Read West-Central Limba Mathiyu 12 Bible Online

Mathiyu 12 - West-Central Limba bible

Mathiyu 12

¹Lɔkɔ banthe Yisɔs mɛnɛ bakarandeni nama beŋ bi kɔŋ nde daŋande ka dumgbu ba ka muthɛri ka Malɔkɔ Mahemuwe maŋ. Bakarandeni beŋ kaho kɔnthɔ. Kɛna bohe bindɛ thinka muthɛri muŋ, e bindɛ muŋ kɔ thɔma.

²Awa naa kute wuŋ biFaresini bi penkitiye kɛndɛ beŋ, bindɛ dome ka Yisɔs, na “Detha hɛ, bakarandeni nda beŋ bi si ni ba tepe Siraŋ bakɛntuŋ baŋ ba thana niyo ka Malɔkɔ Mahemuwe maŋ.”

³Huna tepe Yisɔs kɛnamɛŋ, na “E beŋ niyeta hɛ karaŋ ba ni nde gbaku woŋ Dauda baŋ iŋ lamgbeŋ bi nde iŋ wundɛ ka biyasi haŋ beŋ naa kaho nde bindɛ ŋakɔnthɔ?

⁴Ndɛ biyande nde ka banka ba ka Masaala baŋ e ndɛ ka sɛkitha ŋatoŋ ŋa deŋo nde kɛndɛ ŋaŋ nɔŋ munkii ka Masaala, e thɔma ŋɛŋ iŋ bi nde iŋ wundɛ ka biyasi haŋ beŋ. Wuŋ baŋ wu kiŋ ma sɔkinɔkɔ Siraŋ bakɛntuŋ baŋ ba wɔ hɛna ba thɔma ŋatoŋ ŋaŋ ŋaŋ baŋ daŋandeŋ bafodeni beŋ.

⁵Beŋ kɔthɛŋ nagberekethe ba beŋ thanki niya karaŋ ka Sirani ba ka Musa baŋ ba dɔma na Malɔkɔ Mahemuwe o Malɔkɔ Mahemuwe bafodeni bi ni wali ka banka bamandiŋ ba niye Masaala na kubatho baŋ bi kɔŋ ni ba tepe Siraŋ baŋ ba thana niyo ka Malɔkɔ Mahemuwe maŋ ba niya wali, kɛrɛ bindɛ ka iŋ mathonko hali.

⁶Yaŋ tepe bena, ntha ki kiŋ dondo baŋ ki yamɛ ba banka bamandiŋ ba niye Masaala na kubatho baŋ.

⁷Awa mɛnɛ beŋ kɔthɛŋ nde saabu ba ka magbonkoy maŋ maŋ ba dɔma, na ‘Nkinikiniŋ kina yaŋ kufiyo; wuŋ ka sarakɛŋ ba maamiŋ,’ beŋ sa nde thonkine bi ka iŋ mathonko beŋ,

⁸baa Hati wo domo wo ka Wɔ woŋ na kɛriŋiyɛ Malɔkɔ Mahemuwe maŋ.”

⁹Yisɔs pɛyɛŋ kɛndɛ e ndɛ ka biyande ka banka namɛŋ bathuŋuyande baŋ.

¹⁰Kɛna penke ndɛ hati lamgba wo tukɛ yɔnkɔ. Huna thonthiŋine bindɛ Yisɔs na, na “E wu kiŋ ma sɔkinɔkɔ Siraŋ bakɛntuŋ baŋ ba puya wɔ ka Malɔkɔ Mahemuwe maŋ?” Bindɛ kɔŋ nde deethi na bindɛ niŋ bohe ka Siraŋ.

¹¹Huna dome Yisɔs kɛnamɛŋ, na “Wɔ o ka wo, mɛnɛ taka nama thɔɔyɛ ka kufo ka Malɔkɔ Mahemuwe maŋ, wo sa niŋ katiyɛ yɔnkɔ ba niŋ fuŋuna.

¹²Mbu ntiŋ nda wɔmɛti wo yamɛ niyɔ wɔ waŋ woŋ daŋandeŋ taka woŋ? Huna wuŋ ka ma sɔkinɔkɔ Siraŋ baŋ ba niya bayɔhɔy ka Malɔkɔ Mahemuwe maŋ.”

