Read West-Central Limba Luku 24 Bible Online

Luku 24 - West-Central Limba bible

Luku 24

¹Ka Sɔnde kuputhɔ ku kaŋ, yɛrɛmɛŋ beŋ beŋ key ka yoma haŋ ba kata mayɔ mathimɔy huru ma thanki bindɛ kɔsinɔkɔ maŋ.

²Naa tɛŋ bindɛ kɛndɛ, bindɛ penke raka haŋ hu binkilinɔy ŋaye ka biyo hu ka yoma haŋ.

³Kɛrɛ naa biyande bindɛ, bindɛ tha kutu kubeli ku ka Yisɔs koŋ.

⁴Naa kooye bindɛ e bindɛ kɔ niya kukabanɛ ba bɛyiniŋ baŋ baŋ, kumaŋ, lamgbeŋ biye bi kooyeŋ kɛndɛ kuwaŋ bi iŋ muthɔɔ mumaleke.

⁵Na thooyo bindɛ payɔ e bindɛ sinkina thaaya ka pothi, biya bibiye beŋ beŋ tepe bindɛ, na “Mbɛ ba beŋ deethuwe wopethɔy woŋ ka mateete ma ka bitukɛ beŋ?

⁶Wundɛ ka dondo. Wundɛ ŋaye ka tuka haŋ. Siyuwaŋ hu tepe nde ndɛ bena haŋ naa nde ndɛ iŋ beŋ ka Kalili,

⁷ba dɔma na yɔkɔŋ Hati ka Wɔ woŋ dunkuno ka thɛnkɔ tha ka bahakɛŋ, e yanto ka kuyeŋ kubariŋande koŋ, awa e ŋayi ka tuka haŋ ka gbɛɛŋ bataati baŋ.”

⁸Kɛna simɔkɔy bindɛ thampɛŋ tha ka Yisɔs thaŋ.

⁹Awa naa bindɛ duu ŋaye ka yoma haŋ, bindɛ key kaŋ tɛɛpuwa bɛyiniŋ baŋ baŋ fooma ka bakarandeni kɔhi iŋ wunthe beŋ iŋ ka biya bihɛna beŋ.

¹⁰Mariyama wo ka Makadala, Yoana, iŋ Mariyama nanda ka Yemisi, mɛnɛ nda yɛrɛmɛŋ bihɛna bi nde iŋ bindɛ beŋ, bindɛ bina key tepe baseriŋ bithɔɔkɔ beŋ bɛyiniŋ baŋ baŋ.

¹¹Kɛrɛ bindɛ kute huseri haŋ haŋ nɔŋ sɛkɛlɛ bɛna, awa bindɛ tha huŋ ni kulanɛya hali.

¹²Kɛrɛ Pita ŋayinɔkɔy; wundɛ key kaŋ thara ka yoma ka. Naa putɔy wundɛ e detha kaake, wundɛ kute thika bahuhɛ baŋ ba ŋoye kuwaŋ. Wundɛ duu kaŋ niya kukabanɛ kumandiŋ ba ba thankɛ niyɔ baŋ.

¹³Ka lɔkɔ banthe babɛina, bakarandeni biye bi ka Yisɔs bi kɔŋ nde key ka mɛti ba ka Imeyɔsi, wu bɛrɛ ba ŋaragba ŋasɔŋ-ŋaye ŋaye ka Yɛrusalɛmi.

¹⁴Bindɛ kɔ kaa kaŋ gbonkiya ba bɛyiniŋ ba thankɛ niyɔ baŋ.

¹⁵Naa bindɛ key kaŋ gbonkiya e bindɛ kɔ kaa kaŋ gbakila, Yisɔs see bindɛ thɔɔtɔ ka kubiyasi koŋ e bindɛ kɔ kaa ka nanthe.

¹⁶Bindɛ kute niŋ kɛrɛ bindɛ tha niŋ ŋee.

¹⁷Huna thonthiŋine bindɛ Yisɔs, na “Mbɛ ba beŋ key kaŋ gbonkiya?” Kɛna kɔɔyɛ hintiŋ bindɛ biŋurɛ.

¹⁸Wunthe ka bindɛ wo dɔma na Kiyopasi thɔnthɔŋɔŋ niŋ, na “E yi wuntheŋ nape ka thahinɛŋ bi sɛɛ ka Yɛrusalɛmi beŋ fooma, yina tha kɔthɔ bɛyiniŋ ba thankɛ daŋande ka mandɛni maŋ maŋ baŋ?”

