Read West-Central Limba Maki 9 Bible Online

Maki 9 - West-Central Limba bible

Maki 9

¹Yisɔs key ka kɔtɔkɔy ba bindɛ tepe, na “Yaŋ tepe bena, biya binɔndi bi kooyeŋ dondo baŋ bi sa niye tuke bi kɔŋ kutiyɔkɔ Hugbakine hu ka Masaala haŋ hu si see iŋ sɛmbɛ bamandiŋ.”

²Naa daŋande wuŋ mandɛni masɔŋ-manthe, Yisɔs thiyi Pita na, Yemisi, mɛnɛ Yɔni. Ndɛ diŋe bindɛ ka thinthi ka kusɛri kuthɔkuwɛ-thɔkuwɛ ka bindɛ bintheŋ. Naa bindɛ niŋ dethi, kɛna thikipeke Yisɔs,

³awa e yaba nama baŋ maleke e bɛŋ huha napooŋ wuŋ daŋande ba ti bɛŋ wɔ yo wɔ ka faido punku gbeerine.

⁴Kɛna kute bakarandeni bitaati beŋ Ilaiya na mɛnɛ Musa e bindɛ kɔ gbonkiye Yisɔs na.

⁵Huna dome Pita ka Yisɔs, na “Karimɔkɔ, wuŋ yɔhɔy na nda miŋ dondo na. Mɛnɛ yi kɔŋ mɛyi, miŋ kɔŋ kiyi bankɛŋ bataati bathikɛŋ dondo baŋ, yi banthe, Musa banthe, Ilaiya banthe.”

⁶Pita iŋ bintɔni nama beŋ payɔy nda wumandiŋ haaŋ wuna biyɛ ndɛ tha nda kɔthɔ hu ndɛ tɛpi.

⁷Kɛna see wuruma haŋ pututɔ kaŋ woŋ e niŋ haŋ bindɛ pɛnka, awa e thampa fuŋa maŋaye ka wuruma haŋ tha tɛpɛ ba dɔma, na “Hatiŋ wo thimo yaŋ woŋ na woŋ baŋ. Huna poniyaŋ niŋ kuiha.”

⁸Kɛrɛ naa yili bindɛ thaaya, bindɛ tha nda kutu wɔ o wɔ wohɛna kɛndɛ yɔkɔŋ Yisɔs nagbɛti, ndɛ na kute bindɛ.

⁹Naa Yisɔs iŋ bakarandeni beŋ thuhu ŋaye ka kusɛri koŋ, Yisɔs ni bindɛ yamari ba dɔma, na “Baŋ tepe wɔ o wɔ ba thanki beŋ kuta baŋ, haaŋ nɔŋ yɔkɔŋ Hati ka Wɔ woŋ ŋayino ka tuka haŋ iŋ sii.”

¹⁰Bindɛ yɛrɔkɔy yamari wo ni Yisɔs bindɛ woŋ, kɛrɛ bindɛ sɛsi ba gbonkiya ka wunthe iŋ ntɔ nama ba bɛyiniŋ ba thanki bindɛ yuyɛ baŋ, e bindɛ dɔma, na “Mbɛ mu siyuwe wundɛ gbeeŋ mu ndɛ dɔŋ ba ŋaye ka tuka haŋ?”

¹¹Huna thonthiŋine niŋ bakarandeni beŋ, na “Mbɛ ba dɔmɛ karimɔkɔiŋ bi ka Siraŋ baŋ beŋ bi kɔŋ tɛpi ba dɔma na yɔkɔŋ Ilaiya na nɔŋ yenke saa?”

¹²Yisɔs mɛyiyɛ bindɛ, na “Nɔndi yaathi, Ilaiya na yenke saa, awa ndɛ kɔŋ si kɔsinɔkɔ bɛyiniŋ fooma. Magbali ma ka Masaala maŋ tepe na Hati ka Wɔ woŋ kɔŋ niya nambara haaŋ e wundɛ thanthiyo. Mbɛ ba siyuwe beŋ magbali maŋ ma kɔŋ nɛŋ tɛpi?

