Read West-Central Limba Luku 16 Bible Online

Luku 16 - West-Central Limba bible

Luku 16

¹Yisɔs tepe bakarandeni nama beŋ mbɔrɔ kɔŋ kɔŋ: na “Bananhulu wunthe kɔŋ iŋ nde badethiteke wunthe wo dethiteke nanhulu nama baŋ fooma. Wundɛ sisiyo ŋafuŋutu ba dɔma na badethiteke woŋ thanki teetuwa nanhulu nama baŋ.

²Bananhulu woŋ ŋindi ba badethiteke woŋ be ka thiya, na ‘Mbɛ hu yaŋ yuyɛ haŋ ba yi? Awa saa tɔŋ kuna si kute yi iŋ si thunkuŋ yi, baa yi sa nda niyɔ bawali wokiyaŋ hali.’

³Huna tepe badethiteke woŋ ka yɛthɛ nama, na ‘Mbɛ hu yaŋ ni yee naa see hɛ yaŋ ka kanito wali bakiyaŋ baŋ na? Yaŋ sa nda punku wali ba ka kusaala koŋ baŋ; yaŋ nɛnɛ kɔŋ niyɔ kuyaahu ba yawa.

⁴Ka tete yaŋ kɔthɛŋ nda na yaŋ ni, haliko na yama biya yereke ka bankɛŋ bakɛnamɛŋ naa yaŋ fuŋuto ka wali ba ka dethiteke haŋ baŋ.’

⁵Huna thiye wundɛ bi ba thunkuna mariki nama woŋ beŋ. Wundɛ thɔnthɔŋɔŋ womayoŋ woŋ, na ‘Tima yi ba thunkuna mariki wokiyaŋ woŋ?’

⁶Wundɛ tepe, na ‘Mayɔ thakiyanɛ kɛmɛŋ biye.’ Huna tepe badethiteke woŋ, na ‘Ya dondo kuthagba nda koŋ; dɔŋɔ, e yi thikipa magbali maŋ ka thakiyanɛ kɛmɛ wunthe.’

⁷Wundɛ thiyi hɛlɛŋ wobiye woŋ, na ‘Mbu yi, tima yi ba thunkuna mariki wokiyaŋ woŋ?’ Wundɛ tepe, na ‘Paka yankamani kɛmɛŋ bitaati.’ Wundɛ tepe, na ‘Ya dondo kuthagba nda koŋ e yi thikipa magbali maŋ ka paka yankamani kɛmɛ wunthe e kɔnthɔ kasɔhi.’

⁸Mariki woŋ baŋ thunkunu badethiteke wo be yɔhɔ niyo lanɛya woŋ baŋ ba kele nama haŋ ba na kɔsinɔkɔy wundɛ ba malɔkɔ ma see maŋ. Biya bi dɔŋɔy ba deethuwa nanhulu ba ka dunia baŋ baŋ beŋ hɛ akele haaŋ adaŋande mpati bi ka waŋ baŋ beŋ.

⁹“Bɛna yaŋ tepe bena, dethuweŋ thayathikiya ka nanhulu ba ka dunia baŋ baŋ, baa, mɛnɛ bɛŋ pɛyi bena, beŋ kɔŋ yɛroko iŋ Masaala ka madoŋe ma kɔy yo kɔy maŋ.

¹⁰Wɔ yo wɔ wo thimɔy niyo lanɛya ka wuyete, wundɛ kɔŋ thimɔ niyo lanɛya ka wubɔyɛ.

¹¹Mɛnɛ beŋ tha niyɔ bendo yɔhɔy niyo lanɛya ka nanhulu ba ka dunia baŋ baŋ, nkaana bena piteke ba nanhulu ba yamɛ yiki baŋ nthɔŋ nda fooma?

¹²Naa beŋ tha niyɔ bendo yɔhɔy niyo lanɛya ka ntha ki ka wɔ hɛna kɔŋ, mbɛ bena dunkune wukendeŋ wuŋ gbeeŋ?

¹³“Bawali ka wo punku niyiyɛ marikɔŋ biye wali, baa lɔkɔ hɛ ndɛ kɔŋ thambo wunthe e wundɛ thimo wunthe, maa ndɛ kɔŋ dunkuŋ wunthe yiki e niŋ putiyɔ e yethitɔ wunthe. Yi sa punku niyiyɛ Masaala na wali e yi hɛlɛŋ niyɔ waayi wo ka nanhulu kɔɔ hanthe.”

¹⁴Naa yuye huŋ biFaresini beŋ, bi thimo kɔbiri wumandiŋ-mandiŋ beŋ, wuŋ thime bindɛ dɛkuiŋ.

¹⁵Kɛrɛ Yisɔs tepe bindɛ, na “Beŋ, bena tɔŋinɔkɔ ka biya nɔŋ bendo thumbɛ, kɛrɛ Masaala kɔthɛŋ thathukuma thakendeŋ thaŋ. Bɛyiniŋ ba biyamɛti kutu wumandiŋ, Masaala kute bɛŋ nɔŋ ntha kituunuwɛ.

