Read West-Central Limba Mathiyu 24 Bible Online

Mathiyu 24 - West-Central Limba bible

Mathiyu 24

¹Naa Yisɔs pɛyɛŋ banka bamandiŋ ba Masaala niyo kubatho baŋ ba kaa, bakarandeni nama beŋ see kɛnama ba niŋ toŋine yɔhɔ hu ka bankɛŋ bahɛna ba ka Masaala baŋ kɛndɛ.

²Kɛna mɛyiyɛ Yisɔs bindɛ ba dɔma, na “E beŋ kute bankɛŋ baŋ baŋ fooma? Yaŋ kɔŋ bena tepe nɔndi baŋ, ba kɔŋ teetuwa fooma. Raka hunthe huŋ sa niyɔ hu tutɔ ntɔ nama na ka thinthi, tha kɔŋ ŋɔti kɛkɛŋ fooma.”

³Naa dunkɔy ndɛ ka kusɛri ku dɔma na Ɔlifisi koŋ e ndɛ kɛndɛ ka dɔŋɔ, kɛna see bakarandeni nama beŋ kɛnama ka bindɛ bintheŋ e bindɛ dɔma kɛnama, na “Tepe hɛ mina malɔkɔ ma bɛyiniŋ baŋ baŋ fooma niiye, awa iŋ bɛyi ba yenke niyɔ ba tɔŋɔŋ ba dɔma na yi bohe ba saa iŋ ba tɔŋɔŋ mapeye ma ka lɔkɔ ba ka fay woŋ baŋ.”

⁴Huna tepe Yisɔs bindɛ ba dɔma, na “Niyaŋ kuthɛgbɛ wɔ be tha bena thɔkɔŋ.

⁵Biya bibɔyɛ bi kɔŋ see ka keŋ kukiyaŋ, awa wɔ o wɔ ka bindɛ kɔŋ dɔmɔkɔŋ, na ‘Yama Banikisi wo niyo nde lahiri woŋ,’ awa bi kɔŋ thɔkɔŋ biya bibɔyɛ.

⁶Awa beŋ kɔŋ yuyɛ masɔnkɔ ma ka ŋayombo wuthuriye bena mɛnɛ maseriŋ ma ka ŋayombo wuthokiye bena. Kɛrɛ baŋ ni thɔrɔ ka thathukuma ndeŋ, baa muŋ muŋ fooma mu kiŋ ba yenke niyɔ hintiŋ. Kɛrɛ mapeye ma ka lɔkɔ ba ka fay woŋ baŋ kutɛ hɛ.

⁷Kuyɛkɛŋ ku kɔŋ dekeyi kuyɛkɛŋ, awa huybakine hu kɔŋ dekeyi huybakine, awa ŋakɔnthɔ ŋamandiŋ ŋa kɔŋ niyɔ, kuyɛkɛŋ koŋ ku kɔŋ thɛnɛŋ ka thani ka bɔyɛ.

⁸Kɛrɛ muŋ muŋ fooma athɔyande iŋ wuthoonɛ wumayoŋ wu naa yɛrɛmɛ bohe ba saa ka mpaa.

⁹“Awa beŋ kɔŋ bɔha e beŋ dunkuno ka biya bi bena gbasaŋati haaŋ e bindɛ bena kɔra, awa biyamɛti bi kɔŋ bena thambo saathɛ ba kiyaŋ.

¹⁰Ka lɔkɔ babɛina bibɔyɛ bi kɔŋ fuŋ ka lanɛya baŋ, awa biya bi kɔŋ niyande gbɔŋ ka bi iŋ sɛmbɛŋ baŋ beŋ, awa biya bi kɔŋ thambiyande.

¹¹Banabiŋ bibahothiŋ bi kɔŋ fuŋ awa bi kɔŋ thɔkɔŋ biya bibɔyɛ.

