Read West-Central Limba Mathiyu 25 Bible Online

Mathiyu 25 - West-Central Limba bible

Mathiyu 25

¹Yisɔs key ka kɔtɔkɔy ba dɔma, na “Ka lɔkɔ babɛina Hugbakinɛ hu ka ariana haŋ hu kɔŋ niyɔ nɔŋ mbɔrɔ ki ka mpati bibɛthɛŋ kɔhi bi sɛkithɛ panɛ lampuiŋ namɛŋ ba kaa ka gbada ka ba ka yumba bayɛnti woŋ ba saa ka yakali ba ka kuyɛntande koŋ baŋ.

²Bisɔhi ka beŋ beŋ baŋ bithɔkɔy; awa bisɔhi beŋ bikele.

³Bithɔkɔy beŋ sekithe panɛ lampuiŋ namɛŋ beŋ kɛrɛ bindɛ tha diŋiti mayɔ ma ka ɔlifisi maŋ mayɛɛndɛni.

⁴Kɛrɛ bikele beŋ, naa bathɔy bindɛ ba kaa, bindɛ sekithe lampuiŋ namɛŋ beŋ e bindɛ hɛlɛŋ diŋita mayɔ mayɛɛndɛni.

⁵Naa tɛŋ bindɛ kɛndɛ, bayɛnti woŋ tha peŋ biyande. Huna bindɛ fooma boho mandɛ awa bindɛ ŋɔɔkɔy ka nine.

⁶“Naa tɛŋ nthɔŋ wuŋ huyɛ teete, wuŋ yelo thampa ba dɔma, na ‘Bayɛnti woŋ na see woŋ. Fuŋaŋ fooma ba ka pɛnka bayɛnti woŋ.’

⁷Kɛna thɔhɔy bɛthɛŋ bikɔhi beŋ beŋ fooma e bindɛ yehinuwa lampuiŋ namɛŋ beŋ.

⁸Naa kute bithɔkɔy beŋ ba dɔma na mayɔ namɛŋ maŋ thanki, huna dome bindɛ ka bikele beŋ, na ‘Nkaaŋ mina mayɔ manɔndi baa lampuiŋ ntuŋ beŋ thanko mayɔ.’

⁹Kɛrɛ huna dome bikele beŋ kɛnamɛŋ, na ‘Ade, mɛŋ sa tɛŋ ba hanande iŋ beŋ. Huna kaaŋ ka bi ni gbɔŋ beŋ e beŋ ka boyiyɔkɔ.’

¹⁰Naa key nthɔŋ bithɔkɔy beŋ ka boya haŋ, bayɛnti woŋ biyande, awa bikele bi dɛɛnkitɔkɔy beŋ biyande ka kuyɛntande koŋ. Naa biyande nthɔŋ bindɛ, biyo haŋ loŋo.

¹¹“Naa thanki nthɔŋ biyo haŋ loŋo, bɛthɛŋ bi kaayɛ hɛ ka boya haŋ beŋ tɛŋ, e bindɛ si dɔma, na ‘Hɛmɔŋ, hɛmɔŋ, yaandi pɛthiyɛ mina, miŋ be biyande.’

¹²Kɛrɛ bayɛnti woŋ ni bindɛ yaabi ba dɔma, na ‘Yaŋ kɔita bena. Mbɛ hu yaŋ bena pethiye biyo haŋ?’”

¹³Kɛna gbanthaŋ Yisɔs ba dɔma, na “Kɔ kɛndɛ ka niya kantha, baa beŋ tha kɔthɔ lɔkɔ baŋ mɛnɛ wakathi wo Hati ka Wɔ woŋ see.”

¹⁴Yisɔs key ka kɔtɔkɔy kaŋ tɛpa mbɔrɔ kihɛna ba tɔŋina na nɔŋ wuŋ niye naa Hati ka Wɔ woŋ see. Ndɛ tepe, na “Bayaha wunthe na bathɔy nde ba fuŋa biyasi. Naa bathɔy ndɛ ba kaa, ndɛ thiyi bawaliŋ nama beŋ ba bindɛ dunkune kɛɛ nama baŋ ba niŋ kɔsiniyɛ.

