Read West-Central Limba Mathiyu 2 Bible Online

Mathiyu 2 - West-Central Limba bible

Mathiyu 2

¹Naa see Yisɔs mpaa ka mɛti ba ka Bɛthɛlɛhɛmi ba ka Yudiya, ka yamana wo ka gbaku woŋ Hɛrɔdi, biyɛthɛŋ bikele bi thanuwɛ ba sosɛŋ beŋ ŋaye kuwaŋ kubekede koŋ e bindɛ saa ka Yɛrusalɛmi kaŋ thɔnthiŋinuwa ba dɔma,

²na “Thɔɔ ka gbaku wo ka biYusu beŋ wo mpoo woŋ? Miŋ kute sosa nama woŋ kuwaŋ kubekede koŋ, awa huna see miŋ ba niŋ si niya kubatho.”

³Naa yuye huŋ gbaku woŋ Hɛrɔdi, ndɛ payɔy wumandiŋ. Nɛna niyɔy hɛlɛŋ nɛŋ wuŋ iŋ biya bi ka Yɛrusalɛmi beŋ fooma.

⁴Awa ndɛ kɔminande ka tha banthe fooma bafodeni bibukuyuwɛ beŋ mɛnɛ bikarimɔkɔiŋ bi ka Siraŋ baŋ beŋ, e ndɛ bindɛ thɔnthiŋina ba ka tha ka Banikisi woŋ ba mpoo.

⁵Bindɛ mɛyiyɛ niŋ, na “Ka mɛti ba ka Bɛthɛlɛhɛmi ka bompi wo ka Yudiya, baa nɛna gbale nde banabi woŋ: ‘Masaala tepe, na

⁶Awa yi, Bɛthɛlɛhɛmi, yindo ka bompi wo ka Yudiya, yi athahuwɔ kɛrɛ yina wunthe ka bakɛrɛni bisɔbɛ beŋ ka bompi wo ka Yudiya, baa maŋaye kɛnda kɛna bakɛrɛŋ woŋ ŋaye wo si kɛriŋiyɛ biyaŋ biIsirɛli beŋ.’”

⁷Kɛna thiyi Hɛrɔdi biya bikele beŋ magbɔma ba kɔthɔ kɛnamɛŋ lɔkɔ bagbeeŋ ba toŋineke sosa woŋ baŋ.

⁸Awa kɛna ŋindi ndɛ bindɛ ka Bɛthɛlɛhɛmi e ndɛ dɔma, na “Kaaŋ deethi kuthɛgbɛ nathɛ ba hati woŋ baŋ. Awa naa beŋ kute niŋ, saaŋ yama tepe. Yaŋ hɛlɛŋ gbeeŋ kɔŋ key ba niŋ ka niya kubatho.”

⁹Naa thanki bindɛ nunkunoko iŋ gbaku woŋ Hɛrɔdi, bindɛ key kubiyasi namɛŋ koŋ ka kɔtɔkɔy. Awa sosa wo kute nde bindɛ kuwaŋ kubekede koŋ woŋ kɔtiyɔkɔy bindɛ, haaŋ yɔkɔŋ naa tɛŋ ndɛ ka hati woŋ kɛ e ndɛ kɔ kɔɔ.

¹⁰Naa kute bindɛ na kɔɔyɛ sosa woŋ, wuŋ yehe bindɛ awa bindɛ yehitɔkɔy wumandiŋ.

¹¹Bindɛ biyande ka banka baŋ e bindɛ kuta Mariyama na iŋ hati woŋ, awa kɛna kunthuŋe bindɛ ka kɔtɔkɔy ka Yisɔs e bindɛ niŋ niya kubatho. Kɛna thiye bindɛ thɛnkɔ ka ponthoiŋ namɛŋ baŋ e bindɛ nkaa hati woŋ munkii muboyi, gbomgbo ba domo na Fankinsɛnsi, mɛnɛ tɛɛni ba domo na Mari.