¹²Biya bibɔyɛ bi kɔŋ pɛyi ba thimiyande baa banɛnɔy baŋ ba kɔŋ key ka kɔtɔkɔy wudankande.

¹³Kɛrɛ wɔ wo ni muyuŋ woŋ haaŋ ka mapeye maŋ, ndɛ na niyɔ kisi.

¹⁴Awa Huseri Huyɔhɔy haŋ haŋ baŋ ba Hugbakinɛ hu ka Masaala haŋ hu kɔŋ niya kɛwandi ka fay woŋ fooma, haliko ba niya maseri ka siyani baŋ fooma, awa kɛna ntiŋ mapeye ma ka lɔkɔ ba ka fay woŋ baŋ tɛŋ.

¹⁵“Naa beŋ kute nthɔŋ Ntha Kithambiyo ki sɔkinɔkɔ Masaala na, ki dome nde banabi woŋ Daniyɛli kiŋ, ki kooye ka kuwɛ kɛ ka banka bamandiŋ ba ka Masaala baŋ ka be kiŋ sisande ba kɔɔ.” (Yindo ni karaŋ woŋ, niya kuthɛgbɛ yi be wuŋ metho.)

¹⁶“Ka lɔkɔ babɛina, bi ka Yudiya, yɔkɔŋ bi be kite ka ŋasɛri ŋaŋ ka.

¹⁷Wɔ wo penko ndɛ tute ka banka bakɛnama baŋ ka thinthi, ndɛ be tha nda thuhu ba si sɛkitha mu ka banka nama baŋ kaake,

¹⁸awa wo nda ka dumgbu nama ka, ndɛ be tha nda duu ba si sɛkitha kuhɔli nama koŋ.

¹⁹Nambara ba kɔŋ nɔŋ niyɔ ka yɛrɛmɛŋ bi niyɔ iŋ thahɔɔyɛ beŋ mɛnɛ bi bɔpɔŋ malɛɛthɛŋ ka lɔkɔ babɛina.

²⁰Niyaŋ kuraminɛ ka Masaala haliko kita ndeŋ haŋ hu be tha nɔŋ niyɔ thamɔ maa ka Malɔkɔ Mahemuwe maŋ,

²¹baa nambarɛŋ babɔyɛ ba kɔŋ niyɔ ba be hɛ nɔŋ niyɔ hanthe kabi na thɛri nde ka fay woŋ haaŋ saaŋ bohi ka lɔkɔ baŋ baŋ. Awa bɛyi bahɛna sa nɔŋ nda niyɔ ba thɔyande iŋ baŋ baŋ.

²²Kɛrɛ Masaala thanki thuruna malɔkɔiŋ ma ka nambarɛŋ baŋ baŋ. Mɛnɛ huŋ kutɛ nde, wɔ yo wɔ sa buthurɔ tuka. Kɛrɛ saathɛ ba bi thanki Masaala yɛtha beŋ, ma kɔŋ thuruna.

²³“Huna, mɛnɛ wɔ kɔŋ bena tepe, na ‘Banikisi wo niyo nde lahiri woŋ na woŋ,’ maa ‘Ndɛ na kanka woŋ,’ baŋ niŋ ni lanɛya,

²⁴baa bi dɔmɔkɔ beŋ na Baninikisiŋ bina bindɛ mahɛŋ ma bindɛ ka nɛŋ, mɛnɛ banabiŋ bibahothiŋ bi fuŋ beŋ, bi kɔŋ ni bɛyiniŋ bathakaba, haliko ba thɔkina biya bibɔyɛ. Bi kɔŋ yɔli ti punke bindɛ ba thɔkina bi thanki Masaala yɛtha beŋ, mɛnɛ wu kɔŋ ŋɛnɔ.

²⁵Wuna biyɛ yaŋ kɔŋ bena yenke tepe bɛyiniŋ baŋ baŋ saanuŋ bɛŋ ba niyɔ.

