Read West-Central Limba Luku 18 Bible Online

Luku 18 - West-Central Limba bible

Luku 18

¹Kɛna tepe Yisɔs bindɛ mbɔrɔ kɔŋ kɔŋ ba bindɛ thaninuwa ba dɔma na bi kɔŋ ba niya kuraminɛ timo tima awa bindɛ ka ba yɔntuwa hali.

²Wundɛ tepe, na “Bakɔnsɔŋɔŋ wunthe kɔŋ nde ka mɛti banthe. Wundɛ payeta Masaala na, awa ndɛ niyeta wɔmɛti yiki.

³Awa bagbokora wunthe kɔŋ kɛndɛ ka mɛti babɛina, wo see yako-yako ka bakɔnsɔŋɔŋ woŋ, e kɔ tɛpa, na ‘Mase yama ba yama dunkune mayoho niŋ maŋ ka kithi ba miŋ iŋ ntɔŋ woŋ baŋ.’

⁴Bakɔnsɔŋɔŋ woŋ tha mɛyi ba wuŋ niya yako, kɛrɛ naa nambe wuŋ haaŋ wundɛ tepe ka yɛthɛ nama, na ‘Hali na niyɔy wuŋ na yaŋ payeta Masaala na, yaŋ niyeta wɔmɛti yiki,

⁵halisa bagbokora woŋ kɔŋ yama ni thɔrɔ. Yaŋ kɔŋ kɔnsɔŋɔŋ kithi nama baŋ. Mɛnɛ huŋ kutɛ, saa nama haŋ yako-yako hu kɔŋ yama thamaŋ.’”

⁶Kɛna key Yisɔs ka kɔtɔkɔy e tɛpa, na “Yuyaŋ hu tepe bakɔnsɔŋɔŋ wosikɔy woŋ.

⁷E Masaala sa kɔnsɔŋɔŋ wuthumbɛ biya nama beŋ bi niŋ berinteke gbɛɛŋ iŋ piripiri beŋ? E wundɛ kɔŋ kɔɔkɔ ba bindɛ mase?

⁸Yaŋ tepe bena, wundɛ kɔŋ bindɛ mase ka kɔnsiŋina haŋ, awa ndɛ kɔŋ ntiŋ wuŋ ni yako. Kɛrɛ, e Hati ka Wɔ woŋ kɔŋ pɛnki biya bi niyɛ lanɛya ka dunia baŋ naa wundɛ see?”

⁹Yisɔs gbonkoy hɛlɛŋ mbɔrɔ kɔŋ kɔŋ ka biya bi niyɛ lanɛya yɛthɛ bakɛnamɛŋ ba bindɛ niyɔ bithumbɛ e bindɛ yethitɔ wɔ yo wɔ wohɛna:

¹⁰“Biya biye bina kɔɔyɛ ka banka bamandiŋ ba ka Masaala baŋ ba niya kuraminɛ, wunthe woŋ woFaresi, wowuntheŋ woŋ wo bathuu duthu.

¹¹WoFaresi woŋ kɔɔyɛ ndɛ wuntheŋ; ndɛ ni kuraminɛ ka yɛthɛ nama e tɛpa, na ‘Yaŋ thiyi yina maamo Masaala, baa yaŋ ka nɔŋ biya bihɛna; yaŋ ka bamilɛ, yaŋ ka wɔ nɛnɔy, yaŋ ka babɛy. Yaŋ thiyi yina maamo, baa yaŋ ka nɔŋ bathuu duthu wo kɔɔyɛ kanka woŋ na.

¹²Yaŋ kɔŋ bohi suŋ kaye ba wiki, yaŋ kɔŋ dunkuŋ wu tɛŋɛŋ kɔhi wuŋ maŋaye ka ntha yo ntha ki iŋ yaŋ.’

¹³Kɛrɛ bathuu duthu woŋ kɔɔyɛ wuthokiye. Wundɛ tha hintiŋ nthɔŋ ŋataŋ thaaya nama thaŋ ka ariana; wundɛ sinkɔŋ yaha nama haŋ e tɛpa, na ‘Masaala, kutiyɛ yama nkinikiniŋ, yando bahakɛ.’”

