Read West-Central Limba Luku 13 Bible Online

Luku 13 - West-Central Limba bible

Luku 13

¹Ka malɔkɔ mabɛina biya binɔndi bi kɔŋ nde kɛndɛ bi tepe Yisɔs na ba biKalili bi kore nde Pailɛti beŋ ka lɔkɔ ba nde bindɛ kore maamiŋ beŋ baŋ ba bindɛ fuŋuna saraka ka kuwaŋ ku ka Masaala koŋ.

²Yisɔs tepe bindɛ, na “E ba na niyɔy wuŋ na biKalili beŋ beŋ kore nde ka gboŋa baŋ baŋ, e huna beŋ siyi ba dɔma na bi yameŋ niyɔ bahakɛŋ ba biya bi ka Kalili fooma?

³Hali wuŋ ka nɛŋ, kɛrɛ mɛnɛ beŋ tha sikiyɔkɔ ŋaye ka hakɛŋ bikendeŋ beŋ fooma, beŋ kɔŋ tuku nɔŋ na tuku nde nthɔŋ bindɛ na.

⁴Mbu biya kɔhi iŋ bisɔŋ-bitaati bi ka Silowami, bi tukɛ nde naa ŋoto bindɛ iŋ banka bathɔɔkuwɛ-thɔɔkuwɛ baŋ? E beŋ siyi ba dɔma na bindɛ bina yamɛ nde nɛnɔ ba biya beŋ fooma ka Yɛrusalɛmi?

⁵Ade, wuŋ ka nɛŋ, kɛrɛ yaŋ tepe bena, mɛnɛ beŋ tha sikiyɔkɔ ŋaye ka hakɛŋ ndeŋ beŋ, beŋ fooma beŋ kɔŋ tuku nɔŋ na tuku nde nthɔŋ bindɛ na.”

⁶Kɛna tepe Yisɔs bindɛ mbɔrɔ kɔŋ kɔŋ, na “Wɔ wunthe kɔŋ nde wo thuuwɛ kuyeŋ ku tiŋ mutiŋ muthɔma ku dɔma koŋ na fiki ka sayo hukɛnama haŋ. Lɔkɔ banthe wundɛ key kɛndɛ ba ka detha ba mutiŋ ba thɔma, kɛrɛ wundɛ tha pɛnki mutiŋ kɛndɛ.

⁷Huna tepe wundɛ bawali nama woŋ, na ‘Dethaŋ hɛ, bɛrɛ ba thanina thataati nda yama see ka deethuwa mutiŋ ka kuyeŋ koŋ koŋ baŋ, kɛrɛ hali hanthe yaŋ penketa mutiŋ. Yuutaŋ kuŋ. Mbɛ ba kuŋ kooye dondo e kuŋ kɔ teetuwa kuyɛkɛŋ koŋ ba gboŋ?’

⁸Kɛrɛ bawali woŋ tepe niŋ, na ‘Hɛmɔŋ, pɛyɛna kuŋ ba nina hunthe hɛlɛŋ, yaŋ kɔŋ pɛnkande gbusuta kuŋ e yaŋ kuŋ thiya tɛɛni ba kuŋ yeheŋ.

⁹Awa mɛnɛ kuŋ tiŋ kohira, wu kɔŋ mina niyɔ kuhita daŋandeŋ ba kuŋ yuuta haŋ. Kɛrɛ mɛnɛ kuŋ tha nɛnɛ tiŋ, yi kɔŋ kuŋ yuutu.’”

¹⁰Ka Malɔkɔ Mahemuwe manthe, Yisɔs kɔŋ nde thanani ka banka bathuŋuyande baŋ.

¹¹Wɔ yɛrɛmɛ wunthe kɔŋ nde kɛndɛ wo iŋ wayi wonɛnɔy wo niyɛ niŋ ba thana pethɔ kɔtɔ ba thaninɛŋ kɔhi iŋ thasɔŋ-thataati. Wundɛ puto nda iŋ nthoonaŋ kɔŋ; wundɛ punketa nda thumbunɔkɔ hali.

