Read West-Central Limba Luku 2 Bible Online

Luku 2 - West-Central Limba bible

Luku 2

¹Ka lɔkɔ babɛina, Gbaku Womandiŋ wo ka biRomaŋ beŋ woŋ, Ɔkɔsɔtɔsi, koyoŋ ba ŋakeŋ ŋa ka biya beŋ fooma ka hugbakine nama haŋ ŋaŋ gbalo.

²Gbalo haŋ haŋ huna mayoŋ; huŋ niyɔy ka lɔkɔ ba nde Kiriniyɔsi bakɛrɛŋ wo ka kuyɛkɛŋ ku ka Siriya.

³Bindɛ fooma key ba ka gbalo ŋakeŋ, wɔ yo wɔ akey ka mɛti bakɛnama.

⁴Huna see Yusufu fuŋe ŋaye ka kuyɛkɛŋ ku ka Kalili, ka mɛti ba ka Nasarɛthi, ba kaa ka Bɛthɛlɛhɛmi ka kuyɛkɛŋ ku ka Yudiya, ka mpoo nde gbaku woŋ Dauda kɛ. Huna biyɛ Yusufu kɛndɛ kaaye baa wundɛ kɔŋ nde bɔnsɔŋ banthe iŋ gbaku woŋ Dauda.

⁵Wundɛ key iŋ Mariyama wo nde wundɛ hathi woŋ, hali na niyɔy wuŋ na wundɛ kɔŋ nde nda iŋ hɔɔyɛ huthankɛ ka lɔkɔ babɛina, ba bi be ka gbala ŋakeŋ.

⁶Kɛrɛ naa bindɛ kɛndɛ, lɔkɔ baŋ see tɛŋ ba wundɛ mpee baŋ.

⁷Wundɛ see mpuu hati womayoŋ woŋ wowathe, wundɛ huitutu niŋ ka thika, e wundɛ niŋ taaya ka kuma ba muthɔma mu ka ndansi kɔŋ thiyo kɛ baŋ, baa bindɛ tha nde nda kutu yikiya kaake.

⁸Ka bompi wobɛina, batɔliŋ bi kɔŋ nde kɛndɛ ka wula ka bi nde dethiteke ndansi namɛŋ kɔŋ huyɛ babɛina.

⁹Maleka wo ka Mariki woŋ Masaala see bindɛ tɔŋinɔkɔ, awa yiki ba ka Masaala baŋ see bindɛ pɛnkande nɔŋ mumɔɔli, awa payɔ humandiŋ see bindɛ thɔɔ.

¹⁰Kɛrɛ maleka wo ka Masaala woŋ tepe kɛnamɛŋ, na “Baŋ payɔ! Yaŋ sisiyɛ bena huseri huyɔhɔy hu sisi mayehitɔkɔ mamandiŋ ka biya ndeŋ beŋ fooma.

¹¹Dethaŋ hɛ, hɛ gbeeŋ, ka mɛti ba ka Dauda baŋ, Banikisi ndeŋ woŋ mpoo! Ndɛ na Kraist, Mariki woŋ.

¹²Beŋ kɔŋ kɔthɔ ba yaŋ bena tepe nɔndi, baa naa beŋ key, beŋ kɔŋ pɛnki malɛɛthɛ ma huitutuwɔy ka thika, e wundɛ taayo ka kuma ba muthɔma mu ka ndansi kɔŋ muŋ thiyo kɛ.”

¹³Ka wuthurɔy wubɛina malekɛŋ bibɔyɛ see ŋaye ka ariana iŋ maleka wo yenke hɛ tɔŋinɔkɔ woŋ, e bindɛ kɔ gbuŋunuwa Masaala na e bindɛ kɔ tɛpa,

¹⁴na “Yiki ba kɔŋ ka Masaala wo ka thinthi ka ariana woŋ nthɔŋ nda fooma. Ka dunia baŋ, mathɛbɛ ka biyamɛti bi niŋ yeheŋ thukuma beŋ!”

¹⁵Naa pɛyɛŋ bindɛ malekɛŋ beŋ e bindɛ duwa ka ariana, batɔliŋ beŋ tɛpiyande ba dɔma, na “Nkaaŋ ka Bɛthɛlɛhɛmi; miŋ be ka kutiyɔkɔ bɛyiniŋ ba thankɛ niyɔ baŋ baŋ ba see Mariki woŋ ni ba miŋ kɔthɔ baŋ.”

¹⁶Bindɛ ni kuyaagba ba kaa; bindɛ key pɛnki Mariyama na iŋ Yusufu. Bindɛ kute malɛɛthɛ maŋ ma ŋoye ka kuma ba muthɔma mu ka ndansi kɔŋ muŋ thiyo kɛ.