¹⁴Yisɔs tepe, na “Yaŋ tepe bena, bathuu duthu woŋ baŋ si duu ka banka nama ka, Masaala yɛrɔkɔy niŋ nɔŋ wɔ thumbɛ. Kɛrɛ woFaresi woŋ, Masaala tha niŋ yɛrɔkɔ nɔŋ wɔ thumbɛ. Baa, wɔ yo wɔ wo ŋatinɔkɔy, wundɛ kɔŋ thathina; awa wɔ yo wɔ wo thathinɔkɔy, wundɛ kɔŋ ŋatina.”

¹⁵Komisɛŋ binɔndi sisi malɛɛthɛŋ namɛŋ ba Yisɔs be bindɛ si tutu thɛnkɔ e bindɛ thiyiyɛ thaduba. Kɛrɛ naa kute bakarandeni beŋ bindɛ, bindɛ pinde bindɛ ba bi be tha wuŋ ni.

¹⁶Kɛrɛ Yisɔs thiyi ba bi be sisa, wundɛ tepe, na “Mpati beŋ saaɛŋ kiyaŋ do; baŋ bindɛ pindi, baa na mpati beŋ na, nɛna biya bi biyande ka Hugbakine hu ka Masaala haŋ ba niyɔ.

¹⁷Yaathi, yaŋ tepe bena, yɔkɔŋ wɔ yɛrɔkɔy Hugbakine hu ka Masaala haŋ nɔŋ na huŋ hatiyɛ yɛreke na, mɛnɛ huŋ kutɛ, wundɛ sa kɛndɛ punku biyande.”

¹⁸Kɛna thonthiŋine niŋ wɔ wunthe wo iŋ makooye maŋatɛ, na “Karimɔkɔ woyɔhɔy, mbɛ ba yaŋ ni ba kuta sii ba kɔy yo kɔy?”

¹⁹Huna thonthiŋine niŋ Yisɔs, na “Mbɛ ba yama yi thiye karimɔkɔ woyɔhɔy? Wɔ yo wɔ ka woyɔhɔy yɔkɔŋ Masaala pe.

²⁰Yi kɔthɛŋ Sirani ba ka Masaala baŋ: ‘Ba ni kubɛy, ba kɔri, ba tuwe, ba ni maseri maŋasɔkɛ, niya fanda na yiki iŋ nanda.’”

²¹Huna tepe wundɛ, na “Sirani baŋ baŋ fooma yaŋ kooye bɛŋ kɔsina kabi yaŋ kɔŋ nde hatiyɛ.”

²²Naa yuye Yisɔs yaabi baŋ baŋ, wundɛ tepe hati lamgba woŋ, na “Kɛrɛ bɛyi banthe bɛna pɛyɛ yina, kaa ni gbɔŋ ntha yo ntha ki iŋ yi, e yi dunkuna ka bamɔnɛŋ beŋ. Ka lɔkɔ babɛina yi kɔŋ niyɔ iŋ kɛɛ bamandiŋ ka ariana. Mahɛŋ mabɛina e yi saa ba yama si yema.”

²³Kɛrɛ naa see hati lamgba woŋ yuyɛ yaabi ba ni Yisɔs baŋ baŋ, wundɛ teetuwɔy thukuma, baa bananhulu na nde womandiŋ.

²⁴Naa niŋ Yisɔs dethi, wundɛ tepe, na “Akaahi ba bananhuluiŋ beŋ ba biyande ka Hugbakine hu ka Masaala haŋ!

²⁵Akaahi ba maama womandiŋ nɔŋ nyɔkɔmɛ ba fuŋande ka matha ma ka masandeŋ. Awa ba bananhulu ba biyande ka Hugbakine hu ka Masaala haŋ, wu kɔŋ yaŋ kaahuwa.”

²⁶Biya bi yuyɛ huŋ beŋ tepe, na “Mbu mbɛ bi niyɔ kisi ntiŋ nda?”

