Read West-Central Limba Mathiyu 19 Bible Online

Mathiyu 19 - West-Central Limba bible

Mathiyu 19

¹Naa thanki Yisɔs gbonkiya bɛyiniŋ baŋ baŋ, ndɛ pɛyɛŋ ka Kalili e ndɛ kaa ka kirinkiri hu ka Yudiya thuhaŋ mankɔ ma ka Yɔdaŋ maŋ.

²Naa ndɛ key, sɛthɛ bamandiŋ yeme niŋ ka kaa, awa ndɛ puyi bathoonani beŋ fooma.

³Kɛna see biFaresini binɔndi iŋ kuthɔnthɔŋɔŋ ba niŋ si gbɛriŋina ba kuta na bindɛ niŋ bohe ka Siraŋ. Huna dome bindɛ, na “E wu kiŋ ma sɔkinɔkɔ Siraŋ bakɛntuŋ baŋ ba wɔ ba baŋina wɔtɔ nama ba saabu o saabu ba yɛthi ndɛ?”

⁴Huna mɛyiyɛ bindɛ Yisɔs ba dɔma, na “E beŋ tha ni karaŋ magbali ma ka Masaala ma tɛpɛ ba wuŋ niyɔ na ka mathɛrɛŋ maŋ, Masaala yeheni wɔ wathe mɛnɛ wɔ yɛrɛmɛ.

⁵Awa ndɛ dɔma, na ‘Ba saabu baŋ baŋ huna wɔ wathe peyene fandama na mɛnɛ nandama na e bɔhande ka tha banthe iŋ wɔtɔ nama, awa biya bibiye beŋ beŋ see nda niyɔ nɔŋ wɔ wunthe.’

⁶Huna bindɛ ka nda biya biye, kɛrɛ bi kiŋ nda nɔŋ wɔ wunthe. Wu bohinande Masaala ka tha banthe, wɔmɛti bɛiŋ wuŋ paŋinande.”

⁷Huna dome biFaresini beŋ kɛnama, na “Mbu mbɛ hu niye nde Musa yamari ba dɔma na mɛnɛ wɔ baŋaŋ wɔtɔ nama, ndɛ kiŋ ba niŋ dunkune kuthagba ku iŋ magbali ma tɔŋɔŋ ba dɔma na ndɛ baŋaŋ niŋ?”

⁸Huna mɛyiyɛ Yisɔs bindɛ ba dɔma, na “Musa ni nde wuŋ baa beŋ akaahi thaninuwo. Kɛrɛ ka mathɛrɛŋ maŋ wuŋ ka nɛŋ hali.

⁹Awa yaŋ kɔŋ bena tepe, wɔ yo wɔ wo baŋaŋ wɔtɔ nama wu ka ba dɔma na wɔtɔ nama ni kubɛi e wɔ bɛina yɛnta yɛrɛmɛ wohɛna, ndɛ ni kubɛi ku teeti kuyɛntande kumayoŋ koŋ.”

¹⁰Huna dome bakarandeni beŋ kɛnama, na “Mɛnɛ nɛna wuŋ ba niiye ba wɔ iŋ wɔtɔ nama, wu kiŋ nda hita ba wɔ nda thana yɛnta.”

¹¹Huna dome Yisɔs kɛnamɛŋ, na “Biya fooma kutɛ yɛrɔkɔ mathanani maŋ maŋ baŋ, kɛrɛ ma kiŋ hɔkɔŋ nagbɛti ka bi dunkuno mɛŋ beŋ iŋ Masaala.

¹²Biya binɔndi bi kiŋ kɛndɛ bi iŋ saabuiŋ bahakuwande ba sa bindɛ yente. Binɔndi nɛŋ mpoo mɛŋ. Binɔndi bi kiŋ kɛndɛ biyamɛti bina niyɛ nɛŋ bindɛ. Awa binɔndi bi kiŋ kɛndɛ bindɛ bina yɛthɛ ba thana yɛnta saathɛ ba Hugbakinɛ hu ka ariana haŋ. Wɔ wo punku yɛrɔkɔ mathanani maŋ maŋ woŋ, ndɛ yɛrɔkɔyŋ mɛŋ.”

¹³Kɛna sisi biya binɔndi mpatiyɛŋ ka Yisɔs ba ndɛ be bindɛ tutu thɛnkɔ e bindɛ niyiyɛ kuraminɛ. Kɛrɛ naa kute wuŋ bakarandeni nama beŋ, bindɛ pinde biya beŋ.

¹⁴Huna dome Yisɔs ka bakarandeni beŋ, na “Niyaŋ ba mpati beŋ beŋ saa kiyaŋ do; baŋ bindɛ pindi, baa beŋ beŋ baŋ siiya bina biyɛ Hugbakinɛ hu ka ariana haŋ.”

¹⁵Yisɔs tute bindɛ thɛnkɔ e bindɛ niyiyɛ kuraminɛ. Naa thankaŋ ndɛ, ndɛ fuŋ kɛndɛ e kɔ kaa.

