Read West-Central Limba Luku 10 Bible Online

Luku 10 - West-Central Limba bible

Luku 10

¹Naa daŋande wuŋ, Mariki woŋ Yisɔs yɛthi biya kɔnthɔ kasɔŋ-kaye iŋ biye, e bindɛ kɔɔtina ka biye-biye ka mɛtiŋ baŋ iŋ ka bohe wundɛ ba kaande kɛ fooma.

²Kɛna tepe wundɛ bindɛ, na “Ŋɔna haŋ abɔyi, kɛrɛ baŋɔni beŋ boyeta; niyaŋ kuraminɛ ba wobiyɛ yiya haŋ woŋ be ŋindi baŋɔni ka ŋɔna nama haŋ.

³Kaaŋ! Dethaŋ, yaŋ ŋindi bena nɔŋ takɛŋ ka mateete ma ka yaŋɛŋ beŋ.

⁴Baŋ diŋ pontho ba thiye kɔbiri, maa pontho, maa dagbalɛŋ. Baŋ kɔɔ wunambɛ ba maanuwa biya ka gboŋa.

⁵Naa beŋ biyande banka, dɔmaŋ, na ‘Haliko Masaala thiya mathɛbɛ ka banka baŋ baŋ.’

⁶Mɛnɛ wɔ kɛndɛ wo kɔsinɔkɔy ba kuta mathɛbɛ, mathɛbɛ makendeŋ maŋ mɛ kɔŋ kɛndɛ pɛyɔ; mɛnɛ wuŋ ka nɛŋ, mɛ kɔŋ duu hɛlɛŋ kendeŋ.

⁷Dɔŋɔŋ kɛndɛ e beŋ kɔ thɔma e beŋ kɔ thiiye ntha yo ntha ki bindɛ bena kɛndɛ dunkune. Bawali woŋ kɔŋ ba kuta kuthunkuŋ ŋaye ka wali ba wundɛ ni baŋ. Baŋ key kaŋ pɛnkande ŋaye ka banka ba kaa ka banka.

⁸Naa beŋ tɛŋ ka mɛti e beŋ kɛndɛ yeroko, thɔmaŋ ntha yo ntha ki beŋ dunkuno.

⁹Puyaŋ kɛndɛ biya bithoonuwɔy beŋ e beŋ bindɛ tepe, na ‘Hugbakine hu ka Masaala haŋ thuriye bena.’

¹⁰Kɛrɛ mɛti yo mɛti ba beŋ key beŋ thana yeroko, fuŋaŋ ka gboŋɛŋ babukuyuwɛ baŋ e beŋ bindɛ tepe,

¹¹na, ‘Kuligbi ku ka mɛti bakendeŋ baŋ, ku kahitɛ ka dagbalɛŋ ntuŋ baŋ koŋ, miŋ kɔŋ kuŋ konki ba ku be niyɔ maseri ba bena sɔkinɔkɔ. Kɛrɛ simɔkɔŋ nde, Hugbakine hu ka Masaala haŋ thanki thuriye bena narɔthɔ.’”

¹²Huna tepe Yisɔs, na “Yaŋ kɔŋ bena tepe, na ka malɔkɔ ma ka kɔnsɔŋ koŋ maŋ, Masaala kɔŋ kutiyɛ nkinikiniŋ mɛti ba ka Sɔdɔmi ayaŋ ba mɛti baŋ baŋ!

¹³“Nambara ka kuwaŋ kukendeŋ, bendo biKoresiŋ iŋ biBɛthɛseda, baa mɛnɛ wali bathakaba ba niyo kendeŋ do baŋ na bɛna niyo nde ka Taya iŋ ka Saidɔŋ, kɛrɛ bindɛ thɔɔyɛ nde nɔŋ nda yabɛŋ babɛkɔŋ e puyinɔkɔ hɔɔtɔ ba tɔŋina ba dɔma na bindɛ kutɔkɔy mathonko e sikiyɔkɔ ŋaye ka banɛnɔy bakɛnamɛŋ baŋ.

¹⁴Ka malɔkɔ ma ka kɔnsɔŋ koŋ maŋ, Masaala kɔŋ kutiyɛ biTaya iŋ biSaidɔŋ nkinikiniŋ wuŋ yama ba beŋ.

¹⁵Awa beŋ, bendo biKapaniyɔmi, e beŋ kɔŋ ba yenthiŋina yɛthɛ bakendeŋ ka thinthi ka ariana? Beŋ kɔŋ thathina ka pothi ka yahanama!”

