Read West-Central Limba Luku 21 Bible Online

Luku 21 - West-Central Limba bible

Luku 21

¹Naa Yisɔs yili thaaya na wundɛ kaake ka banka ba ka Masaala baŋ, wundɛ dethe natiŋ naa bananhuluiŋ beŋ thiye munkii namɛŋ muŋ ka kuma ba bindɛ kosine kɔbiri woŋ baŋ.

²Kɛna kute wundɛ bagbokora wo bamɔnɛ-bamɔnɛ si thiyi sɛntiŋ biye.

³Huna tepe Yisɔs, na “Yaŋ tepe bena, bagbokora wo bamɔnɛ woŋ baŋ, yame thiya wumandiŋ ayaŋ ba beŋ beŋ fooma.

⁴Baa binɔndi beŋ beŋ thiye maŋaye ka wuyete wu fuŋuŋ bindɛ ka nanhulu namɛŋ baŋ, kɛrɛ bagbokora wo bamɔnɛ woŋ baŋ thiye fooma wu iŋ wundɛ; wundɛ dunkuŋ fooma kɔbiri wo pɛyɛtɔy wundɛ ba thɔma nama.”

⁵Bakarandeni binɔndi bi kɔŋ nde gbonkoy wunthe iŋ ntɔ nama ba banka bamandiŋ ba ka Masaala baŋ si peye bɛŋ ka yɔhɔ, tharaka tha yehinuwo bɛŋ thaŋ, munkii mu bindɛ dunkuŋ muŋ ba niya Masaala na yiki. Huna tepe Yisɔs bindɛ,

⁶na “Fooma mu beŋ kutu muŋ muŋ, malɔkɔ mɛ kɔŋ nɔŋ see raka hunthe huŋ sa tutɔ ka ntɔ nama, thɛ kɔŋ pankitinuwando fooma.”

⁷Huna thonthiŋine bakarandeni beŋ, na “Karimɔkɔ, tima bɛyiniŋ baŋ baŋ niiye? Mbɛ lamanthoŋ wo niyɔ wo mina toŋine ba dɔma na bɛyiniŋ baŋ baŋ tɛŋ ka niyɔ?”

⁸Huna tepe Yisɔs, na “Niyɔŋ bendo siyɔkɔy, awa baŋ mɛyi ba bena wɔ yo wɔ thiika thɔkɔ, baa biya bibɔyɛ bi kɔŋ see ka keŋ kukiyaŋ koŋ. Bi kɔŋ tɔŋinɔkɔ ba bindɛ kɔ gbonkiya ba yaŋ. Awa bindɛ kɔŋ dɔmɔkɔ, na ‘Yama Banikisi woŋ,’ awa bi kɔŋ dɔŋ, na ‘Malɔkɔ maŋ tɛŋ.’ Yaŋ tepe bena, baŋ bindɛ yeŋ.

⁹Baŋ payɔ mɛnɛ beŋ yuye ba ŋayombo iŋ ŋadekiyande kaake ka kuyɛkɛŋ koŋ. Bɛyiniŋ baŋ baŋ fooma ba kɔŋ ba yenke niyɔ. Wuŋ, wuŋ kutɛ nda dɔŋ nde na mapeye maŋ thuriye.”

¹⁰Wundɛ key ka kɔtɔkɔy kaŋ tɛpa, na “Kuyɛkɛŋ ku kɔŋ kɔɔ ba dekiya kuyɛkɛŋ ntɔ nama. Hugbakine hu kɔŋ ŋayinɔkɔ ba dekiya hugbakine.

¹¹Kuyɛkɛŋ ku kɔŋ thɛnɛŋ ka thani ka bɔyɛ, kɔnthɔ iŋ nthoonani kihakuwande ki kɔŋ niyɔ ka thani ka bɔyɛ, bɛyiniŋ bagbɛki iŋ lamanthoni bɛ kɔŋ see ŋaye ka kuthahinɛ koŋ.

