Read West-Central Limba Luku 22 Bible Online

Luku 22 - West-Central Limba bible

Luku 22

¹Wiki wo ka thɔma kutoŋ ku ka iŋ yisithi woŋ koŋ thuriye, malɔkɔ ma bindɛ dɔŋ maŋ, na “Malɔkɔ ma miŋ siyi na puntiyando nde mbembɛŋ ntuŋ beŋ iŋ maleka wo ka tuka haŋ woŋ maŋ ka Iyipiti.”

²Bafodeni bibukuyuwɛ beŋ mɛnɛ karimɔkɔiŋ bi ka Siraŋ baŋ beŋ fooma, bi nde payɔ biya beŋ, huna bindɛ bohe deethuwa gboŋa ba ŋasɔiŋ ba bindɛ kore Yisɔs na.

³Sithani thɔɔyɛ Yudasi na wo dɔma Isakariyɔti, wunthe ka karandeni kɔhi iŋ biye bi ka Yisɔs beŋ.

⁴Kɛna fuŋ Yudasi, wundɛ key gbonkitiyande bafodeni bibukuyɛ beŋ mɛnɛ bayahɛŋ bi dethiteke banka ba ka Masaala baŋ beŋ ba nɔŋ na wundɛ bindɛ niyite Yisɔs na gbɔŋ.

⁵Wuŋ yehe bindɛ haaŋ e bindɛ si bohinande ba niŋ thunkuna kɔbiri.

⁶Yudasi yɛrɔkɔy huŋ. Wundɛ bohe nda deethuwa hɛɛra ba wundɛ dunkune Yisɔs na kɛnamɛŋ naa sa wuŋ biya kothiye.

⁷Malɔkɔ mamayoŋ ma ka wiki wo bindɛ thome kutoŋ ku ka iŋ yisithi woŋ koŋ tɛŋ, ka lɔkɔ ba takɛŋ bi ka thɔma huthɔɔkɔ haŋ beŋ koro baŋ ba fuŋuno saraka.

⁸Yisɔs ŋindi Pita na iŋ Yɔni e tɛpa, na “Kaaŋ e beŋ ka kɔsinɔkɔ thɔma hu siyuwe malɔkɔ ma puntiyando nde siya ntuŋ baŋ maŋ.”

⁹Huna thonthiŋine bindɛ Yisɔs na, na “Kama thimo yi ba miŋ ka kosineke thɔma haŋ haŋ baŋ?”

¹⁰Huna tepe wundɛ bindɛ, na “Naa beŋ kɔ biyande ka mɛti ka, beŋ kɔŋ pɛnkande iŋ hati lamgba wo tutɔkɔy mandi ka ntha. Yemaŋ niŋ ka banka ba wundɛ ka biyande baŋ,

¹¹e beŋ tepe wo biyɛ banka baŋ woŋ, na ‘Karimɔkɔ woŋ tepe, na ba miŋ yina si thɔnthiŋina ka yikiya baŋ ka wundɛ si thome thɔma hu ka mapuntande maŋ haŋ iŋ bakarandeni nama beŋ.’

¹²Awa wundɛ kɔŋ bena toŋine makonko mamandiŋ maŋ maŋ ka thinthi ka banka baŋ, ma kosinoko nda awa ma nda iŋ ntha yo ntha, kɛna beŋ kiye mu niye bɛyi ntuŋ muŋ fooma.”

¹³Kɛna key bakarandeni beŋ, bindɛ key pɛnki bɛyi o bɛyi nanthe nathesi nɔŋ na tepe nthɔŋ bindɛ Yisɔs na. Bindɛ kɔsinɔkɔy kɛndɛ ba thɔma thɔma hu ka malɔkɔ ma puntiyando nde mbembɛŋ namɛŋ beŋ maŋ.

¹⁴Naa tɛŋ wuŋ ba thɔma thɔma hu ka mapuntande maŋ haŋ, Yisɔs dɔŋɔy iŋ baseriŋ nama bithɔɔkɔ beŋ ba thɔma.