¹⁶Yisɔs tepe bakarandeni nama beŋ, na “Wɔ yo wɔ wo bena yɛrɔkɔ, wundɛ yɛrɔkɔy yama; awa wɔ yo wɔ nɛnɛ wo bena baŋaŋ, yama baŋaŋ wundɛ. Wɔ yo wɔ nɛnɛ wo yama baŋaŋ, wundɛ baŋaŋ wo ŋindɛ yama woŋ.”

¹⁷Bakarandeni kɔnthɔ kasɔŋ-kaye beŋ iŋ biye duu ŋaye biyasi haŋ iŋ thathukuma thayɔhɔy. Bindɛ tepe, na “Mariki, naa key miŋ, ŋaye ka keŋ kukɛnda koŋ, hali mbayiŋ beŋ gbeeŋ aputiyɔ mina.”

¹⁸Huna tepe Yisɔs kɛnamɛŋ, na “Hiŋ yando nde dethi, yaŋ kute naa ŋɔti Sithani nɔŋ kuwalani ŋaye ka ariana.

¹⁹Dethaŋ, yaŋ dunkune bena sɛmbɛ ka thinthi ka Hadeŋ woŋ, iŋ ba yaathuwa bikɛkɛni iŋ dempuiŋ fooma, awa ntha yo ntha sa bena punku niya muthoonɛ.

²⁰Kɛrɛ halisa, baŋ hɔkɔŋ yehitɔkɔ ba wuŋ nagbɛti, ba dɔma na mbayiŋ binɛnɔy beŋ putiyɔy bena. Kɛrɛ yehitɔkɔŋ ba kɔthɔ ba dɔma na ŋakeŋ ŋakendeŋ ŋaŋ gbalo ka ariana.”

²¹Ka wakathi wobɛina gbeeŋ, Yina wo ka Masaala woŋ thiŋiŋ Yisɔs na iŋ mayehitɔkɔ, e Yisɔs tɛpa, na “Yaŋ thiyi yina maamo Fandaŋ woŋ, Mariki wo ka ariana woŋ, iŋ ka faido, ba dɔma na yi nunuŋ bɛyiniŋ baŋ baŋ ka bikele beŋ, iŋ bikɔthɛ beŋ, kɛrɛ e yi bɛŋ toŋine malɛɛthɛŋ. Fandaŋ woŋ, yi ni bɛyiniŋ baŋ baŋ fooma nɔŋ na thimo yi bɛŋ ba bɛŋ niyɔ.”

²²Yisɔs tepe biya beŋ, na “Fandaŋ woŋ thanki yama dunkune ntha yo ntha. Wɔ yo wɔ ka wo kɔthɛ nɔŋ na Hati woŋ, yɔkɔŋ nthɔŋ Fandaŋ woŋ; maa wo kɔthɛ Fandaŋ woŋ yɔkɔŋ nthɔŋ Hati woŋ mɛnɛ wo Hati woŋ yɛthi ba niŋ toŋine Fandama woŋ.”

²³Huna sikiyeke wundɛ ka bakarandeni beŋ naa pɛyɛ bindɛ bindɛ bintheŋ, e tɛpa, na “Mayehitɔkɔ ma kɔŋ ba biya bi kutɛ bɛyiniŋ ba thanki beŋ kuta baŋ.

²⁴Yaŋ kɔŋ bena tepe, banabiŋ bibɔyɛ iŋ gbakuiŋ bibɔyɛ bi thimoŋ nde nɔŋ ba kuta bɛyiniŋ ba beŋ kutu baŋ, kɛrɛ bindɛ tha bɛŋ punku kuta; awa bi thimoŋ nde nɔŋ ba yuyɛ ba beŋ yuyɛ baŋ, kɛrɛ bindɛ tha bɛŋ punku yuyɛ.”

²⁵Karimɔkɔ wunthe wo ka Siraŋ baŋ woŋ see ba saa ka gbɛriŋina Yisɔs na, e tɛpa, na “Karimɔkɔ, mbɛ ba yaŋ ni gbeeŋ ba kuta sii ba kɔy yo kɔy?”

²⁶Huna thonthiŋine niŋ Yisɔs, na “Mbɛ ba gbalo ka Siraŋ baŋ? Mbɛ ba ni yi kɛndɛ karaŋ?”

²⁷Karimɔkɔ woŋ tepe, na “Yi kɔŋ ba thimo Mariki woŋ Masaala wokɛnda woŋ iŋ thukuma hukɛnda haŋ fooma, iŋ sii bakɛnda baŋ fooma, iŋ sɛmbɛ bakɛnda baŋ fooma, iŋ masiyi makɛnda maŋ fooma; awa yi kɔŋ ba thimo ntɔ nda na nɔŋ na thimo yi yɛthɛ bakɛnda.”