²⁷Yisɔs tepe, na “Ba sa wɔmɛti punku niya, Masaala kɔŋ bɛŋ ni.”

²⁸Huna tepe Pita, na “Detha, miŋ fooma pɛyi yikiyani bakɛntuŋ e miŋ yina yema.”

²⁹Huna tepe Yisɔs kɛnamɛŋ, na “Nɔndi yaathi, yaŋ tepe bena, wɔ yo wɔ ka wo pɛyɛnɛ yikiya nama, maa yɛrɛmɛ nama, maa mbɛndama, maa biya nama, maa mpati nama ba saathɛ ba Hugbakine hu ka Masaala haŋ,

³⁰wo sa muŋ duu ka kuta makɔɔni mabɔyɛ e daŋande ba mu pɛyɛŋ wundɛ muŋ ka yamana bahɛ baŋ, iŋ sii ba kɔy yo kɔy ka yamana ba nɔŋ see baŋ.”

³¹Awa naa ŋakɔy wundɛ, wundɛ sekithe bakarandeni bikɔhi iŋ biye beŋ. Wundɛ tepe kɛnamɛŋ, na “Dethaŋ, kaa na miŋ key haŋ ka Yɛrusalɛmi; bɛyi yo bɛyi ba thankɛ gbalo iŋ banabiŋ beŋ ba Hati ka Wɔ woŋ, bɛ kɔŋ niyɔ nanthe nathesi nɔŋ na gbalo nde bɛŋ na.

³²Baa wundɛ kɔŋ dunkuna ka thɛnkɔ tha ka biya bi be kɔthɔ Masaala na. Ndɛ kɔŋ hɛtha, e niyo kuyaahu, e thutho.

³³Bi kɔŋ niŋ gbuduŋ, e kɔra niŋ, awa ka gbɛɛŋ bataati baŋ, ndɛ kɔŋ hɛlɛŋ ŋayi.”

³⁴Kɛrɛ bakarandeni beŋ tha metho bɛyi banthe. Kolo ba ka madunkunɔkɔy maŋ maŋ tha bindɛ methe. Bindɛ tha punku fuŋeke bɛyiniŋ ba gbonkoy Yisɔs baŋ.

³⁵Naa Yisɔs thuriye ka Yɛriko, wɔ mankɔy thaaya doŋeŋ nde ka gboŋa baŋ kuwaŋ e kɔ yawa.

³⁶Naa yuye wɔ mankɔy thaaya woŋ sɛthɛ baŋ bɛ si daŋande, wundɛ thɔnthɔŋɔŋ bithuriye niŋ beŋ, na “Mbɛ mu niyɔy?”

³⁷Bindɛ tepe niŋ, na “Yisɔs wo ka Nasarɛthi woŋ na daŋande.”

³⁸Kɛna bereŋ wundɛ, na “Yisɔs! Hati ka Dauda, yaandi kutiyɛ yama nkinikiniŋ!”

³⁹Bi nde ka kɔtɔkɔy biya muŋ beŋ pinde niŋ ba ndɛ be daanɔkɔ, kɛrɛ wundɛ yame ntiŋ berina, na “Hati ka Dauda, yaandi kutiyɛ yama nkinikiniŋ!”

⁴⁰Kɛna kɔɔyɛ Yisɔs. Wundɛ ni yamari ba hati lamgba wo mankɔy thaaya woŋ be sisa kɛnama. Naa siso wundɛ, Yisɔs thɔnthɔŋɔŋ niŋ, na

⁴¹“Mbɛ ba thimo yi ba yaŋ yina niyiyɛ?” Huna tepe wundɛ, na “Karimɔkɔ, yaŋ thimoŋ ba hɛlɛŋ kuta.”

⁴²Yisɔs tepe kɛnama, na “Awa kuta; kulanɛya kukɛnda petheŋ yina.”

⁴³Ka wuthurɔy wubɛina hati lamgba woŋ punke ba kuta. Wundɛ ŋaye e yema Yisɔs na, e kaa kaŋ thiya Masaala na maamo. Naa kute wuŋ biya beŋ, bindɛ fooma thunkunu Masaala na.