Read West-Central Limba Maki 4 Bible Online

Maki 4 - West-Central Limba bible

Maki 4

¹Yisɔs sɛsi hɛlɛŋ ba thaninuwa ka gbaraŋ ba ka mankɔ ma ka Kalili maŋ. Sɛthɛ bamandiŋ key niŋ pɛnkande haaŋ Yisɔs ŋaye ka ndɛ ka e ka thɔɔ ka gbe baŋ e kɛndɛ dɔŋɔ. Gbe baŋ baŋ ba kiŋ nde ka mankɔ ka, awa sɛthɛ bamandiŋ baŋ pɛyɛ kɔɔ ka gbaraŋ ba ka mankɔ maŋ baŋ ka detha niŋ.

²Wundɛ gbonkiye bindɛ ka mbɔrɔiŋ ba bindɛ thaninuwa bɛyiniŋ babɔyɛ, e tɛpa:

³na “Ponaŋ kuiha! Bapayi paka na kaayɛ nde ka paya paka ka dumgbu nama ka.

⁴Naa ndɛ payi, paka banɔndi ŋɔti ka gboŋa baŋ. Awa bɛna see bɛtiŋ beŋ bɛŋ thuu.

⁵Paka banɔndi ŋɔti ka kuthara koŋ, awa bɛŋ muku yako baa bɛŋ tha pututa iŋ kupati kubɔyɛ.

⁶Saathɛ ba na ka kupati kubɔyɛ, naa tɔɔki nthɔŋ kaŋ woŋ, paka baŋ baŋ thithi baa nthanthɛŋ kiŋ tha thɔɔ wusuŋɔy.

⁷Paka banɔndi ŋɔti ka hande hubasoy haŋ. Naa muku nthɔŋ bɛŋ, hande hubasoy haŋ nothite bɛŋ, awa bɛŋ tha sisi mutiŋ.

⁸Kɛrɛ paka banɔndi ŋɔti ka kuyɛkɛŋ kuyɔhɔy koŋ. Bɛŋ muku e bɛŋ yɔhɔ wumandiŋ. Naa fuŋuŋ bɛŋ, kuyantha kunɔndi ku kiŋ nde iŋ thathaa kɔnthɔ kataati, kunɔndi kɔnthɔ kasɔŋ-hanthe, kunɔndi kɛmɛ wunthe.”

⁹Naa gbanthaŋ Yisɔs, huna dome ndɛ, na “Ndo ba yuyɛ, pona kuiha.”

¹⁰Naa pɛyɛ Yisɔs ndɛ wuntheŋ, biya binɔndi bi yuyɛ niŋ beŋ mɛnɛ bakarandeni bikɔhi iŋ biye beŋ key kɛnama ka e bindɛ niŋ ka thɔnthiŋina ba mɛthina mbɔrɔiŋ kiŋ.

¹¹Huna dome Yisɔs kɛnamɛŋ, na “Beŋ thanki kothino gbundu wo ka Hugbakine hu ka Masaala haŋ. Kɛrɛ biya bihɛna bi kiŋ bi tha kutu hɛɛra baŋ baŋ, bi kɔŋ yuyɛ bɛyiniŋ baŋ baŋ maŋaye ka mbɔrɔiŋ nagbɛti.

¹²Yaŋ gbonkitiyande bindɛ ka mbɔrɔiŋ, huna ‘Bi kɔŋ dethi e bindɛ detha, kɛrɛ bindɛ sa kutu. Bi kɔŋ poŋ kuiha e bindɛ pona kuiha, kɛrɛ bindɛ sa metho. Mɛnɛ bindɛ kute nde e bindɛ yuyɛ e bindɛ metho, bi kɔŋ nde sikiyɔkɔ ka Masaala, awa Masaala kɔŋ nde bindɛ pɛniyɛ hakɛŋ namɛŋ baŋ.’”

¹³Kɛna thɔnthɔŋɔŋ Yisɔs bindɛ, na “E beŋ methota mbɔrɔ kiŋ kiŋ baŋ? Mɛnɛ beŋ tha kiŋ metho, nama beŋ metho mbɔrɔ yo mbɔrɔ ki yaŋ tɛpi?

