Read West-Central Limba Luku 1 Bible Online

Luku 1 - West-Central Limba bible

Luku 1

¹Yama gbali kuthagba koŋ koŋ ka bayiki niŋ woŋ Thiyafilɔsi. Biya bibɔyɛ yole nda si punke bindɛ ba gbala kuna ku ka bɛyiniŋ ba thankɛ niyɔ ka mateete makɛntuŋ maŋ.

²Bindɛ gbale ba thanki nde miŋ tepo baŋ iŋ biya bi kutiyɔkɔy bɛyiniŋ baŋ baŋ beŋ ka thaaya thakɛnamɛŋ thaŋ kabi ka mathɛrɛŋ maŋ, bi koyiŋɛ huseri haŋ beŋ.

³Bɛna, bayiki niŋ woŋ, naa thanki yaŋ thanuwa bɛyiniŋ baŋ baŋ, e yaŋ bɛŋ yekiyɔkɔ fooma there ka mathɛrɛŋ maŋ, yaŋ simɔkɔy ba dɔma na wu kɔŋ niyɔ wuyɔhɔy ba yina gbalite bɛyiniŋ baŋ baŋ toloŋ nɔŋ na niiye bɛŋ na.

⁴Yaŋ ni wuŋ haliko yi be punku ba kɔthɔ nɔndi baŋ nagberekethe ba bɛyiniŋ ba thanki yi tepo baŋ.

⁵Ka lɔkɔ ba nde Hɛrɔdi gbaku wo ka kuyɛkɛŋ ku ka Yudiya, bafode wunthe kɔŋ nde kɛndɛ wo dɔma na Sɛkaraiya wo nde ka kufɛŋ ku ka hufode hu ŋaye ka Abaiya[1] haŋ. Keŋ ku ka wɔtɔ nama woŋ nde kuna dɔma Ilisabɛthi; wundɛ hɛlɛŋ nde wɔ na wo ŋaye ka bɔnsɔŋ ba ka bafodeni.

⁶Sɛkaraiya iŋ wɔtɔ nama Ilisabɛthi biya bina nde biyɔhɔy ka thaaya tha ka Masaala thaŋ, e bindɛ putiyɔ sirani bi ka Masaala beŋ bi niyo nde bindɛ yamari beŋ fooma.

⁷Sɛkaraiya iŋ wɔtɔ nama Ilisabɛthi see thanthi wu ka hati, baa Ilisabɛthi badithi na nde wundɛ.

⁸Lɔkɔ banthe nde Sɛkaraiya ni wali bakɛnama baŋ nɔŋ bafode ka banka bamandiŋ ba ka Masaala baŋ, naa tɛŋ wuŋ malɔkɔ namɛŋ maŋ wundɛ ba kɛndɛ niya wali.

⁹Wundɛ see yɛtha naa yele bindɛ makoro ba niya wali ka banka bamandiŋ ba ka Masaala baŋ nɔŋ na nde bindɛ yethe bafodeni beŋ na, ba tɔɔnuwa gbomgbo ba thimɔy huru ka bɛsɛ ba ka Masaala baŋ. Wundɛ see biyande ka banka bamandiŋ ba ka Masaala baŋ,

¹⁰awa e sɛthɛ baŋ fooma kɔ niya kuraminɛ ka gbada ka, ka wakathi wo gbomgbo ba thimɔy huru baŋ toonuwo woŋ.

¹¹Kɛna see maleka wo ka Mariki woŋ niŋ tɔŋinɔkɔ e wundɛ si kɔɔ ka yɔnkɔ huthome hu ka bɛsɛ ba gbomgbo ba thimɔy huru baŋ toonuwo kɛ.

¹²Naa kute niŋ Sɛkaraiya, wundɛ thunɔkɔy; wundɛ see thooyo payɔ.

¹³Kɛrɛ maleka wo ka Masaala woŋ tepe ka Sɛkaraiya, na “Sɛkaraiya, ba payɔ! Masaala thanki yɛrɔkɔ kuraminɛ kukɛnda koŋ; wɔtɔ nda woŋ Ilisabɛthi kɔŋ mpuu hati wathe; yi kɔŋ ba niŋ thunda keŋ na Yɔni.

