Read West-Central Limba Mathiyu 15 Bible Online

Mathiyu 15 - West-Central Limba bible

Mathiyu 15

¹Kɛna see biFaresini binɔndi mɛnɛ karimɔkɔiŋ bi ka Siraŋ baŋ beŋ ka Yisɔs ŋaye ka mɛti ba ka Yɛrusalɛmi e bindɛ dɔma kɛnama, na

²“Mbɛ hu bakarandeni nda beŋ teetuwe naamu wo thaninuwo nde miŋ iŋ mbembɛŋ ntuŋ beŋ? Bindɛ sa loki thɛnkɔ na sisiyande bindɛ ba lokeke naa bindɛ bohe ba saa ka thɔma.”

³Huna meyiye Yisɔs bindɛ ba dɔma, na “Mbu beŋ? Mbɛ hu beŋ teetuwe yamari wo ka Masaala woŋ saathɛ ba naamu ndeŋ woŋ?

⁴Masaala ni nde yamari ba dɔma, na ‘Thiya fanda na mɛnɛ nanda na yiki,’ awa wundɛ tepe hɛlɛŋ, na ‘Wo gbonkiye fandama na mɛnɛ nandama na wunɛnɔy, wɔ bɛina kɔŋ tuku.’

⁵Naa wɔ niyɔy iŋ ntha ki sisande ndɛ ba dunkune fandama na maa nandama, beŋ thanani ba dɔma na mɛnɛ ndɛ kɔŋ dɔŋ kɛnamɛŋ, na ‘Masaala na biyɛ wuŋ,’

⁶na kabari na wo thane niye fandama na yiki ba niŋ dunkune muŋ muŋ baŋ. Huna saathɛ ba naamu wokendeŋ woŋ, beŋ buuhu yamari wo ka Masaala woŋ.

⁷Bendo banitɔkɔiŋ beŋ, banabi woŋ Aisaya tepe nde nɔndi yaathi ba beŋ ba dɔma, na ‘Masaala tepe, na

⁸Biya beŋ beŋ baŋ bi kɔŋ yama ni yiki iŋ thahothi namɛŋ thaŋ hɔkɔŋ, kɛrɛ thathukuma namɛŋ thaŋ tha thokiye yama,

⁹Huna, ba gboŋ na bindɛ yama niye kubatho, baa bi kɔŋ thanani sirani ba ka biyamɛti nɔŋ Sirani niŋ bɛna.’”

¹⁰Kɛna thiyi Yisɔs sɛthɛ baŋ kɛnama ka e dɔma kɛnamɛŋ, na “Ponaŋ kuiha awa e beŋ metho hu yaŋ bena see ka tepe haŋ.

¹¹Wuŋ ka ba dɔma na muthɔma mu thɔɔ ka hothi hu ka wɔmɛti muna niŋ pothoni, kɛrɛ thampɛŋ tha niŋ fuŋ ka hothi thaŋ thɛna niŋ pothoni.”

¹²Huna see bakarandeni beŋ kɛnama e bindɛ dɔma, na “E yi kɔita ba dɔma na biFaresini beŋ teetuwɔy thathukuma wumandiŋ naa yuye bindɛ hu gbonkoy yi haŋ?”

¹³Huna meyiye Yisɔs bindɛ, na “Muthuu o muthuu mu tha Fandaŋ woŋ thuu, mu kɔŋ ŋaka.

¹⁴Penekeŋ bindɛ, bindɛ athɔyande nɔŋ biya bi mankɔy thaaya bi katitɔkɔ biya bi mankɔy thaaya, awa mɛnɛ wɔ mankɔy thaaya katitɔkɔy wɔ mankɔy thaaya, bindɛ bibiye bibɛina bi kɔŋ ŋɔti ka kufo.”

¹⁵Huna dome Pita kɛnama, na “Methine mina hu tepe yi haŋ.”

¹⁶Huna dome Yisɔs kɛnamɛŋ, na “E beŋ hɛlɛŋ haaŋ hɛ beŋ methota?

¹⁷E beŋ kɔita ba dɔma na mu thɔɔ ka hothi hu ka wɔmɛti mu kɔŋ key toloŋ ka kotho ka, awa e muŋ fuŋa?

¹⁸Kɛrɛ mu fuŋ ka hothi hu ka wɔmɛti mu kɔŋ ŋaye ka thukuma nama haŋ. Muŋ muŋ baŋ muna niŋ pothoni,

¹⁹baa kɛna ŋaye masiyini manɛnɔy maŋ, kɔra haŋ ndo, ŋabɛini ŋahakuwande fooma, kutuwaŋ koŋ ndo, ba niya maseri maŋasɔkɛ yo, mɛnɛ ba teetuwa keŋ ku ka wɔ.

²⁰Muŋ muŋ baŋ fooma muna pothoni wɔmɛti, kɛrɛ ba thɔma wɔ tha lɔkɔkɔ na sisiyande wundɛ ba lokeke, huŋ kutɛ pothoni wɔmɛti.”

²¹Yisɔs pɛyɛŋ kɛndɛ e ndɛ kaa ka kirinkiri hu ka mɛtiŋ ba ka Taya mɛnɛ ka Saidɔŋ baŋ.

²²Kɛna see hati yɛrɛmɛ wo ka kuyɛkɛŋ ku ka Kenaŋ koŋ, wo nde ka kirinkiri hubɛina. Ndɛ see berine Yisɔs na ba dɔma, na “Hɛmɔŋ, kutiyɛ yama nkinikiniŋ, yindo Hati ka Dauda woŋ. Hatiŋ woyɛrɛmɛ ŋoyeŋ kɛndɛ wukahɛ baa wo kutande iŋ wayi.”