¹⁴Bapayi woŋ na thɔyande nɔŋ wɔ wo key kaŋ tɛpa thampa tha ka Masaala thaŋ woŋ.

¹⁵Biya binɔndi athɔyande iŋ paka ba ŋɔtɛ ka gboŋa baŋ. Biya beŋ beŋ bi kɔŋ yuyɛ thampa thaŋ yako; kɛrɛ naa bindɛ thanki nthɔŋ thɛŋ yuyɛ, Sithani see bindɛ kanati thampa tha yuye bindɛ thaŋ.

¹⁶Binɔndi athɔyande iŋ paka ba ŋɔtɛ ka kuthara koŋ baŋ. Bindɛ bina bi yuyɛ thampa tha ka Masaala thaŋ beŋ, e bindɛ thɛŋ yɛrɔkɔ yako iŋ mayehitɔkɔ.

¹⁷Kɛrɛ saathɛ ba na tha bindɛ thɔɔ wusuŋɔy ka thampa thaŋ e bindɛ thɛŋ yɛrɔkɔ wutɛŋɛ, naa thɔɔrɔiŋ maa nambarɛŋ penke nthɔŋ bindɛ saathɛ ba thampa thaŋ, bindɛ pɛyi niya lanɛya haŋ.

¹⁸Biya binɔndi beŋ athɔyande iŋ paka ba ŋɔtɛ ka hande hubasoy haŋ. Bindɛ bina bi yuyɛ thampa tha ka Masaala thaŋ beŋ,

¹⁹kɛrɛ thɔɔrɔiŋ iŋ bɛyiniŋ ba ka fado baŋ mɛnɛ kufiyo ku ba deethuwa nanhulu baŋ koŋ nothite thampa thaŋ, awa bindɛ tha punku ba sisa mutiŋ.

²⁰Kɛrɛ biya binɔndi beŋ athɔyande iŋ paka ba payo ka kuyɛkɛŋ kuyɔhɔy koŋ. Bindɛ bina bi yuyɛ thampa thaŋ beŋ, e bindɛ thɛŋ yɛrɔkɔ, awa e bindɛ sisa mutiŋ: kuyantha kunthe kɔnthɔ kataati, kunɔndi kɔnthɔ kasɔŋ-hanthe, awa kunɔndi kɛmɛ wunthe.”

²¹Yisɔs key ka kɔtɔkɔy ba tɛpa, na “Wɔ ka wo mɔɔli mumɔɔli nama muŋ e muŋ pututa kuma maa e muŋ nɔra ka kuhinsi ka pothi. Kɛrɛ ndɛ kɔŋ muŋ tutu ka tha ka muŋ toŋine waŋ nama baŋ ka banka baŋ fooma.

²²Ntha yo ntha ki nununɔy ki kɔŋ sisa ka nagberekethe, awa ntha yo ntha ki pututɔy ki kɔŋ kubunuwa.

²³Ponaŋ kuiha, awa e beŋ yuyɛ.”

²⁴Wundɛ tepe hɛlɛŋ bindɛ ba dɔma, na “Ponaŋ kuiha ka bɛyiniŋ ba beŋ yuyɛ baŋ. Siraŋ banthe ba beŋ konsiŋine biya bihɛna beŋ baŋ, bɛna Masaala bena konsiŋine. Kɛrɛ konsiŋino hukendeŋ haŋ hu kɔŋ yaŋ kahuwa.

²⁵Wɔ wo iŋ ntha woŋ, wundɛ kɔŋ hɛlɛŋ ndintiya; kɛrɛ wo iŋ wuyete woŋ, hali wuyete wu iŋ ndɛ wuŋ, wundɛ kɔŋ wuŋ kanita e wundɛ peyo wu ka iŋ ntha.”

²⁶Yisɔs key ka kɔtɔkɔy e dɔma, na “Hugbakine hu ka Masaala haŋ athɔyande nɔŋ mbɔrɔ ki ka wɔ wo payɛ thathaa ka dumgbu nama baŋ.

²⁷Wɔ woŋ baŋ kɔŋ nine huyɛ yo huyɛ, e kɔŋ thɔhɔ sanka o sanka, awa thathaa thaŋ thaŋ baŋ see bɔɔti e thɛŋ muka. Kɛrɛ wundɛ tha kɔthɔ mu dɔmɛ thɛ be bɔɔti.