¹⁴Awa mpoo hu ka hati woŋ baŋ haŋ hu kɔŋ sisi mayehitɔkɔ mamandiŋ kɛnda iŋ ka biya bibɔyɛ.

¹⁵Ndɛ kɔŋ niyɔ wɔ mandiŋ ka thaaya tha ka Mariki woŋ thaŋ, awa wundɛ sa thiiye mampa,[2] awa Masaala kɔŋ niŋ thiŋiŋ Yina wokɛnama woŋ there ka hɔɔyɛ.

¹⁶Awa wundɛ kɔŋ hɛlɛŋ si duutu biIsirɛli bibɔyɛ ka kuwaŋ ku ka Mariki woŋ Masaala wokɛnamɛŋ woŋ.

¹⁷Wundɛ kɔŋ kɔtiyɔkɔ Mariki woŋ, awa wundɛ kɔŋ see iŋ sɛmbɛ, iŋ punka humandiŋ nɔŋ na nde banabi woŋ na Ilaiya, ba si bohinande komisɛŋ bibiyɛthɛŋ iŋ mpati namɛŋ.[3] Wundɛ kɔŋ si sikinande bi sa mɛyi ba putiyɔ sirani ba ka Masaala baŋ ka gboŋa ba ka siyuwa nɔŋ na biya bithumbɛ siyuwe. Wundɛ kɔŋ si kɔsinɔkɔ biya bi ka Mariki woŋ beŋ.”

¹⁸Sɛkaraiya thɔnthɔŋɔŋ maleka woŋ, na “Nama yaŋ kothiye ba bɛyiniŋ baŋ baŋ niyɔ nɔndi. Detha hɛ, yaŋ thanthe nda, awa yɛrɛmɛ niŋ woŋ hɛlɛŋ wothanthɛ.”

¹⁹Maleka woŋ tepe, na “Yama Kebirɛli[4] na, wo kɔɔyɛ woŋ ba niyiyɛ Masaala na wali timo tima. Masaala ŋindi yama kɛnda do ba yina si gbonkitiyande iŋ ba yina si tepe huseri huyɔhɔy haŋ haŋ.

²⁰Kɛrɛ yi, yi tha ni kulanɛya huseri hu sisiyɛ yaŋ yina haŋ. Bɛna there nda hɛ, yi kɔŋ niyɔ babobo haaŋ yɔkɔŋ bɛyiniŋ ba thanki yaŋ yina gbonkitiyande baŋ thanki nɔŋ niyɔ.”

²¹Ka lɔkɔ babɛyna, sɛthɛ baŋ ba kooyeŋ thuŋ ka yumba Sɛkaraiya na ka gbada ka e bindɛ kɔ tutunuwande mu nde niŋ niyɔ kaake ka.

²²Naa fuŋ nda wundɛ, wundɛ tha nda punku gbonkitiyande bindɛ, bindɛ see kɔthɔ ba dɔma na wundɛ kute bɛyi ka maniyɔ mathɔɔkɔ nɔŋ ka mandɛ kaake ka banka bamandiŋ ba ka Masaala baŋ; wundɛ tha nda punku ba gbonkiya yɔkɔŋ ayili nda thɛnkɔ.

²³Naa thankaŋ wundɛ lɔkɔ nama baŋ ba niya wali ka banka ba ka Masaala baŋ, Sɛkaraiya duu ka yikiya nama ka.

²⁴Naa yole wuŋ namba, wɔtɔ nama Ilisabɛthi see niyɔ hɔɔyɛ, awa wundɛ tha fuŋ ka gbada ba sɛnkɛni bisɔhi.

²⁵Ilisabɛthi tepe, na “Ka tete Masaala kutiye yama nkinikiniŋ; wundɛ mase yama ka wumankɛ wuŋ nthɔŋ nda nagbɔŋ. Masaala gbɔnɔŋ kuyaahu ka yaha niŋ haŋ.”

