Read West-Central Limba Mathiyu 14 Bible Online

Mathiyu 14 - West-Central Limba bible

Mathiyu 14

¹Ka lɔkɔ babɛina Hɛrɔdi wo nde kɛrɛŋ ka kuyɛkɛŋ ku ka Kalili koŋ yuye ba Yisɔs.

²Awa huna dome ndɛ ka bakaamani nama beŋ, na “Hati lamgba wo ni bɛyiniŋ ba yaŋ yuyɛ baŋ baŋ woŋ, Yɔni na yaathi wo Babiye biye hu ka Masaala haŋ woŋ. Ndɛ na ŋaye hɛlɛŋ ka tuka haŋ. Wuna biyɛ ndɛ niyɔ iŋ sɛmbɛ ba punka niya bɛyiniŋ baŋ baŋ.”

³Saanuŋ Hɛrɔdi ba gbonkiya bɛyiniŋ baŋ baŋ, wundɛ niye nde nda yente Hɛrɔdiyasi na wuthɔkitɛ, wɔtɔ wɛndama Filipi. Kɛna key Yɔni wo Babiye woŋ ka kɔtɔkɔy ba niŋ tepe, na “Wuŋ sisandeta yi ba yɛnta Hɛrɔdiyasi na.” Awa huna niye Hɛrɔdi yamari ba Yɔni wo Babiye woŋ ka boho e ndɛ yuko e thiyo ka yeeli woŋ.

⁵Wundɛ yole gboŋa o gboŋa ba kɔra Yɔni na, kɛrɛ wo nde payɔ biya beŋ baa banabi namɛŋ na.

⁶Kɛrɛ ka lɔkɔ ba ka siyuwa malɔkɔ ma mpoo nde Hɛrɔdi maŋ, hati ka Hɛrɔdiyasi woyɛrɛmɛ woŋ kame wuyɔhɔy ka sɛthɛ bamandiŋ baŋ, awa wuŋ yehe gbaku woŋ Hɛrɔdi na.

⁷Kɛna ni niŋ gbaku woŋ lahiri e ndɛ gbiŋa ba dɔma, na “Ntha o ntha ki yama yi thɔnthɔŋɔŋ ba dunkuno, yaŋ kɔŋ yina kiŋ dunkune.”

⁸Nandama tepe niŋ hu ndɛ ka tepe gbaku woŋ. Awa hati woŋ key tepe gbaku woŋ, na “Dunkune yama yaha hu ka Yɔni wo Babiye woŋ haŋ ka ntha!”

⁹Naa yuye huŋ gbaku woŋ, wuŋ niyɔy niŋ nkinikiniŋ wumandiŋ, kɛrɛ saathɛ ba na thanki nda ndɛ gbiŋa, ndɛ ni yamari ba yaha hu ka Yɔni haŋ dunkuno.

¹⁰Kɛna ŋinde ndɛ ba yaha hu ka Yɔni haŋ ba huŋ ka thoŋo ka ndɛ ka yeeli woŋ ka.

¹¹Awa yaha haŋ kaayiyo e huŋ thiyo ka ntha e hati woŋ huŋ si dunkuno, awa hati woŋ kati huŋ ka nandama ka.

¹²Naa koro Yɔni, bakarandeni nama beŋ sekithe kubeli nama koŋ e bindɛ kuŋ ka mankuwa. Awa bindɛ key huŋ tepe Yisɔs na.

¹³Naa yuye Yisɔs ba Yɔni, ndɛ fuŋ ka nde ndɛ kɛ e ndɛ thɔɔ ka gbe e kaa ka tha ka ndɛ wuntheŋ. Naa yuye huŋ sɛthɛ baŋ, bindɛ pɛyɛŋ mɛtiŋ namɛŋ baŋ e bindɛ niŋ yema kaŋ yathiyɔkɔ gbaraŋ ba ka mankɔ maŋ.

¹⁴Naa fuŋ Yisɔs ka gbe baŋ e ndɛ dunkɔ ka thithɛ ka, ndɛ kute sɛthɛ bamandiŋ baŋ awa ndɛ kutiye bindɛ nkinikiniŋ e ndɛ puya bithoonɔy beŋ.

¹⁵Mahɔnkɔlɛŋ, naa bohe kaŋ woŋ thɔɔ, bakarandeni nama beŋ see kɛnama e bindɛ dɔma, na “Dutha du yɔthiŋɔy duna dondo baŋ, awa kaŋ woŋ bohe thɔɔ, niya ba sɛthɛ baŋ baŋ kaa ka thabikidiŋ thaŋ, bi be ka boyiyɔkɔ muthɔma.”

¹⁶Huna dome Yisɔs kɛnamɛŋ, na “Bindɛ kaaita kama o kama. Beŋ ka yɛthɛ bakendeŋ dunkuneŋ bindɛ muthɔma.”

¹⁷Huna dome bakarandeni beŋ ka Yisɔs, na “Ŋatoŋ ŋasɔhi iŋ heni biye muna iŋ miŋ nagbɛti.”

¹⁸Yisɔs dome kɛnamɛŋ, na “Sisaŋ muŋ kiyaŋ do.”

