Read West-Central Limba Luku 3 Bible Online

Luku 3 - West-Central Limba bible

Luku 3

¹Thampa tha ka Masaala thaŋ see ka Yɔni, hati ka Sɛkaraiya, naa nde ndɛ ka wula baŋ, ka nina hukɔhi iŋ thasɔhi ka makɛrɛŋ ma ka Gbaku Womandiŋ wo ka biRomaŋ beŋ woŋ Taibiriyɔsi, ka yamana ba ka Pɔntiyɔsi Pailɛti ka kuyɛkɛŋ ku ka Yudiya. Hɛrɔdi niyɔ bakɛrɛŋ wo ka Kalili, e wɛndama Filipi niyɔ bakɛrɛŋ wo ka bompi wo ka Ituriya iŋ ka Tirakɔnaitisi, e Laiseniyasi niyɔ bakɛrɛŋ wo ka Abilini. Ka lɔkɔ babɛina Anasi iŋ Keyafasi niyɔ bafodeni bimandiŋ beŋ.

³Yɔni fuŋ ba kaande fooma bompi wo ka mankɔ ma ka Yɔdaŋ, e kaa kaŋ niya kɛwandi ba dɔma, na “Sikinaŋ sɔkɔrɔ hakɛŋ bikendeŋ, e beŋ biyo biye hu ka Masaala haŋ, awa Masaala kɔŋ bena pɛniyɛ hakɛŋ bikendeŋ.”

⁴Wuŋ, wuŋ niyɔy nɔŋ na gbale nde banabi woŋ Aisaya ka buku nama woŋ na: na “Wɔ wunthe kɔŋ yɛli thampa ka wula baŋ ba dɔma: na ‘Kɔsinɔkɔŋ gboŋa ba ka Mariki woŋ baŋ, awa thumbunwaŋ bɛŋ natoloŋ ba wundɛ ba kaandiyande!

⁵Madumgbu yo madumgbu yɔkɔŋ mɛ be thiŋina, kusɛri yo kusɛri yɔkɔŋ ku be mɛlimɛlina. Gboŋɛŋ basikuwɔy baŋ yɔkɔŋ bɛ be thumbunuwa, gboŋɛŋ bayokoli-yokoli baŋ yɔkɔŋ bɛ be mɛlimɛlina.

⁶Biyamɛti fooma bi kɔŋ kutiyɔkɔ na Masaala niye kisi!’”

⁷Huna tepe Yɔni biya beŋ fooma bi sɛɛ ba si biyo biye hu ka Masaala haŋ beŋ, na “Beŋ, bendo bɔnsɔŋ ba ka wɔthɔiŋ! Nkaana yelɛ bena ba kita kugbasaŋati ku ka Masaala koŋ, ku wundɛ ba bena niya koŋ?

⁸Niyaŋ bɛyiniŋ ba tɔŋɔŋ ba dɔma na beŋ sikiyɔkɔy ŋaye ka hakɛŋ bikendeŋ. Baŋ thɛrɛŋ ba kathiŋɔkɔ ba dɔma, na ‘Miŋ kɔŋ mpati bi ka Ebrahim.’ Yaŋ tepe bena, Masaala punkeŋ sɛkitha tharaka thaŋ thaŋ e wundɛ thɛŋ sikinande mpati bi ka Ebrahim.

⁹Hali ka tete kubapi koŋ deŋo nda ka nthanthɛŋ ki ka ŋayeŋ ŋaŋ kɔŋ, kuyeŋ ndo kuyeŋ ku sa tiŋ mutiŋ muyɔhɔy ku kɔŋ muka e kuŋ yelo ka buu buŋ.”

¹⁰Huna thonthiŋine niŋ biya beŋ, na “Mbɛ ba ntiŋ nda miŋ ni?”

¹¹Wundɛ tepe bindɛ, na “Wɔ yo wɔ wo iŋ yabɛŋ baye, wundɛ kɔŋ ba dunkuna banthe ka wɔ ka hɛ iŋ banthe woŋ. Wɔ yo wɔ wo iŋ muthɔma, wundɛ kɔŋ ba hanande iŋ wo ka iŋ woŋ.”

¹²Bathuuni duthu woŋ beŋ see ba si biyo biye hu ka Mariki woŋ haŋ. Bindɛ thɔnthɔŋɔŋ niŋ, na “Karimɔkɔ, mbɛ ba nda miŋ ni?”

¹³Wundɛ tepe bindɛ, na “Baŋ bohoti wɔ wuyamɛ ba si domo beŋ ba niŋ bohita.”

¹⁴Kurugbani binɔndi beŋ see hɛlɛŋ niŋ thɔnthɔŋɔŋ, na “Mbu miŋ? Mbɛ ba nda miŋ ni?” Huna tepe wundɛ bindɛ, na “Baŋ kanati wɔ ntha yo ntha ka kansuŋ, maa ba kɛrɛŋiyɛ wɔ hothi. Kuthunkuŋ kukendeŋ ku tɛŋɛŋ bena.”

