Read West-Central Limba Luku 12 Bible Online

Luku 12 - West-Central Limba bible

Luku 12

¹Naa thuŋande biya wuluiŋ-wuluiŋ haaŋ e bindɛ nda kɔ yathitituwande, Yisɔs gbonkitiyande hintiŋ bakarandeni nama beŋ, na “Niyaŋ kuthɛgbɛ, beŋ be tha thɔɔtɔ yisithi wo ka biFaresini beŋ woŋ, hunitɔkɔ namɛŋ haŋ.

²Baa bɛyi yo bɛyi ba pututuwɔy bɛ kɔŋ nɔŋ kubunuwa, awa gbundu yo gbundu bɛ kɔŋ nɔŋ kothiyo.

³Huna bɛyi yo bɛyi ba gbonkoy yi ka huntuma haŋ, bɛ kɔŋ nɔŋ gbonkiya hatɔ teete nadewu, awa bɛyi yo bɛyi ba ŋɔintɔkɔy yi ka makonko kaake, bɛ kɔŋ nɔŋ koyiŋa ka gbanthaŋ ka.

⁴“Yaŋ tepe bena, bendo binyathikɔŋ bikiyaŋ beŋ, baŋ payɔ bi kɔri kɔtɔ koŋ beŋ, mahɛŋ mabɛina bindɛ ka nda iŋ ba bindɛ punku ba niya bena.

⁵Yaŋ kɔŋ bena tepe wo beŋ ba payɔ; payɔŋ Masaala na wo, naa ndɛ sekithe siini bakendeŋ baŋ woŋ, e hɛlɛŋ niyɔ iŋ sɛmbɛ ba bena yɛla ka yahanama. Yaŋ kɔŋ bena tepe, woŋ, ndɛ na beŋ ba payɔ.

⁶“E sɛntiŋ biye kutɛ sonkoiŋ bisɔhi niyo gbɔŋ? Kɛrɛ hali wunthe Masaala sa niŋ piitɔ.

⁷Masaala thanki kɔnda bɔɔyɛ ndeŋ buŋ. Huna baŋ payɔ, beŋ akaahi mɔlɔŋ daŋandeŋ sonkoiŋ bibɔyɛ.

⁸“Huna yaŋ tepe bena, wɔ yo wɔ wo sa yama niyɔ kuyaahu ka mateete ma ka biyamɛti, Hati ka Wɔ woŋ sa nɛnɛ nɔŋ niŋ niyɔ kuyaahu ka mateete ma ka malekɛŋ bi ka Masaala beŋ.

⁹Kɛrɛ wɔ yo wɔ wo yama buuhu ka mateete ma ka biyamɛti, wundɛ kɔŋ nɛnɛ buuhuwa ka mateete ma ka malekɛŋ bi ka Masaala beŋ.

¹⁰“Awa wɔ yo wɔ wo gbonkoy thampa ba sɔkinɔkɔ Hati ka Wɔ woŋ, wundɛ kɔŋ punku peniyo; kɛrɛ wɔ yo wɔ wo dunkunɔkɔy thampa ba teetuwa keŋ ku ka Yina wo ka Masaala woŋ koŋ, wundɛ sa punku peniyo.

¹¹“Awa mɛnɛ bindɛ kati bena ka bankɛŋ bathuŋuyande baŋ ba bena kɔnsiŋina, maa ka kɔtɔkɔy ka bakɛrɛni beŋ mɛnɛ bakalani bibayahɛŋ beŋ, baŋ niyɔkɔ yaagba ba hu beŋ ka tɛpi iŋ na beŋ huŋ ka tepe,

¹²baa Yina wo ka Masaala woŋ kɔŋ bena thanani ka malɔkɔ mabɛina gbeeŋ hu beŋ ba tɛpa.”

¹³Wɔ wunthe ka sɛthɛ baŋ tepe Yisɔs na, na “Karimɔkɔ, yaandi tepe wɛndaŋ na ba miŋ hanande kɛɛ baŋ iŋ wundɛ.”

¹⁴Huna tepe Yisɔs niŋ, na “Hati lamgba, nkaana niyɛ yama bakɔnsɔŋɔŋ maa bahaninande bena kɛɛ?”

¹⁵Kɛna key Yisɔs ka kɔtɔkɔy kaŋ yela bindɛ fooma e tɛpa, na “Niyaŋ kuthɛgbɛ e beŋ pamɔkɔ ŋaye ka milɛŋ bihakuwande, baa sii bakɛnda baŋ dekinteketa ka nanhulu bakɛnda baŋ hali kɔyta ti bɛŋ ka bɔya.”

