Read West-Central Limba Mathiyu 23 Bible Online

Mathiyu 23 - West-Central Limba bible

Mathiyu 23

¹Naa daŋande wuŋ kɛndɛ, huna dome Yisɔs ka sɛthɛ baŋ mɛnɛ ka bakarandeni nama beŋ, na

²“Bikarimɔkɔiŋ bi ka Siraŋ baŋ beŋ mɛnɛ biFaresini beŋ bindɛ bina iŋ mayoho ba methine biya nagberekethe Sirani ba ka Musa baŋ.

³Huna, thanuwaŋ awa e beŋ niya bɛyiniŋ fooma ba bindɛ bena tepe baŋ. Kɛrɛ baŋ ni ba bindɛ ni baŋ, baa bi kɔŋ ni kɛwandi, kɛrɛ bindɛ niyeta ba bindɛ tɛpi baŋ.

⁴Bi kɔŋ yuukiyɛ biya doniŋ badimbɔy ba sa wɔ punku tutɔkɔ, e bindɛ bɛŋ tutuna biya. Kɛrɛ bindɛ gbeeŋ ka yɛthɛ bakɛnamɛŋ, bindɛ sa mase biya ba bɛŋ kata.

⁵Bi kɔŋ ni bɛyiniŋ fooma haliko biyamɛti bi be bindɛ kutu. Bi kɔŋ yukutɔkɔ nthagbɛŋ kiŋarinɛ ki iŋ magbali ma ka Masaala maŋ ka thayethi namɛŋ mɛnɛ ka thɛnkɔ namɛŋ thaŋ. Awa bindɛ athimo ba thɔɔ ŋahɔli ŋa yantuwɔy nyarɛŋ kithɔɔkuwɛ ba toŋine biya na badinɛŋ bina.

⁶Awa e bindɛ thimo ba dɔŋɔ ka mudoŋe mu ka thinthi muŋ ka thɔma humandiŋ haŋ, awa iŋ madoŋe mayɔhɔy maŋ nthɔŋ nda fooma ka bankɛŋ bathuŋuyande baŋ,

⁷awa e bindɛ thimo ba maanuwo iŋ yiki ka gbɔni baŋ niyo ka, awa e biya bindɛ kɔ thiya ‘Karimɔkɔiŋ.’

⁸Kɛrɛ beŋ ka ba thiyo ‘Karimɔkɔiŋ,’ baa beŋ kiŋ iŋ Karimɔkɔ wunthe hɔkɔŋ, awa huwɛndiya huna beŋ fooma.

⁹Baŋ dɔŋ wɔ yo wɔ ka faido na ‘Fanda ntuŋ na woŋ,’ baa Fanda ndeŋ wunthe napethi na iŋ beŋ, wo ka ariana woŋ.

¹⁰Baŋ hintiŋ nthɔŋ dɔma na ‘Bayahɛŋ,’ baa Bayaha wunthe na iŋ beŋ, ndɛ na Banikisi wo niyo nde lahiri woŋ.

¹¹Wɔ wo ba niyɔ wɔ mandiŋ woŋ mateete makendeŋ ndɛ na ba niyɔ bawali wokendeŋ.

¹²Wɔ o wɔ wo ŋatinɔkɔy, ndɛ kɔŋ thathina; awa wɔ yo wɔ wo thathinɔkɔy, ndɛ kɔŋ ŋatina.

¹³“Bendo karimɔkɔiŋ bi ka Siraŋ baŋ beŋ mɛnɛ biFaresini beŋ, bendo banitɔkɔiŋ beŋ, nambara ba kɔŋ see ba beŋ, baa beŋ lɔŋɔti biyamɛti biyo hu ka Hugbakinɛ hu ka ariana haŋ. Beŋ tha biyande, awa beŋ tha mɛkɛŋ ba biya bihɛna biyande. [

¹⁴Nambara ba kɔŋ see ba beŋ, bendo karimɔkɔiŋ bi ka Siraŋ baŋ beŋ mɛnɛ biFaresini beŋ, bendo banitɔkɔiŋ beŋ. Beŋ kɔŋ ni bagbokorani beŋ sɛmbɛ awa beŋ kɔŋ bindɛ tuutu bankɛŋ ba peyo bindɛ iŋ biwandamɛŋ beŋ baŋ. Beŋ kɔŋ ni ŋaraminɛ ŋathɔɔkuwɛ haliko ba pututa bɛyiniŋ ba beŋ ni baŋ. Beŋ kɔŋ gbasiŋita wuŋ yama ba biya bihɛna ba bɛyiniŋ ba beŋ ni baŋ baŋ.]

¹⁵“Bendo karimɔkɔiŋ bi ka Siraŋ baŋ beŋ mɛnɛ biFaresini beŋ, bendo banitɔkɔiŋ beŋ, nambara ba kɔŋ see ba beŋ, baa beŋ kɛriŋande mankɔ mamɛɛti maŋ e beŋ kaa ka kuyɛkɛŋ kuhɛna napooŋ ba ka niya ba wɔ wunthe be ni lanɛya nɔŋ beŋ. Kɛrɛ naa ni nthɔŋ ndɛ lanɛya, beŋ yame ntiŋ niŋ niya wɔ tɛŋɛ ba kaa ka yahanama nɔŋ na beŋ na.