¹²Naa kute Yisɔs niŋ, wundɛ thiyi niŋ, na “Wɔ yɛrɛmɛ, yi pɛɛkuwɔy ŋaye ka nthoonaŋ kikɛnda kɔŋ.”

¹³Yisɔs tute niŋ thɛnkɔ. Ka wuyako wubɛina, wundɛ thumbunɔkɔy, e thunkunuwa Masaala na.

¹⁴Wuŋ thoŋ bayaha wo ka banka bathuŋuyande baŋ woŋ na baa Yisɔs puyi ka Malɔkɔ Mahemuwe maŋ. Huna tepe wundɛ biya beŋ, na “Hura kasɔŋ-hanthe miŋ kɔŋ ba niya wali bakɛntuŋ, huna saaŋ ka lɔkɔ babɛina ba beŋ be puya, kɛrɛ beŋ ka ba saa ba beŋ be puya ka Malɔkɔ Mahemuwe maŋ.”

¹⁵Huna tepe Mariki woŋ bindɛ, na “Beŋ, bendo banitɔkɔiŋ beŋ beŋ! Beŋ kɔŋ pɛɛki ndansi kikendeŋ ŋaye ka binthi ka e kata kɔŋ ka thiiye ka Malɔkɔ Mahemuwe maŋ.

¹⁶Ka tete detha wɔ yɛrɛmɛ wo ka bɔnsɔŋ ba ka Ebrahim baŋ, wo thanki Sithani yuka bɛrɛ ba thanina kɔhi iŋ thasɔŋ-thataati. E wuŋ ka wuyɔhɔy ba niŋ pɛɛka ka Malɔkɔ Mahemuwe maŋ?”

¹⁷Thampɛŋ thaŋ thaŋ ni ba bindɛ kutɔkɔ kuyaahu ka yɛthɛ bakɛnamɛŋ. Biya beŋ nɛnɛ ayehitɔkɔ ba bɛyiniŋ bathakaba ba Yisɔs ni baŋ.

¹⁸Yisɔs thɔnthɔŋɔŋ, na “Mbɛ mu yaŋ thɔyintande Hugbakine hu ka Masaala haŋ dee?

¹⁹Huŋ athɔyande nɔŋ wɔ wunthe wo sɛkithɛ thaa humɛɛsɛ hu dɔma na mɔstadi awa e huŋ thuuwa ka dumgbu bakɛnama. Thaa humɛɛsɛ haŋ haŋ see muku. Huŋ thɔɔki. Huŋ see niyɔ kuyeŋ kumandiŋ haaŋ e bɛtiŋ beŋ si thooyuwa ka bathalɛŋ bibɛina.”

²⁰Huna tepe hɛlɛŋ wundɛ, na “Mbɛ mu yaŋ thɔyintande Hugbakine hu ka Masaala haŋ dee?

²¹Huŋ athɔyande nɔŋ yisithi wo sekithe wɔ yɛrɛmɛ, e niŋ tikitinuwande iŋ kutoŋ kuthithɛ ku bankɔ hunthe haaŋ e yisithi woŋ niya ba kutoŋ koŋ fooma ŋata.”

²²Yisɔs key ka kɔtɔkɔy kubiyasi nama koŋ ba kaa ka Yɛrusalɛmi. Naa wundɛ key, wundɛ fuŋe ka mɛtiŋ babukuyuwɛ baŋ iŋ bamɛɛsuwɛ baŋ fooma kaŋ kaa kaŋ thaninuwa biya beŋ.

²³Wɔ wunthe thɔnthɔŋɔŋ niŋ, na “Mariki, e biya biyete bina hɔkɔŋ niya kisi?” Huna tepe Yisɔs bindɛ fooma,

²⁴na “Dekiyɔkɔŋ ba biiyande ka biyo hunɔthitɔy haŋ, baa biya bibɔyɛ bi kɔŋ gbɛrɛŋɛŋ yaathi ba biyande kaake, kɛrɛ bindɛ sa punku biyande.