¹³Bɛna dome ntiŋ Yisɔs ka hati lamgba wo tukɛ yɔnkɔ haŋ woŋ, na “Thumbuna yɔnkɔ nda haŋ.” Hati lamgba woŋ thumbuŋ yɔnkɔ nama haŋ, awa yɔnkɔ haŋ pethɔy nagbelebe nɔŋ na huhuntheŋ haŋ na.

¹⁴Naa kute wuŋ biFaresini beŋ, bindɛ fuŋ ka gbada ka e bindɛ ka bɔha magbɔma ba na bindɛ bohe Yisɔs na ba niŋ kɔra.

¹⁵Naa kɔthɛ Yisɔs hu thanki bindɛ dɛɛnka ba ndɛ haŋ, ndɛ fuŋ kɛndɛ. Awa biya bimandiŋ yeme niŋ ka kaa. Ndɛ puyi bithoonɔy beŋ fooma,

¹⁶e ndɛ bindɛ pinda ba bi be tha ni na wuŋ kothiyo ba dɔma na ndɛ na puyɛ bindɛ.

¹⁷Wuŋ baŋ niyɔy haliko ba thiŋina hu tepe nde banabi woŋ Aisaya haŋ, na “Masaala tepe, na

¹⁸Bawali wokiyaŋ wo thanki yaŋ yɛthɛ woŋ, wo thimo yaŋ woŋ wumandiŋ iŋ thukuma niŋ haŋ fooma. Yaŋ kɔŋ niŋ thiyi Yina wokiyaŋ woŋ, awa ndɛ kɔŋ koyoŋ ba mathumbɛ ma ka kukɔnsɔŋɔŋ niŋ koŋ maŋ ka siyani bahɛna baŋ fooma.

¹⁹Ndɛ sa sisi ŋagbakali maa ba bɛnda ka gbonkiya. Awa wɔ sa yuyɛ thampa nama thaŋ ka mɛti baŋ,

²⁰ndɛ sa thinkinande kuthala kuhuthɔkɔy; ndɛ sa dɔmɔŋ mumɔɔli mu na dɔmɔɔtɔ, haaŋ yɔkɔŋ na wundɛ ni ba mathumbɛ niŋ maŋ kɛriŋa.

²¹Ka keŋ kukɛnama koŋ kɛna siyani bahɛna baŋ kahe thukuma.”

²²Naa hintiŋ Yisɔs kɛndɛ, kɛna sisi biya beŋ lamgba wunthe wo boho iŋ wayi, wo mankɔy thaaya e hɛlɛŋ mankɔ hothi. Awa Yisɔs puyi niŋ e ndɛ hɛlɛŋ kuta nagberekethe e ndɛ hɛlɛŋ punka gbonkiya.

²³Biya beŋ fooma ni thakaba wumandiŋ, e bindɛ dɔma, na “E ba hɔŋ woŋ na Hati ka Dauda woŋ?”

²⁴Kɛrɛ naa yuye huŋ biFaresini beŋ, bindɛ dome, na “Ka sɛmbɛ ba ka Beelesibuli baŋ ma kaniniyande biya iŋ mbayiŋ.”

²⁵Naa kɔthɛ Yisɔs hu bindɛ ka thathukuma, ndɛ dome kɛnamɛŋ, na “Mɛnɛ huybakine o huybakine hakande mateete e huŋ kɔ dekiyande ka yɛthɛ nama, huybakine hubɛina hu kɔŋ thanki. Awa mɛti na o ka maa kubɔri ku thiyɛ kugbaayuwande e muŋ punka kaa ka kɔtɔkɔy.

²⁶Mɛnɛ Sithani kanthe kufɛŋ kunthe ka huybakine nama haŋ, wuŋ thɔyande ba dɔma huŋ hakande mateete. Awa huybakine hubɛina hu kɔŋ thanki.

²⁷Beŋ tepe ba dɔma na yando kanthi mbayiŋ ka sɛmbɛ ba ka Beelesibuli baŋ, kɛrɛ beŋ siyuweta ba bakarandeni bikendeŋ beŋ kɔ kanthe mbayiŋ ka sɛmbɛ ba ka Beelesibuli baŋ. Wuŋ, wuna tɔŋinɛ ba dɔma na yaŋ hɛlɛŋ gbeeŋ, yaŋ kantheta mbayiŋ ka sɛmbɛ ba ka Beelesibuli baŋ.