¹⁶“Bendo thɔyande nɔŋ biya bi mankɔy thaaya bi katitɔkɔ biya bi mankɔy thaaya beŋ. Nambara ba kɔŋ see ba beŋ, baa beŋ dome, na ‘Mɛnɛ wɔ yo wɔ gbiŋe banka bamandiŋ ba ka Masaala baŋ, na ba gboŋ bɛna. Kɛrɛ mɛnɛ wɔ gbiŋe ka boyi bu ka banka bamandiŋ ba ka Masaala baŋ buŋ, na ndɛ kɔŋ thiŋiŋ lahiri ba ni ndɛ baŋ.’

¹⁷Bendo biya bi mankɔy thaaya bithɔkɔy beŋ beŋ baŋ! E beŋ kɔita ba dɔma na banka bamandiŋ ba ka Masaala baŋ ba yameŋ niyɔ waŋ ba boyi buŋ baa bɛna niyɛ ba boyi buŋ niyɔ bukuwɛ?

¹⁸Awa beŋ tepe hɛlɛŋ ba dɔma, na ‘Mɛnɛ wɔ yo wɔ gbiŋe ka bɛsɛ ba fuŋune saraka ka Masaala baŋ, na ba gboŋ bɛna; kɛrɛ mɛnɛ wɔ gbiŋe ka munkii mu siso ka bɛsɛ baŋ muŋ, ndɛ kɔŋ thiŋiŋ lahiri nama baŋ.’

¹⁹Bendo biya bi mankɔy thaaya beŋ beŋ baŋ. E beŋ kɔita ba dɔma na bɛsɛ baŋ ba yameŋ niyɔ waŋ ba munkii muŋ baa bɛna niyɛ ba munkii muŋ niyɔ mukuwɛ?

²⁰Huna, mɛnɛ wɔ yo wɔ gbiŋe ka bɛsɛ baŋ, ndɛ gbiŋe ka bɛŋ iŋ ntha yo ntha ki kɛndɛ ka bɛsɛ baŋ.

²¹Awa wɔ wo gbiŋ banka bamandiŋ ba ka Masaala baŋ, ndɛ gbiŋɛŋ bɛŋ e ndɛ gbiŋa Masaala wo kɛndɛ woŋ.

²²Awa wɔ wo gbiŋ ka ariana, ndɛ gbiŋɛŋ yensi hu ka Masaala haŋ iŋ wundɛ wo dɔŋɔy ka huŋ woŋ.

²³“Bendo karimɔkɔiŋ bi ka Siraŋ baŋ beŋ mɛnɛ biFaresini beŋ, bendo banitɔkɔiŋ beŋ, nambara ba kɔŋ see ba beŋ, baa beŋ kɔŋ dunkuŋ wu tɛŋɛŋ kɔhi wuŋ naa beŋ kɔ thubututu munki mu yamɛ nthɔŋ nda thahuwɔ muŋ fooma ŋaye ka dumgbuiŋ ndeŋ baŋ, kɛrɛ beŋ boho gbothontiŋ ba putiyɔ mathanani ma yamɛ niyɔ waŋ ma ka Siraŋ baŋ maŋ, ba niya wuthumbɛ, ba niyɔ iŋ nkinikiniŋ, mɛnɛ ba niyɔ biya bi yɔhɔy niyo lanɛya. Beŋ kiŋ ba yenke putiyɔ mathanani ma yamɛ niyɔ waŋ maŋ, awa e beŋ thana niyɔ gbothontiŋ sirani bathahuwɔy baŋ.

²⁴Bendo thɔyande nɔŋ biya bi mankɔy thaaya bi katitɔkɔ biya bi mankɔy thaaya beŋ. Beŋ kɔŋ senseŋeŋ ntha yo ntha ki beŋ thiiye ba thana thiiyitande kumuimuy, kɛrɛ e beŋ kɔ ŋuna nyɔkɔmɛni bibukuyuwɛ naa beŋ boho gbothontiŋ na mathanani ma yamɛ niyɔ waŋ maŋ.

²⁵“Bendo bikarimɔkɔiŋ bi ka Siraŋ baŋ beŋ mɛnɛ biFaresini beŋ, bendo banitɔkɔiŋ beŋ, nambara ba kɔŋ see ba beŋ, baa beŋ kɔŋ gbɔɔki thakɔɔpu mɛnɛ thapanɛ ndeŋ thaŋ kahɛŋ, kɛrɛ kaake mu poothuwɛ iŋ munki mu kɔsɔŋ beŋ kɛndɛ mu kute beŋ ka kansuŋ iŋ ba yɛthɛ ndeŋ hɔkɔŋ.

²⁶Bendo biFaresini bi mankɔy thaaya beŋ beŋ baŋ. Yenkeŋ hintiŋ gbɔɔkuwa thakɔɔpu thaŋ kaake, e beŋ ntiŋ thɛŋ kɔ manke gbɔɔkuwa kahɛŋ.