¹⁵Ndɛ dunkune woma o woma ti peye punka hukɛnama. Ndɛ dunkuŋ kɔbiri woboyi wuluiŋ bisɔhi ka womayoŋ woŋ, ka wobiye woŋ wuluiŋ biye, ka wotaati woŋ wulu wunthe. Naa thanki nthɔŋ ndɛ wuŋ niya, ndɛ key biyasi haŋ.

¹⁶Bawali wo bɔhɛ wuluiŋ bisɔhi woŋ fuŋ ka thagbɛmgbɛŋ na ba ka sikinuwande kɔbiri woboyi woŋ, haaŋ e ndɛ kuta wuluiŋ bisɔhi ka thinthi.

¹⁷Nɛna ni hɛlɛŋ wo bɔhɛ wuluiŋ biye woŋ. Ndɛ sikinuwande niŋ haaŋ e ndɛ kuta wuluiŋ biye ka thinthi.

¹⁸Kɛrɛ wo bɔhɛ wulu wunthe woŋ, naa fuŋ nthɔŋ ndɛ, akey gbusu kɛkɛŋ e ndɛ maankuwa kɔbiri wo ka bayaha nama woŋ.

¹⁹“Naa nambe nthɔŋ wuŋ haaŋ bayaha wo ka bawaliŋ beŋ beŋ woŋ see tɛŋ maŋaye ka biyasi haŋ. Kɛna thiyi ndɛ bindɛ ba bi be si tɔŋ kuna kɔbiri wo kute bindɛ woŋ.

²⁰Wo bɔhɛ nde wuluiŋ bisɔhi woŋ see e ndɛ si tɔŋa kuna wuluiŋ bisɔhi bi tutɔy ka thinthi beŋ. Huna dome ndɛ ka bayaha nama woŋ, na ‘Hɛmɔŋ, yi dunkune nde yama wuluiŋ bisɔhi, awa yaŋ kute wuluiŋ bisɔhi ka thinthi. Ya dondo baŋ nda wuluiŋ kɔhi ka fooma nama.’

²¹Huna dome bayaha nama woŋ kɛnama, na ‘Yi ni wuyɔhɔy, awa bawali woyɔhɔy na yi, e yi hɛlɛŋ yɔhɔ niyo lanɛya. Yi niyɔy wɔ yɔhɔy niyo lanɛya ba kuta munahaŋ ka ntha kiyetenaŋ. Huna yaŋ kɔŋ yina ni bayaha ka munki mubɔyɛ. Biyande, miŋ be si yehitɔkɔ ka tha banthe.’

²²“Awa wo bɔhɛ nde wuluiŋ biye woŋ see e ndɛ si tɔŋa kuna wuluiŋ biye bi tutɔy ka thinthi beŋ. Huna dome ndɛ ka bayaha nama woŋ, na ‘Hɛmɔŋ, yi dunkune nde yama wuluiŋ biye, awa yaŋ kute wuluiŋ biye ka thinthi. Ya dondo baŋ nda wuluiŋ binaŋ ka fooma nama.’

²³Huna dome bayaha nama woŋ kɛnama, na ‘Yi ni wuyɔhɔy, awa bawali woyɔhɔy na yi, e yi hɛlɛŋ yɔhɔ niyo lanɛya. Yi niyɔy wɔ yɔhɔy niyo lanɛya ka ntha kiyetenaŋ. Huna yaŋ kɔŋ yina ni bayaha ka munki mubɔyɛ. Biyande, miŋ be si yehitɔkɔ ka tha banthe.’