¹⁹Huna thonthiŋine bindɛ Yisɔs, na “Mbɛ bɛyiniŋ ba niyɔy?” Huna tepe bindɛ, na “Bɛyiniŋ ba niyɔy ka Yisɔs wo ka Nasarɛthi woŋ, wo simoko woŋ iŋ Masaala mɛnɛ biyamɛti ba wundɛ niyɔ banabi womandiŋ ka bɛyiniŋ ba wundɛ ni iŋ ba wundɛ dunkunɔkɔy,

²⁰iŋ na bohe niŋ bafodeni bibukuyuwɛ beŋ iŋ bayahɛŋ ntuŋ beŋ e dunkuna niŋ mathonko ba ndɛ be kɔra, awa e yanto ka kuyeŋ kubariŋande koŋ.

²¹Kɛrɛ miŋ tuteŋ nɔŋ yima na ndɛ na si bakaŋ biIsirɛli beŋ. Mahɛŋ mabɛina gbɛɛŋ bataati baŋ bɛna nda baŋ baŋ kabi naa niyɔy wuŋ.

²²Yɛrɛmɛŋ binɔndi ka mateete makɛntuŋ bi kaayɛ ka yoma ka kuputhɔ ku kaŋ koŋ beŋ tepe hɛlɛŋ mina bɛyi bathakaba,

²³na bindɛ tha pɛnki kubeli koŋ. Huna see bindɛ e si tɛpa na bindɛ kute malekɛŋ ka maniyɔ mathɔɔkɔ, bi tepe bindɛ ba dɔma na Yisɔs kɔŋ wopethɔy.

²⁴Mindo binɔndi key ka yoma ka e miŋ ka pɛnka nanthe nathesi na tepe yɛrɛmɛŋ beŋ na, kɛrɛ bindɛ tha kutu Yisɔs na.”

²⁵Huna tepe Yisɔs kɛnamɛŋ, na “O beŋ, bendo biya bithɔkɔy beŋ beŋ, e beŋ hɛlɛŋ niyɔ bendo kahɛ ba niya kulanɛya bɛyiniŋ fooma ba gbonkoy banabiŋ beŋ baŋ.

²⁶E wuŋ tha nde nda thanki deenko ba Banikisi woŋ ba niyo thɔrɔ, e wundɛ nɛnɛ biyande ka yiki nama baŋ?”

²⁷Awa there ka magbali ma ka Musa maŋ haaŋ saaŋ ka ma ka banabiŋ beŋ maŋ, Yisɔs methine bindɛ nagberekethe ba tepo nde ba wundɛ baŋ fooma ka magbali ma ka Masaala maŋ.

²⁸Naa thuriye bindɛ mɛti ba nde bindɛ key baŋ, Yisɔs ni nɔŋ ka wundɛ key ka kɔtɔkɔy.

²⁹Kɛrɛ bindɛ yikɔŋ niŋ ba wundɛ be hintiŋ niyɔ iŋ bindɛ, baa gbɛɛŋ woŋ yole nda kaa e huntuma nda kɔ saa. Kɛna key wundɛ niyɔ iŋ bindɛ.

³⁰Naa dɔŋɔy bindɛ ka thɔma haŋ, wundɛ sekithe kutoŋ koŋ e thiyɛ kuŋ thaduba, e thinkinuwande kuŋ e dunkune bindɛ kuŋ.

³¹Kɛna pɛthɔy ntiŋ thaaya namɛŋ thaŋ. Bindɛ ŋee ntiŋ Yisɔs na, kɛrɛ wundɛ piriŋɔkɔy ka mateete makɛnamɛŋ.

³²Kɛna bohe bindɛ gbonkiya, na “E thathukuma thakɛntuŋ thaŋ tha hɛ thɛnɛŋ iŋ mayehitɔkɔ naa hɛ ndɛ mina gbonkitiyande ka gboŋa hɛ, naa hɛ ndɛ mina methine magbali ma ka Masaala maŋ?”

³³Kɛna ŋaye bindɛ kɔɔ hanthe e duwa ka Yɛrusalɛmi. Kɛna pɛnke bindɛ baseriŋ bithɔɔkɔ bikɔhi iŋ wunthe beŋ bi kɔmandeŋ ka tha banthe iŋ biya bihɛna.

³⁴Biya beŋ beŋ tepe bindɛ, na “Mariki woŋ ŋaye yaathi, awa wundɛ thanki nda tɔŋinɔkɔ ka Saimɔŋ!”