²⁶Ka sɛnkɛ wosɔŋ-wunthe woŋ naa niyɔy Ilisabɛthi hɔɔyɛ, Masaala ŋindi maleka woŋ Kebirɛli na ka kuyɛkɛŋ ku ka Kalili, ka mɛti ba dɔma na ka Nasarɛthi,

²⁷ka hati bɛthɔ wo nde Yusufu wo ŋaye ka bɔnsɔŋ ba ka Dauda hathi woŋ, keŋ nama kuna Mariyama.[5]

²⁸Maleka woŋ see ka Mariyama; wundɛ tepe, na “Maande! Yaathi, Mariki woŋ kɔŋ iŋ yi, awa wundɛ thanki yina thiyiyɛ thaduba thamandiŋ.”

²⁹Naa yuye Mariyama huseri hu sisiyɛ niŋ maleka woŋ haŋ, huŋ niyɔy niŋ kɔnthɔhili, kɛna bohe wundɛ tutunuwande kolo ba kaake ka huseri haŋ haŋ.

³⁰Kɛrɛ maleka woŋ tepe niŋ, na “Mariyama, ba payɔ, baa Masaala thanki tɔŋina makutiyɛ nama maŋ kɛnda.

³¹Detha, yi kɔŋ niyɔ hɔɔyɛ, awa yi kɔŋ mpuu hati wathe, awa yi kɔŋ niŋ thundu keŋ na Yisɔs.[6]

³²Wundɛ kɔŋ si niyɔ wɔ mandiŋ awa ndɛ kɔŋ si tuta keŋ na Hati ka Masaala wo ka thinthi woŋ nthɔŋ nda fooma. Mariki woŋ Masaala kɔŋ niŋ tutu hugbakine hu ka Dauda haŋ mbemba nama kɔŋ,

³³awa ndɛ kɔŋ si kɛriŋiyɛ bɔnsɔŋ ba ka Yakuba baŋ haaŋ ka wuŋ key; hugbakine nama haŋ huŋ sa niyɔ iŋ mapeye.”[7]

³⁴Mariyama thɔnthɔŋɔŋ maleka woŋ, na “Nama yaŋ niiye hɔɔyɛ; yaŋ kɔyta hɛ wathe?”

³⁵Maleka woŋ tepe ka Mariyama, na “Yina wo ka Masaala woŋ kɔŋ thuhu kɛnda, awa sɛmbɛ ba ka Masaala wo ka thinthi woŋ nthɔŋ nda fooma ba kɔŋ si tɔŋinɔkɔ yina; ba kolo babɛyna hati wo see ka mpoo woŋ kɔŋ dɔma na wɔ mɛthɛ, Hati ka Masaala woŋ.

³⁶Detha hɛ Ilisabɛthi na, mpoo nda kɔŋ wo domo nde nda woŋ na ndɛ sa mpuu, kɛrɛ ka tete wundɛ kɔŋ nda iŋ hɔɔyɛ husɛnkɛni bisɔŋ-wunthe,

³⁷baa Masaala punkeŋ niya bɛyi yo bɛyi.”[8]

³⁸Huna tepe Mariyama, na “Yaŋ kɔŋ ka thɛnkɔ tha ka Mariki woŋ thaŋ; wu niyɔyŋ yama nɔŋ na tepe yi na.” Awa kɛna duu maleka woŋ.

³⁹Ka malɔkɔ mabɛina Mariyama ŋaye yako; wundɛ ŋate ka mɛti banthe ka ŋasɛri ŋa ka Yudiya.

⁴⁰Ndɛ key biyande ka banka ba ka Sɛkaraiya; ndɛ key maaŋ Ilisabɛthi na.

⁴¹Naa yuye Ilisabɛthi mamaaŋ ma ka Mariyama maŋ, hati woŋ ŋɛnɔkɔy ka kotho hu ka Ilisabɛthi haŋ, awa Ilisabɛthi boho iŋ Yina wo ka Masaala woŋ.

⁴²Kɛna yele Ilisabɛthi thampa thatɔɔkɛ e tɛpa, na “Wɔ thaduba na yi nthɔŋ nda fooma mateete ma ka yɛrɛmɛŋ fooma; hati wothaduba na wo yi see ka mpaa woŋ.

⁴³Mbɛ mu dɔmɛ bɛyi bamandiŋ baŋ baŋ bɛ be niyɔ kiyaŋ, ba saa ka maano iŋ nanda ka Mariki wokiyaŋ woŋ?