²⁴“Kɛna manke wo bɔhɛ nde wulu wunthe woŋ saa e ndɛ si dɔma ka bayaha nama woŋ, na ‘Hɛmɔŋ, yaŋ kɔthɛŋ ba wuŋ niyɔ na wɔ thiyɛ dɛnkɛŋ na yi, baa yi kɔŋ ŋɔŋ ka tha yi paya paka, awa e yi thinka muthɛri ka tha yi thɛɛli.

²⁵Haŋ haŋ baŋ huna payɔy nde yaŋ, wuna biyɛ nde yaŋ ka gbusa kɛkɛŋ e yaŋ maankuwa kɔbiri nda woŋ. Bɛna ya kɔbiri wo dunkune nde yama yi woŋ.’

²⁶Huna dome bayaha nama woŋ kɛnama, na ‘Bawali wonɛnɔy na yi, awa e yi hɛlɛŋ niyɔ wɔ mayɛini. Yi kɔthɛŋ nagberekethe ba dɔma na yaŋ kɔŋ ŋɔŋ ka tha yaŋ thɛɛli paka, awa e yaŋ thinka muthɛri ka tha yaŋ thɛɛli.

²⁷Na tha nde yi sikinuwande kɔbiri niŋ woŋ yi kɔŋ nde nɔŋ niŋ kati ka kuhunkuŋ ku ka kɔbiri woŋ kosino ka. Haliko naa see yaŋ na, yaŋ be nde nda pɛnki kɔbiri niŋ woŋ fooma mɛnɛ munahaŋ bayete ba tutɔy ka thinthi baŋ.’

²⁸“Huna dome bayaha woŋ ka bawaliŋ bihɛna beŋ, na ‘Bohitaŋ niŋ kɔbiri woboyi wowulu wunthe woŋ e beŋ dunkune wo iŋ kɔbiri wowuluiŋ kɔhi woŋ.

²⁹Yaŋ kɔŋ bena tepe haŋ haŋ baŋ baa wɔ yo wɔ wo iŋ wubɔyɛ woŋ, ndɛ kɔŋ ndintiya, wuna ndɛ niyɔ iŋ wubɔyɛ-bɔyɛ. Kɛrɛ wo ka iŋ ntha woŋ, hali wuyete wu iŋ wundɛ wuŋ, ndɛ kɔŋ wuŋ kanita.

³⁰Yɛlaŋ bawali wo ka munahaŋ woŋ baŋ ka huntuma hugbɛki haŋ ka gbada ka, ka biya thinkuwɔ thathukuma kɛ e bindɛ kɔ berina wuthoonɛ-thoonɛ.’”

³¹Yisɔs key ka kɔtɔkɔy ba dɔma, na “Ti Hati ka Wɔ woŋ see nɔŋ gbaku iŋ malekɛŋ bi ka Masaala beŋ fooma, ndɛ kɔŋ dɔŋɔ ka yensi nama hu ka huybakine haŋ.

³²Ka lɔkɔ babɛina, siyani baŋ fooma ba kɔŋ si kɔɔ ka kɔtɔkɔy kɛnama. Awa ndɛ kɔŋ bindɛ hakinande makɔɔni maye nɔŋ na nthɔŋ batɔli woŋ hakinande takɛŋ beŋ iŋ baahuiŋ beŋ na.

³³Ndɛ kɔŋ kiyi biya bithumbɛ beŋ ka yɔnkɔ nama huthome haŋ, awa e kiya biya binɛnɔy beŋ ka hupɔkɔdɔ haŋ.

³⁴Huna nɔŋ gbaku woŋ dɔŋ ka bi ka yɔnkɔ huthome haŋ beŋ, na ‘Saaŋ, bendo thiyiyo thaduba beŋ iŋ Fandaŋ woŋ! Saaŋ beŋ be si dunkuno huybakine hu kosiniyoko beŋ haŋ iŋ Fandaŋ woŋ kabi ka mathɛrɛŋ ma ka fay woŋ maŋ.