²⁸Huna tepe Yisɔs, na “Yi gbonkoy wuyɔhɔy. Niya nɔŋ na gbonkiye yi na, awa yi kɔŋ kutu sii ba kɔy o kɔy.”

²⁹Kɛrɛ karimɔkɔ woŋ thimoŋ ba kanɔkɔ kuyaahu, huna thonthiŋine wundɛ Yisɔs na, na “Nkaana ntɔŋ?”

³⁰Huna tepe Yisɔs mbɔrɔ kɔŋ kɔŋ, na “Wɔ wunthe kɔŋ nde thathi ŋaye ka Yɛrusalɛmi ba kaa ka Yɛriko. Kɛna see wundɛ ŋooto iŋ batuwani ka gboŋa. Bindɛ kanite niŋ ntha yo ntha ki iŋ wundɛ; bindɛ gbuduŋe niŋ haaŋ; bindɛ niŋ pɛya ŋoye wo ba tuka.

³¹Wuŋ see pɛnkande bafode wunthe kɔ fuŋe gboŋa babɛina. Naa kute wundɛ niŋ wundɛ ŋoye, wundɛ gbɔrɔŋ gboŋa bahɛna.

³²Nɛna ni hɛlɛŋ wɔ wunthe wo ka bɔnsɔŋ ba ka Libay baŋ ba nde iŋ wali ba ka banka bamandiŋ ba ka Masaala baŋ. Naa kute wundɛ hati lamgba woŋ ŋoye, wundɛ gbɔrɔŋ hɛlɛŋ gboŋa bahɛna.

³³Kɛrɛ hati lamgba wothahinɛ napooŋ woSameriya wo ka kubiyasi nama, naa see wundɛ tɛŋ ka ŋoye hati lamgba woŋ baŋ kɛ e niŋ kuta, nkinikiniŋ bohe niŋ.

³⁴Kɛna thuriye wundɛ niŋ. Wundɛ thiye mayɔ mɛnɛ mampa nɔŋ tɛɛni ka mathimɔyŋ maŋ. Wundɛ yuuku mɛŋ wuyɔhɔy e niŋ sɛkitha e tuta niŋ ka maama wo niŋ katitɔkɔ woŋ, e niŋ ka niya yikiya, e niŋ dethiteke wuyɔhɔy.

³⁵Naa puthɔy kaŋ woŋ, wundɛ fuŋuŋ kɔbiri wonɔndi, e wundɛ dunkune wo niyɛ niŋ yikiya woŋ e tɛpa, na ‘Ya niŋ; dethiteke niŋ wuyɔhɔy. Timo tima ti yi thiyi ba wundɛ, naa yaŋ see, yaŋ kɔŋ yina si thunkuŋ.’”

³⁶Huna thonthiŋine Yisɔs karimɔkɔ woŋ, na “Ka biya bitaati beŋ beŋ, nkaana yi simɔkɔ wo tɔŋinɛ huntɔndiya huyɔhɔy ka hati lamgba wo ŋɔtɛ ka mateete ma ka batuwani beŋ maŋ woŋ?”

³⁷Huna tepe wundɛ, na “Wo kutiyɛ niŋ nkinikiniŋ woŋ na.” Huna tepe Yisɔs kɛnama, na “Awa, kaa, e yi nɛŋ ka niya.”

³⁸Naa Yisɔs iŋ bakarandeni nama beŋ key kubiyasi namɛŋ koŋ ka kɔtɔkɔy, wundɛ key tɛŋ ka mɛti banthe. Wɔ yɛrɛmɛ wo dɔma na Matha yɛrɔkɔy niŋ ka banka nama baŋ.

³⁹Awa Matha kɔŋ nde kɛndɛ iŋ wɛndama woyɛrɛmɛ wunthe wo dɔma na Mariyama wo dɔŋɔy ka pothi ka Yisɔs, e kɔ poniyɛ mathanani nama maŋ kuiha.

⁴⁰Kɛrɛ na thanki Matha kaho wali baŋ, wundɛ key tepe Yisɔs na, na “Mariki, e yi wuŋ ka yina bɛyi ba yama wɛndaŋ peyene wali baŋ yaŋ wuntheŋ? Tepe niŋ ba yama mase.”

⁴¹Kɛrɛ Mariki woŋ tepe niŋ, na “Matha, Matha, yi ni yaagba haaŋ e bɛyiniŋ babɔyɛ yina kɔ niya thɔrɔ ka thukuma.

⁴²Kɛrɛ bɛyi banthe bɛna bakolo baŋ; Mariyama thanki yɛtha kufɛŋ kukolo koŋ nthɔŋ nda fooma, ku sa wundɛ punku ba kanito iŋ wɔ yo wɔ koŋ.”