¹⁵Huna tepe Yisɔs, na “Yaŋ kɔŋ nɔŋ nda kufiyo wumandiŋ ba thɔma thɔma haŋ haŋ baŋ iŋ beŋ saanuŋ yaŋ kɔ niyo nambara.

¹⁶Awa yaŋ tepe bena, yaŋ sa nɔŋ nda thɔŋ thɔma haŋ haŋ baŋ iŋ beŋ, yɔkɔŋ nɔŋ nda huŋ toŋino kolo nama baŋ gbeeŋ ka Hugbakine hu ka Masaala haŋ.”

¹⁷Awa Yisɔs sekithe kɔɔpu haŋ e thiya Masaala na maamo, e tɛpa, na “Sɛkithaŋ kɔɔpu haŋ haŋ e beŋ huŋ hanande.

¹⁸There nda ka malɔkɔ mahɛ maŋ, yaŋ sa nɔŋ nda thiiye mampa maŋ maŋ baŋ yɔkɔŋ nɔŋ nda Hugbakine hu ka Masaala haŋ tɛŋ.”

¹⁹Awa wundɛ sekithe hɛlɛŋ kutoŋ koŋ e thiya Masaala na maamo, e kuŋ thinkinande e bindɛ kuŋ dunkune e tɛpa, na “Wuŋ, kɔtɔ niŋ koŋ kuna, ku dunkuŋ yaŋ koŋ ba beŋ. Niyaŋ wuŋ ba yama kɔ siyuwe.”

²⁰Ka gboŋa banthe babɛina hɛlɛŋ, naa thanki bindɛ thɔma, wundɛ dunkune bindɛ kɔɔpu haŋ, e tɛpa, na “Kɔɔpu haŋ haŋ mayuku maŋama ma ka Masaala maŋ mɛna, ma kahitino wasi bakiyaŋ baŋ, ba toŋe yaŋ baŋ ba beŋ.

²¹“Kɛrɛ dethaŋ, wo yama ni gbɔŋ woŋ, ndɛ doŋeŋ iŋ yaŋ ka thɔma haŋ dondo.

²²Baa, Hati ka Wɔ woŋ kɔŋ kaaye nɔŋ na tepe nde Masaala na, na nɛŋ ma kaaye. Kɛrɛ nambara bɛ kɔŋ see ka hati lamgba wo ni niŋ gbɔŋ woŋ ka hadeni nama beŋ!”

²³Kɛna bohe bindɛ thɔnthiŋinuwande ba wo dɛɛnkɛ ba niya wali baŋ baŋ woŋ.

²⁴Kuyuŋande see hɛlɛŋ ŋɔti ka mateete ma ka bakarandeni beŋ ba wo si niyɔ bayaha woŋ nthɔŋ nda fooma.

²⁵Huna tepe Yisɔs kɛnamɛŋ, na “Gbakuiŋ bi ka siyani bahɛna baŋ beŋ bi kɔŋ tɔŋɔŋ sɛmbɛ ka bi bindɛ ka pothi beŋ, awa bakɛrɛni beŋ bi kɔŋ thunda keŋ, na ‘Bamaseŋ biya.’

²⁶Kɛrɛ beŋ, wuŋ ka ba nɛŋ niyɔ, wo bayaha woŋ kɔŋ ba simɔkɔ yɛthɛ nama nɔŋ wothahuwɔy woŋ nthɔŋ nda fooma, awa wo bakɔtɔkɔ woŋ, wundɛ kɔŋ ba niyɔ nɔŋ bawali.

²⁷Nkaana yamɛ bukuya, wo dɔŋɔy ka thɔma haŋ woŋ ndo, iŋ wo sisi muthɔma muŋ woŋ? E wo dɔŋɔy ka thɔma haŋ woŋ kutɛ? Kɛrɛ detha hɛ, yaŋ kɔŋ ka mateete makendeŋ nɔŋ basisi muthɔma.