¹⁶Kɛna sisiyɛ wundɛ bindɛ mathɔyande maŋ maŋ e tɛpa, na “Bananhulu wunthe kɔŋ nde wo kutɛ nde paka bamandiŋ ka yiya hukɛnama.

¹⁷Wundɛ see tutunuwande ka thukuma hukɛnama haŋ, na ‘Yaŋ ka nda iŋ ka kosine paka niŋ baŋ. Nama nda yaŋ ni yee?’

¹⁸Huna tepe wundɛ, na ‘Yaŋ kɔthɛŋ na yaŋ ni. Yaŋ kɔŋ thinki ŋahunkuŋ niŋ ŋaŋ fooma e yaŋ thoya ŋa yamɛ bukuyuwa, e yaŋ kɛndɛ kosine paka niŋ baŋ iŋ nanhulu niŋ baŋ.

¹⁹Yaŋ kɔŋ tepe yɛthɛ niŋ, na “Yi kɔsɔŋ nanhulu bamandiŋ ba thaninɛŋ thabɔyɛ. Hɛmuwa nda, thɔma, thiiye, yehitɔkɔ.” ’

²⁰Kɛrɛ Masaala tepe kɛnama, na ‘Yi, wɔ thɔkɔy na yi! Ka huyɛ bahɛ baŋ yɔkɔŋ yi tuku; awa munki muŋ fooma mu thanki yi kɔsinɔkɔ muŋ, nkaana muŋ biyɔ?’

²¹“Nɛna wuŋ niyɔ ba wɔ yo wɔ wo kɔminuwande nanhulu ba yɛthɛ bakɛnama, kɛrɛ e Masaala niŋ kɔthɔ ba wundɛ niyɔ bamɔnɛ ka thaaya nama thaŋ.”

²²Huna tepe wundɛ bakarandeni nama beŋ, na “Yaŋ tepe bena, baŋ niyɔkɔ yaagba ba siini bakendeŋ baŋ ba mu beŋ thɔŋ, maa ba ŋakɔtɔ ŋakendeŋ ŋaŋ ba mu beŋ thɔɔ.

²³Baa sii baŋ bɛna yamɛ ba muthɔma muŋ, e kɔtɔ koŋ nɛnɛ yama ba muthɔma muŋ.

²⁴Siyuwaŋ hɛ bɛtiŋ beŋ: bindɛ payeta, bindɛ ŋoneta, bindɛ ka iŋ ŋahunkuŋ, kɛrɛ Masaala athɛriyɛ bindɛ. Beŋ, beŋ yameŋ kolo ba bɛtiŋ beŋ!

²⁵E wɔ kɔŋ ka mateete makendeŋ wo, ŋaye ka yaagba ba wundɛ ni baŋ, wo punku ba ndinta thɔɔkuwa hu ka sii bakɛnama baŋ?

²⁶Mɛnɛ beŋ tha punku niya bɛyi bathahuwɔy baŋ nthɔŋ nda fooma ka siini bakendeŋ baŋ, mbɛ ba beŋ niye kuyaagba ba bapɛyɛ baŋ?

²⁷Siyuwaŋ hɛ musɛnkɛŋ mu ka ŋayeŋ ŋaŋ muŋ nɔŋ na muŋ senkine na. Muŋ niyeta wali, muŋ yehinuweta mupithi, kɛrɛ yaŋ tepe bena, hali gbaku woŋ Silamani iŋ hudinhaŋiya nama haŋ fooma wundɛ tha punku ba pitha wuyɔhɔy wuŋ doŋe nanthe iŋ muŋ.

²⁸Kɛrɛ mɛnɛ Masaala wundɛ pithe hande hu hɛ hɔkɔŋ ka boi ka hupethɔy haŋ, mɛmpɛ nda e huŋ si tɔɔka, mbu ntiŋ nda beŋ, e wundɛ sa bena yaŋ pitha? O beŋ, bendo ka iŋ kulanɛya kutɛŋɛ beŋ!

²⁹“Awa baŋ niyɔkɔ yaagba ba kɔɔ timo tima ka deethuwa mu beŋ thɔŋ iŋ mu beŋ thiiye.

³⁰Baa munki muŋ muŋ fooma, muna siyani ba be kɔthɔ Masaala na baŋ deethi. Awa Fanda ndeŋ woŋ kɔthɛŋ ba dɔma na beŋ ka iŋ muŋ.

