Read West-Central Limba Maki 2 Bible Online

Maki 2 - West-Central Limba bible

Maki 2

¹Naa daŋande wuŋ hura hukɔndande, Yisɔs duu hɛlɛŋ ka mɛti ba ka Kapaniyɔmi. Awa huseri hubɛina gbanthande ba wundɛ duwa ka banka nama ka.

²Kɛna key biya bibɔyɛ thuŋande kɛnama ka hali hintiŋ mahenkeya mamɛɛsɛ mɛŋ tha pɛyɔ, hali hintiŋ ka gbada gbeeŋ mayekiyeke ka. Ka lɔkɔ babɛina Yisɔs kɔŋ nde ni kɛwandi huseri haŋ kɛnamɛŋ.

³Kɛna kati lamgbeŋ binaŋ hati lamgba wunthe wogbɛsinkɔy ka Yisɔs ka.

⁴Kɛrɛ naa penke bindɛ biya bibɔyɛ, awa gboŋa yo ka na bindɛ biite bathoonaŋ woŋ ka Yisɔs ka, bindɛ dunkɔy ka banka baŋ ka thinthi e bindɛ buŋunuwa kuwaŋ ka kooye Yisɔs ka. Naa buŋunu bindɛ, bindɛ taye bathoonaŋ woŋ ka muŋoye nama muŋ e bindɛ niŋ fuŋuntande ka buŋunu bindɛ ka.

⁵Naa kute Yisɔs ba dɔma na lanɛya ba ka biya beŋ beŋ baŋ abɔyi, wundɛ dome ka wogbɛsinkɔy woŋ, na “Hatiŋ woŋ, yi peniyo hakɛŋ bakɛnda baŋ.”

⁶Karimɔkɔiŋ binɔndi bi ka Siraŋ baŋ beŋ, bi dɔŋɔy nde kɛndɛ beŋ, bohe thɔnthiŋinuwande bindɛ bithɔ e bindɛ kɔ dɔma,

⁷na “Nama hati lamgba woŋ baŋ gbonkiye na? Wundɛ kɔŋ gbonkiyiyɛ Masaala na wunɛnɔy. Yɔkɔŋ Masaala nagbɛti wundɛ na punku ba pɛniyɛ wɔmɛti hakɛŋ.”

⁸Ka wuthurɔy wubɛina, Yisɔs kɔthɛ hu bindɛ siyi ka thathukuma namɛŋ thaŋ. Huna dome wundɛ kɛnamɛŋ, na “Mbɛ ba beŋ siyuwe bɛyiniŋ baŋ baŋ?

⁹Mbɛ wu yamɛ niyɔ sɔɔnɛya ba yaŋ dɔma ka hati lamgba wogbɛsinkɔy woŋ baŋ, na ‘Yi peniyo hakɛŋ bakɛnda baŋ,’ maa, na ‘Ŋayi ka kɔɔ, awa sɛkitha muŋoye nda muŋ, e yatha’?

¹⁰Yaŋ kɔŋ ni ba beŋ kɔthɔ ba dɔma na wɔ wo dɔma Hati ka Wɔ woŋ kiŋ iŋ mayoho ba pɛniyɛ biya hakɛŋ bakɛnamɛŋ baŋ ka fado.” Awa huna dome ntiŋ wundɛ ka hati lamgba wogbɛsinkɔy woŋ, na

¹¹“Yaŋ tepe yina, ŋayi ka kɔɔ, huuyuwa muŋoye nda muŋ, e duwa ka banka nda.”

¹²Naa kooye biya beŋ ka detha, hati lamgba woŋ ŋaye ka kɔɔ, e sɛkitha muŋoye nama muŋ, e ndɛ kɔ kaa napooŋ. Biya beŋ fooma ni ŋakabanɛ wumandiŋ, e bindɛ thunkunuwa Masaala na e bindɛ dɔma, na “Miŋ bareta hɛ nɔŋ kuta bɛyiniŋ bathakaba nɔŋ baŋ baŋ.”

¹³Yisɔs key hɛlɛŋ ka kudunku ku ka mankɔ ma ka Kalili maŋ koŋ. Biya bibɔyɛ key kɛnama ka, awa kɛna sɛsi wundɛ ba bindɛ thaninuwa.

¹⁴Naa wundɛ kɛndɛ kaande, kɛna kute ndɛ bathuu duthu wunthe wo dɔma Libay, hati ka Alifiyɔsi woŋ, doŋe ka ndɛ thuuwe duthu woŋ ka. Huna dome Yisɔs kɛnama, na “Yema yama, yi be niyɔ karandeŋ wokiyaŋ.” Ka thagbɛmgbɛŋ thabɛina Libay ŋaye ka doŋe ndɛ ka e yema Yisɔs na ka kaa.

¹⁵Naa nambe wuŋ wuyete, Yisɔs dɔŋɔy ka thɔma ka banka ba ka Libay baŋ. Bathuuni duthuiŋ bibɔyɛ mɛnɛ bi siyuwe bayahɛŋ bi ka dina wo ka biYusu beŋ ba bindɛ niyɔ bahakɛŋ yeme Yisɔs na ka kaa. Awa bibɔyɛ ka bindɛ mɛnɛ bakarandeni beŋ thɔɔtɔy niŋ ka thɔma haŋ.

