Read West-Central Limba Maki 13 Bible Online

Maki 13 - West-Central Limba bible

Maki 13

¹Naa Yisɔs pɛyɛŋ banka bamandiŋ ba ka Masaala baŋ ba kaa, bakarandeŋ nama wunthe dome kɛnama, na “Karimɔkɔ, detha hɛ bankɛŋ babukuyuwɛ-bukuyuwɛ iŋ tharaka thabukuyuwɛ-bukuyuwɛ tha thoyo bɛŋ thaŋ.”

²Kɛna ni niŋ Yisɔs yaabi ba dɔma, na “E yi kute bankɛŋ baŋ baŋ fooma? Ba kɔŋ teetuwa, awa raka hunthe huŋ sa niyɔ hu tutɔ ntɔ nama na ka thinthi; tha kɔŋ ŋɔɔti kɛkɛŋ fooma.”

³Yisɔs doŋeŋ nde ka thinthi ka kusɛri ku dɔma koŋ na Ɔlifisi wu sisande iŋ banka ba ka Masaala baŋ. Kɛna key Pita, Yemisi, Yɔni, mɛnɛ Anduru kɛnama ka nasɔɔyi e bindɛ dɔma, na

⁴“Tepe hɛ mina malɔkɔ ma bɛyiniŋ baŋ baŋ fooma niiye, awa iŋ bɛyi ba yenke niyɔ ba tɔŋɔŋ ba dɔma na lɔkɔ baŋ tɛŋ ba bɛyiniŋ baŋ baŋ fooma niiye.”

⁵Huna dome Yisɔs kɛnamɛŋ, na “Niyaŋ kuthɛgbɛ wɔ be tha bena thɔkɔŋ.

⁶Biya bibɔyɛ bi kɔŋ seeye ka keŋ kukiyaŋ, awa wɔ o wɔ ka bindɛ kɔŋ dɔmɔkɔ, na ‘Yama Banikisi wo niyo nde lahiri woŋ,’ awa bi kɔŋ thɔkɔŋ biya bibɔyɛ.

⁷Awa baŋ ni thathukuma thakendeŋ thaŋ thɔɔrɔ naa beŋ yuye masɔnkɔ ma ka ŋayombo wuthuriye bena mɛnɛ maseriŋ ma ka ŋayombo wuthokiye bena. Muŋ muŋ fooma mu kiŋ ba yenke niyɔ. Kɛrɛ mapeye ma ka lɔkɔ ba ka fa woŋ baŋ kutɛ hɛ.

⁸Kuyɛkɛŋ ku kɔŋ dekeyi kuyɛkɛŋ, awa hugbakine hu kɔŋ dekeyi hugbakine, kuyɛkɛŋ koŋ ku kɔŋ thɛnɛŋ ka thani ka bɔyɛ, awa ŋakɔnthɔ ŋamandiŋ ŋa kɔŋ niyɔ. Kɛrɛ muŋ muŋ fooma athɔyande iŋ wuthoonɛ wumayoŋ wu naa yɛrɛmɛ bohe ba saa ka mpaa.

⁹“Beŋ gbeeŋ ka yɛthɛ bakendeŋ niyaŋ kuthɛgbɛ. Beŋ kɔŋ bɔha e beŋ kato ka kaamani beŋ. Beŋ kɔŋ gbuduŋa ka bankɛŋ bathuŋuyande baŋ; beŋ kɔŋ kiya ka kɔtɔkɔy ka bakɛrɛni beŋ mɛnɛ ka gbakuiŋ beŋ saathɛ ba kiyaŋ ba bindɛ tepe Huseri Huyɔhɔy haŋ.

¹⁰Huseri Huyɔhɔy haŋ hu kɔŋ hintiŋ yenke niyo kɛwandi ka biyamɛti fooma saanuŋ bɛyiniŋ baŋ baŋ ba niyɔ.