¹²Kɛrɛ, gboŋa yo gboŋa saanuŋ bɛyiniŋ baŋ baŋ ba niyɔ, beŋ kɔŋ yenke boho, e beŋ niyo thɔrɔ. Beŋ kɔŋ dunkuna ka thɛnkɔ tha ka bakɔnsɔŋɔni beŋ ka bankɛŋ bathuŋuyande baŋ haaŋ e beŋ thiyo ka nɔthitɔy. Ba saathɛ ba kiyaŋ, beŋ kɔŋ kata ka gbakuiŋ iŋ ka bakɛrɛni beŋ.

¹³Wuŋ, wu kɔŋ niyɔ hɛɛra bakendeŋ ba tɛpa kɛndɛ Huseri Huyɔhɔy haŋ ba yaŋ.

¹⁴Dɛɛnkaŋ nda ba thana niyɔkɔ yaagba ba hu beŋ ka tɛpi ba na lɔkɔ babɛina tɛŋ.

¹⁵Baa yaŋ kɔŋ bena dunkune thampɛŋ iŋ kele hu sa hintiŋ nthɔŋ hadeni bikendeŋ beŋ punku sɔkinɔkɔ.

¹⁶Hali hintiŋ biya bi mpɛɛ bena beŋ gbeeŋ, mbɛnda ndeŋ beŋ, mpooni kikendeŋ, iŋ binyathikɔŋ bikendeŋ bi kɔŋ bena dunkuŋ ka thɛnkɔ tha ka bakɔnsɔŋɔni beŋ, awa bendo binɔndi beŋ kɔŋ kɔra.

¹⁷Wɔ yo wɔ kɔŋ bena thambo ba saathɛ ba kiyaŋ.

¹⁸Kɛrɛ mbɔɔyɛ kinthe ka thankaha thakendeŋ thaŋ sa piriŋ.

¹⁹Kɔɔŋ wukahɛ awa beŋ kɔŋ niya kisi.

²⁰“Mɛnɛ beŋ kute ka Yɛrusalɛmi pɛnkando iŋ kurugbani, kɔthɔŋ ba dɔma na kɛ kɔŋ tete teetuwa.

²¹Awa bi ka Yudiya, bi tharɛŋ ka ŋasɛri ŋaŋ. Awa bi kaake ka mɛti baŋ beŋ, bi fuŋɛŋ; awa bi nɛnɛ ka hee ka beŋ, bi bɛiŋ nda duu.

²²Baa, malɔkɔiŋ maŋ maŋ, mɛ kɔŋ niyɔ malɔkɔ ma ka kugbasaŋati ba haliko ba thiŋina hu tepe magbali ma ka Masaala maŋ haŋ.

²³Nkinikiniŋ ba yɛrɛmɛŋ bi iŋ thahɔɔyɛ iŋ bi bɔpɔŋ malɛɛthɛŋ. Wuthoonɛ wunkinikiniŋ wu kɔŋ ŋɔti ka kuyɛkɛŋ koŋ koŋ. Awa kugbasaŋati ku ka Masaala koŋ ku kɔŋ ŋote biya beŋ beŋ.

²⁴Binɔndi ka mateete namɛŋ silanhi bɛ kɔŋ bindɛ kɔɔri. Binɔndi bi kɔŋ diŋa huwaayinɛ ka ŋakuyɛkɛŋ ŋahɛna fooma. Siyani bahɛna ba be kɔthɔ Masaala na bɛ kɔŋ fuŋuŋ ka Yɛrusalɛmi kasara haaŋ nɔŋ, yɔkɔŋ malɔkɔ ma ka siyani bahɛna baŋ maŋ thiŋe.