³¹Yɔlaŋ hintiŋ ba deethuwa Hugbakine nama haŋ ka siini bakendeŋ baŋ, awa munkɔŋ muŋ muŋ fooma beŋ kɔŋ muŋ kutu.

³²“Baŋ payɔ, bendo thahuwɔy beŋ ka kiki, baa mathimo ma ka Fanda ndeŋ woŋ mɛna ba bena dunkune Hugbakine haŋ.

³³Niyaŋ gbɔŋ fooma mu iŋ beŋ, e beŋ niya bayɔhɔy ka bamɔnɛŋ beŋ. Dethiyɔkɔŋ ponthoiŋ ba sa tiyɔ, e beŋ kɔsina kɛɛ ka ariana ba sa teetuwɔ, ka sa batuwani biyande kɛ, mɔɔki sa bɛŋ teeti.

³⁴Baa kamo kama ka kɛɛ bakɛnda, kɛna thukuma hukɛnda.

³⁵“Kɔsinɔkɔŋ yɛthɛ bakendeŋ, e beŋ kɔsina mumɔɔli mukendeŋ muŋ mumaye timo tima.

³⁶Niyɔŋ nɔŋ biya bi yumbu ba mariki wokɛnamɛŋ woŋ be tɛŋ ŋaye ka yakali ba ka kuyɛntande koŋ baŋ, ba haliko bi be niyɔ bikɔsinɔkɔy ba niŋ pɛthiyɛ yako naa wundɛ see gbɛdɛŋ ka biyo haŋ.

³⁷Mayehitɔkɔ ma kɔŋ ka bawaliŋ bi pɛnka bithɔhɔy iŋ mariki namɛŋ woŋ. Nɔndi yaathi, yaŋ tepe bena, mariki woŋ kɔŋ si kɔsinɔkɔ yɛthɛ bakɛnama e bindɛ dɛŋa ka tha banthe, e si niya bindɛ fantha.

³⁸Hali na asɛɛ na wundɛ huyɛ teete, maa ka kuputhɔ ku kaŋ koŋ, mayehitɔkɔ ma kɔŋ ka bawaliŋ bi pɛnka bithɔhɔy!

³⁹Kɛrɛ kɔthɔŋ ba dɔma na mɛnɛ wo biyɛ banka kɔthɛ wakathi wo batuwaŋ woŋ see, wundɛ kɔŋ huru gbele, awa wundɛ sa mɛyi ba batuwaŋ woŋ thinka banka nama baŋ.

⁴⁰Beŋ hɛlɛŋ, beŋ kɔŋ ba kɔsinɔkɔ ba yɛritɔ Hati ka Wɔ woŋ, baa wundɛ kɔŋ see ka malɔkɔ ma ba beŋ niŋ tute thukuma.”

⁴¹Huna tepe Pita, na “Mariki, e thabɔrɔ thaŋ thaŋ tha kɔŋ ba miŋ hɔkɔŋ nagbɛti, mindo bakarandeni beŋ, maa tha kɔŋ ba biya fooma?”

⁴²Kɛna tepe Mariki woŋ, na “Nkaana bawali woyɔhɔy niyo lanɛya e wundɛ niyɔ wokele? Wundɛ na bawali wo dɛŋo iŋ mariki nama ka thinthi ba dethiteke banka babunthu baŋ e hana bawaliŋ bibintheŋ beŋ muthɔma ka lɔkɔ ba bindɛ ba kute muthɔma.

⁴³Mayehitɔkɔ ma kɔŋ ka bawali wobɛina wo mariki nama woŋ pɛnki si ni wali bakɛnama.

⁴⁴Nɔndi yaathi, yaŋ tepe bena, wundɛ kɔŋ niŋ dɛŋ ka thinthi ka ntha yo ntha ki iŋ wundɛ.

⁴⁵Kɛrɛ mɛnɛ bawali wobɛina tepe ka yɛthɛ bakɛnama, na ‘Mariki wokiyaŋ woŋ nambe tindɛ ba duwa,’ e bɔha ba gbuduŋa bawaliŋ bibintheŋ beŋ e kɔ thɔma, e kɔ thiiye haaŋ e yilɔ.

⁴⁶Mariki wo ka bawali wobɛina kɔŋ see malɔkɔ manthe ma be wundɛ niŋ tute thukuma, ka wakathi wo ba wundɛ kɔthɔ. Mariki woŋ kɔŋ niŋ thonkande, awa wundɛ kɔŋ niŋ kɔnditande iŋ biya bi be yɔhɔ niyo lanɛya beŋ.