¹⁷Awa naa see batɔliŋ beŋ kutu malɛɛthɛ maŋ maŋ, batɔliŋ beŋ toŋe kuna ba thanki bindɛ tepo iŋ maleka woŋ ba malɛɛthɛ maŋ maŋ.

¹⁸Fooma bi yuyɛ kuna ku ka batɔliŋ beŋ koŋ ni ŋakabanɛ ŋamandiŋ.

¹⁹Mariyama kɔsɔŋ bɛyiniŋ baŋ baŋ ka thukuma, e wundɛ bɛŋ kɔ tutunuwande.

²⁰Batɔliŋ beŋ duu kaŋ thunkunuwa Masaala na iŋ kaŋ gbuŋunuwa niŋ ba ba thanki bindɛ yuyɛ baŋ e kutiyɔkɔ; wuŋ niyɔy nanthe nathesi nɔŋ na tepo nthɔŋ bindɛ iŋ maleka woŋ na.

²¹Naa daŋande wuŋ hura kasɔŋ-kaye, lɔkɔ baŋ tɛŋ wundɛ ba thiyo ka bintɔni nama. Wundɛ thundo keŋ na Yisɔs, keŋ ku thundo nde ndɛ iŋ maleka woŋ koŋ saanuŋ wundɛ ba niyiyo hɔɔyɛ.

²²Lɔkɔ baŋ see tɛŋ ba Mariyama iŋ Yusufu niye wali ba ka mɛthinɔkɔ haŋ baŋ, nɔŋ na tepe Siraŋ ba ka Musa baŋ na. Bindɛ sisi Yisɔs na ba niŋ si dunkuna ka Mariki woŋ,

²³nɔŋ na gbalo wuŋ na ka Siraŋ ba ka Mariki woŋ baŋ na, na “Hati wathe yo hati wathe wo pɛthi yuku haŋ woŋ, ndɛ kɔŋ dunkuna ka yɔnkɔ hu ka Mariki woŋ.”

²⁴Bindɛ key hɛlɛŋ ba ka fuŋuna saraka ba ka ŋarotho biye maa kukuni bimpatiyɛŋ biye, nɔŋ na tepe Siraŋ ba ka Mariki woŋ baŋ na.

²⁵Ka lɔkɔ babɛina wɔ kɔŋ nde ka Yɛrusalɛmi wo dɔma na Simiɔŋ, wɔ thumbɛ, wo gbonkoy ka kuwaŋ ku ka Masaala koŋ, wo nde yumbu ba malɔkɔ ma biIsirɛli beŋ niyo kisi maŋ. Yina wo ka Masaala woŋ kɔŋ nde iŋ wundɛ,

²⁶e niŋ tepe ba dɔma na wundɛ sa tuku gbɔ, yɔkɔŋ na wundɛ kutiyɔkɔy Banikisi wo niyo nde lahiri woŋ iŋ Mariki woŋ.

²⁷Simiɔŋ, naa wundɛ katitoko iŋ Yina wo ka Masaala woŋ, wundɛ key biyande ka banka bamandiŋ ba ka Masaala baŋ. Naa sisi komisɛŋ beŋ hati woŋ Yisɔs na ka banka ba ka Masaala baŋ ba si niyo nɔŋ na tepe Siraŋ baŋ na,

²⁸Simiɔŋ sekithe hati woŋ ka thɛnkɔ nama thaŋ e ndɛ thiya Masaala na maamo, e tɛpa,

²⁹na “Ka tete, Mariki, yi kɔsɔŋ lahiri nda baŋ; bawali wokɛnda woŋ kɔŋ nda key iŋ thɛbina thukuma.

³⁰Yaŋ kutiyɔkɔy kisi baŋ ka thaaya thakiyaŋ thaŋ,

³¹ba thanki yi kɔsinɔkɔ ka kupɛnkintiyande ku ka biya fooma:

³²Mumɔɔli mu si ni ba siyani bahɛna baŋ kuta gboŋa bakɛnda baŋ, mu sisi yiki ka biya bikɛnda beŋ biIsirɛli.”

³³Fandama iŋ nandama ni kaba wumandiŋ ba bɛyiniŋ ba tepe Simiɔŋ ba hati namɛŋ woŋ baŋ.

³⁴Simiɔŋ thiyɛ bindɛ thaduba; wundɛ tepe ka Mariyama nanda ka Yisɔs woŋ, na “Detha hɛ, hati woŋ baŋ ndɛ yetho iŋ Masaala ba si niya biya bibɔyɛ ŋɔta e biya bibɔyɛ ŋayinɔkɔ ka mateete ma ka biIsirɛli beŋ. Wundɛ kɔŋ si niyɔ wɔ wo tɔŋɔŋ madɛɛnki ma ka Masaala maŋ. Awa biya bibɔyɛ bi kɔŋ gbonkoy ba sɔkinɔkɔ niŋ,

³⁵awa wundɛ kɔŋ si fuŋuŋ gbada masimɔkɔ ma ka biya bibɔyɛ. Awa nkinikiniŋ ki kɔŋ yina thɔɔ nɔŋ silanhi bɛna loopo yi ka thukuma.”