²⁸“Beŋ, bena pɛyɛ ka kuwaŋ kukiyaŋ ka malɔkɔ ma yaŋ ka gberiŋinuwo haŋ maŋ.

²⁹Nɔŋ na dunkune nthɔŋ yama Fandaŋ woŋ mayoho ba kɛriŋa na, nɛna hɛlɛŋ yaŋ bena dunkune mayoho ba kɛriŋa.

³⁰Ka lɔkɔ babɛina beŋ kɔŋ niyɔ iŋ mayoho ba thɔma e thiiye ka tha banthe iŋ yaŋ ka Hugbakine hukiyaŋ haŋ, awa beŋ kɔŋ dɛŋa ka thayensi ba kɛriŋiyɛ bɔnsɔni kɔhi iŋ baye ba ka biIsirɛli beŋ baŋ.

³¹“Saimɔŋ, Saimɔŋ, pona kuiha! Sithani dunkuno mayoho iŋ Masaala ba bena gbɛriŋinuwa fooma, ba haliko ba hakinande biyɔhɔy beŋ iŋ binɛnɔy beŋ, nɔŋ na bamahi woŋ hakinande paka baŋ na iŋ ŋawoy ŋaŋ.

³²Kɛrɛ yaŋ thanki yina niyiyɛ kuraminɛ Saimɔŋ, ba haliko lanɛya bakɛnda baŋ ba be tha thamɔ. Awa naa yi sikiyɔkɔy hɛlɛŋ kiyaŋ, kahina mbɛnda thathukuma.”

³³Huna tepe Pita, na “Mariki, yando kɔsinɔkɔy ba thiyo iŋ yi ka yeeli. Hali hintiŋ na ba tuka iŋ yi, yando kɔsinɔkɔy!”

³⁴Huna tepe Yisɔs, na “Pita, koki woŋ sa niye kokire huyɛ bahɛ baŋ, yi kɔŋ yama buuhu dɔŋɔ kataati ba dɔma na yi kɔyta yama.”

³⁵Huna tepe Yisɔs bakarandeni nama beŋ, na “Naa ŋindi nde yaŋ bena beŋ tha thiiti ka gbooti, maa pontho, maa dagbalɛŋ, e beŋ panke nde ntha yo ntha?” Bindɛ tepe, na “Ade.”

³⁶“Kɛrɛ ka tete, wɔ yo wɔ wo iŋ kɔbiri maa pontho, diŋɛŋ muŋ ka kaa. Wɔ yo wɔ wo ka iŋ silanhi, wundɛ niyɛŋ kuhɔli nama gbɔŋ, e wundɛ boya silanhi banthe.

³⁷Yaŋ tepe bena, magbali ma tɛpɛ maŋ ba dɔma, na ‘Wundɛ kɔnditando iŋ bahakɛŋ beŋ’ tɛŋ ka niyɔ nɔndi kiyaŋ, baa ba thankɛ gbalo baŋ ba yaŋ baŋ thanki thuriye.”

³⁸Huna tepe bakarandeni nama beŋ, na “Mariki, detha, ya dondo silanhiŋ baye.” Yisɔs tepe bindɛ, na “Atɛŋ.”

³⁹Kɛna fuŋ wundɛ. Wundɛ key ka kusɛri ku ka Ɔlifisi nɔŋ na bare nde ndɛ na, awa bakarandeni beŋ yeme niŋ.

⁴⁰Awa naa tɛŋ wundɛ ka tha ka bɛina, wundɛ tepe bakarandeni nama beŋ, na “Niyaŋ kuraminɛ haliko beŋ be tha ŋɔti ka mathiiko.”