²⁸Kɛrɛ mɛnɛ yaŋ kanthe mbayiŋ beŋ maŋaye ka sɛmbɛ ba ka Masaala baŋ, wuŋ thɔyande ba wuŋ niyɔ na Hugbakinɛ hu ka Masaala haŋ see kendeŋ.

²⁹“Wɔ o ka wo punku thinka banka ba ka basɛmbɛ ba niŋ tuuta, yɔkɔŋ ndɛ be niŋ yenke yuka. Wuna ndɛ niŋ punku tuuta.

³⁰“Wɔ o wɔ wo ka iŋ yaŋ, ndɛ kiŋ ba sɔkinɔkɔ yama; awa wɔ yo wɔ wo sa mase yama ba kɔminande ka tha banthe, ndɛ kiŋ ka pankitinuwande mu thanki yaŋ kɔminande muŋ ka tha banthe.

³¹Huna yaŋ tepe bena, hakɛ o hakɛ ba wɔ ni maa bɛyi o bɛyi banɛnɔy ba wundɛ gbonkoy, wundɛ kɔŋ bɛŋ punku peniyo. Kɛrɛ wɔ yo wɔ wo gbonkiye Yina wo ka Masaala woŋ wunɛnɔy, wɔ bɛina sa pɛniya.

³²Awa wɔ yo wɔ wo gbonkoy wunɛnɔy ba Hati ka Wɔ woŋ, wɔ bɛina kɔŋ pɛniya hakɛ babɛina. Kɛrɛ wɔ o wɔ wo gbonkoy wunɛnɔy ma sɔkinɔkɔ Yina wo ka Masaala woŋ, ndɛ sa pɛniya, ka lɔkɔ bahɛ baŋ maa ka lɔkɔ ba nɔŋ see baŋ.

³³“Kuyeŋ kuyɔhɔy kuna tɔŋ mutiŋ muyɔhɔy, maa kuyeŋ kunɛnɔy kuna tiŋ mutiŋ munɛnɔy, baa kuyeŋ koŋ ku kɔŋ kothiyo ka mutiŋ nama muŋ.

³⁴Beŋ, bendo kubɔri ku ka wɔthɔiŋ beŋ beŋ, nama beŋ punku gbonkiye bɛyiniŋ bayɔhɔy mahɛŋ ma e beŋ niyɔ biya binɛnɔy? Hothi haŋ hu kɔŋ gbonkoy fooma ba ka thukuma haŋ.

³⁵Wɔ yɔhɔy woŋ kɔŋ gbonkoy fooma ba kɔsɔŋ ndɛ ka thukuma nama haŋ; awa nɛna hɛlɛŋ wɔ nɛnɔy woŋ, ndɛ kɔŋ gbonkoy fooma ba kɔsɔŋ ndɛ ka thukuma nama haŋ.

³⁶“Yaŋ kɔŋ bena tepe, ka lɔkɔ ba ka kukɔnsɔŋɔŋ koŋ baŋ biyamɛti bi kɔŋ tɔŋ kuna bɛyi o bɛyi bamayɛini ba gbonkoy bindɛ,

³⁷baa maŋaye ka magbonkoy ndeŋ maŋ kɛna beŋ dunkuno mayoho iŋ Masaala, maa ka magbonkoy ndeŋ maŋ kɛna beŋ dunkuno mathonko.”

³⁸Kɛna see bikarimɔkɔiŋ binɔndi bi ka Siraŋ baŋ beŋ mɛnɛ biFaresini binɔndi ka Yisɔs e bindɛ dɔma kɛnama, na “Karimɔkɔ, miŋ thimoŋ ba kuta bɛyi bathakaba ba yi ni ba tɔŋɔŋ ba dɔma na sɛmbɛ nda baŋ ŋaye ka Masaala.”

³⁹Huna mɛyiyɛ bindɛ Yisɔs ba dɔma, na “Bendo biya bi ka lɔkɔ bahɛ baŋ, biya binɛnɔy bina beŋ awa beŋ tha dunkunɔkɔ ka Masaala. Bena dethi ba bɛyi bathakaba. Yaŋ sa bena toŋine bɛyi bathakaba daŋandeŋ ba niyɔy nde ka banabi woŋ Yona baŋ.

