Read West-Central Limba Maki 3 Bible Online

Maki 3 - West-Central Limba bible

Maki 3

¹Yisɔs dapiyɔkɔy hɛlɛŋ e ka biyande ka banka bathuŋuyande ba ka biYusu beŋ baŋ, ka penke ndɛ hati lamgba wo tukɛ yɔnkɔ haŋ woŋ.

²Biya binɔndi bi kiŋ nde kɛndɛ bi thimo ba dunkune Yisɔs na mathonko, huna nde bindɛ niŋ dethe natiŋ mɛnɛ wundɛ kɔŋ puyi wɔ ka Malɔkɔ Mahemuwe maŋ.

³Kɛna dome Yisɔs ka hati lamgba wo tukɛ yɔnkɔ haŋ woŋ, na “Ŋayi ka kɔɔ e yi saa ka kɔtɔkɔy dondo baŋ.”

⁴Huna thonthiŋine Yisɔs biya beŋ, na “Mbɛ mu ni mina Siraŋ bakɛntuŋ baŋ yamari ba niya ka Malɔkɔ Mahemuwe maŋ? E ba mase maa ba teetuwa? Ba niya sii ba ka wɔ kisi maa ba bɛŋ teetuwa?” Kɛrɛ bindɛ tha bohi hu bindɛ gbonkoy.

⁵Yisɔs dethe bindɛ iŋ mathoŋ, kɛrɛ halisa ka lɔkɔ babɛina hɛlɛŋ wundɛ kiŋ iŋ nkinikiniŋ ba bindɛ, baa biya bina nde bi banapiŋ. Bɛna dome ntiŋ Yisɔs ka hati lamgba wo tukɛ yɔnkɔ haŋ woŋ, na “Thumbuna yɔnkɔ nda haŋ.” Hati lamgba woŋ thumbuŋ yɔnkɔ nama haŋ, awa yɔnkɔ haŋ pethɔy nagbelebe.

⁶Kɛna fuŋ biFaresini beŋ ka banka bathuŋuyande baŋ e bindɛ ka thuŋande iŋ biya binɔndi bi kɔɔyɛ ka kiki ba ka Hɛrɔdi baŋ, awa e bindɛ bɔha magbɔma ba na bindɛ bohe Yisɔs na ba niŋ kɔra.

⁷Yisɔs iŋ bakarandeni nama beŋ fuŋ kɛndɛ e bindɛ kaa ka mankɔ ma ka Kalili maŋ. Awa biya bibɔyɛ yeme bindɛ kɛndɛ. Biya binɔndi bi kiŋ nde kɛndɛ bi ŋaye ka kuyɛkɛŋ ku ka Kalili, binɔndi ka kuyɛkɛŋ ku ka Yudiya,

⁸ka mɛti ba ka Yɛrusalɛmi, ka kuyɛkɛŋ ku ka Idumiya, kuyɛkɛŋ ku ka kuwaŋ kubekede ku ka mankɔ ma ka Yɔdaŋ maŋ, mɛnɛ ka kirinkiri hu pɛnkande ka mɛtiŋ ba ka Taya mɛnɛ ka Saidɔŋ baŋ. Sɛthɛ baŋ baŋ fooma see ka Yisɔs, baa bindɛ yuye bɛyiniŋ babɔyɛ ba wundɛ ni baŋ.

⁹Sɛthɛ baŋ boye nda haaŋ e Yisɔs tepe bakarandeni nama beŋ ba bindɛ niŋ mase ba gbe, wuna sa niŋ biya beŋ nɔthɔti wubɔyɛ.

¹⁰Wundɛ thanki puya kɛndɛ biya bibɔyɛ, awa bathoonani beŋ fooma bohe nɔthande ba niya kuthɔnthɔ ba boheke niŋ.

¹¹Awa timo tima ti biya bi bɔhɔy iŋ mbayiŋ binɛnɔy beŋ kutu Yisɔs na, bi kɔŋ ŋɔti kɛkɛŋ ka ŋathaki ŋakɛnama ŋaŋ iŋ masɔnkɔ matɔɔkɛ e bindɛ tɛpa, na “Yina Hati wo ka Masaala woŋ.”

¹²Kɛna pinde Yisɔs mbayiŋ binɛnɔy beŋ ba bi be tha ni na wuŋ kothiyo na wundɛ na.

¹³Yisɔs dunkɔy ka kusɛri koŋ e thiya biya bi thimo wundɛ beŋ.

¹⁴Naa key bindɛ kɛnama ka, wundɛ yɛthi lamgbeŋ kɔhi iŋ biye, e wundɛ bindɛ dɔma na baseriŋ bithɔɔkɔ. Bɛna dome wundɛ kɛnamɛŋ, na “Yaŋ thanki bena yɛtha ba niyɔ iŋ yaŋ. Awa yaŋ kɔŋ hɛlɛŋ bena ŋindi ba kaa kaŋ niya kɛwandi,

¹⁵awa beŋ kɔŋ niyɔ iŋ mayoho ba kaninande biya mbayiŋ beŋ.”

