Read West-Central Limba Mathiyu 20 Bible Online

Mathiyu 20 - West-Central Limba bible

Mathiyu 20

¹“Hugbakinɛ hu ka ariana haŋ athɔyande nɔŋ mbɔrɔ ki ka bayɔy wo fuŋɛ kuputhɔ ku kaŋ ba sɛkitha lamgbeŋ bi niŋ niyiyɛ wali ka dumgbu nama ka.

²Naa kute ndɛ bindɛ, ndɛ bohinande iŋ bindɛ ka mɔlɔŋ ba ti nde wuŋ kɛndɛ thunkuna ba gbɛɛŋ woŋ. Awa ndɛ dome ntiŋ ba bindɛ kaa ka niya wali baŋ ka dumgbu nama ka.

³Naa tɔɔki theyaŋ haŋ, ndɛ fuŋ ba kaa ka kaande. Kɛna penke ndɛ lamgbeŋ bihɛna bi kooye ka gbɔɔni baŋ niyo ka bi ka iŋ wali ba bindɛ ni.

⁴Huna dome ndɛ kɛnamɛŋ, na ‘Kaaŋ ka niya wali ka dumgbu niŋ ka, awa yaŋ kɔŋ bena thunkuŋ na sisande wɔ o wɔ ba thunkuno.’

⁵Lamgbeŋ beŋ beŋ baŋ yɛrɔkɔy awa bindɛ key ka niya wali baŋ. Ndɛ ni hɛlɛŋ nɛŋ naa tɛŋ wuŋ hatɔ teete iŋ naa dɛkinɔy kaŋ woŋ.

⁶Naa tɛŋ wuŋ lɔkɔ ba yɛrɛmɛŋ tote, ndɛ fuŋ hɛlɛŋ e ndɛ kuta lamgbeŋ bihɛna bi kooye ka gbɔɔni baŋ niyo ka. Huna dome ndɛ kɛnamɛŋ, na ‘Mbɛ hu kooye beŋ dondo baŋ gbɛɛŋ, beŋ niyeta wali?’

⁷Huna dome bindɛ kɛnama, na ‘Baa wɔ ka wo sɛkithɛ mina ba niya wali.’ Huna dome ndɛ kɛnamɛŋ, na ‘Kaaŋ yama ka niyiyɛ wali ka dumgbu niŋ ka.’

⁸“Naa bohe kaŋ woŋ ba thɔɔ, wo biyɛ dumgbu baŋ woŋ dome ka lamgba nama woŋ, na ‘Thiya bawaliŋ beŋ fooma e yi si thunkuna bindɛ ba wali ba ni bindɛ baŋ. Kooye thunkuna haŋ ka wo manke sekitho woŋ, haaŋ e yi kaa ka wo yenke sekitho woŋ.’

⁹Naa bohe ndɛ thunkuna haŋ, ndɛ kooye ka bi sekitho ka lɔkɔ ba yɛrɛmɛŋ bohe tota baŋ. Bindɛ thunkuno ti wuŋ kɛndɛ thunkuna ba gbɛɛŋ woŋ.

¹⁰Naa see bi yenke hɛ sekitho beŋ ba thunkuno, bindɛ siyi ba dɔma na bi kɔŋ thunkuna wuyamɛ ba beŋ beŋ baŋ. Kɛrɛ bindɛ fooma thunkuno nanthe nathesi mɔlɔŋ ba ti wuŋ thunkuna ba gbɛɛŋ woŋ.

¹¹Awa naa bindɛ thunkuna, bi yenke hɛ sekitho beŋ bohe gbonkiyɔkɔ ma sɔkinɔkɔ bayɔy wo sɛkithɛ bindɛ woŋ

¹²ba dɔma, na ‘Wakathi wunthe ni na bi manke saa beŋ wali nagbɛti, kɛrɛ yi deŋine bindɛ nanthe iŋ mindo yenke hɛ saa beŋ e miŋ yiŋe niyɔ thɔrɔ nagbɛɛŋ ka kaŋ wotɔɔkɛ woŋ.’

¹³Huna dome ndɛ ka wunthe ka bindɛ, na ‘Nyathiki, yaŋ niyeta yina kɔɔtha hali.’ Yaŋ bohinande hɛ iŋ beŋ ka mɔlɔŋ ba ti wuŋ thunkuna ba gbɛɛŋ.

¹⁴Huna bɔhaŋ kuthunkuŋ ndeŋ koŋ, e beŋ kɔ kaa ka bankɛŋ ndeŋ. Yama yɛthɛ nɛŋ ba thunkune bimankɛ beŋ nɔŋ na yaŋ bena thunkune na.

¹⁵E ba hɔŋ yaŋ ka iŋ mayoho ba niya mathimo makiyaŋ ka ntha niŋ? Maa hunaŋ na beŋ kutu baa na ni yaŋ bayɔhɔy?”

¹⁶Huna manke Yisɔs dɔma kɛnamɛŋ, na “Bimankɛ beŋ bina nɔŋ kɔtɔkɔ, awa bikɔtɔkɔy beŋ nɔŋ manka.”

¹⁷Naa nde Yisɔs ŋati ba kaa ka mɛti ba ka Yɛrusalɛmi iŋ bakarandeni nama bikɔhi iŋ biye beŋ, ndɛ sakitɔkɔy bindɛ ka gboŋa e ndɛ bindɛ gbonkitiyande ba dɔma, na

¹⁸“Ponaŋ kuiha. Miŋ kɔŋ key ka mɛti ba ka Yɛrusalɛmi, awa kɛna Hati ka Wɔ woŋ ka dunkuno ka thɛnkɔ tha ka bafodeni bibukuyuwɛ beŋ mɛnɛ karimɔkɔiŋ bi ka Siraŋ baŋ beŋ, awa bi kɔŋ niŋ thonkine haaŋ e bindɛ niya ba ndɛ koro.