²⁶“Huna mɛnɛ bi kɔŋ bena dɔŋ, na ‘Banikisi wo niyo nde lahiri woŋ tɛŋ ka wula ka,’ baŋ kɛndɛ key. Mɛnɛ bi kɔŋ bena dɔŋ, na ‘Ndɛ nunekeŋ ka banka ka kaake,’ baŋ bindɛ ni lanɛya,

²⁷baa Hati ka Wɔ woŋ kɔŋ see na nthɔŋ kuwaliwaliŋ koŋ kɛriŋande ŋaye kuwaŋ kubekede koŋ e kɔŋ kaa kuwaŋ kupothi koŋ.

²⁸“Beŋ bareŋ kɔ yuyɛ na wuŋ tɛpa na ka maama woŋ tuke ka, kɛna yibani beŋ kɔmande ka tha banthe.

²⁹“Ka wuthurɔy wu nambarɛŋ baŋ baŋ see wuŋ, kaŋ woŋ kɔŋ niyɔ huntuma, awa sɛnkɛ woŋ sa nda bɛndi, sosɛŋ beŋ bi kɔŋ yayi maŋaye ka kuthahinɛ koŋ, sɛmbɛŋ ba ka kuthahinɛ koŋ baŋ ba kɔŋ thɛnɛŋ.

³⁰Ka lɔkɔ babɛina na ntiŋ bɛyi bathakaba baŋ tɔŋinɔkɔ ka kuthahinɛ koŋ ba tɔŋina ba wuŋ niyɔ na Hati ka Wɔ woŋ kɔŋ see. Awa siyani ba ka faido baŋ fooma ba kɔŋ boki naa bindɛ kute Hati ka Wɔ woŋ si see ka thawuruma tha ka kuthahinɛ koŋ thaŋ iŋ sɛmbɛ mɛnɛ yiki bamandiŋ.

³¹Kuthuthu kumandiŋ koŋ ku kɔŋ hɔŋa. Ndɛ kɔŋ ŋindi malekɛŋ nama beŋ ba kɔminande ka tha banthe bi thanki ndɛ yethiyo beŋ maŋaye ka fai wobunthu woŋ fooma.

³²“Niyaŋ ba kuyeŋ ku tiŋ mutiŋ muthɔma mu dɔma muŋ na fiki ku thɔyande nɔŋ kugbemgbeŋ koŋ bena thaninuwa mathanani. Naa beŋ kute nthɔŋ bathalɛŋ biŋama beŋ thaha e bindɛ fuŋuna bompa, kɔthɔŋ ba dɔma na thamɔ bohe thɔɔ.

³³Thanuwaŋ mathanani maŋaye ka wuŋ baŋ. Naa beŋ kute nthɔŋ bɛyiniŋ baŋ baŋ fooma ba si niyɔ, kɔthɔŋ ba dɔma na ntha kiŋ ki kiŋ nda wuthuriye, awa ki kooyeŋ nda ka biyo haŋ ba biyande.

³⁴Yaŋ kɔŋ bena tepe nɔndi baŋ, biya bi ka yamana bahɛ baŋ baŋ sa niye daŋiyande fooma e bɛyiniŋ baŋ baŋ niyɔ.

³⁵Kuthahinɛ kɔŋ iŋ ka fay woŋ mu kɔŋ daŋande fooma, kɛrɛ thampa niŋ thaŋ sa daŋande.

³⁶“Wɔ o ka wo kɔthɔ malɔkɔ mɛnɛ wakathi wo Hati ka Wɔ woŋ see, hali hintiŋ malekɛŋ bi ka ariana beŋ, maa Hati woŋ. Yɔkɔŋ Fandaŋ woŋ nagbɛti ndɛ na kɔthɛ.

³⁷Hati ka Wɔ woŋ kɔŋ see e biya kɔ niya bɛyiniŋ nɔŋ na niyɔy nde nthɔŋ wuŋ na ka yamana ba ka Nowa baŋ.