¹³Kɛrɛ yaŋ tepe bena ba wuŋ niyɔ na Ilaiya thanki nde nda saa, awa bindɛ ni niŋ ba thimo bindɛ ba niŋ niya, nɔŋ na tepe magbali ma ka Masaala maŋ ba nɛŋ wuŋ kɔ niyiye ba ndɛ.”

¹⁴Naa teŋiteke Yisɔs iŋ bakarandeni bitaati beŋ ba si thɔɔtɔ bi pɛyɛ hɛ beŋ, bindɛ penke kɛndɛ sɛthɛ bamandiŋ. Karimɔkɔiŋ binɔndi bi ka Siraŋ baŋ beŋ kɔ gbakila iŋ bakarandeni bi pɛyɛ hɛ beŋ.

¹⁵Ka wuthurɔy wu kute biya beŋ Yisɔs na wuŋ, bindɛ ni kuthɛrɛnaŋ wumandiŋ. Kɛna thare bindɛ e bindɛ niŋ ka maana.

¹⁶Naa tɛŋ Yisɔs ka bakarandeni beŋ, ndɛ thɔnthɔŋɔŋ bindɛ, na “Mbɛ hu beŋ gbakile iŋ karimɔkɔiŋ beŋ beŋ baŋ?”

¹⁷Wɔ wunthe ka sɛthɛ baŋ ni niŋ yaabi, na “Karimɔkɔ, hatiŋ wowathe na sisi yaŋ kɛnda do, wo kutande iŋ wayi wonɛnɔy. Awa ndɛ punketa gbonkiya hali.

¹⁸Timo tima ti ndɛ kɔ kutiyande iŋ wayi woŋ, ndɛ kɔŋ niŋ tɔŋ kɛkɛŋ, e kɔ fuŋuna kuhɛ ka hothi, e kɔ ŋakitinande thathithi nama thaŋ, e kahitande fooma. Huna see yaŋ theteke bakarandeni nda beŋ ba niŋ kaninande iŋ wayi woŋ, kɛrɛ bindɛ tha punku.”

¹⁹Huna dome Yisɔs kɛnamɛŋ, na “O biya bi be ni lanɛya. Tima hɛlɛŋ nda yaŋ niyɔ iŋ beŋ? Tima hɛlɛŋ nda yaŋ bena ni muyuŋ? Sisiyaŋ nuŋ hati woŋ dondo baŋ.”

²⁰Kɛna kato hati woŋ ka Yisɔs ka. Ka wuthurɔy wu kute wayi woŋ Yisɔs na wuŋ, ndɛ toŋe hati woŋ wumandiŋ e ndɛ kɔ binkilɔkɔ kɛkɛŋ, e kɔ fuŋuna kuhɛ ka hothi.

²¹Huna thonthiŋine Yisɔs fanda ka hati woŋ, na “Tima nambe nda wuŋ na ndɛ kutande iŋ wayi woŋ baŋ?” Fanda hati woŋ ni yaabi, na “Kabi ndɛ kiŋ hatiyɛ.

²²Lɔkɔiŋ fooma wayi woŋ kɔŋ yɔli ba niŋ kɔra kaŋ yɛla niŋ ka buu, mɛnɛ ka mandi. Yaandi, kutiyɛ mina nkinikiniŋ e yi mina mase ba niŋ puya, mɛnɛ yi kɔŋ punku.”

²³Huna dome Yisɔs kɛnama, na “Mbɛ ba yi dome, na ‘mɛnɛ yi kɔŋ punku’? Wɔmɛti wo niyɛ lanɛya kɔŋ punku niya bɛyi yo bɛyi.”

²⁴Ka wuthurɔy wubɛina fanda ka hati woŋ dome, na “Yaŋ kiŋ iŋ lanɛya, kɛrɛ bɛŋ boyeta. Yaandi, mase yama yaŋ be niyɔ iŋ lanɛya batɛŋɛ.”