¹¹Awa naa beŋ boho e beŋ kato ka kaamani beŋ, baŋ ni thɔɔrɔ ba hu beŋ gbonkoy; naa lɔkɔ baŋ tɛŋ, tɛpaŋ humo huma hu beŋ dɔma ba gbonkiya. Baa thayimbɛŋ tha beŋ gbonkoy thaŋ beŋ kutɛ biyɛ thɛŋ; tha kɔŋ ŋaye ka Yina wo ka Masaala woŋ.

¹²Ka lɔkɔ babɛina biya bi kɔŋ ni mbɛndamɛŋ na gbɔŋ ka bi iŋ sɛmbɛŋ baŋ beŋ haaŋ e bindɛ niya ba bindɛ koro. Komisɛŋ bibiyɛthɛŋ bi kɔŋ hɛlɛŋ nɛŋ ni ka mpati namɛŋ. Mpati bi kɔŋ nɔŋ ŋayi e bindɛ sɔkinɔkɔ biya namɛŋ e bindɛ niya ba bindɛ kooruwo.

¹³Wɔ yo wɔ kɔŋ bena thambo saathɛ ba kiyaŋ. Kɛrɛ wɔ yo wɔ wo ni muyuŋ haaŋ ka mapeye ma ka sii nama baŋ, ndɛ na nɔŋ niyɔ kisi.

¹⁴“Beŋ kɔŋ kutu Ntha Kithambiyo ki sɔkinɔkɔ Masaala na kiŋ ki kooye ka ba kiŋ sisande ba kɔɔ.” (Yindo ni karaŋ woŋ tute thukuma; yi be wuŋ metho.) “Ka lɔkɔ babɛina, bi ka kuyɛkɛŋ ku ka Yudiya yɔkɔŋ bi be kite ka ŋasɛri ŋaŋ.

¹⁵Wɔ wo penko ndɛ tute ka banka bakɛnama baŋ ka thinthi, ndɛ be tha nda thuhu ba ka sɛkitha mu ka banka nama baŋ kaake.

¹⁶Awa wɔ wo nda ka dumgbu nama ka, ndɛ be tha nda duu ba ka sɛkitha kuhɔli nama koŋ.

¹⁷Nambara ba kɔŋ nɔŋ niyɔ ka yɛrɛmɛŋ bi niyɔ iŋ thahɔɔyɛ beŋ mɛnɛ bi bɔpɔŋ malɛɛthɛŋ ka lɔkɔ babɛina.

¹⁸Niyaŋ kuraminɛ ka Masaala haliko bɛyiniŋ baŋ baŋ ba be tha nɔŋ niyɔ thamɔ.

¹⁹Ba nambarɛŋ babɔyɛ ba kɔŋ niyɔ ba be hɛ nɔŋ niyɔ hanthe kabi na thɛrɛŋ nde Masaala ka fa woŋ haaŋ saaŋ bohi ka lɔkɔ baŋ baŋ. Awa bɛyi bahɛna sa nɔŋ nda niyɔ ba thɔyande iŋ baŋ baŋ.

²⁰Kɛrɛ Masaala thanki thuruna malɔkɔiŋ ma ka nambarɛŋ baŋ baŋ. Mɛnɛ huŋ kutɛ nde, wɔ yo wɔ sa buthurɔ tuka. Kɛrɛ saathɛ ba bi thanki Masaala yɛtha beŋ, ndɛ thuruŋ mɛŋ.

²¹“Huna mɛnɛ wɔ kɔŋ bena tepe, na ‘Banikisi wo niyo nde lahiri woŋ na woŋ,’ maa ‘Ndɛ na kanka woŋ,’ baŋ niŋ ni lanɛya.

²²Ba bi dɔmɔkɔ beŋ na Baninikisiŋ bina bindɛ mahɛŋ ma bindɛ ka nɛŋ, mɛnɛ banabiŋ bibahothiŋ, bi kɔŋ fuŋ. Bi kɔŋ ni lamanthoni iŋ bɛyiniŋ bathakaba haliko ba thɔkina biya bi thanki Masaala yɛtha beŋ, mɛnɛ wu kɔŋ ŋɛnɔ.