²⁸Kuyɛkɛŋ koŋ kuna niyɛ ba muthuu muŋ bɔɔtuwa, e muŋ muka, e muŋ fuŋa yako-yako, e muŋ sɛnkina, e muŋ tima.

²⁹Naa thithi mutiŋ mubɛina, wundɛ sɛsi ba ŋɔna, baa malɔkɔ ma ka ŋɔna haŋ maŋ tɛŋ.”

³⁰Kɛna dome hɛlɛŋ Yisɔs, na “Mbɛ mu miŋ thɔyintande Hugbakine hu ka Masaala haŋ ndee? Yaŋ kɔŋ bena toŋine mu thɔyande iŋ Hugbakine hu ka Masaala haŋ.

³¹Huŋ athɔyande nɔŋ wɔ wunthe wo sɛkithɛ thaa humɛɛsɛ hu dɔma haŋ na ‘mɔstadi,’ awa e ndɛ huŋ thuuwa ka dumgbu nama ka.

³²Naa nambe wuŋ, huŋ muku e muthuu muŋ muŋ baŋ thɔɔkuwa e muŋ yama muthuuni muŋ fooma. Muŋ see niyɔ muthuu mumandiŋ haaŋ e bɛtiŋ beŋ ka thooyuwa thahooti ka bathalɛŋ beŋ.”

³³Yisɔs ni kɛwandi thampɛŋ tha ka Masaala thaŋ ka biya beŋ ka mbɔrɔiŋ nɔŋ kiŋ kiŋ. Ndɛ gbonkitiyande bindɛ ti bindɛ punku ba metho.

³⁴Wundɛ tha bindɛ gbonkitiyande mahɛŋ ma ka mbɔrɔiŋ kutɛ. Kɛrɛ naa wundɛ pɛyɛ iŋ bakarandeni nama beŋ, wundɛ kɔŋ bindɛ methine bɛyi yo bɛyi.

³⁵Bɛrɛ ba naa bohe kaŋ woŋ ba thɔɔ, Yisɔs tepe bakarandeni nama beŋ, na “Miŋ thuhandeŋ thuhaŋ mankɔ maŋ.”

³⁶Huna pɛyi bindɛ sɛthɛ baŋ, e bakarandeni beŋ thɔɔ ka gbe ba thɔɔyɛ nde Yisɔs baŋ e bindɛ niŋ diŋa ka kaa. Gbeni bahɛna ba kiŋ nde kɛndɛ.

³⁷Naa bindɛ ka gbe baŋ, huru humandiŋ penke bindɛ wuthinkande ka mankɔ maŋ awa thamunkulu thaŋ bohe ba gbantuwande gbe baŋ. Gbe baŋ bohe ba thiŋo mandi.

³⁸Yisɔs kiŋ nde ka gbe baŋ mahɛŋ. Wundɛ kɔŋ nde nine e dɛntɔkɔ mudɛntɔkɔ muŋ. Kɛna thɔhɔŋ niŋ bakarandeni beŋ e bindɛ niŋ thɔnthiŋina, na “Karimɔkɔ, e hali miŋ tuukuwaŋ dondo baŋ fooma yi boheta sɛmbɛ?”

³⁹Kɛna ŋaye Yisɔs ka kɔɔ e pinda huru haŋ, na “Thɛba nayeŋ!” Awa e tepe thamunkulu thaŋ ba thɛŋ thɛba nayeŋ. Awa ka wuthurɔy wubɛina, huru haŋ thebe nayeŋ, awa wuŋ niyɔy nayeŋ ka mankɔ ka.

⁴⁰Yisɔs tepe ka bakarandeni beŋ ba dɔma, na “Mbɛ hu beŋ paye? E beŋ haaŋ hɛ beŋ ka iŋ lanɛya?”

⁴¹Kɛrɛ bindɛ fooma thooyo payɔ humandiŋ e bindɛ bɔha thɔnthiŋinuwande, na “Mbɛ hati wowathe woŋ baŋ, wo hali hintiŋ huru haŋ iŋ thamunkulu thaŋ amɛyiyɛ niŋ yamari?”