¹⁶“Bɛyiniŋ ba gbalo ka Siraŋ baŋ baŋ iŋ magbali ma ka banabiŋ beŋ maŋ ni wali haaŋ ka malɔkɔ ma ka Yɔni wo Babiye woŋ. There nda ka malɔkɔ mabɛina, Huseri Huyɔhɔy hu ka Hugbakine hu ka Masaala haŋ niyo kɛwandi. Wɔ yo wɔ nda adekiyɔkɔ ba biyande kɛndɛ.

¹⁷Kɛrɛ ba soora wunthe wo ka Siraŋ baŋ ba fuŋa, bɛyi bɛna bakahɛ-kahɛ; wu kɔŋ yaŋ niyɔ wuŋɛnɔy ba ariana iŋ dunia baŋ ba daŋande.

¹⁸“Wɔ yo wɔ wo baŋaŋ wɔtɔ nama e wundɛ ka yɛnta yɛrɛmɛ wohɛna, wundɛ ni kubɛy. Awa wɔ yo wɔ wo yɛnti yɛrɛmɛ wo baŋino iŋ wandama, wundɛ ni kubɛy.

¹⁹“Bananhulu wunthe kɔŋ nde wo thɔɔ mupithi muyɔhɔy mu kahɛ mɔlɔŋ, e wundɛ kɔ thɔma wumandiŋ timo tima.

²⁰Bamɔnɛ wunthe kɔŋ nde kɛndɛ wo dɔma Lasarɔsi wo thiŋɛ iŋ mathimɔyŋ, wo ŋɔɔ timo tima ka biyo hu ka bananhulu woŋ.

²¹Lasarɔsi thimoŋ ba thɔma ŋaboba ŋa bananhulu woŋ tɔnki ŋaŋ ka karo nama baŋ. Yɔkɔŋ ŋatheŋ bina see ba minuwa mathimɔyŋ nama maŋ.

²²Malɔkɔ manthe bamɔnɛ woŋ see tuku. Wundɛ see kata iŋ malekɛŋ beŋ e ka thiyo ka thɛnkɔ tha ka Ebrahim thaŋ. Bananhulu woŋ see hɛlɛŋ tuku e wundɛ mankuwo.

²³Ka yahanama kɛna niyɔy wundɛ ka nambara bathoonɛ. Kɛna dethe wundɛ ka thinthi. Wundɛ kute Ebrahim na wuthokiye e Lasarɔsi niŋ doŋe kuwaŋ.

²⁴Kɛna yele wundɛ thampa, na ‘Fandaŋ Ebrahim, kutiyɛ yama nkinikiniŋ. Ŋinda Lasarɔsi na ba wundɛ be muluŋ kuthenke nama koŋ ka mandi e wundɛ yama thondine ka hiliŋ niŋ haŋ baa yaŋ kɔŋ ka nambara bamandiŋ ka buu buŋ buŋ!’

²⁵Kɛrɛ Ebrahim tepe, na ‘Hatiŋ woŋ, siyuwa naa nde yi ka dunia baŋ ka hɛri bakɛnda e Lasarɔsi kɔ niyɔ thɔrɔ. Kɛrɛ ka hɛ woŋ wundɛ kɔŋ ka mathɛbɛ, yi nɛnɛ yi kɔŋ ka wuthoonɛ.

²⁶Hali ba huŋ kutɛ hintiŋ, mateete makɛntuŋ iŋ beŋ, matha masunŋɔy maŋarinɛ nɔŋ ka tha ka tha kuyɛkɛŋ mankande ma kɔŋ mina mateete ba bi dondo beŋ bi ba kaa kendeŋ ka beŋ, bi be tha kɛndɛ punku kaa, awa wɔ be tha hɛlɛŋ punku ŋayi kɛndɛ ba saa dondo.’

²⁷Huna tepe bananhulu woŋ, na ‘Mba yaŋ theteke nda yina, fandaŋ woŋ, ba yi be ŋindi Lasarɔsi na ka biya niŋ ka,

²⁸baa yaŋ kɔŋ iŋ mbɛndaŋ bisɔhi, haliko wundɛ be bindɛ ka yeli na sa nda bindɛ see du tha du thɔrɔ dondo.’

²⁹Kɛrɛ Ebrahim tepe, na ‘Bi kɔŋ iŋ magbali ma ka Musa maŋ iŋ ma ka banabiŋ beŋ maŋ ba bindɛ yela, awa bi kɔŋ ba mɛŋ poniyɛ kuiha.’

³⁰Huna tepe bananhulu woŋ, na ‘Ade, fandaŋ woŋ Ebrahim, huŋ sa ni wali, kɛrɛ mɛnɛ wɔ ŋaye nda ka tuka haŋ e wundɛ bindɛ ka yela, bi kɔŋ sikiyɔkɔ maŋaye ka hakɛŋ bikɛnamɛŋ.’

³¹Huna tepe Ebrahim, na ‘Mɛnɛ bindɛ tha poniyɛ kuiha magbali ma ka Musa maŋ iŋ ma ka banabiŋ beŋ maŋ, hali aŋaye na wɔ ka tuka haŋ bindɛ sa sikiyɔkɔ.’”