²⁵Naa kute Yisɔs sɛthɛ baŋ ba si yaŋ thiŋitande, wundɛ ni wayi wonɛnɔy woŋ yamari, na “Yindo wayi wo babobo wo lɔŋɔy ŋaiha woŋ baŋ, yaŋ ni yina yamari ba yi fuŋa ka hati woŋ baŋ, awa ba nɔŋ nda kutande iŋ wundɛ hali.”

²⁶Kɛna tɛntitɔkɔy wayi woŋ wubɔyɛ e tɔŋa hati woŋ kɛkɛŋ, e ndɛ ŋɔɔ nagbaraŋ saanuŋ ndɛ ntiŋ niŋ kɔ pɛyɛna. Hati woŋ niyɔy nɔŋ ka tuku wundɛ. Awa womo woma dome nda, na “Ndɛ tuku.”

²⁷Kɛrɛ Yisɔs bohe niŋ kugbeke e niŋ mase ba ŋayi ka kɔɔ.

²⁸Naa biyande Yisɔs ka banka ka, bakarandeni nama beŋ key kɛnama ka nasɔɔyi e bindɛ dɔma, na “Mbɛ hu tha miŋ punke kaniniyande hati woŋ iŋ wayi woŋ?”

²⁹Huna dome Yisɔs kɛnamɛŋ, na “Yɔkɔŋ lanɛya nagbɛti bɛna punku kaninande wayi woŋ baŋ siiya. Ntha kihɛna yo sa punku wuŋ niya.”

³⁰Yisɔs iŋ bakarandeni nama beŋ ŋaye kɛndɛ e bindɛ kɛriŋande kuyɛkɛŋ ku ka Kalili koŋ. Wundɛ thimota ba wɔ yo wɔ kɔthɔ ka ndɛ,

³¹baa ndɛ kɔŋ kɔ thanani bakarandeni nama beŋ, na “Hati ka Wɔ woŋ kɔŋ dunkuna ka thɛnkɔ tha ka biyamɛti, awa bi kɔŋ niŋ kɔri. Kɛrɛ ndɛ kɔŋ ŋayina ka tuka haŋ ka gbɛɛŋ wo tɛŋinɛ wotaati woŋ ba niyɔ iŋ sii.”

³²Bindɛ tha metho mathanani maŋ maŋ, awa bindɛ payɔy ba niŋ thɔnthiŋina.

³³Bindɛ tɛŋ ka mɛti ba ka Kapaniyɔmi. Naa biyande bindɛ kaake, Yisɔs thɔnthɔŋɔŋ bakarandeni nama beŋ, na “Mbɛ ba hɛ beŋ see kaŋ gbakila ka gboŋa?”

³⁴Kɛrɛ bindɛ tha niŋ ni yaabi, baa bi kɔŋ nde key kaŋ gbakila ba wo niyɔ wɔ mandiŋ mateete makɛnamɛŋ.

³⁵Naa dɔŋɔy Yisɔs, ndɛ thiyi bakarandeni kɔhi iŋ biye beŋ, e ndɛ dɔma kɛnamɛŋ, na “Wɔ yo wɔ wo thimo ba niyɔ ka thinthi woŋ fooma ka mateete makendeŋ, yɔkɔŋ wundɛ be thathinɔkɔ ka pothi kendeŋ fooma.”

³⁶Kɛna sekithe wundɛ hati woyete e wundɛ niya ba ndɛ kɔɔ ka kɔtɔkɔy kɛnamɛŋ. Wundɛ pɔpitɔkɔy niŋ e dɔma kɛnamɛŋ, na

³⁷“Wɔ yo wɔ wo yɛrɔkɔ hati yo hati nɔŋ woŋ baŋ, ndɛ yɛrɔkɔy yama; awa wɔ yo wɔ wo yɛrɔkɔy yama, yaŋ wuthɔ kutɛ yɛrɔkɔy ndɛ, kɛrɛ ndɛ yɛrɔkɔy hɛlɛŋ wo ŋindɛ yama woŋ.”

