Read West-Central Limba Mathiyu 17 Bible Online

Mathiyu 17 - West-Central Limba bible

Mathiyu 17

¹Naa daŋande wuŋ mandɛni masɔŋ-manthe, Yisɔs thiyi Pita na, mɛnɛ biya bi huwɛndiya Yemisi mɛnɛ Yɔni. Ndɛ diŋe bindɛ ka thinthi ka kusɛri kuthɔkuwɛ-thɔkuwɛ ka bindɛ bintheŋ.

²Naa bindɛ niŋ dethi, kɛna thikipo Yisɔs, awa e yethi nama haŋ maleke nɔŋ kaŋ woŋ, awa e yaba nama baŋ huha napooŋ.

³Kɛna kute bakarandeni bitaati beŋ Musa na mɛnɛ Ilaiya e bindɛ kɔ gbonkiye Yisɔs na.

⁴Huna dome Pita ka Yisɔs, na “Mariki, wuŋ yɔhɔy na nda miŋ dondo na. Mɛnɛ yi kɔŋ mɛyi, yaŋ kɔŋ kiyi bankɛŋ bataati bathikɛŋ dondo baŋ, yi banthe, Musa banthe, Ilaiya banthe.”

⁵Naa ndɛ gbonkoy, kɛna see wuruma hu bɛndɛ-bɛndɛ pututɔ bindɛ, awa e thampa fuŋa maŋaye ka wuruma haŋ tha tɛpɛ ba dɔma, na “Hatiŋ wo thimo yaŋ woŋ na woŋ baŋ, wo yama yeheŋ thukuma woŋ. Huna poniyaŋ niŋ kuiha.”

⁶Naa yuye bakarandeni beŋ thampa thaŋ thaŋ baŋ, wuŋ niyɔy bindɛ gbɛki wumandiŋ e bindɛ ŋɔɔkɔ kɛkɛŋ e bindɛ pututɔ thayethi namɛŋ thaŋ.

⁷Huna see Yisɔs kɛnamɛŋ e ndɛ bindɛ tuta thɛnkɔ nama thaŋ e dɔma, na “Ŋayeŋ ka kɔɔ. Baŋ payɔ.”

⁸Kɛna ŋaye bindɛ ka ŋoke bindɛ ka. Kɛrɛ naa yili bindɛ thaaya, bindɛ tha nda kutu wɔ yo wɔ wohɛna kɛndɛ yɔkɔŋ Yisɔs ndɛ wuntheŋ napethi, ndɛ na kute bindɛ.

⁹Naa Yisɔs iŋ bakarandeni beŋ thuhu ŋaye ka kusɛri koŋ, Yisɔs ni bindɛ yamari ba dɔma, na “Baŋ tepe wɔ o wɔ ba thanki beŋ kuta baŋ, haaŋ nɔŋ yɔkɔŋ Hati ka Wɔ woŋ ŋayino ka tuka haŋ iŋ sii.”

¹⁰Huna thonthiŋine niŋ bakarandeni beŋ, na “Mbɛ ba dɔmɛ karimɔkɔiŋ bi ka Siraŋ baŋ beŋ bi kɔŋ tɛpi ba dɔma na yɔkɔŋ Ilaiya na nɔŋ yenke saa?”

¹¹Yisɔs mɛyiyɛ bindɛ, na “Nɔndi yaathi, nɛna tepe magbali maŋ, na Ilaiya na nɔŋ yenke saa, awa ndɛ kɔŋ si kɔsinɔkɔ bɛyiniŋ fooma.

¹²Kɛrɛ yaŋ tepe bena ba wuŋ niyɔ na Ilaiya thanki nde nda saa, kɛrɛ bindɛ tha nde niŋ ŋee, awa bindɛ ni niŋ nama o nama na thimo bindɛ. Nɛna hɛlɛŋ Hati ka Wɔ woŋ si niya nambara iŋ biyamɛti.”

¹³Kɛna kɔthɛ ntiŋ bakarandeni beŋ ba wuŋ niyɔ na ndɛ kɔŋ bindɛ gbonkiye ba Yɔni wo Babiye woŋ.