⁴¹Kɛna yɔsɔkɔy wundɛ wuyete. Wundɛ kunthuŋe e niya kuraminɛ, e tɛpa,

⁴²na “Fandaŋ, mɛnɛ mamɛyi makɛnda mɛna, gbɔnina kɔɔpu hu ka thɔrɔ haŋ haŋ kuwaŋ kukiyaŋ. Kɛrɛ wu bɛiŋ niyɔ ka mamɛyi makiyaŋ nde, kɛrɛ bɛyi yo bɛyi ba thimo yi bɛ be niyɔ, ba niyɔyŋ.”

⁴³Kɛna see niŋ maleka tɔŋinɔkɔ ŋaye ka ariana, e wundɛ niŋ si kahina thukuma.

⁴⁴Thukuma nama haŋ see ni thɔrɔ. Kɛna ni wundɛ kuraminɛ wukahɛ-kahɛ haaŋ mamuheyani nama maŋ thonda nɔŋ wasi bɛna thondi ka kuyɛkɛŋ koŋ.

⁴⁵Naa ŋaye wundɛ ka kuraminɛ koŋ, wundɛ penke bindɛ bi si nine, baa bindɛ niyɔy nkinikiniŋ wumandiŋ.

⁴⁶Huna thonthiŋine ndɛ bindɛ, na “Mbɛ ba beŋ niniye? Ŋayeŋ e beŋ niya kuraminɛ haliko beŋ be tha thɔɔ ka mathiiko.”

⁴⁷Naa wundɛ ka gbonkiya haŋ, kɛna tɛŋ sɛthɛ. Wɔ wunthe wo dɔma na Yudasi, wunthe ka bakarandeni kɔhi iŋ biye bi ka Yisɔs beŋ, kɔtiyɔkɔy bindɛ. Kɛna see wundɛ Yudasi niŋ thuriye ba niŋ si dɔɔkɔ.

⁴⁸Huna tepe Yisɔs, na “Yudasi, e yi aniye Hati ka Wɔ woŋ gbɔŋ ka dɔɔkɔ?”

⁴⁹Naa kute bakarandeni beŋ ba see ka niyɔ baŋ, bindɛ thɔnthɔŋɔŋ, na “Mariki, e miŋ yuwa iŋ silanhiŋ baŋ?”

⁵⁰Wunthe ka bindɛ gbari kuiha kuthome ku ka bawali wo ka Bafode Womandiŋ woŋ koŋ.

⁵¹Kɛrɛ Yisɔs tepe, na “Pɛyaŋ, baŋ nda wuŋ ni!” Kɛna boheke wundɛ kuiha ku ka bawali woŋ koŋ e kuŋ pethina.

⁵²Huna tepe Yisɔs bafodeni bibukuyuwɛ beŋ iŋ bidethiteke banka bamandiŋ ba ka Masaala baŋ beŋ iŋ bakalani bibayahɛŋ beŋ fooma bi sɛɛ ba niŋ saa ka bɔha beŋ, na “E beŋ asee iŋ silanhiŋ mɛnɛ ŋagbemgbe ba yama saa ka bɔha nɔŋ batuwaŋ?

⁵³Naa nɔŋ yaŋ iŋ beŋ timo tima ka banka bamandiŋ ba ka Masaala baŋ, beŋ tha yama boheke. Kɛrɛ malɔkɔ maŋ mɛna tɛŋɛ ba beŋ, iŋ wo iŋ sɛmbɛ ba ka huntuma haŋ baŋ woŋ ba niya wali.”

⁵⁴Kɛna ni bindɛ yamari ba ndɛ be bɔha e kata niŋ. Naa bindɛ niŋ kati ka banka ba ka Bafode Womandiŋ woŋ baŋ, Pita yemeŋ kahɛŋ wuthokiye.

⁵⁵Buu ŋindo kɛndɛ ka gbada hu ka banka ba ka Bafode Womandiŋ woŋ haŋ mateete ba poyi. Pita thuriye ka poyi haŋ.