⁴⁴Baa, naa yuye nthɔŋ yaŋ na maaŋ yi, hati woŋ ŋɛnɔkɔy ka kotho hukiyaŋ haŋ iŋ mayehitɔkɔ.

⁴⁵Wɔ thaduba na yi ba niya kulanɛya ba dɔma na huseri hu ka Mariki woŋ haŋ kɛnda hu kɔŋ niyɔ nɔndi.”

⁴⁶Mariyama tepe, na “Huthukuma hukiyaŋ haŋ thunkunu Mariki woŋ.

⁴⁷Yina wokiyaŋ woŋ yehitɔkɔy ba Masaala, Banikisi wokiyaŋ woŋ,

⁴⁸baa wundɛ siyi bawali nama wothathinɔkɔy woŋ. There nda hɛ biya fooma bi kɔŋ yama dɔŋ wɔ wothaduba,

⁴⁹ba saathɛ ba bɛyiniŋ babukuyuwɛ ba thanki Masaala wo iŋ sɛmbɛ woŋ yama niyiyɛ baŋ. Keŋ nama koŋ kukuwɛ kuna.

⁵⁰Awa nkinikiniŋ kikɛnama kɔŋ ki kɔŋ ka thankaha tha ka bi payɔy niŋ beŋ, ŋaye nthɔŋ nda ka mpati bi mpɔy beŋ, mɛnɛ mpati bi see ka mpoo beŋ fooma.

⁵¹Wundɛ tɔŋɔŋ yɔnkɔ nama husɛmbɛ haŋ kaŋ pankitinuwande biya bi niyɔkɔ kaba beŋ e teetuwa madɛɛnki makɛnamɛŋ maŋ fooma.

⁵²Wundɛ kɔŋ thathaŋ gbakuiŋ beŋ ŋaye ka madoŋeŋ namɛŋ maŋatinɔkɔy maŋ, e wundɛ ŋatina bithathinɔkɔy beŋ.

⁵³Wundɛ theriye bi kaho kɔnthɔ beŋ muthɔma muyɔhɔy, e wundɛ kantha bananhuluiŋ beŋ wu ka ntha.

⁵⁴Wundɛ thiŋiŋ lahiri ba ni nde wundɛ ka mbembɛŋ ntuŋ kɔŋ baŋ, awa wundɛ see ka mase Isirɛli na, bawali wokɛnama woŋ.

⁵⁵Wundɛ simɔkɔy ba tɔŋina nkinikiniŋ ka Ebrahim[9] iŋ ka bɔnsɔŋ nama baŋ fooma haaŋ ka wuŋ key.”[10]

⁵⁶Mariyama dɔŋɔy iŋ Ilisabɛthi ba sɛnkɛni bitaati, saanuŋ wundɛ ba duwa ka banka nama ka.

⁵⁷Naa tɛŋ lɔkɔ baŋ Ilisabɛthi ba mpaa, wundɛ see mpuu hati wathe.

⁵⁸Bi thuriyande wundɛ beŋ ndo, biya nama beŋ ndo, bindɛ fooma yehitɔkɔy iŋ wundɛ wumandiŋ naa yuye bindɛ ba dɔma na Mariki woŋ kutiye niŋ nkinikiniŋ.

⁵⁹Naa daŋande wuŋ hura kasɔŋ-kaye, bindɛ see ba saa ka thiya hati woŋ ka bintɔni nama.[11] Bindɛ ŋaye ba niŋ thunda keŋ ku ka fandama koŋ Sɛkaraiya,

⁶⁰kɛrɛ nandama tepe, na “Ade, wuŋ ka nɛŋ; ndɛ kɔŋ ba thundo keŋ na Yɔni.”

⁶¹Huna tepe bindɛ, na “Kɛrɛ wɔ ka ka bɔnsɔŋ ndeŋ baŋ wo dɔma na Yɔni.”

⁶²Bindɛ yiliyɛ fandama na yɔnkɔ ba niŋ thɔnthiŋina keŋ ku ka hati woŋ.

⁶³Huna thiye wundɛ ba yekiniyo mugbale. Naa yekiniyo wundɛ muŋ, wundɛ gbale, na “Keŋ nama kuna Yɔni.” Biya beŋ fooma ni ŋakabanɛ ŋamandiŋ.