²⁵Mariki wo ka banka baŋ woŋ kɔŋ ŋayinɔkɔ e lɔŋa biyo haŋ, awa naa beŋ kɔɔyɛ ka gbada ka e beŋ bɔha gbɛdiŋa ka biyo haŋ e beŋ kɔ dɔma, na ‘Pɛthiyɛ mina biyo haŋ, mariki!’ Wundɛ kɔŋ bena tepe ba dɔma, na ‘Yaŋ kɔyta ka ŋaye beŋ!’

²⁶Ka lɔkɔ babɛina beŋ kɔŋ tɛpi, na ‘Yi bareŋ nde ka thɔma, e ka thiiye iŋ miŋ, e thaninuwa ka mɛtiŋ bakɛntuŋ baŋ.’

²⁷Ka lɔkɔ babɛina wundɛ kɔŋ tɛpi, na ‘Yaŋ kɔyta ka ŋaye beŋ, gbɔniyɔkɔŋ yama, bendo bare nde niya wunɛnɔy beŋ.’

²⁸Beŋ kɔŋ bereŋ e beŋ kɔ ŋakitinande thathithi ka wuthoonɛ ka tete ka lɔkɔ ba beŋ kutu Ebrahim na, Aisaki, Yakuba, iŋ banabiŋ beŋ fooma ka Hugbakine hu ka Masaala haŋ, beŋ, e beŋ yelo ka gbada ka.

²⁹Ka lɔkɔ babɛina biya bi kɔŋ see ŋaye ka thadoŋ tha ka dunia baŋ fooma e bindɛ dɔŋɔ ka thɔma ka tha banthe ka Hugbakine hu ka Masaala haŋ.

³⁰Ka lɔkɔ babɛina, bi hɛ mahɛŋ beŋ, bindɛ bina nɔŋ niyɔ ka kɔtɔkɔy; awa bi hɛ ka kɔtɔkɔy beŋ, bindɛ bina nɔŋ niyɔ mahɛŋ.”

³¹Ka wuthurɔy wubɛina biFaresini binɔndi see niŋ tepe, na “Wu kɔŋ kuhita ba yi ŋayi dondo, baa Hɛrɔdi dɛɛnki ba yina kɔra.”

³²Huna tepe Yisɔs kɛnamɛŋ, na “Kaaŋ tepe bakɔɔtha wobɛina, na ‘Detha, yando kanthi mbayiŋ binɛnɔy e yaŋ kɔ puya biya hɛ iŋ mɛmpɛ, mɛmpɛthɔ yaŋ kɔŋ thankaŋ wali bakiyaŋ baŋ.

³³Halisa, yɔkɔŋ yaŋ be key ka kɔtɔkɔy biyasi niŋ haŋ hɛ, mɛmpɛ, iŋ mɛmpɛthɔ, ba wuŋ thumbeta ba banabi koro ka tha ka hɛna wuŋ daŋande ka Yɛrusalɛmi.’

³⁴“Beŋ, bendo biya bi ka Yɛrusalɛmi, beŋ lɔɔpi banabiŋ beŋ iŋ baseriŋ bi ŋindi Masaala beŋ haaŋ beŋ bindɛ kɔra. Tima thɔkɔti nɔŋ nda yaŋ niyɔ kufiyo ba bena kɔmitɔkɔ ka thɛnkɔ niŋ thaŋ nɔŋ na thɛɛ wokomisa pɛnkinande ŋapɛli nama ŋaŋ ka mpati nama, kɛrɛ beŋ tha mɛyi ba yaŋ bena nɛŋ niya.

³⁵Huna banka bakendeŋ ba ka Masaala baŋ bɛ kɔŋ fuŋoko. Yaŋ kɔŋ bena tepe, beŋ sa nda yama kutu haaŋ yɔkɔŋ na beŋ dome nɔŋ, na ‘Wɔ thaduba na, wo see ka sɛmbɛ ba ka Mariki woŋ baŋ!’”