Read West-Central Limba Mathiyu 3 Bible Online

Mathiyu 3 - West-Central Limba bible

Mathiyu 3

¹Ka malɔkɔ mabɛina Yɔni wo Babiye biye hu ka Masaala haŋ woŋ see kaŋ niya kɛwandi ka wula ba ka Yudiya.

²Ndɛ dome, na “Sikinaŋ sɔkɔrɔ hakɛŋ ndeŋ baŋ, e beŋ biyo biye hu ka Masaala haŋ, baa huybakine hu ka ariana haŋ thuriye.”

³Ndɛ woŋ baŋ na nde banabi woŋ Aisaya gbonkiyiyɛ woŋ ba dɔma, na “Wɔ wunthe kɔŋ yɛli thampa ka wula baŋ, na ‘Kɔsinɔkɔŋ gboŋa baŋ ba Mariki woŋ, awa e beŋ bɛŋ thumbunuwa natoloŋ.’”

⁴Awa Yɔni thooyeŋ nde yaba ba yehinuwo maŋaye ka bɔɔyɛ bu ka maama wo domo na nyɔkɔmɛ. Awa e ndɛ pitha mbumbusa ki ka nthagba ka hirika nama haŋ, e ndɛ nde kɔ thɔma sisiŋ mɛnɛ tɔŋɔ.

⁵Kɛna penko ndɛ iŋ biya bi ŋaye ka Yɛrusalɛmi mɛnɛ bi ka bompi wo ka Yudiya fooma, mɛnɛ bi ka bompi wo ka Yɔdaŋ fooma.

⁶Kɛna tɛŋinɔkɔy bindɛ hakɛŋ bakɛnamɛŋ baŋ nagberekethe awa ndɛ biye bindɛ biye hu ka Masaala haŋ ka mankɔ ma ka Yɔdaŋ maŋ.

⁷Kɛrɛ naa kute Yɔni biFaresini mɛnɛ biSadusini bibɔyɛ bi si see kɛnama ba biyo, ndɛ tepe bindɛ ba dɔma, na “Beŋ, bendo kubɔri ku ka wɔthɔiŋ beŋ, nkaana yelɛ bena ba beŋ kita kugbasaŋati ku ka Masaala koŋ, ku ndɛ ba bena niya koŋ?

⁸Niyaŋ bɛyiniŋ ba tɔŋɔŋ ba dɔma na beŋ sikiyɔkɔy ŋaye ka hakɛŋ ndeŋ baŋ.

⁹Baŋ thɛrɛŋ ba kathiŋɔkɔ ba dɔma, na ‘Mpati bi ka Ebrahim bina miŋ.’ Yaŋ tepe bena, Masaala punkeŋ sɛkitha tharaka thaŋ thaŋ e ndɛ thɛŋ sikinande mpati bi ka Ebrahim.

¹⁰Hali ka tete kubapi koŋ yenthiŋino nda ba thonka nthanthɛŋ ki ka ŋayeŋ ŋaŋ kiŋ, baa kuyeŋ ndo kuyeŋ ku sa tiŋ mutiŋ muyɔhɔy ku kɔŋ yuuta e kuŋ yelo ka buu buŋ.

¹¹Yaŋ kɔŋ bena biye iŋ mandi baa beŋ sikiŋ sɔkɔrɔ hakɛŋ bakendeŋ baŋ; kɛrɛ hiŋ wɔ si see wo yamɛ ba yaŋ kaye-kaye. Yaŋ teŋeta hintiŋ nthɔŋ ba niŋ bohiyɛ dagbalɛŋ nama baŋ. Ndɛ na wɔ bɛina wo si sɛkɛthi Yina wo ka Masaala woŋ awa mɛnɛ buu ba bena biiye.

¹²Ndɛ boheŋ kubonka koŋ ka yɔnkɔ nama haŋ, ba huukuwa gbethe nama baŋ. Ndɛ kɔŋ kɔsɔŋ paka baŋ ka kuhunkuŋ nama koŋ, e sɛkitha ŋawoi ŋaŋ e ŋɛŋ yɛla ka buu bu sa dɔmɔ buŋ.”

¹³Kɛna see Yisɔs ka Yɔni ŋaye ka Kalili ba biyo iŋ Yɔni ka mankɔ ma ka Yɔdaŋ maŋ.

¹⁴Kɛrɛ Yɔni pinde niŋ e niŋ tepe, na “Yina sisande ba yama biye; mbɛ hu yi see kiyaŋ do ba biyo?”

¹⁵Kɛrɛ Yisɔs tepe niŋ ba dɔma, na “Wu niyɔyŋ nda tete, baa wu kɔŋ ni ba miŋ thanka niya fooma mathumbɛ ma thimo Masaala maŋ.” Kɛna mɛyi ntiŋ Yɔni ba niŋ biye.

¹⁶Naa biyo Yisɔs, ndɛ fuŋ yako ka mandi maŋ. Awa kɛna pɛthɔy ka ariana e ndɛ kuta Yina wo ka Masaala woŋ si thuhu ka mathɔyande ma ka kurotho e tutɔ Yisɔs na.

¹⁷Kɛna yuye Yɔni thampa maŋaye ka ariana tha tɛpɛ ba dɔma, na “Hatiŋ wowathe wo thimo yaŋ woŋ na woŋ baŋ, wo yeheŋ yama thukuma woŋ.”