⁴⁷“Bawali wo kɔthɛ ba thimo mariki nama ba wundɛ be ni, kɛrɛ wundɛ tha kɔsinɔkɔ yɛthɛ nama e ŋayi ka kɔɔ e bɛŋ niya, wundɛ kɔŋ yaŋ gbuduŋo wuthoonɛ.

⁴⁸Kɛrɛ bawali wo be kɔthɔ ba thimo mariki nama woŋ ba wundɛ niya, mɛnɛ wundɛ ni ba tɛŋɛ wundɛ ba gbuduŋo, wundɛ kɔŋ kutu kugbuduŋ kuyete. Wo dunkuno wubɔyɛ-bɔyɛ, ndɛ kɔŋ thɔnthiŋina ba wubɔyɛ-bɔyɛ; wɔ bɛina wo dunkuno wubɔyɛ-bɔyɛ, wundɛ kɔŋ thɔnthiŋina ba dunkuna wu yamɛ bɔya.

⁴⁹“Yaŋ see ba si thiya hɛrɛ hu buu ka dunia baŋ, awa yaŋ kɔŋ nda kufiyo ba buu bubɛina maye.

⁵⁰Yaŋ boheŋ ba muluno ka nambarɛŋ, awa thukuma niŋ haŋ hu ka yaagba ba daŋinande nambarɛŋ babɛina.

⁵¹E beŋ simekeŋ ba dɔma na yaŋ see ba saa ka thiya mathɛbɛ ka dunia baŋ? Ade, yaŋ tha see ba thiya mathɛbɛ, kɛrɛ ba si thiya mabarinkande wɔ iŋ ntɔ nama.

⁵²There nda hɛ, mpoo ki biya bisɔhi ka banka banthe ki kɔŋ hakuwande; biya bitaati bi kɔŋ kɔɔ ba sɔkinɔkɔ biya biye, biya biye bi kɔŋ kɔɔ ba sɔkinɔkɔ biya bitaati.

⁵³Komisa wowathe kɔŋ kɔɔ ba sɔkinɔkɔ hati nama wowathe; hati wathe kɔŋ kɔɔ ba sɔkinɔkɔ fandama na; komisa woyɛrɛmɛ kɔŋ kɔɔ ba sɔkinɔkɔ hati nama woyɛrɛmɛ; hati yɛrɛmɛ kɔŋ kɔɔ ba sɔkinɔkɔ nandama na; thɔnɔ kɔŋ kɔɔ ba sɔkinɔkɔ thamba nama; thamba woŋ kɔŋ kɔɔ ba sɔkinɔkɔ thɔnɔ nama.”

⁵⁴Huna tepe hɛlɛŋ wundɛ biya beŋ, na “Mɛnɛ beŋ kute thawuruma thaŋ thɛ si ŋati ka koyoŋ woŋ ŋaye ka, beŋ kɔthɛ yako na koyoŋ kɔŋ tete see; yaathi, e wundɛ nɛnɛ saa.

⁵⁵Awa mɛnɛ beŋ kute hɛlɛŋ huru hu ka kuheda koŋ haŋ hu si hɔŋ, beŋ kɔŋ kɔthɔ ba dɔma na, naa huŋ daŋande, nthonthoŋ kɔŋ ki kɔŋ see; yaathi, e kɔŋ nɛnɛ saa.

⁵⁶Bendo banitɔkɔiŋ beŋ, beŋ punkeŋ ba detha dunia baŋ iŋ kuthahinɛ koŋ, e beŋ tɛpa ba niyɔ. Mbɛ ba sa beŋ kothiye kolo ba ka lɔkɔ bahɛ baŋ baŋ?

⁵⁷“Mbɛ ba sa beŋ kɔnsiŋiniyande nɔŋ na thumbe wuŋ?

⁵⁸Mɛnɛ yi thohite wɔ dɔɔnthɔ, e ndɛ yina bɔha ba yina kata ka kaama, ka dekiyɔkɔ ba huŋ dɛɛnka iŋ wundɛ ka gboŋa saanuŋ beŋ ba biyande ka kaama ka. Mɛnɛ yi tha wuŋ ni, wundɛ kɔŋ yina kati ka bakɔnsɔŋɔŋ woŋ ka, awa e bakɔnsɔŋɔŋ woŋ yina ka dunkuna ka bayaha woŋ, awa e bayaha woŋ yina ka thiya ka yeeli.

⁵⁹Yaŋ tepe yina, yi sa kɛndɛ fuŋ gbɔ, yɔkɔŋ na yi thunkuŋ fooma dɔɔnthɔ baŋ, sɛnti wunthe ndɛ sa peyɔ.”