²³Kɛrɛ Yisɔs tha niŋ gbonkitiyande hali. Awa kɛna see bakarandeni nama beŋ kɛnama e bindɛ niŋ theteke ba dɔma, na “Niya ba hati yɛrɛmɛ woŋ kaa, baa ndɛ kɔŋ mina manki poro wumandiŋ.”

²⁴Huna niye Yisɔs bindɛ yaabi ba dɔma, na “Yaŋ ŋindo hɔkɔŋ ka biya bi ka Isirɛli bipiriŋɛ beŋ. Bindɛ athɔyande nɔŋ takɛŋ bi fuŋɛ ka yɔnkɔ hu ka wo tɔlɛ bindɛ woŋ.”

²⁵Kɛrɛ hati woyɛrɛmɛ woŋ see e ndɛ si kunthuŋa ka kɔtɔkɔy ka Yisɔs e dɔma, na “Hɛmɔŋ, mase yama.”

²⁶Huna meyiye niŋ Yisɔs, na “Wuŋ yeheta ba sɛkitha muthɔma mu ka mpati beŋ muŋ ba muŋ yɛliyɛ ŋatheŋ beŋ.”

²⁷Huna dome hati woyɛrɛmɛ woŋ ka Yisɔs, na “Hunɔndi yaathi hɛmɔŋ, kɛrɛ hali ŋatheŋ beŋ gbeeŋ bi kɔŋ ŋɔɔ ka pothi ka wo biyɛ bindɛ woŋ thome kɛ haliko ba thɛɛruwa ŋaboba ŋa ŋɔti ŋaŋ.”

²⁸Yisɔs mɛyiyɛ niŋ ba dɔma, na “O yi, yi kiŋ iŋ lanɛya bamandiŋ. Haliko wu niyiye nɛŋ na thonthiŋine yi na.” Ka thagbɛmgbɛŋ thabɛina hati nama woyɛrɛmɛ woŋ pethɔy.

²⁹Yisɔs pɛyɛŋ kɛndɛ e ndɛ kaa ka gbaraŋ ba ka mankɔ ma ka Kalili maŋ. Ndɛ key dunkɔ ka kusɛri koŋ ka thinthi, e ndɛ dɔŋɔ kɛndɛ.

³⁰Kɛna penko ndɛ iŋ sɛthɛ bamandiŋ bi sisɛ bathoonani, binɔndi ka bathoonani beŋ beŋ bagbɛthɛŋ, bimankɔy thaaya, bigbɛsinkɔy, baboboiŋ, mɛnɛ bi iŋ nthoonani kihakuwande, awa e bindɛ si dɛŋiyɛ Yisɔs na bindɛ. Kɛna puyi Yisɔs bindɛ fooma.

³¹Sɛthɛ baŋ ni thakaba wumandiŋ naa kute bindɛ baboboiŋ beŋ gbonkiya, bigbɛsinkɔy beŋ punka kɔɔ, bagbɛthɛŋ beŋ yatha, awa e bimankɔy thaaya beŋ kuta. Bindɛ gbuŋunu Masaala wo biIsirɛli beŋ ni kubatho woŋ.

³²Kɛna thiyi Yisɔs bakarandeni nama beŋ kɛnama ka e bindɛ tepe, na “Wuŋ niyɔy yama nkinikiniŋ wumandiŋ ba sɛthɛ baŋ baŋ, baa bindɛ niyɔy iŋ yaŋ ka gbɛɛni bitaati beŋ beŋ baŋ. Awa bindɛ thanki thɔma muthɔma namɛŋ muŋ. Yaŋ thimota ba bindɛ duuta mahɛŋ ma yaŋ tha bindɛ thɔmɔŋ, thampo naa bindɛ kɔ duu bi kɔŋ yilɔ ka gboŋa e bindɛ ŋɔɔtuwa.”

³³Huna dome bakarandeni beŋ kɛnama, na “Kama miŋ kute ŋatoŋ ka wula baŋ baŋ ŋa tɛŋ ba sɛthɛ baŋ baŋ?”

³⁴Huna thonthiŋine Yisɔs bindɛ, na “Tima ŋatoŋ ŋa iŋ beŋ?” Huna dome bindɛ, na “Ŋasɔŋ-ŋaye, mɛnɛ muheni muthahuwɔy.”

³⁵Kɛna ni Yisɔs sɛthɛ baŋ yamari ba bindɛ dɔŋɔ kɛkɛŋ.

³⁶Naa dɔŋɔy bindɛ, Yisɔs sekithe ŋatoŋ ŋasɔŋ-ŋaye ŋaŋ mɛnɛ muheni muŋ, e thiya Masaala na maamo ba muŋ. Naa thanki ndɛ muŋ thiyɛ maamo, ndɛ thinkinuwande muŋ e dunkune bakarandeni beŋ ba bindɛ dunkune biya beŋ. Naa bohe muŋ bakarandeni beŋ, bindɛ dunkune muŋ sɛthɛ baŋ.

³⁷Awa sɛthɛ bamandiŋ baŋ thɔŋ e woma o woma thimbɔ. Naa ŋaye bindɛ ka thɔma haŋ, bakarandeni beŋ ŋutunuwande magbanthi maŋ e mɛŋ tɛŋa thadebe thasɔŋ-thaye.

³⁸Biyɛthɛŋ bɛrɛ ba wuluiŋ binaŋ bina thɔmɛ. Yɛrɛmɛŋ iŋ mpatiyɛŋ bi thɔmɛ tha thiyita ka kɔnda.

³⁹Naa dututu Yisɔs sɛthɛ baŋ, ndɛ thɔɔyɛ ka gbe baŋ ba kaa ka kirinkiri hu ka mɛti ba ka Makadaŋ.