Read West-Central Limba Mathiyu 22 Bible Online

Mathiyu 22 - West-Central Limba bible

Mathiyu 22

¹Yisɔs gbonkitiyande hɛlɛŋ biya beŋ ka mbɔrɔ ba dɔma, na

²“Hugbakinine hu ka ariana haŋ athɔyande nɔŋ mbɔrɔ ki ka gbaku wo kɔsinɔkɔy muthɔma ba malɔkɔ ma ti wundɛ yɛntiyɛ hati nama.

³Ndɛ ŋiindi bawaliŋ nama beŋ ba ka thiya bi thiyo beŋ ba ka penkitiye ka kuyɛntande koŋ beŋ. Naa key bindɛ thiya ba kaa, binɔndi tha mɛyi ba kaa.

⁴Ndɛ ŋiindi hɛlɛŋ bawaliŋ bihɛna e ndɛ bindɛ nunkunɔkɔ, na ‘Kaaŋ tepe bi thiyo nde beŋ ba dɔma, na yaŋ thanki nda kɔsinɔkɔ muthɔma muŋ fooma. Yaŋ kore manani bibukuyuwɛ mɛnɛ manani bidankɔy beŋ, awa yaŋ thanki kɔsinɔkɔ ntha yo ntha. Bi sɛɛŋ ka thɔma haŋ.’

⁵Kɛrɛ bindɛ yethitɔy huseri haŋ haŋ baŋ awa womo woma key ka thimo ndɛ ba kaa. Woŋ key ka dumgbu nama, woŋ key ka niya bɛyi bakɛnama.

⁶Bi pɛyɛ beŋ bohe bawaliŋ bi ŋindo beŋ, e bindɛ tawa bindɛ haaŋ e bindɛ kɔɔruwa bindɛ.

⁷Naa yuye huŋ gbaku woŋ, ndɛ thɔɔyɛ ka mathoŋ, awa ndɛ ŋindi kɛndɛ kurugbani nama beŋ ba bakɔriŋ beŋ beŋ baŋ ka kooruwo fooma e mɛti namɛŋ baŋ toonuwo.

⁸Huna thiye hɛlɛŋ ndɛ bawaliŋ nama beŋ e dɔma kɛnamɛŋ, na ‘Thɔma humandiŋ haŋ tɛŋ lɔkɔ, kɛrɛ bi thiyi yaŋ beŋ tha sisande ba saa ka thɔma haŋ baa bindɛ yethitɔy kuthiyi niŋ koŋ.’

⁹Huna dome ndɛ ka bawaliŋ beŋ, na ‘Pinthaŋ mɛti baŋ fooma e beŋ ka thiya wɔ yo wɔ wo beŋ kutu ndɛ be see ka thɔma haŋ.’

¹⁰Bawaliŋ beŋ pinthi mɛti baŋ e bindɛ ka thunkunuwande biya bi kute bindɛ beŋ fooma ka tha banthe, biyɔhɔy yo, mɛnɛ binɛnɔy. Kɛna see banka ba kuyɛntande koŋ niyo baŋ thiŋa iŋ biya bimandiŋ.

¹¹“Naa see gbaku woŋ fuŋ ba saa kaŋ detha bi sɛɛ beŋ, ndɛ kute kɛndɛ wɔ wunthe wo tha thɔɔ yaba bathɔɔkɔ ba ka kuyɛntande koŋ baŋ.

¹²Huna dome gbaku woŋ kɛnama, na ‘Nyathiki, mbɛ hu see yi dondo baŋ yi tha thɔɔ yaba bathɔɔkɔ ba ka kuyɛntande koŋ baŋ?’ Kɛrɛ wothiyo woŋ tha bohi hu ndɛ tɛpi.

¹³Huna dome gbaku woŋ ka bi sɛɛ beŋ, na ‘Yukaŋ niŋ thɛnkɔ mɛnɛ ŋathaki, e beŋ niŋ yɛla ka huntuma haŋ, ka biya thinkuwɔ thathukuma kɛ e bindɛ kɔ berina wuthoonɛ-thoonɛ.’”

¹⁴Kɛna gbanthaŋ Yisɔs ba dɔma, na “Biya bibɔyɛ bina thiyo iŋ Masaala, kɛrɛ biyete bina yetho ka Hugbakinɛ hu ka ariana haŋ.”