¹²Naa ŋɔyɛ bindɛ ka nine, Masaala yeli bindɛ ka mandɛ ba bi be tha nda dapiyɔkɔ ka Hɛrɔdi ka. Awa naa bohe bindɛ duwa, bindɛ fuŋe gboŋa bahɛna ba duwa kɛnamɛŋ ka.

¹³Naa key bindɛ, maleka wo ka Mariki woŋ tɔŋinɔkɔy Yusufu na ka mandɛ e niŋ tepe, na “Ŋaye, e yi gbɔnina hati woŋ iŋ nandama dondo baŋ, awa e beŋ kaa ka Iyipiti, awa kɛna beŋ niyɔ haaŋ yɔkɔŋ yaŋ tepe nɔŋ bena ba beŋ duwa, baa Hɛrɔdi kɔŋ deethi hati woŋ ba niŋ kɔra.”

¹⁴Awa naa ŋaye ndɛ ka nine haŋ, ndɛ sekithe hati woŋ iŋ nandama woŋ huyɛ e bindɛ kaa ka Iyipiti.

¹⁵Kɛna niyɔy bindɛ haaŋ yɔkɔŋ na tuku Hɛrɔdi. Wuŋ baŋ niyɔy haliko ba thiŋina hu tepe nde Mariki woŋ haŋ ka hothi hu ka banabi woŋ, na “Maŋaye ka Iyipiti kɛna thiye yaŋ hatiŋ wowathe woŋ.”

¹⁶Naa kute Hɛrɔdi ba wuŋ niyɔ na biyɛthɛŋ bikele beŋ thɔkɔŋ niŋ, ndɛ thɔɔyɛ ka mathoŋ wumandiŋ. Kɛna dunkuŋ ndɛ yamari ba hati o hati wowathe wo tɛŋinɛ thanina thaye maa wo ba hɛ tindɛ tɛŋɛŋ ba ndɛ koro, there ka Bɛthɛlɛhɛmi, awa mɛnɛ lonkori wo tɔpɛ kɛndɛ woŋ fooma, baa biyɛthɛŋ bikele beŋ tepe niŋ ba sosa woŋ tɔŋinɔkɔ bɛrɛ ba thanina thaye nda.

¹⁷Hu tepe nde banabi woŋ Yɛrɛmaya haŋ see niyɔ nɔndi,

¹⁸ba dɔma, na “Thampa yuyo ka Rama, boka iŋ sampɛrɛŋ bamandiŋ. Retɛli kɔŋ bereŋ ba mpati nama, awa ndɛ tha mɛyi ba thaayuwo, baa ndɛ sa nɔŋ nda bindɛ kutu.”

¹⁹Naa tuku Hɛrɔdi, maleka wo ka Mariki woŋ see tɔŋinɔkɔ Yusufu na ka mandɛ ka Iyipiti, e ndɛ dɔma, na

²⁰“Ŋaye e yi sɛkitha hati woŋ mɛnɛ nandama, e beŋ kaa ka kuyɛkɛŋ ku ka Isirɛli, baa bi nde deethi ba kɔra hati woŋ thanki tuukuwa.”

²¹Yusufu ŋaye e ndɛ sɛkitha hati woŋ mɛnɛ nandama na e bindɛ duwa ka Isirɛli.

²²Kɛrɛ naa yuye Yusufu ba dɔma na Akɛleyɔsi na pɛyɛtɔy huybakine hu ka fandama Hɛrɔdi haŋ ka Yudiya, ndɛ see thooyo payɔ ba kaa kɛndɛ. Kɛna see ndɛ yela ka mandɛ iŋ maleka wo ka Masaala woŋ ba ndɛ be tha key kɛndɛ. Awa ndɛ key ka kuyɛkɛŋ ku ka Kalili koŋ.

²³Kɛna key ndɛ niyɔ ka mɛti banthe ba dɔma na ka Nasarɛthi, haliko hu tepe nde banabiŋ beŋ haŋ ba hati woŋ hu be niyɔ nɔndi, na “Ndɛ kɔŋ dɔma Nasarini.”