⁴⁰Nɔŋ na niyɔy nde nthɔŋ Yona gbɛɛni bitaati iŋ hura kataati ka kotho hu ka he womandiŋ woŋ, nɛna hɛlɛŋ Hati ka Wɔ woŋ niyɔ gbɛɛni bitaati iŋ hura kataati ka kuyɛkɛŋ koŋ naa ndɛ mankuwo.

⁴¹Ka lɔkɔ ba ka kukɔnsɔŋɔŋ koŋ baŋ, biya bi ka mɛti ba ka Niniba bi kɔŋ biyande ka huybakine hu ka ariana haŋ baa bindɛ sikiyɔkɔy ka Masaala na ni ndɛ Yona bindɛ kɛwandi. Kɛrɛ beŋ, beŋ kɔŋ thonkino. Yaŋ tepe bena, ntha ki yamɛ ba Yona ki kooyeŋ mateete makendeŋ.

⁴²Ka lɔkɔ ba ka kukɔnsɔŋɔŋ koŋ baŋ, gbaku woyɛrɛmɛ wo nde ŋaye ka kuyɛkɛŋ ku ka Siba ba saa ka poniyɛ gbaku woŋ Silamani na kuiha naa ndɛ thanani thampɛŋ thakele thaŋ, ndɛ kɔŋ ŋaye ka kɔɔ, awa e beŋ thonkino. Yaŋ tepe bena, ntha ki yamɛ ba gbaku woŋ Silamani ki kooyeŋ mateete makendeŋ.

⁴³“Naa wayi wonɛnɔy fuŋ ka wɔmɛti, ndɛ kɔŋ key kaŋ tharɔkɔ ka wulani ka ba kaa kaŋ deethuwa mahemuwe. Mɛnɛ ndɛ tha kutu ka ndɛ hemuwe,

⁴⁴ndɛ kɔŋ dɔŋ ka yɛthɛ nama, na ‘Yaŋ kɔŋ duuteke ka banka niŋ ka ŋaye nde yaŋ ka.’ Mɛnɛ ndɛ biyande ka banka baŋ, ndɛ kɔŋ bɛŋ pɛnki ba ka iŋ ntha, awa ba pithinɔy natharaŋ, ba kosinoko wuyɔhɔy.

⁴⁵Ndɛ kɔŋ fuŋ e ndɛ kaayiyɛ mbayiŋ bisɔŋ-biye bihɛna bi yamɛ nɛnɔ ba ndɛ. Bindɛ fooma bi kɔŋ biyande e bindɛ niya yikiya kɛndɛ. Awa maniyɔ ma ka wɔ bɛina ma kɔŋ nda yaŋ nɛnɔ adaŋande na nde ndɛ mayoŋ na. Nɛna nɔŋ wuŋ niyɔ ka biya bi ka lɔkɔ bahɛ baŋ.”

⁴⁶Naa nde hintiŋ Yisɔs gbonkiye biya beŋ, nandama mɛnɛ mbɛndama bibiyɛthɛŋ see kɔɔ ka gbada e bindɛ kɔ yumba ba niŋ gbonkitiyande.

⁴⁷Kɛna dome wɔ wunthe ka biya beŋ ka Yisɔs, na “Ya nanda na mɛnɛ mbɛnda bibiyɛthɛŋ bi kooye ka gbada, awa bi thimoŋ ba yina gbonkitiyande.”

⁴⁸Huna dome ndɛ ka biya beŋ ba dɔma, na “Mbɛ nandaŋ, awa mbɛ mbɛndaŋ bibiyɛthɛŋ?”

⁴⁹Kɛna pɛmpɛŋɛŋ ndɛ thɛnkɔ nama thaŋ ka bakarandeni nama beŋ e tɛpa ba wuŋ niyɔ, na “Bena binandaŋ mɛnɛ mbɛndaŋ bibiyɛthɛŋ,

⁵⁰baa wɔ yo wɔ wo ni mathimo ma ka Fandaŋ wo ka ariana woŋ, ndɛ na wɛndaŋ wowathe, wɛndaŋ woyɛrɛmɛ, mɛnɛ nandaŋ.”