²³Tuteŋ thukuma, wuna biyɛ yaŋ kɔŋ bena yenke tepe bɛyiniŋ baŋ baŋ saanuŋ bɛŋ ba niyɔ.

²⁴“Ka wuthurɔy wu nambarɛŋ baŋ baŋ see wuŋ, kaŋ woŋ kɔŋ niyɔ huntuma, awa sɛnkɛ woŋ sa nda bɛndi.

²⁵Sosɛŋ beŋ bi kɔŋ yayi maŋaye ka kuthahinɛ koŋ; sɛmbɛŋ ba ka kuthahinɛ koŋ baŋ ba kɔŋ thɛnɛŋ.

²⁶Ka lɔkɔ babɛina na ntiŋ Hati ka Wɔ woŋ tɔŋinɔkɔ e ndɛ kɔ saa ka thawuruma thaŋ iŋ sɛmbɛ bamandiŋ mɛnɛ yiki bamandiŋ.

²⁷Ndɛ kɔŋ ŋindi malekɛŋ nama beŋ ba kɔminande ka tha banthe bi thanki Masaala yɛtha beŋ maŋaye ka fa wobunthu woŋ fooma.

²⁸“Niyaŋ ba kuyeŋ ku tiŋ mutiŋ muthɔma mu dɔma muŋ na fiki, ku thɔyande nɔŋ kugbemgbeŋ, bena thaninuwa mathanani. Naa beŋ kute nthɔŋ bathalɛŋ biŋama beŋ thaha e bindɛ fuŋuna bompa, kɔthɔŋ ba dɔma na thamɔ bohe thɔɔ.

²⁹Nɛna hɛlɛŋ nɛŋ, naa beŋ kute nthɔŋ bɛyiniŋ baŋ baŋ ba si niyɔ, kɔthɔŋ ba dɔma na lɔkɔ baŋ thuriye, awa bɛŋ bohe nda sɛsuwa ba niyɔ.

³⁰Siyuwaŋ ba dɔma na biya bi ka yamana bahɛ baŋ baŋ sa niye daŋiyande fooma e bɛyiniŋ baŋ baŋ niyɔ.

³¹Kuthahinɛ koŋ iŋ ka fa woŋ mu kɔŋ daŋande fooma, kɛrɛ thampa niŋ thaŋ sa daŋande.

³²“Wɔ yo ka wo kɔthɔ malɔkɔ mɛnɛ wakathi wo Hati ka Wɔ woŋ see, hali hintiŋ malekɛŋ bi ka ariana beŋ, maa Hati woŋ. Yɔkɔŋ Fandaŋ woŋ nagbɛti ndɛ na kɔthɛ.

³³Niyaŋ kuthɛgbɛ baa beŋ kɔita malɔkɔ ma Hati ka Wɔ woŋ see.

³⁴Wu kɔŋ nɔŋ niyɔ nɔŋ mathɔyande ma ka wɔ bathɔy ba fuŋa biyasi ba kaa kuyɛkɛŋ napooŋ. Naa bathɔy ndɛ ba kaa, ndɛ peye bawaliŋ nama beŋ waliŋ ba womo woma ni. Awa ndɛ tepe badethiteke biyo haŋ woŋ ndɛ be tha nine hali.

³⁵Bɛna dethitekeŋ, baa beŋ kɔita lɔkɔ ba mariki wo ka banka baŋ woŋ see. Thampo wu kɔŋ niyɔ naa kaŋ woŋ thɔɔyɛ, maa huyɛ teete, maa saanuŋ kaŋ ba puthɔ, maa naa kaŋ puthɔy.

³⁶Mɛnɛ ndɛ see kuthurunɔ, ndɛ be tha bena pɛnki bi nine.

³⁷Hu yaŋ bena tepe haŋ, yaŋ tepe huŋ ba womo woma: Dethitekeŋ!”