³⁸Ka lɔkɔ ba thenkiyiye mandi maŋ ka faido, biya bi kɔŋ nde thɔɔmi e bindɛ kɔ thiiyuwe mampani, bi kɔŋ nde yɛɛnti e bindɛ kɔ dunkuna ŋayɛntande, haaŋ Nowa thɔɔ ka gbe bamandiŋ baŋ.

³⁹Awa bindɛ tha nde kɔthɔ ba niyɔ haaŋ yɔkɔŋ na thɛnkiyiyɔy mandi maŋ e bindɛ momino fooma. Nɛna nɔŋ wuŋ niyɔ na Hati ka Wɔ woŋ see.

⁴⁰Ka lɔkɔ babɛina, lamgbeŋ biye bi kɔŋ niyɔ ka wali ka dumgbu ka, wunthe kɔŋ si sɛkitha, e woŋ kɛndɛ peyo.

⁴¹Yɛrɛmɛŋ biye bi kɔŋ kɔɔ ka yɔŋa ka kuthodo kunthe. Wunthe kɔŋ si sɛkitha, e woŋ kɛndɛ peyo.

⁴²Niyaŋ kuthɛgbɛ baa beŋ kɔita malɔkɔ ma Mariki ndeŋ woŋ see maŋ.

⁴³Awa yaŋ thimoŋ ba beŋ hakiyando hu tepe hɛ yaŋ bena haŋ. Mɛnɛ wɔ wo biyɛ banka baŋ woŋ nde hɔkɔŋ nthɔŋ kɔthɔ wakathi wo ka huyɛ baŋ wo batuwaŋ woŋ see ba si thinka banka nama baŋ, ndɛ kɔŋ nde hure yila banka nama baŋ napiripiri haliko ba be tha si thinka ba tuuto.

⁴⁴Huna niyɔŋ bendo dɛɛnkitɔkɔy timo tima, baa Hati ka Wɔ woŋ kɔŋ see ka wakathi wo be beŋ niŋ siyuwe.

⁴⁵“Mbɛ bawali wo yɔhɔy niyo lanɛya e ndɛ hɛlɛŋ niyɔ wo kele? Ndɛ na wɔ wo mariki nama ni bayaha ka bawaliŋ bihɛna beŋ ba bindɛ kɔ dunkune muthɔma naa lɔkɔ ba ka thɔma haŋ baŋ tɛŋ.

⁴⁶Bawali wobɛina kɔŋ yehitɔkɔ naa mariki nama woŋ penke niŋ si ni wali babɛina.

⁴⁷Yaŋ kɔŋ bena tepe nɔndi baŋ, ndɛ kɔŋ niŋ ni bayaha ba kɛriŋiyɛ mu biyɛ ndɛ muŋ fooma.

⁴⁸Kɛrɛ mɛnɛ bawali wonɛnɔy na ndɛ, ndɛ kɔŋ dɔŋ ka yɛthɛ nama, na ‘Mariki niŋ woŋ seeta hɛ yako.’

⁴⁹Ndɛ kɔŋ sɛsi ba tawa ntɔni nama bi bawaliŋ beŋ, e ndɛ kɔ thɔma, e ndɛ kɔ thiiye mampa maŋ iŋ bayilɔiŋ beŋ.

⁵⁰Mariki wo ka bawali wonɛnɔy woŋ kɔŋ see ka lɔkɔ ba be ndɛ niŋ siyuwe, iŋ wakathi wo be ndɛ kɔthɔ.

⁵¹Ndɛ kɔŋ niŋ gbasaŋati ka nanthe iŋ banitɔkɔiŋ beŋ, ka tha ka bɛina kɛndɛ kɛna biya thinkuwɔ thathukuma kɛ e bindɛ kɔ berina wuthoonɛ-thoonɛ.”