ fooma iŋ Sirani ba ka Musa baŋ ni hunabi haaŋ e Yɔni saa.

¹⁴Awa mɛnɛ beŋ mɛyi ba maseriŋ mabɛina, Yɔni na Ilaiya wo domo nde ba ndɛ kɔ saa woŋ.

¹⁵Wɔ wo ba yuyɛ, ndɛ ponɛŋ kuiha.

¹⁶“Mbɛ mu yaŋ thɔyintande iŋ biya bi ka lɔkɔ ba hɛ baŋ? Bindɛ athɔyande nɔŋ mpati bi dɔŋɔ ka gbɔni baŋ niyo ka e bindɛ kɔ thiya bintɔni namɛŋ beŋ ba thurɔkɔ,

¹⁷na ‘Miŋ haŋiye bena yakali, kɛrɛ beŋ tha kaŋ. Miŋ soŋiye bena nthenkeyni, kɛrɛ beŋ tha bereŋ.’

¹⁸Naa see Yɔni, ndɛ bohe suŋ, awa ndɛ tha thiiye mampa. Biya beŋ fooma dome, na ‘Ndɛ boho iŋ wayi.’

¹⁹Hati wo domo wo ka Wɔ woŋ see wo thɔŋ e ndɛ kɔ thiiye, awa biya beŋ fooma dome, na ‘Batiki iŋ bayilɔ iŋ mampa na ndɛ; nyathiki wo ka bathuuni duthu na iŋ bahakɛŋ.’ Nama o nama kele hu ka Masaala haŋ hu kɔŋ tɔŋinɔkɔ ka yɛthɛ bakɛnama ba huŋ niyɔ nɔndi ka wumankɛ.”

²⁰Kɛna bohe Yisɔs gbonkiya wukahɛ-kahɛ ka biya bi ka mɛtiŋ babukuyuwɛ baŋ ka thanki ndɛ niya bɛyiniŋ bathakaba, baa bindɛ tha mɛyi ba sikina sɔkɔrɔ hakɛŋ namɛŋ baŋ ba saa ka Masaala.

²¹Ndɛ tɛpa, na “Nambara kendeŋ, bendo biKoresiŋ. Nambara kendeŋ bendo biBɛthɛseda, baa mɛnɛ bɛyiniŋ bathakaba ba thankɛ nde niyo kendeŋ do baŋ bɛna niyo nde ka biya bi ka mɛtiŋ ba ka Taya mɛnɛ ka Saidɔŋ baŋ beŋ, bi be ni Masaala na lanɛya beŋ, bi kɔŋ nde nɔŋ thɔɔkɔ yabɛŋ babɛkiŋ e bindɛ puyinɔkɔ hɔɔtɔ ba tɔŋina ba bindɛ kutɔkɔ mathonko e bindɛ sikiyɔkɔ maŋaye ka banɛnɔy namɛŋ baŋ.

²²Awa yaŋ tepe bena, ka lɔkɔ ba ka kukɔnsɔŋɔŋ koŋ baŋ, Masaala kɔŋ kutiyɛ biTaya mɛnɛ biSaidɔŋ nkinikiniŋ wuŋ yama ba beŋ.

²³Awa bendo biKapaniyɔmi, e beŋ kiŋ ba ŋatina yɛthɛ bakendeŋ ka thinthi ka ariana? Beŋ kɔŋ thathina ka pothi ka yahanama; baa mɛnɛ waliŋ bamandiŋ ba thankɛ niyo nde kendeŋ do baŋ bɛna niyo nde nɔŋ ka mɛti ba ka Sɔdɔmi, ba kɔŋ nde niyɔ kɛndɛ haaŋ hɛ.

²⁴Awa yaŋ tepe bena, ka lɔkɔ ba ka kukɔnsɔŋɔŋ koŋ baŋ, Masaala kɔŋ kutiyɛ biSɔdɔmi nkinikiniŋ wuŋ yama ba beŋ.”

²⁵Ka lɔkɔ babɛina, huna tepe Yisɔs ba dɔma, na “Fandaŋ woŋ, yindo Mariki wo ka ariana woŋ mɛnɛ ka faido, yaŋ thiyi yina maamo baa yi nunuŋ bɛyiniŋ baŋ baŋ ka bikele beŋ iŋ bithanuwɛ beŋ, e yi bɛŋ toŋine bi be kɔthɔ beŋ.

²⁶Nɛna huŋ yaathi Fandaŋ woŋ, yi ni mayɛthi makɛnda mɛnɛ mathimo makɛnda maŋ.”

²⁷Kɛna tepe Yisɔs bakarandeni nama beŋ ba dɔma, na “Fandaŋ woŋ thanki yama dunkune ntha yo ntha, awa wɔ ka wo punku kɔthɔ Hati woŋ yɔkɔŋ Fandaŋ na kɔthɛ yama, awa wɔ ka wo punku kɔthɔ Fandaŋ woŋ, yɔkɔŋ yaŋ, Hati woŋ, na kɔthɛ niŋ. Awa Hati woŋ na yɛthɛ bi ndɛ toŋine Fandama na.

²⁸“Saaŋ kiyaŋ do fooma, bendo dimbo doniŋ bakendeŋ beŋ, awa yaŋ kɔŋ bena hɛmɛni.

²⁹Kɔsinaŋ mathanani niŋ maŋ, awa e beŋ thanuwa maŋaye kiyaŋ, baa wɔ na yaŋ wo thathinɔkɔy iŋ wo thɛbɛ thukuma. Awa beŋ kɔŋ kutu kuhemuwe ka siini bakendeŋ baŋ,

³⁰baa mathanani niŋ maŋ baŋɔita kosino, awa doni niŋ baŋ ayethɔ.”