¹⁵Naa daŋande wuŋ, biFaresini beŋ key bohi magbɔma ba deethuwa na bindɛ bohe Yisɔs na ka magbonkoy nama.

¹⁶Huna ŋinde bindɛ bakarandeni namɛŋ beŋ mɛnɛ binɔndi bi kɔɔyɛ ba Hɛrɔdi beŋ ka Yisɔs ka. Naa tɛŋ bindɛ ka Yisɔs, bindɛ dome kɛnama, na “Karimɔkɔ, miŋ kɔthɛŋ ba dɔma na batɛpi nɔndi na yi, awa yi kɔŋ hɛlɛŋ thanani gboŋa ba ka Masaala baŋ ka nɔndi. Yi kahota ba kɔthɔ hu wɔmɛti siyi ba yi, awa yi kahota ba makooye ma ka wɔmɛti.

¹⁷Huna, tepe hɛ mina hu siyuwe yi. E wuŋ asisande maŋaye ka Siraŋ ntuŋ baŋ ba miŋ thunkuna duthu woŋ ka Gbaku wo ka Romaŋ woŋ, maa wuŋ sisandeta?”

¹⁸Kɛrɛ Yisɔs kɔthɛŋ magbɔma manɛnɔy makɛnamɛŋ maŋ, huna dome ndɛ kɛnamɛŋ, na “Mbɛ hu beŋ yama gberiŋinuwe, bendo banitɔkɔiŋ beŋ.

¹⁹Toŋineŋ hɛ nuŋ kɔbiri wo beŋ thunkuŋ duthu woŋ.” Kɛna sisi bindɛ kɔbiri woŋ kɛnama.

²⁰Naa bohe Yisɔs kɔbiri woŋ, ndɛ thɔnthɔŋɔŋ bindɛ ba dɔma, na “Mbɛ biyɛ yethi iŋ keŋ ka kɔbiri woŋ baŋ?”

²¹Huna dome bindɛ ka Yisɔs, na “Gbaku wo ka Romaŋ woŋ na.” Huna dome Yisɔs kɛnamɛŋ, na “Dunkuneŋ Gbaku woŋ wukɛnama wuŋ, awa e beŋ dunkune Masaala na wukɛnama wuŋ.”

²²Naa yuye bindɛ huŋ, bindɛ ni thakaba wumandiŋ, awa bindɛ pɛyi niŋ kɛndɛ e bindɛ kɔ kaa.

²³Ka lɔkɔ banthe babɛina biSadusini binɔndi see ka Yisɔs, bi tɛpɛ beŋ ba dɔma na biya sa ŋaye ka tuka haŋ hali. Huna thonthiŋine bindɛ Yisɔs na

²⁴ba dɔma, na “Karimɔkɔ, Musa tepe nde ka Siraŋ baŋ ba dɔma, na ‘Mɛnɛ wɔ wathe wo yɛntɛ tuku, awa ndɛ tha mpuu mpati, yɔkɔŋ wɛndama be yɛnti bagbokora woŋ, bi be mpuu mpati ba wɛndama wo tukɛ woŋ.’

²⁵Miŋ kiŋ nde dondo baŋ iŋ biya bisɔŋ-biye bi kotho hunthe. Womayoŋ woŋ yente, e ndɛ tuka, kɛrɛ ndɛ tha mpuu mpati iŋ woyɛrɛmɛ woŋ, awa wɛndama pɛɛtɔy bagbokora woŋ.

²⁶Nɛna niiye wuŋ ka wobiye woŋ, wotaati woŋ, haaŋ kaaŋ ka wosɔŋ-biye woŋ.

²⁷Naa thanki bindɛ tuukuwa fooma, woyɛrɛmɛ woŋ see ntiŋ manke tuka.

²⁸Ka lɔkɔ ba biya ŋaye ka tuka haŋ baŋ, nkaana biyɔ woyɛrɛmɛ woŋ? Bindɛ fooma thanki niŋ yɛnta.”

²⁹Huna meyiye bindɛ Yisɔs ba dɔma, na “Beŋ fooma piriŋinuwɔy, baa beŋ kɔita magbali ma ka Masaala maŋ, awa beŋ kɔita sɛmbɛ ba ka Masaala baŋ.