²⁵“Lamanthoni bi kɔŋ tɔŋinɔkɔ ka kaŋ woŋ iŋ sɛnkɛ woŋ, iŋ ka sosɛŋ beŋ. Siyani baŋ fooma ka dunia baŋ bɛ kɔŋ thɛŋ iŋ payɔ humandiŋ naa mankɔ mathanthɛ maŋ manki poro iŋ thamunkulu thabɛina.

²⁶Biyamɛti bi kɔŋ heŋɔ iŋ hupayɔ naa bindɛ dethiteke ba bɛyiniŋ ba see ka niyɔ ka dunia babunthu baŋ. Baa, sɛmbɛŋ ba ka kuthahinɛ koŋ baŋ bɛ kɔŋ ŋɛna e bɛŋ fuŋuto ka makooye makɛnamɛŋ.

²⁷Mahɛŋ mabɛina Hati ka Wɔ woŋ kɔŋ see. Wundɛ kɔŋ see ka wuruma haŋ iŋ sɛmbɛ mɛnɛ yiki.

²⁸Naa bɛyiniŋ baŋ baŋ bohe niyɔ, dethaŋ ka thinthi; kisi bakendeŋ baŋ thuriye.”

²⁹Kɛna sisiyɛ Yisɔs bindɛ mathɔyande e tɛpa, na “Simɔkɔŋ hɛ kuyeŋ kuthɔma ku dɔma koŋ na fiki iŋ ŋayeŋ ŋahɛna ŋaŋ.

³⁰Naa ŋɛŋ yose nthɔŋ bompa buŋama, beŋ kɔthɛ nda ba dɔma na thamɔ thuriye.

³¹Awa nɛna hɛlɛŋ, naa beŋ kute bɛyiniŋ baŋ baŋ bɛ si niyɔ, beŋ kɔŋ kɔthɔ ba dɔma na Hugbakine hu ka Masaala haŋ thuriye.

³²“Nɔndi yaathi, yaŋ tepe bena, biya bi ka yamana baŋ baŋ beŋ sa niye thanke tuukuwe, bɛyiniŋ baŋ baŋ fooma bɛ kɔŋ thanki niyɔ.

³³Kuthahinɛ koŋ iŋ dunia baŋ mu kɔŋ daŋande, kɛrɛ huseri hukiyaŋ haŋ huŋ sa daŋande.

³⁴“Niyaŋ kuthɛgbɛ ba haliko beŋ be tha thɔŋ haaŋ e beŋ boho pumpuŋ. Baŋ thiiye haaŋ e yilɔ. Baŋ mɛyi ba yaagbani bi ka sii baŋ baŋ beŋ kɛriŋiyɛ thathukuma thakendeŋ thaŋ. Mɛnɛ huŋ kutɛ, malɔkɔ ma ka saa hu ka Hati ka Wɔ woŋ haŋ mɛ kɔŋ bena bohi

³⁵nɔŋ mudikɔŋ. Babiyɛ mɛ kɔŋ see ka biya fooma bi dɔŋɔy ka dunia baŋ beŋ.

³⁶Kɛrɛ lɔkɔ timo tima, yilaŋ e beŋ niya kuraminɛ ba haliko beŋ be kutu sɛmbɛ ba daŋande bɛyiniŋ baŋ baŋ fooma ba see ka niyɔ baŋ wupankɔy bɛyi iŋ ba kɔɔ ka kɔtɔkɔy ka Hati ka Wɔ woŋ.”

³⁷Lɔkɔiŋ baŋ baŋ fooma Yisɔs dunkuŋ bɛŋ ba thaninuwa ka banka bamandiŋ ba ka Masaala baŋ. Naa mahɔnkɔlɛŋ tɛŋ, wundɛ kɔŋ key ka kusɛri ku ka Ɔlifisi e ndɛ kɛndɛ ka hura napii.

³⁸Timo tima kuputhɔ ku kaŋ, biya bi kɔŋ key ka poniyɛ niŋ kuiha ka banka bamandiŋ ba ka Masaala baŋ.