Read West-Central Limba Mathiyu 16 Bible Online

Mathiyu 16 - West-Central Limba bible

Mathiyu 16

¹Biya binɔndi bi dɔma na biFaresini mɛnɛ biSadusini beŋ key ka Yisɔs ba niŋ ka gbɛriŋina. Bindɛ see niŋ thɔnthɔŋɔŋ ba ndɛ be ni bɛyi bathakaba ba tɔŋɔŋ ba dɔma na ndɛ kiŋ iŋ sɛmbɛ ba ka Masaala baŋ.

²Yisɔs mɛyiyɛ bindɛ ba dɔma, na “Naa kaŋ woŋ kɔ thɔɔ, beŋ kɔŋ dɔŋ, na ‘Kuthahinɛ koŋ ayɔhɔ, baa miŋ kɔŋ kutu na pothoŋ kuŋ.’

³Awa sanka sanka beŋ kɔŋ dɔŋ, na ‘Koyoŋ kɔŋ niyɔ hɛ, baa kuthahinɛ koŋ kubɔlinɛ.’ Beŋ kɔthɔ nagberekethe na beŋ hakiniyande maniyɔ ma ka kuthahinɛ koŋ maŋ, kɛrɛ beŋ sa punku tɛpa mathɔyande ma ka bɛyiniŋ ba niyɔ ka lɔkɔ baŋ baŋ.

⁴Bendo biya bihɛ beŋ ani bɛyiniŋ banɛnɔy awa beŋ metheta ka Masaala. Beŋ kɔŋ dethi ba bɛyi bathakaba ba tɔŋɔŋ ba yaŋ niyɔ iŋ sɛmbɛ ba ŋaye ka Masaala baŋ. Kɛrɛ beŋ sa toŋino bɛyi bathakaba bahɛna yɔkɔŋ ba ka Yona baŋ nde.” Huna pɛyi Yisɔs bindɛ kɛndɛ e ndɛ kɔ kaa napooŋ.

⁵Naa thuhande Yisɔs mɛnɛ bakarandeni beŋ mankɔ maŋ, bakarandeni beŋ piitɔy ba diŋa muthɔmɛŋ ka kaa.

⁶Huna dome Yisɔs kɛnamɛŋ, na “Niyaŋ kuthɛgbɛ yisithi wo ka biFaresini beŋ mɛnɛ biSadusini beŋ woŋ.”

⁷Bindɛ sɛsi huŋ gbonkiya kɛndɛ bindɛ bithɔ ba dɔma, na “Yisɔs tepe haŋ haŋ baa na tha miŋ diŋ ŋatoŋ.”

⁸Kɛrɛ naa kɔthɛ Yisɔs hu bindɛ gbonkiyɔkɔ bindɛ bithɔ, ndɛ dome kɛnamɛŋ, na “Biya bi iŋ lanɛya bathahuwɔy bina beŋ. Mbɛ hu beŋ gbonkiyeke ba hu tha beŋ diŋe ŋatoŋ ka saa?

⁹E haaŋ hɛ beŋ methota? E beŋ piitɔy naa theriye nde yaŋ lamgbeŋ wuluiŋ bisɔhi ka ŋatoŋ ŋasɔhi ŋaŋ? Tima nde thadebe tha thiŋɛ magbanthi ma pɛyɛ maŋ naa ŋutunuwande beŋ?

¹⁰Maa ka ŋatoŋ ŋasɔŋ-ŋaye ŋaŋ iŋ lamgbeŋ wuluiŋ binaŋ beŋ? Tima nde thadebe tha thiŋɛ magbanthi ma pɛyɛ maŋ naa ŋutunuwande beŋ?

¹¹Mbɛ hu sa te beŋ metho ba dɔma na yaŋ gbonkiyeta bena ba ŋatoŋ ba na dome yaŋ, na ‘Niyaŋ kuthɛgbɛ yisithi wo ka biFaresini beŋ woŋ mɛnɛ biSadusini beŋ’?”

¹²Kɛna metho ntiŋ bindɛ ba dɔma na ndɛ tepeta bindɛ ba niya kuthɛgbɛ ba yisithi wo thiya ka kutoŋ koŋ woŋ, kɛrɛ ba mathanani ma ka biFaresini beŋ maŋ mɛnɛ biSadusini beŋ.

¹³Yisɔs pɛyɛŋ kɛndɛ e kaa ka kirinkiri hu thuriye ka mɛti ba ka Sɛsariya Filipai. Kɛna thonthiŋine ndɛ bakarandeni nama beŋ, na “Nama biyamɛti yama dɔŋ, yando Hati ka Wɔ woŋ na yaŋ?”

¹⁴Huna tepe bindɛ ka Yisɔs, na “Binɔndi bi kɔŋ dɔŋ na yina Yɔni wo Babiye woŋ, binɔndi bi kɔŋ dɔŋ na yina Ilaiya, awa binɔndi na Yɛrɛmaya, maa wunthe na yi ka banabiŋ beŋ.”