³⁰Naa biya ŋaye ka tuka haŋ, biyɛthɛŋ sa nda yɛnti, awa yɛrɛmɛŋ sa nda dunkuna ka yɛnto, baa biya bi kɔŋ nɔŋ niyɔ nɔŋ malekɛŋ bi ka ariana beŋ.

³¹Awa sɔkɔ hu ba ŋaye hu ka bitukɛ beŋ haŋ: E beŋ niyeta hɛ nɔŋ karaŋ hu tepe Masaala ka magbali nama maŋ haŋ ba beŋ? Ka tepe ndɛ kɛ ba dɔma, na

³²‘Yama Masaala wo Ebrahim ni kubatho woŋ, wo Aisaki ni kubatho woŋ, mɛnɛ wo Yakuba ni kubatho woŋ.’ Ndɛ ka Masaala wo bitukɛ beŋ ni kubatho woŋ, kɛrɛ ndɛ na Masaala wo bihɛmɛ beŋ ni kubatho woŋ.”

³³Awa naa yuye huŋ sɛthɛ baŋ, bindɛ ni thakaba wumandiŋ ba mathanani nama maŋ.

³⁴Kɛrɛ naa yuye biFaresini beŋ ba dɔma na Yisɔs ni ba biSadusini beŋ danɔkɔ nayeeŋ, bindɛ see kɔmande ka tha banthe.

³⁵Naa see bindɛ ka Yisɔs, kɛna thonthiŋine niŋ karimɔkɔ wunthe wo ka Siraŋ baŋ kuthɔnthɔŋɔŋ ba niŋ gbɛriŋina. Huna dome ndɛ ka Yisɔs, na

³⁶“Karimɔkɔ, mbɛ siraŋ ba yamɛ nthɔŋ nda fooma ka sirani baŋ?”

³⁷Huna dome Yisɔs kɛnama, na “Thimo Mariki woŋ Masaala wokɛnda woŋ iŋ thukuma nda fooma, iŋ sii bakɛnda fooma, mɛnɛ masiyi makɛnda fooma.

³⁸Siraŋ baŋ baŋ bɛna bamandiŋ baŋ nthɔŋ nda fooma, awa bɛna bamayoŋ baŋ ka sirani baŋ.

³⁹Awa ba tɛŋinɛ babaye baŋ athɔyande iŋ bamayoŋ baŋ: ‘Thimo ntɔ nda na nɔŋ na thimo yi yɛthɛ bakɛnda baŋ.’

⁴⁰Ka sirani babaye baŋ baŋ kɛna there Sirani ba ka Musa baŋ mɛnɛ mathanani ma ka banabiŋ beŋ maŋ.”

⁴¹Naa thuŋande biFaresini binɔndi beŋ ka tha banthe, kɛna thɔnthɔŋɔŋ Yisɔs bindɛ

⁴²ba dɔma, na “Nama siyuwe beŋ ba wo dɔma Banikisi woŋ? Mbɛ bɔnsɔŋ ba ŋaye wundɛ?” Huna dome bindɛ kɛnama, na “Ka bɔnsɔŋ ba ka gbaku woŋ Dauda baŋ.”

⁴³Huna dome Yisɔs kɛnamɛŋ, na “Mɛnɛ nɛna huŋ, mbu mbɛ ba dɔmɛ Yina wo ka Masaala woŋ niya gbaku woŋ Dauda ba thiya Banikisi woŋ, na ‘Mariki’? Baa ndɛ Dauda gbeeŋ, ndɛ tepe, na

⁴⁴‘Mariki woŋ tepe ka Mariki wokiyaŋ woŋ, na: Dɔŋɔ kuwaŋ ka yɔnkɔ niŋ huthome haŋ, ka madoŋe mayiki maŋ, haaŋ nɔŋ e yaŋ niya ba hadeni bikɛnda beŋ niyɔ ka ŋathaki nda ŋaŋ ka pothi.’

⁴⁵Mɛnɛ gbaku woŋ Dauda thiyi niŋ na ‘Mariki,’ mbu nama Banikisi wo niyo nde lahiri woŋ kɔ ŋaye ka bɔnsɔŋ nama baŋ?”

⁴⁶Wɔ o wɔ tha niyɔ wo punkɛ niŋ niya yaabi kuthɔnthɔŋɔŋ koŋ koŋ baŋ, awa there nda ka lɔkɔ babɛina wɔ tha nda niŋ thunku thɔnthiŋina kuthɔnthɔŋɔŋ.