¹⁶Karimɔkɔiŋ binɔndi bi ka Siraŋ baŋ beŋ, bi ka kiki ba dɔma baŋ na biFaresini, kute Yisɔs si thɔŋ iŋ bi siyuwe bayahɛŋ bi ka dina namɛŋ beŋ ba bindɛ niyɔ bahakɛŋ mɛnɛ bathuuni duthu woŋ beŋ. Huna thonthiŋine bindɛ bakarandeni nama beŋ, na “Mbɛ hu wundɛ thome iŋ biya nɔŋ na beŋ beŋ na?”

¹⁷Naa yuye Yisɔs bi si nɛŋ thɔnthɔŋɔŋ, wundɛ kaaye bindɛ thayiŋ ba dɔma, na “Biya bipethɔy beŋ thimota nda bapuyi woŋ, kɛrɛ bithoonɔy beŋ bina thimo bapuyi woŋ. Yaŋ tha see ka thiya biya bi iŋ yiki bamandiŋ beŋ, kɛrɛ yaŋ see ba bi siyuwo ba bindɛ niyɔ bahakɛŋ beŋ.”

¹⁸Ka malɔkɔ manthe mathɔɔkɔ, bakarandeni bi ka Yɔni wo Babiye woŋ iŋ kiki ba ka biFaresini beŋ baŋ bohe suŋ. Kɛna key biya binɔndi ka Yisɔs e bindɛ niŋ ka thɔnthiŋina ba dɔma, na “Mbɛ ba dɔmɛ bakarandeni bi ka Yɔni wo Babiye woŋ iŋ bakarandeni bi ka biFaresini beŋ kɔ bɔha suŋ, kɛrɛ bikɛnda beŋ boheta suŋ?”

¹⁹Yisɔs ni bindɛ yaabi ba dɔma, na “E beŋ atute thukuma ba wɔ wo thiyo ba penkitiye ka kuyɛntande koŋ ba wundɛ kɔ bɔha suŋ? Yaŋ niyeŋ lanɛya, wuŋ sa niyɔ mɛnɛ bayɛnti woŋ kiŋ kɛndɛ. Bindɛ sa mɛyi ba wuŋ niyɔ.

²⁰Kɛrɛ lɔkɔ baŋ ba kɔŋ see naa bayɛnti woŋ sekitho e kato napooŋ. Lɔkɔ babɛina na ntiŋ bindɛ bohi suŋ.

²¹“Wɔ yo wɔ ka wo thiyi rombo huŋama ka yaba batiyɔ, bɛyi bahɛna kutɛ rombo huŋama haŋ hu kɔŋ thuriyande e huŋ niya ba yaba batiyɔ baŋ sainɔ wumandiŋ.

²²Wɔ sa hɛlɛŋ thiyi mampa maŋama ma huitu ka muthiye mutiyɔ mu yehinuwo ka kuthagba ku ka baahu e muŋ lɔŋita, bɛyi bahɛna kutɛ muthiye muŋ mu kɔŋ tambɔ awa mampa maŋ ndo iŋ muthiye muŋ mu kɔŋ teetuwɔ. Wuna biyɛ mampa maŋama ayɔhɔ ba thiyo ka muthiye muŋama, awa ti muŋ muye sa teetuwɔ.”

²³Lɔkɔ banthe Yisɔs mɛnɛ bakarandeni nama beŋ bi kɔŋ nde daŋande ka dumgbu ba ka muthɛri ka Malɔkɔ Mahemuwe maŋ. Bakarandeni beŋ kaho kɔnthɔ. Kɛna bohe bindɛ thinka muthɛri muŋ, e bindɛ muŋ kɔ thɔma.

²⁴Naa kute wuŋ biFaresini beŋ, bindɛ tepe Yisɔs na ba dɔma, na “Detha hɛ bakarandeni nda beŋ bi si ni ba tepe Siraŋ bakɛntuŋ baŋ ba thana niyo ka Malɔkɔ Mahemuwe maŋ.”

²⁵Huna tepe Yisɔs kɛnamɛŋ, na “E beŋ niyeta hɛ karaŋ ba ni nde gbaku woŋ Dauda baŋ iŋ lamgbeŋ bi nde iŋ wundɛ ka biyasi haŋ beŋ naa kaho nde bindɛ ŋakɔnthɔ?

²⁶Ndɛ biyande nde ka banka ba ka Masaala baŋ e ndɛ ka sɛkitha ŋatoŋ ŋa deŋo nde kɛndɛ ŋaŋ nɔŋ munkii ka Masaala, e thɔma ŋɛŋ iŋ bi nde iŋ wundɛ ka biyasi haŋ beŋ. Wuŋ baŋ niyɔy nde ka malɔkɔ ma nde Abiyatha Bafode Womandiŋ. Wuŋ baŋ wu kiŋ ma sɔkinɔkɔ Siraŋ bakɛntuŋ baŋ ba wɔ hɛna ba thɔma ŋatoŋ ŋaŋ ŋaŋ baŋ daŋandeŋ bafodeni beŋ. Kɛrɛ gbaku woŋ Dauda thɔŋ nde ŋɛŋ iŋ lamgbeŋ nama beŋ.”

²⁷Awa kɛna gbanthaŋ ntiŋ Yisɔs e tɛpa, na “Malɔkɔ Mahemuwe maŋ yehinuwo ba wuyɔhɔy wu ka wɔmɛti, kɛrɛ wɔmɛti tha yehinuwo ba mɛŋ.

²⁸Awa wɔ wo dɔma Hati ka Wɔ woŋ wundɛ na kɛrɛŋ thiitaŋ Malɔkɔ Mahemuwe maŋ.”