³⁵Kɛna tɛŋɛni ntiŋ bakarandeni biye beŋ nagberekethe ba niyɔy bindɛ ka gboŋa ka baŋ, iŋ nɔŋ na ŋeeye bindɛ Yisɔs na naa thinkiniyande wundɛ bindɛ kutoŋ koŋ ka thɔma haŋ.

³⁶Naa bindɛ gbonkoy bɛyiniŋ baŋ baŋ, ka wuthurɔy wubɛina, Yisɔs kɔɔyɛ ka mateete namɛŋ e tɛpa, na “Haliko mathɛbɛ ma niyɔ iŋ beŋ.”

³⁷Kɛna thunɔkɔy bindɛ iŋ payɔ humandiŋ. Bindɛ siyi ba dɔma na kuyimɛy na kute bindɛ.

³⁸Huna tepe Yisɔs, na “Mbɛ ba beŋ niyeke thɔrɔ? Mbɛ ba beŋ niyeke kɔnthɔhili ka thathukuma thakendeŋ?

³⁹Dethaŋ hɛ thɛnkɔ niŋ thaŋ iŋ ŋathaki niŋ ŋaŋ, haliko beŋ be ni lanɛya ba dɔma na yama yaathi. Bohekeŋ hɛ yama e detha, baa kuyimɛy ka iŋ kɔtɔ iŋ bathoy nɔŋ na kute beŋ yama na.”

⁴⁰Naa thanki wundɛ gbonkiya nanaŋ, wundɛ toŋine bindɛ thɛnkɔ nama thaŋ iŋ ŋathaki nama ŋaŋ.

⁴¹Naa yuye bindɛ huseri haŋ haŋ, bindɛ see thiŋ iŋ mayehitɔkɔ haaŋ bindɛ tha nda kɔthɔ na bindɛ huŋ niye lanɛya. Huna thonthiŋine wundɛ bindɛ, na “E beŋ kɔŋ iŋ muthɔma?”

⁴²Kɛna dunkune bindɛ Yisɔs na he woponɔy.

⁴³Wundɛ sekithe niŋ e thɔma niŋ ka thaaya ka bakarandeni beŋ fooma.

⁴⁴Huna tepe wundɛ bindɛ, na “Bɛyiniŋ baŋ baŋ bɛna gbonkitiyande nde yaŋ bena baŋ naa nde hintiŋ yaŋ iŋ beŋ, ba dɔma na bɛyi yo bɛyi ba thankɛ nde gbalo ba yaŋ ka Siraŋ ba ka Musa baŋ, iŋ banabiŋ beŋ, iŋ ka Ŋaiŋa ŋaŋ na, ba boheŋ ba niyɔ nɔŋ na tepe bindɛ na.”

⁴⁵Kɛna ni wundɛ ba bindɛ metho magbali ma ka Masaala maŋ.

⁴⁶Awa wundɛ key ka kɔtɔkɔy kaŋ tepe bindɛ ba dɔma, na “Haŋ haŋ huŋ gbalo nde nda, na Banikisi wo niyo nde lahiri woŋ iŋ Masaala kɔŋ niya thɔrɔ, ka gbɛɛŋ bataati baŋ ndɛ kɔŋ ŋayina ka tuka haŋ.

⁴⁷Awa ka keŋ kukɛnama koŋ kɛna bohe maseri ma ka sikiyɔkɔ ŋaye ka hakɛŋ mɛnɛ ba peniyo hakɛŋ ba niyo kɛwandi ka siyani baŋ fooma there nthɔŋ nda ka Yɛrusalɛmi.

⁴⁸Beŋ, bena maseri ma ka bɛyiniŋ baŋ baŋ.

⁴⁹Awa yaŋ, yaŋ kɔŋ bena tɔŋɔti wu dome nde Masaala ba bena tɔŋita wuŋ. Kɛrɛ yumbaŋ ka Yɛrusalɛmi haaŋ e beŋ thiyo sɛmbɛ baŋ maŋaye ka thinthi.”

⁵⁰Naa peyete wundɛ bakarandeni beŋ haaŋ ka mɛti ba ka Bɛthani, wundɛ yentheŋeŋ thɛnkɔ nama thaŋ e bindɛ thiyiyɛ thaduba.

⁵¹Naa wundɛ bindɛ thiyiyɛ thaduba, kɛna piriŋe wundɛ mateete namɛŋ; wundɛ ŋatito ka ariana.

⁵²Kɛna ni bindɛ niŋ kubatho e duwa ka Yɛrusalɛmi iŋ mayehitɔkɔ mamandiŋ.

⁵³Bindɛ niyɔy ka banka bamandiŋ ba ka Masaala baŋ timo tima ka thunkunuwa niŋ.