³⁶Banabi wo bagbokora wothanthɛ wunthe kɔŋ nde kɛndɛ, wo dɔma na Ana, hati ka Fanuɛli, wo ŋaye ka bɔnsɔŋ ba ka Asa. Naa yento wundɛ, thaninɛŋ thasɔŋ-thaye sekithe na wuŋ e wandama kɔ tuka.

³⁷Wundɛ pɛyɛ nda bagbokora haaŋ e hukalaŋ nama haŋ tɛŋa thaninɛŋ kɔnthɔ kasɔŋ-kataati iŋ thanaŋ awa wundɛ tha pɛyɛŋ banka bamandiŋ ba ka Masaala baŋ; gbɛɛŋ iŋ piripiri wundɛ kɔŋ ka niya Masaala na kubatho, abohi suŋ, ani kuraminɛ.

³⁸Ka lɔkɔ babɛina, Ana see biyande; wundɛ thiyi Masaala na maamo, e wundɛ gbonkiya ba hati woŋ ka biya muŋ fooma bi nde dethiteke ba malɔkɔ ma Masaala pɛyɛŋ mɛti ba ka Yɛrusalɛmi kuyankaŋ.

³⁹Naa thanki Yusufu iŋ Mariyama niya bɛyi yo bɛyi ba thimo Siraŋ ba ka Mariki woŋ baŋ ba bindɛ niya, bindɛ duu ka Nasarɛthi ba ka Kalili.

⁴⁰Hati woŋ see bɔyi; wundɛ kaahi kɔtɔ. Wundɛ thiye thukuma; thaduba tha ka Masaala thaŋ niyɔy iŋ wundɛ.

⁴¹Nina yo nina biya bi ka Yisɔs bi kɔŋ key ka Yɛrusalɛmi ba ka penkitiye ka malɔkɔ ma masiyuwe na puntiyando nde biIsirɛli beŋ iŋ maleka wo ka tuka haŋ woŋ ka Iyipiti.

⁴²Naa sekithe Yisɔs thanina kɔhi iŋ thaye, bindɛ see key ka Yɛrusalɛmi nɔŋ na bare nde bindɛ kɔ niya na.

⁴³Naa thankaŋ bindɛ mathuŋande maŋ maŋ, bindɛ bohe duwa. Kumaŋ, Yisɔs pɛyɛ ka Yɛrusalɛmi ka, kɛrɛ biya nama beŋ tha wuŋ kɔthɔ.

⁴⁴Bindɛ simɔkɔy ba dɔma na Yisɔs kɔŋ ka kɔtɔkɔy iŋ biya beŋ. Bindɛ yiŋe yatha nagbɛɛŋ, kɛna thɛrɛŋ bindɛ ba niŋ deethuwa ka mateete ma ka biya namɛŋ beŋ iŋ binyathiki namɛŋ beŋ.

⁴⁵Kɛrɛ bindɛ tha niŋ kutu. Bindɛ duu hɛlɛŋ napooŋ ka Yɛrusalɛmi ba niŋ saa kaŋ deethuwa.

⁴⁶Ka gbɛɛŋ bataati baŋ, bindɛ penke niŋ ka banka bamandiŋ ba ka Masaala baŋ, e wundɛ dɔŋɔ iŋ karimɔkɔiŋ bi ka biYusu beŋ, e wundɛ bindɛ kɔ poniyɛ kuiha e bindɛ kɔ thɔnthiŋinuwande.

⁴⁷Fooma bi yuyɛ niŋ beŋ ni ŋakabanɛ ba yaabiŋ nama bakele baŋ.

⁴⁸Naa kute niŋ biya nama, bindɛ ni kaba. Nandama tepe kɛnama, na “Hatiŋ woŋ, mbɛ ba niye nɛŋ yi mina? Detha hɛ, yaŋ iŋ fanda thɔkɔti hɛ nda ka niya yaagba ka deethuwa yina.”

⁴⁹Yisɔs tepe, na “Mbɛ ba beŋ yama deethuwe? E beŋ kɔyta ba dɔma na yaŋ kɔŋ ba niyɔ ka banka ba ka Fandaŋ baŋ?”

⁵⁰Kɛrɛ yaabi ba ni Yisɔs baŋ tha bindɛ methe.

⁵¹Yisɔs duu iŋ bindɛ ka Nasarɛthi. Wundɛ putiyɔy biya nama timo tima. Nandama kɔsɔŋ bɛyiniŋ baŋ baŋ fooma ka thukuma.

⁵²Yisɔs fuŋ lamgba iŋ kele e wundɛ thimiyo iŋ Masaala mɛnɛ biyamɛti.