¹⁵Masimɔkɔ ma ka biya beŋ bohe ŋayi; bindɛ thɛrɛŋ thɔnthiŋinɔkɔ ba saathɛ ba Yɔni, ba thampo wundɛ na Banikisi wo niyo nde lahiri woŋ.

¹⁶Yɔni tepe bindɛ fooma, na “Yaŋ kɔŋ bena biye iŋ mandi, kɛrɛ hiŋ wɔ wo see wo yamɛ bukuya ba yaŋ. Yaŋ teŋeta hintiŋ ba pɛɛka nkalɛŋ ki ka dagbalɛŋ nama baŋ kɔŋ. Wundɛ wobɛina kɔŋ bena si biiye Yina wo ka Masaala woŋ mɛnɛ buu.

¹⁷Wundɛ boheŋ kubonka koŋ ka yɔnkɔ nama haŋ, ba hukuwa gbethe nama baŋ. Wundɛ kɔŋ kɔsɔŋ paka baŋ ka kuhunkuŋ nama koŋ, e sɛkitha ŋawoy ŋaŋ, e ŋɛŋ yɛla ka buu bu sa dɔmɔ buŋ.”

¹⁸Yɔni ni kɛwandi Huseri Huyɔhɔy haŋ ka biya beŋ ka gboŋɛŋ bahakuwande, e niya bindɛ ŋathɔnthɔ ba bi be thikipi maniyɔ makɛnamɛŋ maŋ.

¹⁹Kɛrɛ Yɔni tepiyeke gbaku woŋ Hɛrɔdi na, ba na kane wundɛ Hɛrɔdiyasi na, wɔtɔ wo ka wɛndama woŋ nde, awa e niya hɛlɛŋ bɛyiniŋ babɔyɛ banɛnɔy bahɛna.

²⁰Bɛna manke ntiŋ Hɛrɔdi niya ba yamɛ nɛnɔ baŋ nthɔŋ nda, ba thiya Yɔni na ka yeeli woŋ.

²¹Naa thanki biya beŋ fooma biyo biye hu ka Masaala haŋ, Yisɔs hɛlɛŋ nɛnɛ ndɛ biyo. Naa Yisɔs ni kuraminɛ, ka ariana pɛthɔy.

²²Kɛna thuhe Yina wo ka Masaala woŋ ka mathɔyande ma kurotho, awa thampa fuŋ ŋaye ka ariana, na “Yina hati wokiyaŋ wowathe wo thimo yaŋ woŋ. Yi yeheŋ yama thukuma.”

²³Naa sɛsi Yisɔs wali nama baŋ, wundɛ kɔŋ nde nda bɛrɛ ba thanina kɔnthɔ-kataati. Wundɛ kɔŋ nde hati wathe wo ka Yusufu, ka nɔŋ na simeke biya beŋ na. Yusufu na nde hati ka Hilay,

²⁴hati ka Mathati, hati ka Libay, hati ka Mɛlɛkay, hati ka Yanay, hati ka Yusufu,

²⁵hati ka Matathaiasi, hati ka Emɔsi, hati ka Nehɔmi, hati ka Ɛsalay, hati ka Nekay,

²⁶hati ka Maathi, hati ka Matathaiasi, hati ka Sɛmaiŋ, hati ka Yosɛki, hati ka Yoda,

²⁷hati ka Yoanaŋ, hati ka Risa, hati ka Sɛrubabɛli, hati ka Sialitɛli, hati ka Niray,

²⁸hati ka Mɛlɛkay, hati ka Aday, hati ka Kosami, hati ka Ɛlɛmadami, hati ka Eri,

²⁹hati ka Yasuwa, hati ka Ɛliesa, hati ka Yorimi, hati ka Mathati, hati ka Libay,

³⁰hati ka Simiɔŋ, hati ka Yuda, hati ka Yusufu, hati ka Yonami, hati ka Ɛliakimi,

³¹hati ka Milia, hati ka Mɛna, hati ka Matatha, hati ka Nethaŋ, hati ka Dauda,

³²hati ka Yɛsi, hati ka Obɛdi, hati ka Boasi, hati ka Salamoŋ, hati ka Nasoŋ,

³³hati ka Aminadabi, hati ka Adimiŋ, hati ka Arini, hati ka Hɛsirɔŋ, hati ka Pirɛsi, hati ka Yuda,

³⁴hati ka Yakuba, hati ka Aisaki, hati ka Ebrahim, hati ka Tira, hati ka Nehɔ,

³⁵hati ka Sɛruku, hati ka Riyu, hati ka Pilɛki, hati ka Iba, hati ka Sila,

³⁶hati ka Kenaŋ, hati ka Arafasadi, hati ka Sɛmi, hati ka Nowa, hati ka Lemɛki,

³⁷hati ka Mɛthusɛla, hati ka Inɔki, hati ka Yerɛdi, hati ka Mahelalili, hati ka Kenaŋ,

³⁸hati ka Inɔsi, hati ka Sɛthi, hati ka Mbemba Adama, hati ka Masaala.