¹⁶Lamgbeŋ bikɔhi iŋ biye bi yɛthi wundɛ beŋ bina beŋ beŋ baŋ: Saimɔŋ wo thunde Yisɔs keŋ na Pita,

¹⁷Yemisi iŋ wɛndama Yɔni, mpati bi ka Sɛbɛdi beŋ, bi thunde Yisɔs keŋ ku dɔma koŋ na ‘Boanakesi,’ wu thalintando wuŋ na ‘Biya binthanka,’

¹⁸Anduru, Filipi, Batholomiyu, Mathiyu, Thɔmɔsi, Yemisi hati ka Alifiyɔsi, Thadiyɔsi, Saimɔŋ wo nde kurugba woŋ,

¹⁹mɛnɛ Yudasi Isakariyɔti, wo niyɛ nde Yisɔs na gbɔŋ ka hadeni nama beŋ woŋ.

²⁰Yisɔs duu ka banka nama ka. Kɛna key hɛlɛŋ sɛthɛ bamandiŋ kɔmande kɛndɛ. Wuŋ ni ba Yisɔs iŋ bakarandeni nama beŋ thana kuta hɛɛra bayete ba thɔma.

²¹Naa yuye biya nama beŋ ba bɛyiniŋ baŋ baŋ, bindɛ key ba niŋ kaayiyɛ ba niŋ diŋa ka kaa, bɛyi bahɛna kutɛ bindɛ yuye na biya beŋ gbonkoy ba ndɛ, na “Wundɛ thooyo kuso.”

²²Awa karimɔkɔiŋ binɔndi bi ka Siraŋ baŋ bi ŋaye ka mɛti ba ka Yɛrusalɛmi nda kɔ dɔma, na “Wundɛ kiŋ iŋ Beelesibuli. Gbaku wo ka mbayiŋ beŋ woŋ na dunkune niŋ sɛmbɛ ba kaninande biya mbayiŋ beŋ.”

²³Kɛna thiyi Yisɔs bindɛ e wundɛ bindɛ gbonkitiyande ka mbɔrɔiŋ ba dɔma, na “Nama Sithani kɔ kanthe Sithani na?

²⁴Mɛnɛ kuyɛkɛŋ hakande ka kikiŋ e kuŋ kɔ dekiyande ka yɛthɛ nama, kuyɛkɛŋ kubɛyna ku kɔŋ teetuwɔ.

²⁵Mɛnɛ mpoo hakuwande ka kikiŋ e bindɛ kɔ dekiyande, mpoo kibɛina ki kɔŋ teetuwɔ.

²⁶Huna, mɛnɛ hugbakine hu ka Sithani haŋ hakande ka kikiŋ, huŋ sa nambi hali; hu kɔŋ ŋɔti awa e huŋ thanka natharaŋ.

²⁷“Wɔ yo ka wo punku thinka banka ba ka basɛmbɛ ba niŋ tuuta yɔkɔŋ wundɛ be hintiŋ niŋ yenke yuka; wuna ndɛ niŋ punku tuuta.

²⁸“Huna, yaŋ tepe bena, biyamɛti bi kɔŋ punku peniyo iŋ Masaala hakɛŋ namɛŋ baŋ mɛnɛ bɛyi yo bɛyi banɛnɔy ba bindɛ ni mɛnɛ ba bindɛ gbonkoy.

²⁹Kɛrɛ wɔ yo wɔ wo gbonkoy wunɛnɔy ma sɔkinɔkɔ Yina wo ka Masaala woŋ, wundɛ sa pɛniya iŋ Masaala, baa wundɛ ni hakɛ ba sa punku ba peniyo haaŋ ka wuŋ key.”

³⁰Saabu babiyɛ Yisɔs kɔŋ tɛpi nanaŋ baŋ, biya binɔndi bi kɔŋ nde gbonkoy ba dɔma, na “Wundɛ kiŋ iŋ wayi wonɛnɔy.”

³¹Naa nde hintiŋ Yisɔs gbonkiye biya beŋ, nandama mɛnɛ mbɛndama bibiyɛthɛŋ tɛŋ ka gbada e bindɛ ŋinda baseri ba niŋ thiyiyo.

³²Ka lɔkɔ babɛina sɛthɛ bamandiŋ ba doŋeŋ nde e bɛŋ pɛnkande Yisɔs na. Kɛna tepo ndɛ ba dɔma, na “Detha hɛ nanda na mɛnɛ mbɛnda bibiyɛthɛŋ ka gbada ka, awa bi thimoŋ ba yina kuta yako.”

³³Huna dome ndɛ ka sɛthɛ baŋ ba dɔma, na “Mbɛ nandaŋ, awa mbɛ mbɛndaŋ bibiyɛthɛŋ?”

³⁴Wundɛ yili thaaya ka sɛthɛ ba pɛnkande niŋ baŋ e tɛpa, na “Ya binandaŋ beŋ mɛnɛ mbɛndaŋ bibiyɛthɛŋ beŋ.

³⁵Wɔ yo wɔ wo ni ba thimo Masaala ba wundɛ niya baŋ, wundɛ na nandaŋ, wɛndaŋ wowathe, mɛnɛ wɛndaŋ woyɛrɛmɛ.”