³⁸Yɔni dome kɛnama, na “Karimɔkɔ, miŋ kute wɔ si kaninande biya mbayiŋ ka keŋ kukɛnda koŋ, awa miŋ tepe niŋ ba ndɛ pɛya, baa ndɛ ka ka kiki ntuŋ baŋ.”

³⁹Huna dome Yisɔs kɛnamɛŋ, na “Pɛyaŋ niŋ pinda haŋ, baa wɔ o ka wo punku niya bɛyi bathakaba ka keŋ kukiyaŋ koŋ, ka wuthurɔy wubɛina e ndɛ hɛlɛŋ kɔ gbonkiya bɛyiniŋ banɛnɔy ba yaŋ.

⁴⁰Baa wɔ yo wɔ wo be mina sɔkinɔkɔ, ndɛ kiŋ ba miŋ.

⁴¹Tuteŋ thukuma haŋ haŋ baŋ, wɔ yo wɔ wo bena dunkune mandi ba thiiye baa na beŋ bikiyaŋ, wɔ bɛina kɔŋ kutu kuthunkuŋ kukɛnama koŋ.

⁴²“Mɛnɛ wɔ yo wɔ ni ba wunthe ka mpati beŋ beŋ baŋ bi niyɛ yama lanɛya beŋ ŋɔta ka hakɛ, wu kɔŋ niyɔ hita ba wɔ bɛina yantino raka humandiŋ ka nkoyo nama kiŋ e ka muluno ka mankɔ masuŋɔy-suŋɔy maŋ.

⁴³Mɛnɛ yɔnkɔ nda haŋ ni ba yi ŋɔta ka hakɛ, thoŋa e yi huŋ yɛla. Wu kɔŋ niyɔ hita yi ba kuta sii ba kɔy yo kɔy wu ka yɔnkɔ, ayaŋ yi ba niyɔ iŋ thɛnkɔ thaye e yi yelo ka yahanama ka buu bu sa dɔmɔ buŋ, [

⁴⁴ka tha ka ŋanunku bi sa tuku bi thɔŋ wɔ beŋ, mɛnɛ buu bu sa dɔmɔ buŋ].

⁴⁵Awa mɛnɛ kuthaki nda koŋ ni ba yi ŋɔta ka hakɛ, thoŋa e yi kuŋ yɛla. Wu kɔŋ niyɔ hita yi ba kuta sii ba kɔy yo kɔy wu ka kuthaki, ayaŋ yi ba niyɔ iŋ ŋathaki ŋaye e yi yelo ka yahanama, [

⁴⁶ka tha ka ŋanunku bi sa tuku bi thɔŋ wɔ beŋ, mɛnɛ buu bu sa dɔmɔ buŋ].

⁴⁷Awa mɛnɛ hooya nda haŋ ni ba yi ŋɔta ka hakɛ, fuŋuna huŋ. Wu kiŋ hita yi ba kuta sii ba kɔy yo kɔy iŋ hooya hunthe, ayaŋ yi ba niyɔ iŋ thaaya thaye e yi yelo ka yahanama,

⁴⁸ka tha ka ŋanunku bi sa tuku bi thɔŋ wɔ beŋ, mɛnɛ buu bu sa dɔmɔ buŋ.

⁴⁹“Wɔ yo wɔ kɔŋ methino ka buu, nɔŋ na saraka methino ka mɛɛti na.

⁵⁰“Mɛɛti maŋ ayɔhɔ; kɛrɛ mɛnɛ mɛɛti maŋ piriŋiŋ wuthimɔy nama wuŋ, nama hɛlɛŋ nda yi punku niye ba mɛŋ thimɔ? “Niyɔŋ nɔŋ mɛɛti, awa niyɔŋ iŋ mathɛbɛ mateete makendeŋ.”