⁵⁶Kɛna kute niŋ bawali woyɛrɛmɛ wo ka Bafode Womandiŋ woŋ naa doŋe wundɛ ka buu buŋ kuwaŋ. Kɛna dethe wundɛ niŋ natiŋ, e tɛpa, na “Hati lamgba woŋ baŋ, ndɛ kɔŋ nɔŋ iŋ Yisɔs.”

⁵⁷Kɛrɛ Pita thanthiye, e tɛpa, na “Hatiŋ woŋ, yaŋ kɔyta niŋ.”

⁵⁸Wuŋ tha hɛlɛŋ nambi hati lamgba wohɛna kute hɛlɛŋ niŋ. Wundɛ tepe hɛlɛŋ, na “Yi, yi kɔŋ wunthe wo ka bindɛ.” Huna tepe hɛlɛŋ Pita, na “Hatiŋ woŋ, yaŋ ka wunthe wo ka bindɛ.”

⁵⁹Naa daŋande wuŋ bɛrɛ ba wakathi wunthe wɔ hɛna see hɛlɛŋ gbonkoy wukahɛ, e tɛpa, na “Yaathi hati lamgba woŋ, kɔnsɔŋ ndo ka, ndɛ kɔŋ nɔŋ iŋ Yisɔs, baa wɔ ka Kalili na woŋ.”

⁶⁰Kɛrɛ Pita tepe, na “Wɛiŋ woŋ, yaŋ kɔyta hu yi dunkunɔkɔy haŋ.” Ka wuthurɔy wubɛina naa wundɛ dunkunɔkɔy, koki woŋ kokori.

⁶¹Kɛna sikiyɔkɔy Mariki woŋ e detha Pita na. Pita siyi thampa tha ka Mariki woŋ thaŋ ba dɔma, na “Saanuŋ koki woŋ ba kokira hɛ, yi kɔŋ yama buuhu dɔŋɔ kataati.”

⁶²Kɛna fuŋ Pita. Wundɛ bereŋ wuthoonɛ-thoonɛ.

⁶³Lamgbeŋ bi bɔhɛ Yisɔs na beŋ bohe hɛtha niŋ e bindɛ niŋ kɔ thorinuwa.

⁶⁴Bindɛ yuku niŋ thaaya, e tɛpa, na “Awa, banabi, hina hɛ wo thorinɛ yina woŋ!”

⁶⁵Kɛna gbonkoy bindɛ bɛyiniŋ bahɛna banɛnɔy babɔyɛ ma sɔkinɔkɔ Yisɔs na.

⁶⁶Naa puthɔy kaŋ woŋ, Kaama wo ka bakalani bibayahɛŋ bi ka biYusu beŋ woŋ fooma thuŋande ka tha banthe, thiyitaŋ bafodeni bibukuyuwɛ beŋ mɛnɛ karimɔkɔiŋ bi ka Siraŋ baŋ beŋ. Kɛna kato Yisɔs ka Kaama namɛŋ woŋ, e bindɛ tɛpa, na

⁶⁷“Mɛnɛ yina Banikisi wo niyo nde lahiri, tepe mina.” Kɛrɛ Yisɔs tepe bindɛ, na “Mɛnɛ yaŋ tepe bena, beŋ sa yama ni kulanɛya.

⁶⁸Awa mɛnɛ yaŋ thɔnthɔŋɔŋ bena, beŋ sa yama ni yaabi.

⁶⁹Kɛrɛ there nda ka lɔkɔ bahɛ baŋ, Hati ka Wɔ woŋ kɔŋ dɔŋɔ ka yɔnkɔ huthome hu ka Masaala wo iŋ sɛmbɛ woŋ haŋ.”

⁷⁰Huna thonthiŋine bindɛ, na “E huna yina nda Hati ka Masaala woŋ?” Huna tepe Yisɔs, na “Na tepe nda nɛŋ beŋ.”

⁷¹Huna tepe bindɛ, na “Mbɛ nda maseri ma nda miŋ deethi? Miŋ fooma yuyɔkɔy nda ŋaye ka hothi hukɛnama!”