¹⁹Naa bohe ndɛ muŋ, ndɛ ni yamari sɛthɛ baŋ ba bindɛ dɔŋɔ ka hande haŋ. Kɛna sekithe ndɛ ŋatoŋ ŋasɔhi ŋaŋ mɛnɛ heni biye beŋ e detha ka thinthi. Ndɛ thiyɛ muŋ thaduba, awa ndɛ thinkinuwande muŋ e dunkune bakarandeni nama beŋ, ba bindɛ muŋ hana sɛthɛ baŋ.

²⁰Naa thɔŋ bindɛ muŋ, woma o woma ka bindɛ thimbɔy. Kɛna ŋutunuwande bakarandeni beŋ magbanthi maŋ e mɛŋ tɛŋa thadebe kɔhi iŋ thaye.

²¹Biyɛthɛŋ bɛrɛ ba wuluiŋ bisɔhi mɛnɛ yɛrɛmɛŋ iŋ mpatiyɛŋ bindɛ bina thɔmɛ.

²²Kɛna dome Yisɔs ka bakarandeni beŋ ba bindɛ thɔɔ ka gbe baŋ ba bindɛ niŋ kɔtiyɔkɔ ka thuhaŋ mankɔ maŋ, na hintiŋ ndɛ pɛyɔ kɛndɛ ba dututuwa sɛthɛ baŋ.

²³Naa thanki ndɛ dututuwa sɛthɛ baŋ baŋ, ndɛ dunkɔy ka kusɛri koŋ mahɔnkɔlɛŋ ba ka niya kuraminɛ ka ndɛ wuntheŋ.

²⁴Ka lɔkɔ baŋ baŋ gbe baŋ ba kiŋ nda wuthɔkiyande iŋ ka thithɛ ka, awa kɛna sɛsi bɛŋ ba gbantuwando iŋ thamunkulu thaŋ, baa huru haŋ abɔyi ka mankɔ maŋ.

²⁵Saanuŋ kaŋ woŋ ba puthɔ, Yisɔs see kɛnamɛŋ, e ndɛ kɔ kaande ka mankɔ maŋ ka thinthi.

²⁶Naa kute niŋ bakarandeni beŋ si kaande ka mankɔ maŋ ka thinthi, bindɛ payɔy wumandiŋ, e bindɛ dɔma, na “Kuyimɛi na woŋ baŋ.” Kɛna payɔy bindɛ e bindɛ berina sampɛrɛŋ batɔɔkɛ.

²⁷Ka wuthurɔy wubɛina, Yisɔs tepe bindɛ ba dɔma, na “Kahaŋ thathukuma. Yama. Baŋ payɔ.”

²⁸Huna meyiye niŋ Pita, na “Mariki, mɛnɛ yina hunɔndi, niya yama yamari ba yaŋ kaande ka mandi maŋ ka thinthi e yaŋ kaa kɛnda ka.”

²⁹Kɛna dome Yisɔs kɛnama, na “Saa.” Kɛna fuŋ Pita ka gbe baŋ e ndɛ bɔha kaande ka mandi maŋ ka thinthi ba kaa ka Yisɔs ka.

³⁰Kɛrɛ naa kute nthɔŋ ndɛ huru humandiŋ haŋ, ndɛ thooyo payɔ, awa ndɛ sɛsi ba mula ka mandi maŋ. Kɛna berintɔkɔy ndɛ, na “Mariki, niya yama kisi.”

³¹Ka wuthurɔy wubɛina Yisɔs katiyɛ niŋ yɔnkɔ e ndɛ niŋ thaye, e dɔma kɛnama, na “Yi kiŋ iŋ lanɛya bathahuwɔy. Mbɛ hu yi niyiye haamɛ ba niya lanɛya ba dɔma na yaŋ punkeŋ ba yi kaande ka mandi maŋ ka thinthi?”

³²Awa naa thɔɔyɛ Yisɔs iŋ Pita ka gbe baŋ, huru haŋ pɛyi hɔŋa haŋ.

³³Bakarandeni bi nde ka gbe baŋ beŋ fooma kunthuŋe ka kɔtɔkɔy ka Yisɔs e bindɛ dɔma, na “Hunɔndi yaathi, yina Hati ka Masaala woŋ.”

³⁴Naa thuhande bindɛ mankɔ maŋ, bindɛ tɛŋ ka tha ka dɔma na Kɛnɛsɛrɛti.

³⁵Awa naa kɔthɛ biya bi kɛndɛ beŋ ba dɔma na Yisɔs na, bindɛ ŋiindi thaseriŋ fooma ka kirinkiri hubɛina ba bithoonɔy beŋ fooma siso ka Yisɔs.

³⁶Naa sisi bindɛ bathoonani beŋ, biya beŋ theteke Yisɔs na ba ndɛ be mɛkɛŋ ba bathoonani beŋ hɔkɔŋ boheke kulɛmpilɛmpi ku ka yaba nama baŋ koŋ. Awa bathoonaŋ ndo bathoonaŋ wo boheke kulɛmpilɛmpi koŋ, ndɛ pethɔy.