¹⁶Awa kɛna see hati lamgba wunthe ka Yisɔs e ndɛ dɔma, na “Karimɔkɔ, mbɛ bayɔhɔy ba yaŋ ni gbeeŋ haliko ba kuta sii ba kɔy yo kɔy?”

¹⁷Huna dome Yisɔs kɛnama, na “Mbɛ hu yama yi thonthiŋine ba bayɔhɔy ba yi ba niya? Masaala ndɛ wuntheŋ napethi ndɛ na wɔ yɔhɔy. Mɛnɛ yi kiŋ ba kuta sii ba kɔy yo kɔy, putiyɔ sirani ba dunkuŋ nde Masaala baŋ ka yɔnkɔ hu ka Musa.”

¹⁸Huna thonthiŋine hati lamgba woŋ Yisɔs na, na “Mbɛ sirani na?” Huna mɛyiyɛ niŋ Yisɔs, na “Ba kɔri, ba ni kubɛi, ba tuwe, ba ni maseri mahothi ba ntɔ nda,

¹⁹thiya fanda na iŋ nanda na yiki, awa e yi thimo ntɔ nda na nɔŋ na thimo yi yɛthɛ bakɛnda baŋ.”

²⁰Huna dome hati lamgba woŋ ka Yisɔs, na “Yaŋ thɔkɔti nde nda putiyɔ sirani baŋ baŋ fooma. Mbɛ hɛlɛŋ mu pɛyɛ yaŋ ba niya?”

²¹Huna dome Yisɔs kɛnama, na “Mɛnɛ yi thimoŋ ba niyɔ wɔ thankinuwɛ, kaa e yi ka niya gbɔŋ fooma munki mukɛnda muŋ, e yi dunkuna kɔbiri woŋ ka bamɔnɛŋ beŋ. Yi kɔŋ niyɔ iŋ hudinhaŋiya ka ariana, awa e yi tiŋ saa ba yama yema.”

²²Naa yuye huŋ hati lamgba woŋ baŋ, ndɛ sinkiŋ yaha e ndɛ kaa iŋ thukuma hu teetuwɔy baa ndɛ kiŋ iŋ nanhulu bamandiŋ.

²³Huna dome Yisɔs ka bakarandeni nama beŋ, na “Yaŋ kɔŋ bena tepe nɔndi baŋ, wu kɔŋ kaahi ba bananhulu ba biyande ka Hugbakinɛ hu ka ariana haŋ.

²⁴Yaŋ kɔŋ hɛlɛŋ bena huŋ tepe, akaahi ba maama womandiŋ nɔŋ nyɔkɔmɛ ba fuŋande ka mathaa ma ka masandeŋ. Ba bananhulu ba biyande ka Hugbakinɛ hu ka Masaala haŋ, wu kɔŋ yaŋ kaahuwa.”

²⁵Naa yuye huŋ bakarandeni beŋ, bindɛ ni thakaba wumandiŋ, e bindɛ dɔma, na “Mbu mbɛ wo nda niyɔ kisi?”

²⁶Huna dethe bindɛ Yisɔs e ndɛ dɔma kɛnamɛŋ, na “Biyamɛti sa punku niyɔkɔ kisi, kɛrɛ Masaala punkeŋ niya bɛyi o bɛyi.”

²⁷Huna dome Pita ba wuŋ niyɔ, na “Miŋ pɛyi ntha o ntha ba yina yema. Mbɛ mu nda miŋ kutu gbeeŋ maŋaye kɛnda?”

²⁸Huna dome Yisɔs kɛnamɛŋ, na “Yaŋ kɔŋ bena tepe nɔndi baŋ, ka fay woŋama wo see woŋ, Hati ka Wɔ woŋ kɔŋ dɔŋɔ ka yensi nama hu ka sɛmbɛ baŋ haŋ. Bendo yemɛ yama beŋ, beŋ kɔŋ hɛlɛŋ nɔŋ dɔŋɔ ka thayensi kɔhi iŋ thaye thaŋ ba kɔnsiŋina bɔnsɔni bakɔhi iŋ baye ba ka Isirɛli baŋ.

²⁹Ka lɔkɔ babɛina wɔ yo wɔ wo pɛyɛnɛ bankɛŋ nama, maa mbɛndama bibiyɛthɛŋ maa mbɛndama biyɛrɛmɛŋ maa fandama maa nandama maa mpati nama maa thakai nama ba saathɛ ba kiyaŋ, ndɛ kɔŋ tutiya kɛmɛ wunthe ka ntha yo ntha ki piriŋiŋ wundɛ awa ndɛ kɔŋ kutu sii ba kɔy yo kɔy.

³⁰Ka lɔkɔ babɛina, bibɔyɛ bi nde ka kɔtɔkɔy beŋ, bindɛ bina nda manki mahɛŋ; awa bimankɛ beŋ nde, bindɛ bina nda si niyɔ ka kɔtɔkɔy.