²⁷“Bendo karimɔkɔiŋ bi ka Siraŋ baŋ beŋ mɛnɛ biFaresini beŋ, bendo banitɔkɔiŋ beŋ, nambara ba kɔŋ see ba beŋ, baa beŋ athɔyande nɔŋ thayoma tha puyino hiro huhuhɛ napooŋ e thɛŋ yɔhɔ ka detha kahɛŋ, kɛrɛ kaake tha thiŋo iŋ bathoy bapoothuwɛ ba ka biya bitukɛ mɛnɛ ŋakɔtɔ ŋatuunuwɛ.

²⁸Bendo tɔŋinɔkɔ ka biyamɛti beŋ nɔŋ biya bithumbɛ bina beŋ, kɛrɛ kaake ka siini ndeŋ baŋ beŋ ka nɛŋ awa bendo thiŋo iŋ hunitɔkɔ mɛnɛ banɛnɔy.

²⁹“Bendo karimɔkɔiŋ bi ka Siraŋ baŋ beŋ mɛnɛ biFaresini beŋ, bendo banitɔkɔiŋ beŋ, nambara ba kɔŋ see ba beŋ, baa beŋ yeheni thayoma thaŋ wuyɔhɔy tha ka banabiŋ bi kooruwo nde beŋ, awa e beŋ yehinuwa wuyɔhɔy thayoma tha ka biya bithumbɛ beŋ thaŋ.

³⁰Beŋ hɛlɛŋ tɛpa ba dɔma, na ‘Mɛnɛ miŋ kiŋ nde nɔŋ ka yamana ba ka mbembɛŋ ntuŋ beŋ baŋ, miŋ sa nde nɔŋ thɔɔtɔ ka niya ba ni bindɛ baŋ iŋ ba kɔra banabiŋ beŋ.’

³¹Kɛrɛ wuŋ tɔŋɔŋ nagberekethe ba dɔma na bena ŋaye ka bɔnsɔŋ ba ka bi kɔrɛ nde banabiŋ beŋ.

³²Huna, kaaŋ ka kɔtɔkɔy ba thankina wali ba sɛsi nde mbembɛŋ ndeŋ beŋ baŋ.

³³Bendo bikɛkɛni beŋ beŋ baŋ, bendo kubɔri ku ka wɔthɔiŋ beŋ, nama beŋ niiye thanka yelo ka yahanama haŋ?

³⁴Huna yaŋ kɔŋ ŋindi banabiŋ, biya bikele, mɛnɛ karimɔkɔiŋ beŋ kendeŋ do. Awa beŋ kɔŋ kɔri binɔndi, e beŋ yanta binɔndi ka kuyeŋ kubariŋande, awa beŋ kɔŋ tawu binɔndi ka bankɛŋ ndeŋ bathuŋuyande baŋ, awa beŋ kɔŋ bindɛ kanthi maŋaye ka mɛti akey ka mɛti.

³⁵Wuna beŋ gbasiŋita kugbasaŋati ku ka bi tɔŋɛ nde wasi ba ka biya bithumbɛ beŋ baŋ kɛkɛŋ ka faido, there nthɔŋ nda ka wasi ba ka Ebɛli wo pankɔy bɛyi woŋ baŋ haaŋ kaaŋ ka wasi ba ka Sɛkaraiya hati ka Barakaya woŋ baŋ, wo kore nde beŋ woŋ mateete ma ka banka ba ka Masaala baŋ mɛnɛ ka bɛsɛ baŋ ka saraka baŋ fuŋuno kɛ.

³⁶Yaŋ tepe bena nɔndi baŋ, kugbasaŋati ku ka biya bi niyɛ bɛyiniŋ baŋ baŋ beŋ ku kɔŋ tutɔ ka thankaha tha ka biya bi ka lɔkɔ bahɛ baŋ.

³⁷“Yɛrusalɛmi, bendo biya bi ka mɛti ba ka Yɛrusalɛmi, beŋ thanki nde kɔɔruwa banabiŋ beŋ, awa e beŋ hɛlɛŋ lɔɔpuwa baseriŋ bi ŋindi Masaala kendeŋ do beŋ. Yaŋ thɔkɔti nɔŋ nda niyɔ kufiyo ba bena kɔminande ka tha banthe e yaŋ bena pɔpitɔkɔ nɔŋ na thɛɛ wokomisa kɔminande mpati nama beŋ ka tha banthe e ndɛ bindɛ pututɔ iŋ ŋapɛli nama ŋaŋ, kɛrɛ beŋ tha mɛyi.

³⁸Banka ndeŋ baŋ ba kɔŋ pɛyɛnɔ wu ka wɔ, awa ba kɔŋ teetuwɔ.

³⁹Yaŋ kɔŋ bena tepe, beŋ sa nɔŋ nda yama kutu, haaŋ yɔkɔŋ beŋ dome, na ‘Thaduba tha kiŋ ka wo see ka keŋ ku ka Mariki woŋ.’”