³⁵Beŋ kɔŋ kutu huybakine haŋ baa yaŋ see nde kendeŋ wo kaho kɔnthɔ e beŋ yama nkaa muthɔma. Yando kaho nde kumbɛ e beŋ yama nkaa mandi ba thiiye. Yando sɛɛ nde kendeŋ thahinɛ e beŋ yama niya yikiya.

³⁶Yando ka iŋ nde muthɔɔ, kɛrɛ beŋ nkee nde yama muthɔɔ. Yando nde wothoonɔy e beŋ yama kaa ka thiya nhee. Yaŋ kiŋ nde ka yeeli e beŋ yama kaa ka maana.’

³⁷“Huna nɔŋ niŋ bithumbɛ beŋ meyiye ba dɔma, na ‘Mariki, kama kute nde miŋ yina wo kaho kɔnthɔ e miŋ yina nkaa muthɔma, maa yindo kaho kumbɛ e miŋ yina nkaa mandi ba thiiye?

³⁸Awa tima see yi thahinɛ kɛntuŋ do e miŋ yina niya yikiya, maa yindo ka iŋ muthɔɔ e miŋ yina dunkune muthɔɔ?

³⁹Awa tima kute miŋ yina wothoonɔy maa wo thiyɔy ka yeeli e miŋ yina kaa ka maana?’

⁴⁰“Huna nɔŋ gbaku woŋ bindɛ meyiye ba dɔma, na ‘Yaŋ kɔŋ bena tepe nɔndi baŋ, naa ni nde nthɔŋ beŋ wuŋ ka wunthe ka mbɛndaŋ beŋ beŋ bi ka waŋ beŋ, wuŋ niyɔy ba dɔma na kiyaŋ ni na nde beŋ wuŋ.’

⁴¹“Huna nɔŋ gbaku woŋ dɔŋ ka bi kooye niŋ ka yɔnkɔ hupɔkɔdɔ haŋ beŋ, na ‘Gbɔniyɔkɔŋ nuŋ dondo baŋ, bendo badankɛŋ beŋ beŋ baŋ. Bendo thiya ka buu bu sa dɔmɔ bu deenkitoko buŋ ba Wayi Womandiŋ woŋ mɛnɛ malekɛŋ nama beŋ.

⁴²Beŋ kɔŋ thiya ka buu buŋ baa yaŋ see nde kendeŋ wo kaho kɔnthɔ, kɛrɛ beŋ tha yama dunkune muthɔma. Yaŋ see nde kendeŋ wo kaho kumbɛ, beŋ tha yama nkuu mandi ba thiiye.

⁴³Yaŋ see nde thahinɛ kendeŋ, beŋ tha yama ni yikiya. Yaŋ see nde kendeŋ wo ka iŋ muthɔɔ, beŋ tha yama nkii muthɔɔ. Yaŋ thoono nde awa yaŋ thiyo nde ka yeeli, beŋ tha yama key ka maana kɛndɛ.’

⁴⁴“Huna nɔŋ bindɛ niŋ meyiye ba dɔma, na ‘Mariki, kama kute nde miŋ yina wo kaho kɔnthɔ maa wo kaho kumbɛ maa thahinɛ maa wo ka iŋ muthɔɔ maa wothoonɔy maa ka yeeli, miŋ tha yina mase?’

⁴⁵“Huna nɔŋ gbaku woŋ dɔŋ kɛnamɛŋ, na ‘Yaŋ kɔŋ bena tepe nɔndi baŋ, na tha nde nthɔŋ beŋ wuŋ ni ka wunthe ka beŋ beŋ bi dɔma bi ka waŋ beŋ. Wuŋ niyɔy ba dɔma beŋ tha wuŋ ni kiyaŋ.’

⁴⁶Huna biya bi ka yɔnkɔ hupɔkɔdɔ haŋ beŋ, bi kɔŋ key ka kugbasaŋati ku kɔy yo kɔy koŋ. Kɛrɛ bithumbɛ beŋ, bi kɔŋ key ka bindɛ ka niyɔ iŋ sii ba kɔy yo kɔy.”