¹⁵Huna dome ndɛ kɛnamɛŋ, na “Kɛrɛ mbu nda beŋ? Nama siyuwe beŋ na yaŋ?”

¹⁶Huna dome Saimɔŋ Pita, na “Yina Banikisi wo yetho iŋ Masaala woŋ. Yina Hati ka Masaala wo iŋ sii ba kɔy o kɔy woŋ.”

¹⁷Huna meyiye niŋ Yisɔs, na “Yehitɔkɔ Saimɔŋ, yindo hati ka Yɔni woŋ, baa wɔmɛti kutɛ toŋine yina nɔndi baŋ baŋ. Kɛrɛ Fandaŋ wo ka ariana woŋ na toŋine yina bɛŋ.

¹⁸Awa yaŋ kɔŋ yina tepe, yina nda dɔma Pita, kuthara, awa ka kuthara koŋ koŋ baŋ kɛna yaŋ sesuwe ba kɔminiyande makɔmande ma ka biya bikiyaŋ beŋ, awa hali hintiŋ sɛmbɛ ba ka tuka haŋ baŋ sa mɛŋ punku teetuwa.

¹⁹Yaŋ kɔŋ yina dunkune masaapɛŋ ma ka Hugbakinɛ hu ka ariana haŋ. Awa bɛyi o bɛyi ba yi baŋaŋ ka faido, Masaala kɔŋ bɛŋ baŋaŋ ka ariana. Awa bɛyi o bɛyi ba yi yɛrɔkɔ ka faido, Masaala kɔŋ bɛŋ yɛrɔkɔ ka ariana.”

²⁰Kɛna yeli ndɛ bakarandeni beŋ wukahɛ-kahɛ ba bi be tha huŋ tepe wɔ yo wɔ ba dɔma na ndɛ na Banikisi woŋ.

²¹There nda ka lɔkɔ babɛina, Yisɔs sɛsi ba tepe bakarandeni nama beŋ nagberekethe ba dɔma, na “Yɔkɔŋ yaŋ be key ka mɛti ba ka Yɛrusalɛmi e yaŋ kɛndɛ ka niyo thɔrɔ wumandiŋ iŋ bakalani bibayahɛŋ beŋ, bafodeni bibukuyuwɛ beŋ, awa mɛnɛ bikarimɔkɔiŋ bi ka Siraŋ baŋ beŋ. Yaŋ kɔŋ kɔra, kɛrɛ ka gbɛɛŋ wo tɛŋinɛ wotaati woŋ, yaŋ kɔŋ hɛlɛŋ ŋayina ka tuka haŋ e yaŋ hɛlɛŋ niyɔ iŋ sii.”

²²Kɛna thiyi niŋ Pita ka bindɛ biye e niŋ pinda ba hu tepe ndɛ haŋ ba dɔma, na “Mariki, haliko Masaala niya yina huŋ thanka. Wuŋ sa yina punku niyɔ haaŋ nɔŋ.”

²³Huna dethe Yisɔs mahɛŋ e ndɛ dɔma ka Pita, na “Gbɔniyɔkɔ yama Pita, yindo sɛkithɛ kufɛŋ ku ka Sithani koŋ. Yindo kankilɛ gboŋa niŋ baŋ, baa masiyi makɛnda maŋ maŋ tha ŋaye ka Masaala, kɛrɛ ka kufɛŋ ku ka wɔmɛti kɛna ŋaye mɛŋ.”

²⁴Huna tepe Yisɔs bakarandeni nama beŋ, na “Mɛnɛ wɔ kiŋ ba yama yema, yɔkɔŋ ndɛ be thambo munki mu ka faido mu thimo ndɛ muŋ, e ndɛ thunkuteke nambarɛŋ ba niŋ pɛnki ba thɔyande nɔŋ kuyeŋ kubariŋande koŋ, e ndɛ yama yema.

²⁵Wɔ o wɔ wo yɔli ba kɔsina sii nama baŋ ka yɛthɛ nama, ndɛ kɔŋ bɛŋ piriŋiŋ; awa wɔ yo wɔ wo piriŋiŋ sii nama baŋ saathɛ ba kiyaŋ, ndɛ kɔŋ kutu sii.

²⁶Munahaŋ ndo ka wo wɔmɛti kutu ba piriŋina sii nama baŋ haliko ba kuta munki mu ka faido muŋ fooma. Wuŋ sa punku niyɔ hali. Ntha o ka ki wɔmɛti dunkuŋ ba kuta sii nama baŋ hɛlɛŋ.

²⁷Hati ka Wɔ woŋ kiŋ ba saa iŋ malekɛŋ nama beŋ mɛnɛ sɛmbɛ bamandiŋ ba ka Fandama woŋ baŋ ba si tɛnkiniyɛ wɔ yo wɔ ba ba thanki ndɛ niya baŋ.

²⁸Yaŋ kɔŋ bena tepe nɔndi baŋ, biya binɔndi bi kooyeŋ dondo baŋ bi sa niye tuke bi kɔŋ kutiyɔkɔ Hati ka Wɔ woŋ si kɛrɛŋ ka Hugbakinɛ nama haŋ.”