¹⁹Awa bi kɔŋ niŋ dunkuŋ ka thɛnkɔ tha ka biya bi be ni Masaala na kubatho beŋ, awa bi kɔŋ niŋ thiyi ŋasɛkɛ e bindɛ niŋ tawa, awa bi kɔŋ niŋ lɔŋ ka kuyeŋ kubariŋande koŋ e ndɛ kɛndɛ yantɔ haaŋ ndɛ kɛndɛ tuke. Kɛrɛ ndɛ kɔŋ ŋayina ka tuka haŋ ka gbɛɛŋ wo tɛŋinɛ wotaati woŋ.”

²⁰Awa kɛna see wɔtɔ ka Sɛbɛdi woŋ iŋ mpati nama biye bibiyɛthɛŋ e si kunthuŋa ka kɔtɔkɔy ka Yisɔs ba niŋ thɔnthiŋina ba niyiyo bɛyi banthe.

²¹Huna dome Yisɔs kɛnama, na “Mbɛ ba thimo yi ba yaŋ yina niyiyɛ?” Huna dome hati woyɛrɛmɛ woŋ, na “Niya yama lahiri ba mpatiŋ bibiyɛthɛŋ beŋ beŋ baŋ nɔŋ dɔŋɔ ka madoŋeŋ makɛnda mayiki maŋ, wunthe kuwaŋ ka yɔnkɔ nda huthome haŋ, wunthe kuwaŋ ka hupɔkɔdɔ haŋ, naa yi niyɔy nɔŋ gbaku.”

²²Huna meyiye Yisɔs ba dɔma, na “Beŋ kɔita hu beŋ thɔnthɔŋɔŋ haŋ. E bendo biye beŋ beŋ, beŋ kɔŋ punku ba thiiye kɔɔpu hu ka nambarɛŋ ba yama see ka pɛnka baŋ?” Huna dome bindɛ ka Yisɔs, na “Miŋ kɔŋ punku.”

²³Huna dome Yisɔs kɛnamɛŋ, na “Beŋ kɔŋ thiiye kɔɔpu hu ka nambarɛŋ baŋ haŋ yaathi, kɛrɛ yaŋ ka iŋ mayoho ba yɛtha bi dɔŋɔ ka yɔnkɔ niŋ huthome haŋ mɛnɛ hupɔkɔdɔ haŋ. Fandaŋ woŋ na yɛthi bi dɔŋɔ ka madoŋeŋ mayiki maŋ maŋ.”

²⁴Naa yuye huŋ bakarandeni bibintheŋ bikɔhi beŋ, wuŋ thoŋ bindɛ ba biya bi huwɛndiya beŋ beŋ baŋ.

²⁵Kɛna thiyi Yisɔs bindɛ ka tha banthe e dɔma, na “Beŋ kɔthɛŋ ba dɔma na biya bi kɛriŋiyɛ biya bihɛna bi be ni Masaala na lanɛya beŋ, bi kiŋ iŋ mayoho mamandiŋ ba bindɛ tuta sɛmbɛ.

²⁶Wuŋ ka ba niyɔ ka mateete makendeŋ. Mɛnɛ wɔ kiŋ ba niyɔ wɔ mandiŋ mateete makendeŋ, yɔkɔŋ ndɛ be niyɔ bawali wokendeŋ.

²⁷Awa wɔ wo ba niyɔ ka kɔtɔkɔy ka mateete makendeŋ woŋ, yɔkɔŋ ndɛ be niyɔ waayi wokendeŋ.

²⁸Beŋ kiŋ ba niyɔ nɔŋ Hati ka Wɔ woŋ. Ndɛ tha see ba niyiyo. Kɛrɛ ndɛ see ba niyiyɛ biya iŋ ba dunkuna sii nama baŋ ba bakiŋa biya fooma.”

²⁹Naa Yisɔs mɛnɛ bakarandeni nama beŋ pɛyɛŋ ka mɛti ba ka Yɛriko baŋ, sɛthɛ bamandiŋ yeme bindɛ ka kaa.

³⁰Awa kɛna penke bindɛ lamgbeŋ biye bi mankɔy thaaya bi doŋe ka gboŋa baŋ kuwaŋ. Naa yuye nthɔŋ bindɛ ba dɔma na Yisɔs na daŋande woŋ, bindɛ yele thampa ba dɔma, na “Yindo Hati ka gbaku woŋ Dauda, kutiyɛ mina nkinikiniŋ.”

³¹Huna wokitɔkɔy sɛthɛ baŋ bindɛ ba bi be daanɔkɔ. Kɛrɛ bindɛ tha daanɔkɔ. Bindɛ yame ntiŋ hɛlɛŋ lemgbiŋina sampɛrɛŋ batɔɔkɛ e bindɛ dɔma, na “Yindo Hati ka gbaku woŋ Dauda, kutiyɛ mina nkinikiniŋ.”

³²Huna kɔɔyɛ Yisɔs e ndɛ bindɛ thiya. Naa see bindɛ, huna thonthiŋine ndɛ bindɛ, na “Mbɛ mu thimo beŋ ba yaŋ bena niyiyɛ?”

³³Huna dome bindɛ kɛnama, na “Hɛmɔŋ, niya hɛlɛŋ ba miŋ kuta.”

³⁴Yisɔs kutiye bindɛ nkinikiniŋ e ndɛ boheke thaaya namɛŋ thaŋ. Ka thagbɛmgbɛŋ thabɛina, bindɛ kute nagberekethe e bindɛ yema Yisɔs na ka kaa.