¹⁴Naa teŋiteke bindɛ ka sɛthɛ baŋ ka, hati lamgba wunthe see ka Yisɔs e ndɛ si kunthuŋa ka kɔtɔkɔy kɛnama e tɛpa, na

¹⁵“Hɛmɔŋ, kutiyɛ hati niŋ wowathe woŋ nkinikiniŋ, baa timo tima wo ŋɔti iŋ makɛndɔiŋ, awa wo kaho-kaho wumandiŋ. Tima o tima ndɛ kɔŋ ŋɔti ka buu, lɔkɔ hɛ ka mandi ka.

¹⁶Huna sise yaŋ niŋ ka bakarandeni nda beŋ, kɛrɛ bindɛ tha niŋ punku puya.”

¹⁷Huna dome Yisɔs kɛnamɛŋ, na “O biya bi be ni lanɛya iŋ biya bisikɔy, tima hɛlɛŋ nda yaŋ niyɔ iŋ beŋ? Mbɛ hɛlɛŋ nda muyuŋ ba yaŋ bena ni? Sisiyaŋ nuŋ hati woŋ dondo baŋ.”

¹⁸Kɛna bende Yisɔs wayi woŋ, awa wayi woŋ pɛyɛŋ hati woŋ. Ka thagbɛmgbɛŋ thabɛina hati woŋ pethɔy.

¹⁹Huna see bakarandeni beŋ nasɔɔyi ka Yisɔs e bindɛ dɔma, na “Mbɛ hu tha miŋ punke kaniniyande hati woŋ iŋ wayi woŋ?”

²⁰Huna dome Yisɔs kɛnamɛŋ, na “Baa kulanɛya kukendeŋ koŋ athahuwɔ tindɛ. Yaŋ kɔŋ bena tepe nɔndi baŋ, mɛnɛ beŋ hɔkɔŋ nthɔŋ niyɔ iŋ lanɛya bathahuwɔy nɔŋ thaa humɛɛsɛ hu dɔma na mɔstadi haŋ, beŋ kɔŋ punku dɔma ka kusɛri koŋ koŋ baŋ, na ‘Gbɔnɔkɔ dondo baŋ e yi kaa kanka baŋ.’ Awa ku kɔŋ gbɔnɔkɔ e kuŋ kɛndɛ kaa. Awa bɛyi o bɛyi ka ba sa beŋ punku niya. [

²¹Kɛrɛ yɔkɔŋ kuraminɛ mɛnɛ bɔha suŋ muna ni ba bɛyiniŋ baŋ baŋ punka niyɔ.]”

²²Naa thuŋande bakarandeni beŋ ka tha banthe fooma ka Kalili, Yisɔs dome kɛnamɛŋ, na “Hati ka Wɔ woŋ kɔŋ dunkuna ka thɛnkɔ tha ka biyamɛti,

²³awa bi kɔŋ niŋ kɔri. Kɛrɛ ndɛ kɔŋ ŋayina ka tuka haŋ ka gbɛɛŋ wo tɛŋinɛ wotaati woŋ.” Ka lɔkɔ baŋ baŋ wuŋ niyɔy bakarandeni beŋ nkinikiniŋ wumandiŋ.

²⁴Naa tɛŋ Yisɔs iŋ bakarandeni nama beŋ ka mɛti ba ka Kapaniyɔmi, bathuuni duthu bi ka banka bamandiŋ ba ka Masaala baŋ beŋ key ka Pita ka, e bindɛ dɔma kɛnama, na “E karimɔkɔ ndeŋ woŋ kɔŋ kɔ thunkuŋ duthu woŋ?”

²⁵Huna meyiye Pita, na “Ndo.” Awa naa tɛŋ Pita ka banka, Yisɔs yenke hintiŋ gbonkitiyande Pita na ba dɔma, na “Mbɛ mu siyuwe yi, Saimɔŋ? Kama gbakuiŋ bi ka faido beŋ bohi duthu? Ka lasiri baŋ maa ka biya bihɛna beŋ?”

²⁶Huna dome Pita, na “Ka biya bihɛna beŋ na bindɛ niŋ bohe.” Kɛna dome Yisɔs kɛnama, na “Awa lasiri baŋ sa nda thunkuŋ.

²⁷Kɛrɛ na ka miŋ ba bindɛ mina thooye ka mathoŋ, huna kaa ka mankɔ ka e yi ka yɛla danka baŋ, awa he wo yi yenke bɔha woŋ, kubunande hothi nama haŋ. Yi kɔŋ kɛndɛ kutu kɔbiri. Sɛkitha kɔbiri wobɛina e yi ka thunkuna bindɛ duthu woŋ ba yaŋ iŋ yi.”