⁶⁴Ka yako babɛyna hothi nama haŋ pɛɛkɔy; hiliŋ nama haŋ yethɔy ba gbonkiya. Kɛna bohe wundɛ gbuŋunuwa Masaala na.

⁶⁵Biya bi tɔpɛ bindɛ beŋ fooma thooyo payɔ, awa bɛyiniŋ baŋ baŋ key kaŋ gbonkiyo ka mɛtiŋ batɔpɛ baŋ iŋ ba ka ŋasɛri ŋaŋ fooma ka kuyɛkɛŋ ku ka Yudiya.

⁶⁶Biya fooma bi yuyɛ bɛyiniŋ baŋ baŋ beŋ thiye bɛŋ ka thathukuma, e bindɛ kɔ kaa kaŋ thɔnthiŋina, na “Mbɛ mu hati woŋ baŋ si ni yee?” Bindɛ thɔnthɔŋɔŋ kuthɔnthɔŋɔŋ koŋ koŋ baŋ baa sɛmbɛ ba ka Masaala baŋ ba kɔŋ iŋ wundɛ.

⁶⁷Fanda ka Yɔni woŋ Sɛkaraiya see bɔha iŋ Yina wo ka Masaala woŋ. Wundɛ ni hunabi ba tɛpa,

⁶⁸na “Yaŋ thunkunu Mariki woŋ Masaala wo ka biIsirɛli beŋ woŋ, wo sɛɛ ka mase iŋ ba bakɔŋa biya nama beŋ.

⁶⁹Wundɛ mina tɔŋita banikisi womandiŋ, wo there ka bɔnsɔŋ ba ka gbaku woŋ Dauda, bawali nama woŋ.

⁷⁰Nɔŋ na ni nde wundɛ lahiri na ka banabiŋ bikɛnama beŋ na.

⁷¹Ba mina si niya kisi ŋaye ka hadeni ntuŋ beŋ, iŋ ka sɛmbɛ ba ka bi thambo mina beŋ fooma.

⁷²Wundɛ tepe nde ba dɔma na wundɛ kɔŋ toŋine mbembɛŋ ntuŋ kɔŋ nkinikiniŋ, awa na ndɛ kɔŋ simɔkɔ mayuku nama makuwɛ maŋ iŋ mbembɛŋ kikɛntuŋ kɔŋ.

⁷³Nɔŋ na ni nde wundɛ lahiri na e sɛkitha magbiŋ ka fanda ntuŋ woŋ Ebrahim,

⁷⁴ba mina niya kisi ŋaye ka hadeni ntuŋ beŋ, haliko na miŋ niŋ niye kubatho wumɛthɛ, wuthumbɛ, wu ka iŋ payɔ, ka malɔkɔ ma ka siini bakɛntuŋ baŋ fooma.

⁷⁵

⁷⁶“Yi, yindo hatiŋ woŋ, yi kɔŋ si thunda keŋ na banabi wo ka Masaala wo ka thinthi woŋ nthɔŋ nda fooma. Yi kɔŋ kɔtiyɔkɔ Mariki woŋ, ba niŋ kaa kaŋ pɛthiyɛ gboŋa ba wundɛ si fuŋuye baŋ,[12]

⁷⁷ba kaa kaŋ tepe biya nama beŋ ba dɔma na bi kɔŋ niya kisi naa bindɛ peniyo hakɛŋ bikɛnamɛŋ.

⁷⁸Masaala ntuŋ woŋ wɔ bankinikiniŋ na; wundɛ ni ba mina kaŋ womatheyani wo ka kisi baŋ woŋ mina bende,

⁷⁹iŋ ba bɛnda ŋaye ka ariana ka bi dɔŋɔy ka huntuma haŋ beŋ fooma,[13] ba mina katitɔkɔ ka gboŋa ba ka mathɛbɛ.”

⁸⁰Hati woŋ see fuŋ lamgba haaŋ e thiya thukuma. Ndɛ niyɔy ka wula ka haaŋ lɔkɔ baŋ tɛŋa ba see wundɛ toŋineke baŋ nagberekethe ka biya biIsirɛli beŋ.